DISOLO YA KULONGUKA 4
Sambu na Nki Beto Ke Vukanaka na Nkinsi ya Kuyibuka Lufwa ya Yezu?
“Beno landa kusala yo sambu na kuyibuka mono.”—LUKA 22:19.
NKUNGA 20 Nge Pesaka Yezu
MAMBU YINA DISOLO YAI KE TUBILA *
1-2. (a) Inki ntangu beto ke yindulaka mingi muntu yina beto vandaka kuzola yina me fwaka? (b) Inki Yezu salaka na mpimpa yina yandi fwaka?
ATA bantu yina beto vandaka kuzola me fwaka bamvula mingi me luta, beto ke landaka kuyibuka bo. Beto ke yindulaka bo mingi-mingi kana beto me kuma kilumbu yina bo fwaka.
2 Konso mvula, beto ke vukanaka ti bamilio ya bantu na ntoto ya mvimba sambu na kuyibuka lufwa ya muntu mosi ya beto ke zolaka mingi, Yezu Kristu. (1 Pie. 1:8) Beto ke vukanaka sambu na kuyibuka lufwa ya muntu yina pesaka luzingu na yandi sambu na kugulusa beto na disumu mpi na lufwa. (Mat. 20:28) Yezu zolaka nde balongoki na yandi kuyibuka lufwa na yandi. Na mpimpa ya nsuka ya Yezu awa na ntoto, yandi salaka sambu na mbala ya ntete nkinsi ya Madia ya Nkokila ya Mfumu mpi yandi songaka balongoki na yandi nde: “Beno landa kusala yo sambu na kuyibuka mono.” *—Luka 22:19.
3. Inki beto ta tubila na disolo yai?
3 Kimvuka ya fioti ya bantu yina ke vukanaka na Nkinsi ya Kuyibuka lufwa ya Kristu ke vandaka ti kivuvu ya kuzinga na zulu. Kansi bamilio ya bantu yina ke vukakanaka mpi ti bo ke vandaka ti kivuvu ya kuzinga awa na ntoto. Na disolo yai, beto ta tubila bikuma yina ke pusaka bimvuka yina zole na kuvanda na kiese ya kuvukana na Nkinsi ya Kuyibuka Lufwa ya Yezu konso mvula. Beto ta tubila mpi mambote yina beto ke bakaka ntangu beto ke vukanaka na nkinsi yina. Beto tubila ntete bikuma yina ke pusaka Bakristu yina bo me tulaka mafuta na kuvukana na Nkinsi ya Kuyibuka Lufwa ya Yezu.
SAMBU NA NKI BAKRISTU YINA BO ME TULAKA MAFUTA KE VUKANAKA NA NKINSI YA KUYIBUKA LUFWA YA YEZU?
4. Sambu na nki Bakristu yina bo me tulaka mafuta ke diaka dimpa mpi ke nwaka vinu na Nkinsi ya Kuyibuka Lufwa ya Yezu?
4 Konso mvula, Bakristu yina bo me tulaka mafuta ke vukanaka na Nkinsi ya Kuyibuka Lufwa ya Yezu. Bo ke diaka dimpa mpi bo ke nwaka vinu. Bo ke salaka yo na mutindu ya mbote. Sambu na nki bo ke diaka dimpa mpi bo ke nwaka vinu? Sambu na kupesa mvutu, beto tala mambu yina salamaka na mpimpa ya nsuka ya luzingu ya Yezu awa na ntoto. Ntangu Yezu manisaka kusala nkinsi ya Paki ti balongoki na yandi, yandi songaka bo nkinsi ya nkaka yina beto ke bingaka Madia ya Nkokila ya Mfumu. Yandi lutisaka dimpa mpi vinu na bantumwa 11 yina kangamaka na yandi mpi yandi songaka bo nde bo dia dimpa yina mpi bo nwa vinu. Yezu songaka bo mambu ya me tala bakuwakana zole. Kuwakana ya mpa mpi kuwakana ya Kimfumu. * (Luka 22:19, 20, 28-30) Bakuwakana yina salaka nde, bantumwa yina mpi kimvuka mosi ya fioti ya bantu ya nkaka kukuma bantotila mpi banganga-nzambi na zulu. (Kus. 5:10; 14:1) Kaka Bakristu yina bo me tulaka mafuta, bayina kele awa na ntoto ya kele na bakuwakana yina zole bantu lenda dia dimpa mpi kunwa vinu na Nkinsi ya Kuyibuka Lufwa ya Yezu.
