Beto ke sambilaka Yehowa na balukutakanu ya dibundu, na balukutakanu ya nene mpi na balukutakanu ya distrike. Diaka, beto ke sambilaka yandi beto mosi mpi na dibuta. Yai kele mwa mambu yina nge lenda tadila ntangu nge ke longuka nge mosi to ntangu beno ke sala lusambu ya dibuta:

• Beno yidika balukutakanu ya dibundu. Beno lenda longuka bankunga mpi kusadisa bantu yonso na dibuta na kuyidika mvutu mosi ya kupesa na lukutakanu.

• Beno lenda tanga disolo mosi ya Biblia. Na nima, beno lenda sala dessin ya ke monisa disolo yina, to beno lenda sonika dilongi mosi ya mfunu yina beno me longuka.

• Beno lenda tanga kisambu mosi ya kele na Biblia mpi kutubila mutindu yo lenda sadisa beno na kuyidika bisambu na beno mbote.

• Beno lenda tala video mosi na jw.org mpi kutubila yo ti bantu ya nkaka to kusonika mambu yina me sepedisa beno na video yango.

• Beno yilama sambu na kisalu ya kulonga nsangu ya mbote. Mu mbandu, beno lenda sala nsonga ti muntu mosi ya dibuta sambu na kuyidika mambu yina beno ta tuba.

• Beno lenda tala bima yina Yehowa me salaka mpi kuyindula yo mingi to beno lenda tubila mambu yina yo ke longa beno sambu na Yehowa. a