Mpangi-nkento Mary ti bakala na yandi mpangi John, a ke zingaka na kisika yina bo lenda longa nsangu ya mbote na bantu mingi ya kisalu yina ke katukaka na Philippines. Na ntangu ya maladi ya coronavirus, mpangi Mary yantikaka kulonguka Biblia ti bantu na insi yina yandi ke zingaka mpi na bansi ya nkaka. Inki mutindu yandi vandaka kusala yo?

Mpangi Mary vandaka kuyula balongoki na yandi ya Biblia nde: “Keti beno me zaba bantu ya nkaka yina ta sepela kulonguka Biblia?” Kana balongoki na yandi me ndima, yandi vandaka kusonga bo na kusadisa yandi na kuzabana ti bantu yango. Kuyula ngiufula yai ya pete ke nataka mambote sambu mbala mingi bantu ya ke sepelaka ti Ndinga ya Nzambi ke songaka bampangi na bo ya mabuta mpi banduku na bo mambu yina bo ke longukaka. Ebuna nki mambote ngiufula yai ya mpangi Mary vandaka kuyula nataka?

Jasmin, longoki ya Biblia ya mpangi Mary, sadisaka mpangi Mary na kuzabana ti bantu ya nkaka iya yina sepelaka kulonguka Biblia. Kristine, yina vandaka mpi na kati ya bantu yango, sepelaka mingi kulonguka Biblia, yo yina yandi songaka mpangi Mary na kulonguka ti yandi mbala zole konso mposo. Ntangu mpangi Mary yulaka yandi kana yandi me zaba bantu ya nkaka yina lenda sepela kulonguka Biblia, Kristine vutulaka nde: “Ee, mono ta natila nge banduku na mono.” Na nima ya bamposo fioti, Kristine pesaka mpangi Mary banduku na yandi iya yina vandaka kuzola kulonguka Biblia. Na nima, Kristine pesaka yandi diaka banduku na yandi ya nkaka mpi bankaka na kati na bo pesaka mpi mpangi Mary bazina ya banduku na bo ya nkaka yina lendaka kusepela kulonguka Biblia.

Kristine zolaka mpi nde dibuta na yandi na Philippines kulonguka Biblia. Yo yina, yandi solulaka ti mwana na yandi ya nkento Andrea. Ntete, Andrea tubaka nde: ‘Bambangi ya Yehowa kele ka-dibundu mosi ya mpamba-mpamba, bo ke kwikilaka ve na Yezu mpi bo ke sadilaka kaka Masonuku ya Kiebreo (Ancien Testament).’ Kansi na nima ya kulonguka mbala mosi mpamba, yandi katulaka bangindu yina ya mbi. Ntangu yandi vandaka kulonguka, yandi vandaka kuyituka mpi kutuba nde: “Mambu yai kele ya kieleka sambu yo me katuka na Biblia!”

Na nima, Andrea sadisaka mpangi Mary na kuzabana ti banduku na yandi zole mpi nduku na yandi mosi ya kisalu; bo yantikaka mpi kulonguka Biblia. Diaka, mpangi Mary vandaka ve kuzaba nde ntangu bo vandaka kulonguka Biblia ti Andrea, tata-nkento na yandi Angela ya kifwa-meso, vandaka mpi kulanda mambu yina bo vandaka kulonguka. Yo yina kilumbu mosi, Angela songaka Andrea na kuyula mpangi Mary kana yandi ta sepela mpi kulonguka Biblia ti yandi. Angela vandaka kuzola mingi mambu yina yandi vandaka  kulonguka. Na nima ya ngonda mosi mpamba, yandi kangaka baverse mingi ya Biblia na ntu mpi yandi vandaka kuzola kulonguka Biblia mbala iya konso mposo! Andrea sadisaka yandi na kubanda kuvukana mbala na mbala ti bampangi na balukutakanu na nzila ya video.

Ntangu mpangi Mary bakisaka nde Joshua, bakala ya Kristine, vandaka kulanda mpi mambu ya bo vandaka kulonguka, mpangi Mary yulaka Joshua kana yandi ta sepela mpi kulonguka Biblia. Joshua vutudilaka yandi nde: “Mono ke zola kaka kuwidikila kansi kuyula mono ve ata ngiufula mosi, kana ve mono ta katuka awa.” Kansi ntangu mpangi Mary longukaka minuta 5 ti Kristine, Joshua yulaka bangiufula mingi kuluta Kristine mpi yandi ndimaka kulonguka Biblia.

Ngiufula ya pete yina mpangi Mary vandaka kuyula, sadisaka yandi na kuzwa balongoki mingi ya Biblia. Yandi pesaka balongoki mingi ya nkaka ya Biblia na Bambangi ya Yehowa ya nkaka sambu bo landa kulonguka ti bo. Mpangi Mary yantikaka kulonguka Biblia ti bantu 28 na bansi iya.

Jasmin, longoki na yandi ya ntete ya Biblia, bakaka mbotika na avril 2021. Kristine bakaka mbotika na mai 2022 mpi na nima yandi vutukaka na Philippines na dibuta na yandi. Balongoki zole ya nkaka, yina Kristine pesaka mpangi Mary, bakaka mpi mbotika. Angela bakaka mbotika bangonda fioti na nima ya Kristine mpi bubu yai yandi kele mupasudi-nzila ya ntangu yonso. Joshua bakala ya Kristine ti mwana na bo ya nkento Andrea mpi balongoki mingi ya nkaka ya Biblia, ke yela mbote na kimpeve.

Na bilumbu ya Bakristu ya ntete, nsangu ya mbote panzanaka nswalu sambu bantu mingi zabisaka yo na bampangi na bo ya mabuta mpi banduku na bo. (Yoa. 1:41, 42a; Bis. 10:24, 27, 48; 16:25-33) Yula balongoki na nge ya Biblia mpi bantu ya ke sepelaka ti mambu ya Biblia nde: “Keti beno me zaba bantu ya nkaka yina ta sepela kulonguka Biblia?” Kuyula ngiufula yai ya pete lenda sadisa nge na kuzwa balongoki mingi ya Biblia!