1. Inki ntangu Bakristu yonso yina bo me tulaka mafuta ta vanda na zulu?

 BAMVULA mingi me luta, bansadi ya Yehowa vandaka kudiyula nde: ‘Inki ntangu Bakristu ya nsuka yina bo me tulaka mafuta ta mata na zulu?’ Ntete, beto vandaka kuyindula nde Bakristu ya nkaka yina bo me tulaka mafuta ta bikala na ntoto mpi ta zinga na Paladisu mwa ntangu na nima ya bitumba ya Armagedoni. Kansi na Nzozulu ya Nkengi ya 15 juillet 2013, beto longukaka nde Bakristu yonso yina bo me tulaka mafuta ya kele ntete awa na ntoto, ta mata na zulu na ntwala nde Armagedoni kuyantika.​—Mat. 24:31.

2. Inki ngiufula bampangi ya nkaka lenda kudiyula mpi nki beto ta tadila na disolo yai?

² Kansi, bampangi ya nkaka lenda kudiyula nde: Na “mpasi ya nene,” nki ta kumina “mameme ya nkaka” yina ke sadilaka Yehowa na mutindu ya mbote na ntoto? (Yoa. 10:16; Mat. 24:21) Bampangi ya nkaka bubu yai lenda kudiyangisa mpi bo lenda yindula nde ata muntu mosi ve ta sadisa bo to ta twadisa bo ntangu bampangi na bo ya bo ke zolaka mingi, disongidila Bakristu yina bo me tulaka mafuta, ta mata na zulu. Beto tadila masolo zole ya Biblia, yina lenda pusa bo na kuyindula mutindu yina. Na nima, beto ta tadila sambu na nki yo kele ve mfunu na kudiyangisa.

INKI TA SALAMA VE?

3-4. Inki bantu ya nkaka lenda kudiyula mpi sambu na nki?

³ Bampangi ya nkaka lenda kudiyula kana mameme ya nkaka ta yambula kusadila Yehowa ntangu Bakristu yina bo me tulaka mafuta ya kele na Nto-Kimvuka, ta vanda diaka ve sambu na kutwadisa bo. Mbala ya nkaka, masolo ya nkaka ya kele na Biblia lenda pusa bo na kuyindula mutindu yina. Beto tadila bambandu zole. Mbandu ya ntete kele ya nganga-nzambi ya nene Yehoyada.  Yandi vandaka kusadila Yehowa na mutindu ya mbote kibeni. Yandi ti nkento na yandi Yehoshabeati taninaka Yehoashi, mwana mosi ya fioti ya bakala mpi bo sadisaka yandi na kukuma ntotila mosi ya mbote. Yehoashi sambilaka Yehowa na mutindu ya mbote mpi yandi salaka mambu ya mbote ntangu Yehoyada vandaka na luzingu. Kansi ntangu Yehoyada fwaka, Yehoashi yantikaka kusala mambu ya mbi. Yandi wilaka bamfumu ya mbi ya Yuda mpi yandi yambulaka Yehowa.​—2 Bans. 24:2, 15-19.

⁴ Mbandu ya zole kele ya Bakristu ya mvu-nkama ya zole, bayina zingaka na nima ya lufwa ya bantumwa. Ntumwa Yoane vandaka ntumwa ya nsuka yina fwaka. Ntangu yandi vandaka na luzingu, yandi vandaka mbandu ya mbote sambu na Bakristu mingi mpi yandi sadisaka bo na kulanda kusadila Yehowa na mutindu ya mbote. (3 Yoa. 4) Bonso bantumwa ya nkaka ya Yezu, ntumwa Yoane mpi salaka ngolo sambu apostazi kumwangana ve na mabundu. (1 Yoa. 2:18; 2 Bate. 2:7) Kansi ntangu yandi fwaka, apostazi panzanaka bonso tiya na mfinda. Na bamvula yina landaka, ba-aposta vandaka kulonga malongi mingi ya luvunu mpi bo vandaka kukanga meso na mambu ya mbi yina vandaka kusalama na mabundu.

5. Masolo yina zole fwete pusa beto ve na kuyindula nki?

⁵ Keti masolo yina zole ya kele na Biblia ke monisa nde diambu ya mutindu yina ta kumina mameme ya nkaka, ntangu Bakristu yina bo me tulaka mafuta ya kele awa na ntoto ta kwenda na zulu? Keti na ntangu yina, Bakristu na ntoto ta yantika kusala mambu ya mbi bonso Yehoashi to bo ta kuma ba-aposta bonso Bakristu mingi ya mvu-nkama ya zole? Ata fioti ve. Beto ke ndima kibeni nde ntangu Bakristu yina bo me tulaka mafuta ya kele awa na ntoto ta kwenda na zulu, mameme ya nkaka ta landa kusadila Yehowa na mutindu ya mbote mpi yandi ta landa kukeba bo. Inki ke ndimisa beto nde yo ta vanda mpidina?

