NA NSI-NTOTO yai, bantu mingi ke zolaka nde bo sadila bo mambu kuluta bantu ya nkaka mpi bo pesa bo lukumu, banswa mpi mikumba ya nkaka ya mfunu mingi kuluta bantu ya nkaka. Ata bantu ke pesa bo dezia bima yai yonso, bo ke fulukaka yo ve. Kifu ya kusosa kaka mambote na bo mosi mpi ya kukonda kupesa matondo, yina kele na kati ya bidimbu ya bilumbu ya nsuka, ke pusaka bo na kuvanda mutindu yai.​—2 Tim. 3:2.

Ya kieleka, mpeve yina bantu mingi ke vandaka na yo ya kusosa kaka mambote na bo mosi me banda ve bubu yai. Adami ti Eva bakaka lukanu ya kupona bo mosi mambu ya mbote mpi ya mbi mpi yo me natilaka beto yonso bampasi. Bamvula mingi na nima, ntotila Uziya ya Yuda yindulaka nde yandi vandaka ti nswa ya kupesa ndumbu na tempelo kansi yandi kudikusaka mpenza. (2 Bans. 26:18, 19) Mutindu mosi, Bafarize ti Basaduse yindulaka nde yo fwanaka nde Nzambi kusadila bo mambu kuluta bantu ya nkaka kaka sambu bo vandaka bana ya Abrahami.​—Mat. 3:9.

Bubu yai beto ke zinga ti bantu ya ke sosaka kaka mambote na bo mosi mpi kana beto keba ve, beto lenda kuma mpi ti mpeve yai. (Bag. 5:26) Beto lenda banda kuyindula nde beto me fwana na kubaka lukumu to mukumba mosi ya mfunu mingi kuluta bantu ya nkaka. Inki lenda sadisa beto na kubuya mpeve yai? Ntete, beto sosa kuzaba mutindu Yehowa ke tadilaka mpeve yango. Minsiku zole ya Biblia lenda sadisa beto.

Yehowa mpamba ke ponaka mambu yina beto me fwana na kubaka. Beto tadila mwa bambandu.

• Na dibuta, Yehowa ke zolaka nde nkento kuzitisa bakala na yandi mpi bakala kuzola nkento na yandi. (Baef. 5:33) Bantu yina me kwelaka fwete monisa mawi ya zola kaka na bankwelani na  bo kansi ve na muntu ya nkaka. (1 Bak. 7:3) Bana fwete lemfukila bibuti na bo mpi bibuti fwete zola bana na bo mpi kulungisa bampusa na bo.​—2 Bak. 12:14; Baef. 6:2.

• Na dibundu, Yehowa ke zolaka nde beto zitisa bankuluntu sambu na kisalu ya ngolo yina bo ke salaka. (1 Bate. 5:12) Ata mpidina, bo kele ve ti nswa ya kuyala bampangi na bo.​—1 Pie. 5:2, 3.

• Nzambi me pesaka bamfumu ya nsi-ntoto nswa ya kulomba mpaku mpi ya kubaka lukumu na bantu yina bo ke yalaka.​—Bar. 13:1, 6, 7.

Yehowa ke pesaka beto na zola yonso bima mingi kuluta yina beto me fwana na kubaka. Mutindu beto kele bantu ya masumu, beto me fwana kaka na kufwa. (Bar. 6:23) Kansi, Yehowa ke sakumunaka beto mingi sambu na zola na yandi ya kwikama sambu na beto. (Nk. 103:10, 11) Konso lusakumunu to mukumba yina yandi ke pesaka beto, yandi ke salaka yo sambu na ntima na yandi ya mbote ya nene.​—Bar. 12:6-8; Baef. 2:8.

Keba na mpeve ya nsi-ntoto. Kana beto keba ve, beto lenda banda kuyindula nde beto me fwana nde bo sadila beto mambu kuluta bantu ya nkaka. Yezu pesaka mbandu ya bantu ya kisalu yina bo futaka denari mosi sambu na kumonisa mutindu bantu lenda kuma kukonda mpasi ti mpeve yai. Bantu ya nkaka ya kisalu yantikaka kusala na suka-suka mpi bo salaka kilumbu ya mvimba na nsi ya ntangu ya ngolo, kansi bantu ya nkaka ya kisalu salaka kaka ngunga mosi. Bantu yina yantikaka kisalu na suka-suka yindulaka nde bo fwanaka na kubaka salere mingi kuluta bantu ya nkaka sambu na kisalu ya ngolo yina bo salaka. (Mat. 20:1-16) Na kutadila mbandu yai, Yezu monisaka nde balongoki na yandi fwete sepela ti bima yina Nzambi ke pesaka bo.

Vanda ti kikalulu ya kupesa mersi mpi kuzola ve kaka nde bantu kusadisa nge. (1 Bate. 5:18) Landa mbandu ya ntumwa Polo, yandi lombaka ve bampangi ya Korinto na kusadisa yandi na kinsuni ata yandi vandaka ti nswa ya kusala yo. (1 Bak. 9:11-14) Beto fwete vanda ti kikalulu ya kupesa mersi sambu na konso kima yina bantu ke pesa beto mpi kubuya mpeve ya kuzola kaka nde bantu kusadisa beto.

Vanda ya kudikulumusa. Ntangu muntu ke yindula nde yandi kele mfunu mingi, mbala mingi yandi ke yantikaka kumona nde yandi me fwana  na kubaka bima mingi kuluta yina yandi kele ti yo. Kudikulumusa ta sadisa beto na kubuya bangindu yai ya mbi.

Profete Daniele me bikilaka beto mbandu ya mbote ya kudikulumusa. Dibuta na bo vandaka ya lukumu, yandi vandaka kitoko, mayele mpi ti makuki ya kusala mambu mingi. Mambu yai yonso lendaka kupusa yandi na kuyindula nde yandi fwanaka mpenza na kubaka lukumu mpi mikumba ya mfunu mingi yina yandi vandaka ti yo. (Dan. 1:3, 4, 19, 20) Ata mpidina, Daniele vandaka kaka ya kudikulumusa mpi kikalulu yai kumisaka yandi mfunu mingi na meso ya Yehowa.​—Dan. 2:30; 10:11, 12.

Beto fwete buya mpeve yina bantu mingi ke vandaka ti yo na nsi-ntoto yai ya kusosa kaka mambote na bo mosi. Kansi, beto fwete landa kusepela ti konso lusakumunu yina Yehowa ke pesaka beto sambu na ntima na yandi ya mbote ya nene.