1. Inki ke kwisilaka nge na mabanza ntangu nge ke yindulaka Yehowa?

 KETI nge me yindulaka dezia mutindu Yehowa ke vandaka? Ntangu nge ke sambaka yandi, nki ke kwisilaka nge na mabanza? Ata beto ke monaka ve Yehowa, Biblia ke tubilaka yandi na mitindu ya kuswaswana. Yo ke bingaka yandi nde “ntangu mpi kitaninu” mpi “tiya ya ke yokaka.” (Nk. 84:11; Baeb. 12:29) Ezekiele monaka Yehowa na mbona-meso bonso ditadi ya safire, kibende ya ke sema mpi nkongolo ya ke sema. (Ezek. 1:26-28) Mambu yina Ezekiele tubaka sambu na Yehowa lenda yitukisa beto, to nkutu yo lenda pesa beto boma.

2. Inki ke salaka nde yo vandila bantu ya nkaka mpasi na kupusana pene-pene na Yehowa?

² Beto ke monaka ve Yehowa, yo yina yo lenda vanda mpasi na kundima nde yandi ke zolaka beto. Bantu ya nkaka ke yindulaka nde Yehowa lenda zola bo ve ata fioti sambu na mambu ya mpasi yina bo me kutanaka ti yo na luzingu. Mbala ya nkaka, papa na bo vandaka kuzola bo ve. Yehowa ke bakisaka mutindu beto ke waka mpi yandi ke zabaka nde yo lenda vandila beto mpasi na kupusana pene-pene na yandi. Yo yina, yandi ke songa beto na Ndinga na yandi nde yandi kele Nzambi ya lutondo mingi.

3. Sambu na nki beto fwete tadila mbote-mbote zola ya Yehowa?

³ Zola kele ngogo yina ke tendulaka Yehowa mbote-mbote kibeni. (1 Yoa. 4:8) Yehowa kele zola, yandi ke salaka mambu yonso na zola. Zola ya Yehowa kele ya kieleka mpi yo kele ngolo kibeni. Yo yina, yandi ke monisilaka yo ata bantu yina ke zolaka yandi ve. (Mat. 5:44, 45) Na disolo yai, beto ta tadila mbote-mbote Yehowa mpi zola na yandi. Kana beto ke longuka mambu mingi ya me tala Nzambi na beto, beto ta zola yandi mpi mingi.

YEHOWA KE ZOLAKA BETO MINGI KIBENI

4. Zola ya Yehowa ke pusa nge na kuwa nki mutindu? (Tala mpi kifwanisu ya ke wakana ti paragrafe yai.)

⁴ “Yehowa kele kibeni ti lutondo.” (Yak. 5:11) Na Biblia, Yehowa  ke kudifwanisaka ti mama ya zola. (Yez. 66:12, 13) Yindula fioti mama yina ke keba mwana na yandi ya fioti na zola yonso. Yandi ke nata yandi na zulu ya makulu na yandi na zola yonso mpi yandi ke tubila yandi na mawete mpi kukonda kunganina yandi. Kana mwana ke dila to yandi kele na mpasi, yandi ke sala yonso sambu na kupesa yandi bima yina yandi kele ti yo mfunu. Kana beto ke kutana ti bampasi, beto fwete tula ntima na zola ya Yehowa. Muyimbi-bankunga mosi sonikaka nde: “Ntangu basusi lutilaka mono, nge pesaka mono kikesa mpi nge lembikaka mono.”​—Nk. 94:19.

5. Zola ya kwikama ya Yehowa ke tendula nki sambu na nge?

⁵ Yehowa kele ya kwikama. (Nk. 103:8) Yandi ke yambulaka beto ve kana beto me sala kima mosi ya mbi. Mbala na mbala, bantu ya Izraele vandaka kusala mambu ya mbi yina vandaka kupesa Yehowa mpasi mingi. Kansi ntangu bo vandaka kubalula ntima mpi kuyambula kusala mambu yina ya mbi, Yehowa vandaka kundimisa bo nde zola na yandi ke wumelaka mvula na mvula. Mu mbandu, yandi songaka bo nde: “Sambu nge kumaka na mfunu mingi na meso na mono, mono pesaka nge lukumu mpi mono zolaka nge.” (Yez. 43:4, 5) Zola ya Yehowa me sobaka ve. Beto fwete ndima mpi nde yandi ke zolaka beto ntangu yonso. Ata kana beto me salaka bifu ya nene kibeni, Yehowa ke yambulaka beto ve. Kana beto balula ntima mpi beto vutukila Yehowa, beto ta mona nde yandi ke zolaka beto kaka. Yandi ke sila nde “yandi ta lolula na luzolo yonso.” (Yez. 55:7) Biblia ke tuba nde kana Yehowa me lolula beto, beto ta mona “bansungi ya kupema ya ke katuka na Yehowa yandi mosi.”​—Bis. 3:19.