LUSAMBU YA BUNKETE TA BEBA VE

6. Inki bantangu tatu beto ta tadila na bunkufi?

⁶ Sambu na nki beto ke ndima kibeni nde lusambu ya bunkete ta beba ve, ata na bantangu ya mpasi yina ke kwisa na ntwala? Sambu mambu yina Biblia ke tubaka sambu na bilumbu ke kwisa, ke ndimisa beto yo. Ntangu yina beto ke zinga me swaswana ngolo kibeni ti ntangu ya Izraele ya ntama mpi ntangu ya Bakristu ya mvu-nkama ya zole, na nima ya lufwa ya bantumwa. Yo yina, beto tadila mbote-mbote kibeni bantangu yai tatu: (1) Ntangu ya Izraele ya ntama, (2) na nima ya lufwa ya bantumwa mpi (3) bantangu na beto, disongidila “bantangu yina bo ta vutula bima yonso.”​—Bis. 3:21.

7. Na Izraele ya ntama, sambu na nki bantu yina vandaka kusadila Yehowa na mutindu ya mbote lembaka ve nitu ntangu bo vandaka kumona bantotila mpi bantu ya nkaka ke sala mambu ya mbi?

⁷ Ntangu ya Izraele ya ntama. Mwa ntangu fioti na ntwala ya lufwa ya Moize, yandi songaka bantu ya Izraele nde: “Sambu mono me zaba mbote nde na nima ya lufwa na mono, beno ta sala kibeni mambu ya mbi mpi beno ta yambula nzila yina mono me songa beno.” (Kul. 31:29) Moize kebisaka mpi bantu ya Izraele nde kana bo me lemfukila ve Yehowa, Yehowa ta tinda bo na kimpika. (Kul. 28:35, 36) Keti mambu yina lunganaka? Ee. Na nsungi ya bamvula mingi, bantotila mingi salaka mambu ya mbi na meso ya Yehowa mpi bo vidisaka bantu ya Nzambi nzila. Yo salaka nde Yehowa kupesa bantu ya Izraele ndola mpi yandi bikaka diaka ve nde ata ntotila mosi kuyala bo. (Ezek. 21:25-27) Kansi bantu ya Izraele yina vandaka kusadila Yehowa na mutindu ya mbote, bakaka kikesa ntangu bo monaka nde mambu yina Yehowa tubaka lunganaka kibeni.​—Yez. 55:10, 11.

8. Keti beto fwete yituka mutindu apostazi mwanganaka na kati ya Bakristu na mvu-nkama ya zole? Tendula.

⁸ Na nima ya lufwa ya bantumwa. Keti beto fwete yituka mutindu apostazi mwanganaka na  kati ya Bakristu na mvu-nkama ya zole? Ata fioti ve. Yezu tubaka na ntwala nde apostazi ta mwangana na kati ya Bakristu. (Mat. 7:21-23; 13:24-30, 36-43) Ntumwa Polo, ntumwa Piere ti ntumwa Yoane tubaka nde mambu yina Yezu tubaka yantikaka dezia kulungana na mvu-nkama ya ntete ya ntangu na beto. (2 Bate. 2:3, 7; 2 Pie. 2:1; 1 Yoa. 2:18) Na mvu-nkama ya zole ya ntangu na beto, apostazi mwanganaka kibeni na kati ya Bakristu. Bakristu ya ba-aposta basikaka mpi bo kumaka kitini mosi ya nene ya Babilone ya Nene, disongidila kimvuka ya mabundu yonso ya luvunu na ntoto ya mvimba. Diaka, mambu yina Yezu tubaka vandaka kulungana.

9. Inki mutindu ntangu yina beto ke zinga kele ve bonso ntangu ya Izraele ya ntama mpi ntangu ya Bakristu ya mvu-nkama ya zole?