5. Inki Bakristu yina bo me tulaka mafuta ke zabaka na yina me tala kivuvu yina bo me pesaka bo?
5 Bakristu yina bo me tulaka mafuta ke vukanaka diaka na Nkinsi ya Kuyibuka Lufwa ya Yezu, sambu yo ke pesaka bo dibaku ya kuyindula kivuvu na bo. Yehowa me pesaka bo kivuvu mosi ya kuyituka, disongidila kivuvu ya kuvanda ti nitu yina ke fwaka ve mpi yina ke polaka ve mpi ya kuzinga na zulu, kivuvu ya kuyala ti Yezu Kristu mpi bantu 144 000 mpi kivuvu ya kuluta yonso kele kivuvu ya kumona Yehowa Nzambi. (1 Bak. 15:51-53; 1 Yoa. 3:2) Bakristu yina bo me tulaka mafuta ke zabaka nde, bo me bingisaka bo sambu na kusepela ti bima yina yonso kele na zulu. Kansi sambu bo kwenda na zulu, bo fwete landa kusadila Yehowa na mutindu ya mbote tii na lufwa na bo. (2 Tim. 4:7, 8) Nkinsi ya Kuyibuka Lufwa ya Yezu ke pesaka Bakristu yina bo me tulaka mafuta kiese ya mingi, sambu bo ke yibukaka kivuvu na bo ya kuzinga na zulu. (Tito 2:13) Ebuna “mameme ya nkaka”? (Yoa. 10:16) Sambu na nki bo ke vukanaka na Nkinsi ya Kuyibuka Lufwa ya Yezu?
SAMBU NA NKI MAMEME YA NKAKA KE VUKANAKA NA NKINSI YA KUYIBUKA LUFWA YA YEZU?
6. Sambu na nki mameme ya nkaka ke vukanaka na Nkinsi ya Kuyibuka Lufwa ya Yezu?
6 Mameme ya nkaka ke diaka ve dimpa mpi bo ke nwaka ve vinu na Nkinsi ya Kuyibuka Lufwa ya Yezu. Ata mpidina, bo ke vandaka na kiese ya kuvukana na nkinsi yango. Na 1938, bo bingisaka bantu yina kele ti kivuvu ya kuzinga awa na ntoto na kuvukana na Nkinsi ya Kuyibuka Lufwa ya Yezu. Yo vandaka mbala na bo ya ntete ya kuvukana na nkinsi yina. Nzozulu ya Nkengi ya Marsi 1, 1938 tubaka nde: “Yo ta vanda mbote kibeni nde [mameme ya nkaka] kukwisa mpi na lukutakanu yai mpi bo tala mutindu yo ke salamaka. . . . Bo fwete sepela mpi na nkinsi yina.” Bantu yina bo ke bingisaka na feti ya makwela ke vandaka na kiese ya kukwenda. Mutindu mosi mpi, mameme ya nkaka ke vandaka na kiese ya kukwenda na Nkinsi ya Kuyibuka Lufwa ya Yezu ata bo ke diaka ve dimpa mpi bo ke nwaka ve vinu.