6. Zekaria 2:8 ke longa beto nki sambu na Yehowa?

⁶ Tanga Zekaria 2:8. Yehowa ke zolaka beto, yo yina yandi ke bakisaka mutindu beto ke waka mpi yandi ke vandaka ti nzala ya ngolo ya kutanina beto. Kana beto ke kutana ti bampasi, yo ke salaka yandi mpi mpasi. Yo yina, beto fwete ndima nde yandi ta pesa mvutu ntangu beto ke samba yandi nde: “Tanina mono bonso mbuma ya disu na nge.” (Nk. 17:8) Disu kele kitini mosi ya mfunu mingi na nitu mpi beto ke taninaka yo mbote-mbote. Yo yina ntangu Yehowa ke fwanisaka beto ti mbuma ya disu na yandi, yo kele bonso yandi ke tuba nde: ‘Bansadi na mono, konso muntu yina ke sala beno mbi, yandi ke simba kima yina kele mfunu mingi sambu na mono.’

7. Sambu na nki yo ke lomba nde beto ndima kibeni nde Yehowa ke zolaka beto?

⁷ Yehowa ke zola nde konso muntu na kati na beto kundima nde yandi ke zolaka yandi. Kansi,  yandi ke zaba nde sambu na mambu ya mpasi yina beto me kutanaka ti yo, yo lenda sala nde beto kudiyula kana Yehowa ke zolaka beto kibeni. To yo lenda vanda nde beto ke kutana ti mambu mingi ya mpasi ntangu yai mpi yo ke meka kibeni lukwikilu na beto na Yehowa. Inki ta sadisa beto na kundima kibeni nde Yehowa ke zolaka beto? Kana beto ke longuka mutindu Yehowa ke monisilaka Yezu, Bakristu yina yandi me tulaka mafuta mpi beto yonso, zola.

MUTINDU YEHOWA KE MONISAKA NDE YANDI KE ZOLAKA BETO

8. Sambu na nki Yezu vandaka kundima kibeni nde Tata na yandi ke zolaka yandi?

⁸ Banda bamvula mingi, Yehowa ti Mwana na yandi ya yandi ke zolaka mingi me salaka kinduku mosi ya ngolo kibeni mpi bo ke zolanaka mingi. Kinduku na bo me salaka bamvula mingi kuluta binduku yonso ya nkaka. Na Matayo 17:5, Yehowa tubilaka na pwelele zola yina yandi ke vandaka ti yo sambu na Yezu. Yehowa lendaka kutuba kaka nde: ‘Yai kele muntu yina mono me ndima.’ Kansi yandi zolaka nde beto zaba nde yandi ke zolaka Yezu mingi kibeni, yo yina yandi bingaka yandi nde “Mwana na mono, ya mono ke zolaka mingi.” Yehowa vandaka na kiese mingi sambu na Yezu mpi sambu na mambu yina Yezu zolaka kusala. (Baef. 1:7) Diaka, Yezu vandaka ve ti badute nde Tata na yandi ke zolaka yandi mingi. Yezu vandaka kundima kibeni nde Yehowa ke vandaka ti zola ya ngolo sambu na yandi. Mbala mingi, yandi tubaka ti kundima yonso nde Tata na yandi ke zolaka yandi.​—Yoa. 3:35; 10:17; 17:24.

9. Inki bangogo ke monisaka zola yina Yehowa ke vandaka ti yo sambu na Bakristu yina bo me tulaka mafuta? Tendula. (Baroma 5:5)

⁹ Yehowa ke monisaka mpi zola na yandi sambu na Bakristu yina bo me tulaka mafuta. (Tanga Baroma 5:5.) Beto tadila bangogo “fulusaka.” Diksionere mosi ya ke tendulaka Biblia ke tuba nde “yo ke kulumukilaka beto bonso masa.” Mbandu yina ke monisa mpenza zola yina Yehowa ke vandaka ti yo sambu na Bakristu yina bo me tulaka mafuta. Bakristu yina bo me tulaka mafuta ke zabaka nde ‘Nzambi ke zolaka bo.’ (Yude 1) Ntumwa Yoane tubilaka mutindu Bakristu yina bo me tulaka mafuta ke waka, yandi tubaka nde: “Beno tala nki mutindu Tata me zolaka beto, sambu bo binga beto bana ya Nzambi!” (1 Yoa. 3:1) Keti Yehowa ke zolaka kaka Bakristu yina bo me tulaka mafuta? Ve, Yehowa ke zolaka beto yonso.