⁹ “Bantangu yina bo ta vutula bima yonso.” Ntangu na beto kele ve bonso ntangu ya Izraele ya ntama mpi ntangu yina apostazi mwanganaka na mvu-nkama ya zole ya ntangu na beto. Ebuna, nki mutindu bo ke bingaka ntangu yai ya beto ke zinga? Yo kele “bilumbu ya nsuka” ya nsi-ntoto yai ya mbi. (2 Tim. 3:1) Kansi Biblia ke tuba mpi nde yo ta vanda luyantiku ya nsungi mosi ya nda mpi ya mfunu mingi kibeni. Yo ta suka ntangu Kimfumu ya Mesia ta kumisa bantu ya kukuka mpi ta kumisa ntoto paladisu. Bo ke bingaka nsungi yango “bantangu yina bo ta vutula bima yonso.” (Bis. 3:21) Yo yantikaka na 1914. Ebuna, nki bo vutulaka na nsungi yango? Yezu kumaka Ntotila na zulu. Yo yina, Yehowa kumaka diaka ti muntu yina ke monisa yandi mpi yina bakaka kiti ya kimfumu ya ntotila Davidi. Kansi Yehowa vutulaka kaka kimfumu yina mpamba ve. Na nima ya kuvutula kimfumu yina, yandi yantikaka kuvutula lusambu ya bunkete. (Yez. 2:2-4; Ezek. 11:17-20) Keti lusambu ya bunkete ta beba diaka?

10. (a) Inki Biblia tubaka na ntwala sambu na lusambu ya bunkete na ntangu na beto? (Yezaya 54:17) (b) Sambu na nki baprofesi yina ke pesa kikesa?

¹⁰ Tanga Yezaya 54:17. Yindula profesi yai: “Ata kinwaninu mosi ve ya bo ta sadila sambu na kunwanisa nge ta nunga.” Mambu yina ke lungana kibeni bubu yai. Mambu yai ya ke landa ke lungana mpi na ntangu na beto: “Yehowa ta longa bana na nge yonso, mpi ngemba ya bana na nge ta vanda mingi. Bo ta tula nge ngolo na lunungu. . . . Nge ta wa boma ata ya kima mosi ve mpi nge ta vanda ve ti kikuma ya kutekitila, sambu yo ta kwisa ve pene-pene na nge.” (Yez. 54:13, 14) Ata nkutu Satana yandi mosi, “nzambi ya ngidika yai ya bima,” kele ve ti ngolo ya kukanga bansadi ya Yehowa nzila ya kulonga bantu mambu ya Yehowa. (2 Bak. 4:4) Yehowa me vutulaka lusambu ya bunkete mpi yo ta beba diaka ve ata fioti. Yo ta vanda mvula na mvula. Ata kinwaninu  mosi ve ya bo ta sadila sambu na kunwanisa beto ta nunga.

INKI TA SALAMA?

11. Inki ke ndimisa beto nde kimvuka ya nene ta bikala ve yo mosi ntangu Bakristu yina bo me tulaka mafuta ta kwenda na zulu?

¹¹ Inki ta salama ntangu Bakristu yina bo me tulaka mafuta ya kele ntete awa na ntoto ta mata na zulu? Kuvila ve nde Yezu muntu kele Ngungudi na beto. Yandi muntu kele mfumu ya dibundu. Yezu tubaka na pwelele yonso nde: “Beno kele kaka na Ntwadisi mosi, Kristu.” (Mat. 23:10) Ntotila na beto Yezu yina ke yala na zulu, ta lungisa mbote-mbote kibeni mukumba na yandi ya kukeba balongoki na yandi ya kieleka. Balongoki ya Kristu awa na ntoto ta wa ve boma ata fioti, sambu Kristu ke twadisaka bo. Ya kieleka, beto ke zaba ve mambu mingi ya me tala mutindu Yezu ta twadisa balongoki na yandi na ntangu yina. Beto tadila mwa bambandu ya kele na Biblia, yina lenda pesa beto kikesa.

12. Inki mutindu Yehowa kebaka bantu na yandi (a) na nima ya lufwa ya Moize? (b) ntangu Eliya bakaka mukumba ya nkaka? (Tala mpi kifwanisu ya ke wakana ti paragrafe yai.)