7. Sambu na nki mameme ya nkaka ke vandaka na kiese ya kulanda diskure ya Nkinsi ya Kuyibuka Lufwa ya Yezu?
7 Mameme ya nkaka mpi ke yindulaka kivuvu na bo. Bo ke vandaka na kiese ya kulanda diskure ya Nkinsi ya Kuyibuka Lufwa ya Yezu sambu yo ke tubilaka mingi mambu yina Kristu mpi bantu 144000 yina ta yala ti yandi ta sala sambu na bantu yina ta bikala ya kukangama na Nzambi na Luyalu ya Bamvula Funda. Na nsi ya lutwadisu ya Ntotila na bo Yezu Kristu, bantu yina ta yala na zulu ta pesa maboko na kisalu ya kukumisa ntoto Paladisu mpi bo ta sadisa bantu na kukuma ya kukuka. Bamilio ya bantu yina ke diaka ve dimpa mpi ke nwaka ve vinu na Nkinsi ya Kuyibuka Lufwa ya Yezu, ke vandaka na kiese mingi ntangu bo ke monaka na mabanza mutindu mambu yina Biblia tubaka ta lungana. Mu mbandu, mambu yina kele na Yezaya 35:5, 6; 65:21-23; mpi na Kusonga 21:3, 4. Ntangu bo ke monaka na mabanza mutindu bo mpi bantu yina bo ke zolaka ta zinga na nsi-ntoto ya mpa, kivuvu na bo sambu na bilumbu ke kwisa ke kumaka ngolo mpi bo ke vandaka kaka ti lukanu ya kulanda kusadila Yehowa.—Mat. 24:13; Bag. 6:9.
8. Sambu na nki diaka mameme ya nkaka ke vukanaka na Nkinsi ya Kuyibuka Lufwa ya Yezu?
8 Beto tala kikuma ya nkaka ya ke pusaka mameme ya nkaka na kuvukana na Nkinsi ya Kuyibuka Lufwa ya Yezu. Bo ke vukanaka na nkinsi yina sambu na kumonisa nde bo ke zolaka Bakristu yina bo me tulaka mafuta mpi nde bo ke zolaka kusadisa bo. Ndinga ya Nzambi tubaka nde, Bakristu yina bo me tulaka mafuta ti Bakristu yina kele ti kivuvu ya kuzinga awa na ntoto ta sala na kimvuka. Inki mutindu? Beto tala mwa bambandu ya ke monisa yo.
9. Mambu yina Zekaria 8:23 ke tuba ke monisa nde mameme ya nkaka ke waka nki mutindu sambu na Bakristu yina bo me tulaka mafuta?
9 Tanga Zekaria 8:23. Mambu ya kitoko ya kele na verse yina ke monisa mutindu mameme ya nkaka ke waka sambu na Bakristu yina bo me tulaka mafuta. Bangogo “Muyuda mosi” mpi “beno” ke tadila kimvuka yina mosi, disongidila Bakristu yina bo me tulaka mafuta bayina kele awa na ntoto. (Bar. 2:28, 29) “Bantu kumi ya bandinga yonso ya makanda” kele mameme ya nkaka. Bo me “simba ngolo,” disongidila bo me kangamaka ngolo ti Bakristu yina bo me tulaka mafuta mpi bo me vukanaka ti bo na lusambu ya bunkete. Yo yina mameme ya nkaka ke monisaka nde, bo me kangamaka ngolo ti Bakristu yina bo me tulaka mafuta ntangu bo ke vukanaka ti bo na Nkinsi ya Kuyibuka Lufwa ya Yezu.