10. Inki kima ya kuluta nene yina Yehowa salaka ya ke monisa nde yandi ke zolaka beto mingi?

¹⁰ Inki kima ya kuluta nene yina Yehowa me salaka ya ke monisa nde yandi ke zolaka beto? Yandi me pesaka kimenga ya Yezu. Kima yina Yehowa me salaka me luta konso kima yina muntu ya nkaka lenda sala sambu na kumonisa zola. (Yoa. 3:16; Bar. 5:8) Yehowa bikaka nde Mwana na yandi yina yandi ke zolaka mingi kufwa sambu na bantu yonso, sambu yandi lolula masumu na beto mpi beto kuma banduku na yandi. (1 Yoa. 4:10) Kana beto yindula mingi mambu yina yo lombaka nde Yehowa mpi Yezu kusala sambu na kufuta kimenga ya Yezu, beto ta bakisa kibeni nde bo ke zolaka beto mingi. (Bag. 2:20) Yehowa pesaka ve Mwana na yandi bonso kimenga kaka sambu na kuzitisa bansiku na yandi ya lunungu. Yo kele dikabu ya zola. Yehowa monisaka nde yandi ke zolaka beto mingi kibeni, ntangu yandi pesaka Mwana na yandi Yezu yina yandi ke zolaka mingi kuluta, bonso kimenga sambu na bantu. Yehowa bikaka nde Mwana na yandi kumona mpasi mpi kufwa sambu na beto.

11. Inki dilongi beto lenda baka na Yeremia 31:3?

¹¹ Mutindu beto me mona yo, Yehowa ke zolaka beto mingi kibeni mpi yandi ke songaka beto nde yandi ke zolaka beto. (Tanga Yeremia 31:3.) Yehowa me bendaka beto na yandi sambu yandi ke zolaka beto. (Tala mpi Kulonga 7:7, 8.) Ata kima mosi ve mpi ata muntu mosi ve lenda kabula beto na zola ya Nzambi. (Bar. 8:38, 39) Inki mutindu nge ke wa sambu na zola ya Nzambi? Tanga Nkunga 23 mpi tala mutindu Davidi waka sambu na zola ya Yehowa mpi lutondo na yandi. Tala mutindu nge mpi lenda kudiwa sambu na zola yango.

 ZOLA YA YEHOWA KE PUSA NGE NA KUWA NKI MUTINDU?

12. Nkunga 23 ke tubila nki?

¹² Tanga Nkunga 23:1-6. Na Nkunga 23, Davidi monisaka mutindu yandi vandaka kundima kibeni nde Yehowa vandaka kuzola yandi mpi kukeba yandi. Yandi tubilaka kinduku ya ngolo yina yandi vandaka ti yo ti Yehowa mpi yandi bingaka Yehowa nde Ngungudi na yandi. Davidi vandaka kudiwa na lutaninu sambu yandi vandaka kubika nde Yehowa kutwadisa yandi mpi yandi vandaka kutudila Yehowa ntima ya mvimba. Davidi zabaka kibeni nde Yehowa ta landa kumonisila yandi zola konso kilumbu. Inki sadisaka yandi na kutudila Yehowa ntima mutindu yina?

13. Sambu na nki Davidi vandaka kundima nde Yehowa vandaka kukeba yandi?

¹³ “Mono ta konda kima ve.” Davidi vandaka kuzaba nde Yehowa vandaka kukeba yandi mbote sambu yandi vandaka ti bima yonso yina yandi vandaka ti yo mfunu. Davidi zabaka mpi nde yandi vandaka ti kinduku ya mbote ti Yehowa mpi Yehowa vandaka kundima yandi. Yo yina, yandi vandaka kundima kibeni nde ata yandi kutana ti mambu ya nki mutindu na luzingu na yandi, Yehowa ta landa kupesa yandi bima yonso yina yandi kele ti yo mfunu. Davidi vandaka kundima nde Yehowa vandaka kuzola yandi mpi yandi zolaka kulungisa bampusa na yandi. Yo sadisaka yandi na kudiyangisa ve kansi na kuvanda na kiese mpi na kusepela ti bima yina yandi vandaka ti yo.​—Nk. 16:11.