¹² Moize fwaka na ntwala nde bantu ya Izraele kukota na Ntoto ya Lusilu. Inki kuminaka bantu ya Nzambi? Keti Yehowa yambulaka kusadisa bantu na yandi na nima ya lufwa ya Moize? Ve. Yehowa vandaka kusadisa bantu na yandi ntangu bo vandaka kulemfukila yandi. Na ntwala nde Moize kufwa, Yehowa songaka yandi na kutula Yozue sambu yandi twadisa bantu ya Izraele. Moize vandaka kupesa Yozue formasio banda bamvula mingi. (Kub. 33:11; Kul. 34:9) Diaka, Yehowa pesaka bantu mingi ya nkaka kiyeka ya kutwadisa bantu na yandi. Mu mbandu bamfumu ya mafunda, bamfumu ya bankama, bamfumu ya makumi tanu mpi nkutu bamfumu ya makumi. (Kul. 1:15) Bo vandaka kukeba mbote bansadi ya Nzambi. Mbandu yina ke wakana mpi ti mbandu ya Eliya. Yandi salaka ngolo bamvula mingi sambu na kusadisa bantu ya Izraele na kusambila Yehowa na mutindu ya mbote. Kansi na nima, Yehowa pesaka yandi mukumba ya nkaka ya kulungisa na sudi, na Yuda. (2 Bant. 2:1; 2 Bans. 21:12) Keti Yehowa yambulaka bantu yina vandaka kusadila yandi na mutindu ya mbote, bayina vandaka na kimfumu ya makanda kumi ya Izraele? Ve. Eliya pesaka Elisha formasio bamvula mingi. ‘Kimvuka mosi ya baprofete’ vandaka mpi kubaka formasio. (2 Bant. 2:7) Ya kieleka, bantu mingi vandaka pana sambu na kusadisa bansadi ya Nzambi mpi na kutwadisa bo. Yehowa landaka kulungisa lukanu na yandi mpi yandi kebaka bansadi na yandi yina vandaka kusadila yandi na mutindu ya mbote.

13. Inki mambu ya ke pesa kikesa ya kele na Baebreo 13:5b? (Tala mpi kifwanisu ya ke wakana ti paragrafe yai.)

 ¹³ Ti bambandu yina na ntu, nge ke yindula nde nki ta salama ntangu Bakristu yonso yina bo me tulaka mafuta ya kele ntete awa na ntoto ta kwenda na zulu? Yo kele ve mfunu na kudiyula ngiufula yina. Biblia ke tubila kieleka mosi ya pete ya ke ndimisa: Yehowa ta yambula ve ata fioti bansadi na yandi awa na ntoto. (Tanga Baebreo 13:5b.) Bonso Moize ti Eliya, kimvuka ya fioti ya Bakristu yina bo me tulaka mafuta, bayina ke twadisa organizasio ya Yehowa bubu yai, ke bakisaka mfunu ya kupesa bampangi formasio. Banda ntama, bampangi ya Nto-Kimvuka ke pesaka bampangi-babakala ya kele na kati ya mameme ya nkaka formasio sambu na kutwadisa. Mu mbandu, banda bamvula mingi bo me salaka banzo-nkanda mingi sambu na kupesa formasio na bankuluntu, bankengi ya nziunga, bampangi yina ke salaka na Bakomite ya Filiale, bankengi ya Betele mpi bampangi ya nkaka. Bampangi ya Nto-Kimvuka bo mosi, ke pesaka bansadisi yina ke salaka na bakomite ya Nto-Kimvuka formasio. Bampangi yina kele bansadisi, ke lungisa mbote kibeni mikumba mingi yina bo kele ti yo na organizasio ya Yehowa bubu yai. Bo kele ya kuyilama kibeni sambu na kulanda kukeba mameme ya Kristu ntangu Bakristu yina bo me tulaka mafuta ta kwenda na zulu.

14. Inki kele diambu ya mfunu ya beto ke tubila na disolo yai?

¹⁴ Yai kele diambu ya mfunu yina beto ke tubila na disolo yai: Ntangu Bakristu yonso yina bo me tulaka mafuta ya kele ntete awa na ntoto ta mata na zulu na ntwala nde mpasi ya nene kusuka, bansadi ya Yehowa yina ta bikala awa na ntoto, ta landa kusadila yandi na mutindu ya mbote. Na lutwadisu ya Yezu Kristu, bansadi ya Nzambi ta konda ve ata kima mosi. Beto ke zaba nde na ntangu yina, kimvuka mosi ya makanda yina Biblia ke bingaka nde Gogi ya Magogi, ta nwanisa bansadi ya Nzambi. (Ezek. 38:18-20) Kansi yo ta sala ve bantangu mingi mpi bo ta nunga ve ata fioti. Bo ta kuka ve kukanga bansadi ya Nzambi nzila ya kulanda kusambila yandi. Yehowa ta gulusa kibeni bansadi na yandi. Na mbona-meso mosi, ntumwa Yoane monaka “kimvuka mosi ya nene” ya mameme ya nkaka ya Kristu. Bo songaka yandi nde ‘kimvuka yai ya nene’ kele bantu yina me katuka “na mpasi ya nene.” (Kus. 7:9, 14) Ya kieleka, Yehowa ta gulusa bo kibeni.