10. Inki Yehowa me sala sambu na kulungisa mambu yina kele na Ezekiele 37:15-19, 24, 25?
10 Tanga Ezekiele 37:15-19, 24, 25. Yehowa lungisaka mambu ya kele na baverse yina mutindu yandi me salaka nde Bakristu yina bo me tulaka mafuta mpi mameme ya nkaka kusala na kimvuka mpi na bumosi. Baverse yina tubilaka bitini zole ya banti. Bantu yina kele ti kivuvu ya kuzinga na zulu kele bonso kitini ya nti “sambu na Yuda” (dikanda yina bo vandaka kupona bantotila ya Izraele), mpi bantu yina kele ti kivuvu ya kuzinga awa na ntoto kele bonso kitini yina ya nkaka ya nti “ya Efrayimi.” * Yo lombaka nde Yehowa kuvukisa bitini yina zole ya banti sambu yo kuma “nti mosi.” Yo ke tendula nde bo ke salaka na bumosi na lutwadisu ya Ntotila mosi Kristu Yezu. Konso mvula, Bakristu yina bo me tulaka mafuta mpi mameme ya nkaka ke vukanaka na Nkinsi ya Kuyibuka Lufwa ya Yezu. Bo ke vukanaka ve bonso bimvuka zole ya kukabwana. Kansi bo ke vukanaka bonso “kimvuka mosi” na lutwadisu ya “ngungudi mosi.”—Yoa. 10:16.
11. “Mameme” yina Biblia ke tubila na Matayo 25:31-36, 40 ke sadisa bampangi ya Kristu ntete na nki kisalu?
11 Tanga Matayo 25:31-36, 40. “Mameme” yina Yezu tubilaka na baverse yina, kele bantu ya mbote na ntangu ya nsuka, bayina kele ti kivuvu ya kuzinga awa na ntoto, disongidila mameme ya nkaka. Bo ke sadisa bampangi ya Kristu yina bo me tulaka mafuta bayina kele awa na ntoto mpi bo ke sala yo na mutindu ya mbote. Bo ke sadisa bo ntete na kusala kisalu mosi ya nene, disongidila kisalu ya kulonga nsangu ya mbote na ntoto ya mvimba mpi ya kukumisa bantu balongoki.—Mat. 24:14; 28:19, 20.
12-13. Inki mameme ya nkaka ke salaka diaka sambu na kusadisa bampangi ya Kristu?
12 Konso mvula, mwa bamposo na ntwala ya Nkinsi ya Kuyibuka Lufwa ya Yezu, mameme ya nkaka ke kudipesaka ya mvimba, sambu na kusadisa bampangi ya Kristu na kampani yina ke salamaka na ntoto ya mvimba sambu na kubingisa bantu yina me sepela na kukwisa na Nkinsi ya Kuyibuka Lufwa ya Yezu. (Tala lupangu “Mambu Yina Nge Lenda Sala na Ntwala mpi na Nima ya Nkinsi ya Kuyibuka Lufwa ya Yezu”) Ata na mabundu mingi bantu yina ke diaka dimpa mpi ke nwaka vinu ke vandaka ve, mameme ya nkaka ke vandaka na kiese kibeni ya kusadisa bampangi ya Kristu mutindu yina. Mameme ya nkaka ke zabaka nde, Yezu ke zabaka mbote nde mambu yina bo ke salaka sambu na kusadisa bampangi na yandi yina bo me tulaka mafuta, bo ke salaka yo na yandi.—Mat. 25:37-40.
13 Inki kele bikuma ya nkaka ya ke pusaka beto yonso na kuvukana na Nkinsi ya Kuyibuka Lufwa ya Yezu, yo vanda beto kele ti kivuvu ya kuzinga na zulu to awa na ntoto?
SAMBU NA NKI BETO YONSO KE VUKANAKA NA NKINSI YA KUYIBUKA LUFWA YA YEZU?
14. Inki Yehowa mpi Yezu me salaka sambu na kumonisa nde bo ke zolaka beto mingi?
14 Beto ke pesa Yehowa mpi Yezu mersi mingi sambu na zola na bo sambu na beto. Yehowa me monisaka nde yandi ke zolaka beto na mitindu mingi. Kansi mutindu mosi me luta mitindu yonso yina ya nkaka. Yandi tindaka Mwana na yandi yina yandi ke zolaka sambu yandi mona mpasi mpi yandi fwa sambu na beto. (Yoa. 3:16) Beto ke zaba mpi nde Yezu monisaka mpi nde yandi ke zolaka beto mingi mutindu yandi ndimaka na luzolo yonso kupesa luzingu na yandi sambu na beto. (Yoa. 15:13) Beto ta kuka ve ata fioti kufuta Yehowa mpi Yezu sambu na zola yina bo me monisilaka beto. Kansi beto lenda pesa bo mersi na mambu yina beto ke sala konso kilumbu. (Bakol. 3:15) Beto ke vukanaka mpi na Nkinsi ya Kuyibuka Lufwa ya Yezu sambu na kuyibuka zola na bo sambu na beto, mpi sambu beto monisa nde beto ke zolaka bo mpi.