14. Inki mutindu Yehowa ke kebaka beto na zola yonso?

¹⁴ Yehowa ke kebaka beto na zola yonso, mingi-mingi ntangu beto ke kutana ti bampasi. Mpangi-nkento Claire a me sadila Yehowa bamvula kuluta 20 na Betele. Yandi zabaka ve mutindu ya kusadisa dibuta na yandi ntangu bo vandaka kukutana ti bampasi mingi. Papa na yandi salaka AVC, bo basisaka mpangi na yandi mosi ya nkento na dibundu mpi dibuta na bo vandaka diaka ve ti  mbongo. Nkutu, banki mosi botulaka nzo na bo. Inki mutindu Yehowa monisaka nde yandi ke zolaka bo? Mpangi Claire ke tuba nde: “Yehowa vandaka kupesa dibuta na beto bima yonso yina bo vandaka ti yo mfunu konso kilumbu. Mbala mingi, Yehowa vandaka kupesa beto bima mingi kuluta yina beto vandaka ti yo mfunu. Mono ke yindulaka mbala na mbala bantangu yina mono monaka zola ya Yehowa, mpi mono ta vila yo ve ata fioti. Kuyindula mambu yina ke sadisaka mono na kulanda kusadila Yehowa na kiese ntangu mono ke kutana ti bampasi.”

15. Inki mutindu Davidi bakaka kikesa? (Tala mpi kifwanisu ya ke wakana ti paragrafe yai.)

¹⁵ “Yandi ke pesaka mono kikesa.” Bantangu ya nkaka, Davidi vandaka kudiyangisa sambu na mambu ya mpasi yina yandi vandaka kukutana ti yo. (Nk. 18:4-6) Kansi zola ya Yehowa mpi mutindu yandi vandaka kukeba yandi, pesaka yandi kikesa. Yehowa nataka nduku na yandi Davidi yina lembaka na “banseke yina me fuluka ti matiti” mpi na “bisika ya kupema yina kele ti masa mingi.” Yo yina, Davidi bakaka diaka kikesa mpi landaka kusadila Yehowa na kiese yonso.​—Nk. 18:28-32.

16. Inki mutindu zola ya Yehowa me pesaka nge kikesa?

¹⁶ Mutindu mosi mpi bubu yai, “kana beto me mana ve, yo kele sambu na zola ya kwikama ya Yehowa,” ata ntangu beto ke kutana ti bampasi mpi ke nwana ti yo. (Bid. 3:22; Bakol. 1:11) Beto tadila mbandu ya mpangi Rachel. Yo salaka yandi mpasi mingi kibeni ntangu bakala na yandi yambulaka yandi mpi yambulaka Yehowa na nsungi ya maladi ya coronavirus. Inki Yehowa sadilaka yandi? Yandi ke tuba nde: “Yehowa salaka yonso sambu na kumonisa mono nde yandi ke zolaka mono. Yandi pesaka mono banduku yina vandaka kulutisa ntangu ti mono, kunatila mono madia, kutindila mono ba message ya mawete mpi baverse ya Biblia ya ke pesa kikesa, bayina vandaka kuseka ti mono mpi kuyibusa mono nde Yehowa ke zolaka mono. Ntangu yonso mono ke pesaka Yehowa mersi sambu na dibuta ya nene ya zola yina yandi me pesaka mono.”

17. Sambu na nki Davidi vandaka ‘kuwa ve boma ya kima ya mbi’?

¹⁷ “Mono ke waka ve boma ya kima ya mbi, sambu nge kele ti mono.” Mbala mingi, luzingu ya Davidi vandaka na kigonsa sambu yandi vandaka ti bambeni mingi ya ngolo. Kansi, zola ya Yehowa vandaka kusala nde yandi kudiwa na lutaninu. Davidi zabaka nde Yehowa vandaka ti yandi konso ntangu yina yandi vandaka kukutana ti bampasi mpi yo vandaka kupesa yandi kikesa. Yo yina yandi yimbaka nde: “[Yehowa] gulusaka mono na mambu yonso yina vandaka kupesa mono boma.” (Nk. 34:4) Ata bantangu ya nkaka Davidi vandaka kuwa boma mingi, yandi vandaka kukatula boma yina sambu yandi zabaka nde Yehowa vandaka kuzola yandi mingi.