15-16. Mutindu Kusonga 17:14 ke monisa yo, nki Bakristu yina bo me tulaka mafuta ta sala na bitumba ya Armagedoni mpi sambu na nki yo ke pesa kikesa?

 ¹⁵ Kansi, bantu ya nkaka lenda kudiyula nde: ‘Inki Bakristu yina bo me tulaka mafuta ta sala ntangu bo ta kwenda na zulu?’ Mvutu ya Biblia na ngiufula yina kele pwelele. Yo ke tubaka nde baguvernema ya nsi-ntoto yai “ta nwana ti Mwana-Dimeme.” Ya kieleka, bo ta bela kibeni. Biblia ke tuba nde “Mwana-Dimeme ta nunga bo.” Ebuna, banani ta sadisa yandi? Mvutu kele kaka na Biblia. Yo kele bantu “yina bo me bingaka, yina bo me solaka, mpi yina kele ya kwikama.” (Tanga Kusonga 17:14.) Bantu yango kele banani? Bo kele Bakristu yina bo me tulaka mafuta ya me futumukaka. Yo yina, ntangu Bakristu yonso yina bo me tulaka mafuta ya kele ntete awa na ntoto ta mata na zulu na ntwala nde mpasi ya nene kusuka, mukumba ya ntete yina bo ta lungisa ta vanda ya kunwana. Yo kele mukumba mosi ya kuyituka kibeni. Bakristu ya nkaka yina bo me tulaka mafuta, vandaka ntete kunwana ti bantu ya nkaka na ntwala nde bo kuma Bambangi ya Yehowa. Bankaka nkutu vandaka basoda na baguvernema ya nsi-ntoto yai. Kansi na nima, bo me kumaka Bakristu ya kieleka mpi bo me longukaka kuzinga na ngemba ti bantu ya nkaka. (Bag. 5:22; 2 Bate. 3:16) Bo ke kotaka diaka ve na bitumba. Kansi ntangu bo ta kwenda na zulu, bo ta vukana ti Yezu mpi bawanzio na yandi ya santu sambu na kunwanisa bambeni ya Nzambi na bitumba ya nsuka ya Armagedoni.

¹⁶ Yindula fioti. Awa na ntoto, Bakristu ya nkaka yina bo me tulaka mafuta kele minunu mpi nkutu bankaka kele ve ngolo. Kansi ntangu bo ta futumuka sambu na kuzinga na zulu, bo ta vanda bigangwa ya kimpeve yina ta fwa ve mpi ya ngolo mingi. Bo ta nwana kumosi ti Yezu Kristu, Ntotila ya Ke Nwanaka. Ntangu bitumba ya Armagedoni ta mana, bo ta sala kumosi ti Yezu Kristu sambu na kukumisa bantu ya kukuka. Ntembe kele ve nde ntangu bo ta vanda na zulu, bo ta sadisa mingi bampangi na bo yina bo ke zolaka mingi, kuluta mutindu bo vandaka kusadisa bo ntangu bo vandaka na ntoto.

17. Inki mutindu beto me zaba nde bansadi ya Nzambi yonso ta vanda na lutaninu na bitumba ya Armagedoni?

¹⁷ Keti nge kele na kati ya mameme ya nkaka? Kana mpidina, nki nge ta sala ntangu Armagedoni, bitumba ya mfunu mingi ta yantika? Yo ta lomba kaka nde nge tudila Yehowa ntima mpi nge landa lutwadisu na yandi. Yo lenda tendula nki? Biblia ke tuba mambu yai ya ke pesa kikesa: “Beno kota na basuku na beno ya kati, mpi beno kanga bakielo na beno. Beno bumbana sambu na ntangu fioti tii kuna makasi ta luta.” (Yez. 26:20) Bansadi yonso ya Nzambi yina ke sadilaka yandi na mutindu ya mbote na ntoto mpi na zulu, ta guluka na ntangu yina. Bonso ntumwa Polo, beto ke ndima kibeni nde yo vanda “baluyalu to bima ya ntangu yai to bima yina ta kwisa . . . ata kima mosi ve ta kuka kukabula beto na zola ya Nzambi.” (Bar. 8:38, 39) Kuvila ve ata mbala mosi nde: Yehowa ke zolaka nge mpi yandi ta yambula nge ve ata fioti.