15. Sambu na nki Bakristu yina bo me tulaka mafuta mpi mameme ya nkaka ke pesaka Yehowa mersi sambu na kimenga ya Yezu?
15 Beto ke pesaka Yehowa mersi mingi sambu na kimenga ya Yezu. (Mat. 20:28) Kimenga ya Yezu kele mfunu mingi sambu na Bakristu yina bo me tulaka mafuta, sambu yo ke pesa bo kivuvu mosi ya mbote kibeni. Bo ke kwikilaka na kimenga ya Yezu, yo yina Yehowa me ndimaka bo bonso bantu ya lunungu mpi yandi me ndimaka bo bonso bana na yandi. (Bar. 5:1; 8:15-17, 23) Mameme ya nkaka mpi ke pesaka Yehowa mersi sambu na kimenga ya Yezu. Bo ke kwikilaka mpi na kimenga ya Kristu. Yo yina bo kele ti kansansa ya bunkete na ntwala ya Nzambi, mpi bo lenda sadila yandi kisalu ya santu mpi bo kele ti kivuvu ya kuguluka na mpasi ya nene. (Kus. 7:13-15) Bakristu yina bo me tulaka mafuta mpi mameme ya nkaka ke vukanaka konso mvula na Nkinsi ya Kuyibuka Lufwa ya Yezu sambu na kupesa mpi Yehowa mersi.
16. Sambu na nki diaka beto ke vukanaka na Nkinsi ya Kuyibuka Lufwa ya Yezu?
16 Beto ke vukakanaka diaka na Nkinsi ya Kuyibuka Lufwa ya Yezu sambu beto ke zolaka kulemfukila yandi. Yo vanda beto kele ti kivuvu ya kuzinga na zulu to awa na ntoto, beto yonso fwete zitisa nsiku yina Yezu pesaka na mpimpa yina yandi salaka sambu na mbala ya ntete Nkinsi ya Kuyibuka Lufwa na yandi. Yandi tubaka nde: “Beno landa kusala yo sambu na kuyibuka mono.”—1 Bak. 11:23, 24.
MAMBOTE YINA BETO YONSO KE BAKAKA NTANGU BETO KE VUKANAKA NA NKINSI YA KUYIBUKA LUFWA YA YEZU
17. Inki mutindu Nkinsi ya Kuyibuka Lufwa ya Yezu ke sadisaka beto na kukwenda pene-pene ya Yehowa?
17 Beto ke kwendaka pene-pene ya Yehowa. (Yak. 4:8) Mutindu beto me longuka yo, Nkinsi ya Kuyibuka Lufwa ya Yezu ke pesaka beto dibaku ya kuyindula kivuvu yina Yehowa me pesaka beto mpi ya kuyindula zola yina yandi me monisilaka beto. (Yer. 29:11; 1 Yoa. 4:8-10) Kana beto yindula kivuvu yina beto kele ti yo sambu na bilumbu ke kwisa mpi zola yina Yehowa ke landaka kumonisila beto, zola na beto sambu na yandi ta kuma ngolo. Kinduku na beto ti yandi ta kuma mpi ngolo.—Bar. 8:38, 39.