18. Inki mutindu kundima nde Yehowa ke zolaka nge ta sadisa nge ntangu nge ke wa boma?

 ¹⁸ Inki mutindu kuzaba nde Yehowa ke zolaka beto ke pesaka beto kikesa ntangu beto ke kutana ti mambu yina ke pesa boma? Mpangi-nkento Susi yina kele mupasudi-nzila ke tubila mutindu yandi ti bakala na yandi waka ntangu mwana na bo ya bakala kudifwaka. Yandi ke tuba nde: “Kana diambu ya mpasi mutindu yina me kumina nge, yo lenda sala nge mpasi mingi kibeni mpi yo sala nde nge kudiwa kukonda lutaninu mpi kukonda lusadisu. Kansi zola ya Yehowa me salaka nde beto vanda mbote mpi beto kudiwa na lutaninu.” Mpangi Rachel yina beto me tubila ke tuba nde: “Kilumbu mosi na mpimpa, mono waka susi mingi. Mono kudiyangisaka mpi yo pesaka mono boma. Yo yina, mono didilaka Yehowa ngolo na kisambu. Kaka na ntangu yina, Yehowa lembikaka mono, mono kudiyangisaka diaka ve mpi mono lalaka, kaka mutindu mama ke salaka bebe na yandi. Mono ta vila ve ntangu yina ata fioti.” Mpangi Tasos kele nkuluntu, yandi salaka bamvula iya na boloko sambu yandi buyaka kukuma soda. Inki mutindu yandi bakisaka nde Yehowa ke zolaka yandi mpi ke kebaka yandi? Yandi ke tuba nde: “Yehowa pesaka mono bima yonso yina mono vandaka ti yo mfunu mpi nkutu, yandi pesaka mono diaka bima mingi kuluta. Yo pesaka mono kikesa mpi yo ndimisaka mono kibeni nde mono fwete tudila yandi ntima ya mvimba. Diaka, Yehowa sadilaka mpeve santu na yandi sambu na kusadisa mono na kuvanda na kiese, ata mono vandaka na kisika yina bantu ke kudiyangisaka mingi. Yo sadisaka mono na kubakisa nde kana mono ke tudila yandi ntima mingi, yo ta sadisa mono na kubakisa nde yandi ke zolaka mono mpi mingi. Yo yina, mono kumaka mupasudi-nzila ya ntangu yonso na boloko.”

PUSANA PENE-PENE NA NZAMBI NA NGE YA LUTONDO

19. (a) Inki mutindu beto ta samba Yehowa kana beto me zaba nde yandi ke zolaka beto? (b) Inki kima ya zola yina Yehowa me sadilaka nge ya me sepedisaka nge mingi? (Tala lupangu “ Bangogo Yina Ke Sadisaka Beto na Kubakisa Kibeni nde Yehowa Ke Zolaka Beto.”)

¹⁹ Mambu yonso yina beto me tubila ke monisa nde Yehowa, “Nzambi ya zola,” kele ti beto. (2 Bak. 13:11) Yandi ke tudilaka konso muntu na kati na beto dikebi. Beto ke ndima nde “zola na yandi ya kwikama ke ziungaka” beto. (Nk. 32:10) Kana beto ke yindula mingi mutindu yandi ke monisaka nde yandi ke zolaka beto, beto ta bakisa kibeni nde yandi ke zolaka beto mingi mpi beto ta ta kinduku ya ngolo ti yandi. Beto ta samba yandi kukonda mpasi mpi beto ta songa yandi nde beto ke vandaka kibeni ti mfunu ya zola na yandi. Beto ta songa yandi mambu yonso yina ke yangisa beto mpi beto ta ndima kibeni nde yandi ke bakisaka beto mpi yandi ke vandaka ti nzala ya ngolo ya kusadisa beto.​—Nk. 145:18, 19.

20. Inki mutindu zola ya Yehowa ke bendaka beto pene-pene na yandi?

²⁰ Kaka mutindu beto ke zolaka kuyotila tiya na kilumbu ya madidi, beto ke vandaka mpi ti mfunu ya zola ya Yehowa. Yehowa ke zolaka beto mingi kibeni mpi yandi ke vandaka lutondo. Yo yina, vanda na kiese sambu Yehowa ke zolaka nge. Mpi beto yonso lenda tuba mutindu yai sambu na zola ya Yehowa: “Mono ke zolaka Yehowa.”​—Nk. 116:1.