18. Kuyindula mbandu ya Yezu ke pusaka beto na kusala nki?
18 Yo ke pusaka beto na kulanda mbandu ya Yezu. (1 Pie. 2:21) Mwa bilumbu na ntwala ya Nkinsi ya Kuyibuka Lufwa ya Yezu, beto ke tulaka dikebi na masolo ya Biblia ya ke tubilaka mposo ya nsuka ya luzingu ya Yezu awa na ntoto, lufwa na yandi mpi lufutumuku na yandi. Diskure yina bo ke salaka na nkokila ya Nkinsi ya Kuyibuka Lufwa ya Yezu ke yibusaka beto zola ya Yezu sambu na beto. (Baef. 5:2; 1 Yoa. 3:16) Ntangu beto ke tangaka mbandu ya kuditambika ya Yezu mpi ke yindulaka yo na mudindu, yo ke pusaka beto na “kutambula mutindu muntu yina tambulaka.”—1 Yoa. 2:6.
19. Inki beto fwete sala sambu na kulanda kuvanda banduku ya Yehowa?
19 Yo ke pusaka beto na kulanda kuvanda banduku ya Yehowa. (Yude 20, 21) Beto ta landa kuvanda banduku ya Nzambi kana beto ke sala yonso sambu na kulemfukila yandi, sambu na kusantisa zina na yandi mpi sambu na kusepedisa yandi. (Bing. 27:11; Mat. 6:9; 1 Yoa. 5:3) Kuyibuka Lufwa ya Yezu ke pusaka beto na kuzola kusala luzolo ya Yehowa konso kilumbu mpi na kusala mambu yina ke monisa nde, beto ke songa Yehowa nde ‘mono ke zola kulanda kuvanda nduku na nge.’
20. Inki kele bikuma ya mbote ya ke pusa beto na kuvukana na Nkinsi ya Kuyibuka Lufwa ya Yezu?
20 Yo vanda beto kele ti kivuvu ya kuzinga mvula na mvula na zulu to awa na ntoto, beto kele ti bikuma ya mbote ya kuvukana na Nkinsi ya Kuyibuka Lufwa ya Yezu. Konso mvula ntangu beto ke vukanaka na dati ya nkinsi yina, beto ke yibukaka lufwa ya muntu yina beto ke zolaka, Yezu Kristu. Diambu ya kuluta mfunu kele nde, beto ke yibukaka zola ya nene yina Yehowa me monisilaka beto mutindu yandi pesaka kimenga ya Mwana na yandi. Na mvula yai, Nkinsi ya Kuyibuka Lufwa ya Yezu ta salama na Kitanu 15 Avril, 2022. Beto ke zolaka Yehowa ti Mwana na yandi. Yo yina kima ya kuluta mfunu yina beto fwete sala sambu na kuyibuka lufwa ya Yezu, kele kukwenda na Nkinsi ya Kuyibuka Lufwa na yandi.
NKUNGA 16 Beno Kumisa Yah mpi Yezu
^ Konso mvula, beto ke vandaka na kiese ya kuvukana na Nkinsi ya Kuyibuka Lufwa ya Yezu, yo vanda beto kele ti kivuvu ya kuzinga na zulu to na ntoto yina ta kuma Paladisu. Disolo yai ta tubila bikuma ya mbote yina Biblia ke pesa ya ke pusaka beto na kuvukana na Nkinsi ya Kuyibuka Lufwa ya Yezu mpi mambote yina beto ke bakaka ntangu beto ke vukanaka na nkinsi yango.
^ Bible en Kituba me balulaka bangogo yina mutindu yai: “Beno sala mpidiyai sambu na kuyindula mono.”
^ Sambu na kuzaba mambu mingi na yina me tala kuwakana ya mpa mpi kuwakana ya Kimfumu, tala disolo “Beno Ta Kuma ‘Kimfumu ya Banganga-Nzambi’” na Nzozulu ya Nkengi ya Oktobri 15, 2014, balut. 15-17.
^ Sambu na kuzaba mambu mingi na yina me tala mambu yina Biblia tubaka sambu na bitini zole ya banti ya kele na Ezekiele kapu 37, tala mukanda Yehowa Me Vutula Lusambu ya Bunkete! balut. 130-135, bapar. 3-17.
