1-2. Inki bampasi bansadi ya Yehowa lenda kutana ti yo?

 DIAMBU mosi ya mpasi lenda soba luzingu na beto na mbala mosi. Mu mbandu, bo kangaka mpangi-bakala Luis a ti maladi ya kansere ya ngolo. Munganga songaka yandi nde yandi bikalaka kaka ti bangonda fioti ya kuzinga. Mpangi Monika ti bakala na yandi vandaka kudipesa mingi na mambu ya kimpeve. Kansi kilumbu mosi, mpangi Monika bakisaka nde bakala na yandi yina vandaka nkuluntu, vandaka kusala masumu na kinsweki bamvula mingi. Yo lombaka nde mpangi Olivia yina me kwelaka ntete ve kuyambula nzo na yandi sambu mupepe mosi ya ngolo zolaka kubula. Ntangu yandi vutukaka, yandi kutaka mupepe yina me bebisa nzo na yandi. Kaka na ntangu fioti, luzingu ya bampangi yina beto me tubila sobaka kibeni. Keti nge me kutanaka mpi dezia ti diambu mosi ya mpasi yina sobaka kibeni luzingu na nge?

² Ata beto kele bansadi ya Yehowa, beto ke kutanaka ti mambu ya mpasi mpi beto ke belaka kaka mutindu yo ke kuminaka mpi bantu yonso. Diaka, bantu yina ke teleminaka bansadi ya Nzambi lenda telemina beto to kuniokula beto. Yehowa ke pesaka nzila nde mambu yina kukumina beto, kansi yandi ke sila beto nde yandi ta sadisa beto. (Yez. 41:10) Yandi lenda sadisa beto na kulanda kuvanda na kiese, na kubaka balukanu ya mbote mpi na kukangama kaka na yandi ata beto ke kutana ti bampasi ya nki mutindu. Na disolo yai, beto ta tadila mambu iya yina Yehowa ke salaka sambu na kusadisa beto na bantangu ya mpasi. Beto ta tadila mpi mambu yina beto fwete sala sambu yandi sadisa beto.

YEHOWA TA TANINA NGE

3. Kana beto ke kutana ti mpasi mosi ya ngolo, nki beto lenda kuka ve kusala?

³ Diambu ya mpasi. Kana beto ke kutana ti mpasi ya ngolo, yo  lenda vanda mpasi na kuyindula mbote mpi na kubaka balukanu. Sambu na nki? Sambu beto lenda wa mpasi ya ngolo na ntima. Mabanza na beto lenda fuluka ti basusi. Beto lenda kuma kisaka-saka mpi beto lenda zaba ve kima ya kusala. Beto tala mutindu bampangi-bankento zole yina beto me tubila, waka ntangu bo kutanaka ti bampasi ya ngolo. Mpangi Olivia ke tuba nde: “Ntangu mupepe yina ya ngolo bebisaka nzo na mono, mono kumaka kisaka-saka mpi mambu lutilaka mono kibeni.” Mpangi Monika ke tuba mambu yai sambu na mambu ya mbi yina bakala na yandi salaka: “Mono waka mpasi mingi kibeni. Mono waka kibeni bonso nde ntima na mono me pasuka. Mono vandaka kukuka ve kusala ata kima mosi. Mono yindulaka ve ata fioti nde diambu ya mutindu yina lenda kumina mono.” Inki mutindu Yehowa ke sila nde yandi ta sadisa beto kana bampasi me lutila beto?

4. Mutindu Bafilipi 4:6, 7 ke monisa yo, nki Yehowa ke sila beto?

⁴ Inki mutindu Yehowa ta sadisa beto? Yandi ke sila nde yandi ta pesa beto “ngemba ya Nzambi.” (Tanga Bafilipi 4:6, 7.) Ngemba yango kele kuvanda pima mpi kudiyangisa ve na mabanza mpi na ntima. Beto ke waka mutindu yina kana beto kele ti kinduku ya mbote ti Yehowa. Ngemba yango “me luta mayele yonso ya kubakisa mambu,” disongidila yo me luta yina beto lenda yindula. Keti yo me kuminaka nge dezia nde nge samba Yehowa ngolo kibeni mpi na nima nge wa ngemba yina yitukisaka nge? Ngemba yina kele “ngemba ya Nzambi.”

5. Inki mutindu ngemba ya Nzambi ke taninaka mabanza mpi bantima na beto?

⁵ Bafilipi 4:6, 7 ke monisa mpi nde ngemba ya Nzambi “ta tanina bantima na beno mpi mabanza na beno.” Ngogo ya kisina yina bo sadilaka sambu na ngogo “kutanina” kele ngogo yina bo vandaka kusadila sambu na kutubila basoda yina vandaka kutanina mbanza mpi kusala nde bambeni kukota ve. Bantu yina vandaka kuzinga na mbanza yina basoda vandaka kutanina, vandaka kulala na ngemba sambu bo vandaka kuzaba nde mbanza na bo vandaka na lutaninu. Mutindu mosi, kana ngemba ya Nzambi ke tanina bantima na beto mpi mabanza na beto, beto ke waka mbote sambu beto me zaba nde beto kele na lutaninu. (Nk. 4:8) Na mbandu ya Ana, ata kana diambu ya mpasi yina beto ke kutana ti yo ke mana ve nswalu, beto lenda vanda kaka na ngemba. (1 Sam. 1:16-18) Kana beto ke kudiyangisa ve, yo ta vandila beto pete na kuyindula mbote mpi na kubaka balukanu ya mbote.

6. Inki beto fwete sala sambu na kubaka ngemba ya Nzambi? (Tala mpi kifwanisu ya ke wakana ti paragrafe yai.)

⁶ Inki beto fwete sala? Kana beto ke kutana ti diambu mosi ya mpasi, beto fwete binga Yehowa sambu yandi tanina beto. Inki mutindu? Samba tii ntangu nge ta wa ngemba ya Nzambi.  (Luka 11:9; 1 Bate. 5:17) Mpangi Luis yina beto me tubila, tendulaka mutindu yandi ti nkento na yandi Ana kukaka kukanga ntima ntangu bo songaka bo nde yandi me bikala kaka ti bangonda fioti mpamba ya kuzinga. Yandi tubaka nde: “Na bantangu ya mutindu yai, yo ke vandaka mpasi kibeni na kubaka balukanu na yina me tala lusansu mpi mambu ya nkaka. Kansi kisambu vandaka mfunu mingi kibeni sambu yo sadisaka beto na kuvanda na ngemba na ntangu yina.” Mpangi Luis ti nkento na yandi tubaka nde bo vandaka kusamba ngolo kibeni mpi bo vandaka kusamba mbala na mbala. Bo vandaka kulomba Yehowa na kupesa bo ngemba ya mabanza mpi ya ntima, mpi mayele ya kubaka balukanu ya mbote. Yehowa sadisaka bo. Kana nge ke kutana ti mpasi, landa kusamba mpi nge ta wa ngemba ya Yehowa yina ta tanina ntima mpi mabanza na nge.​—Bar. 12:12.

YEHOWA TA SALA NDE NGE NIKANA VE ATA FIOTI

7. Inki mutindu beto lenda wa kana beto ke kutana ti mpasi ya ngolo?

⁷ Diambu ya mpasi. Kana beto ke kutana ti diambu mosi ya mpasi, beto lenda kudiwa ve mbote, beto lenda yindula ve mbote to beto lenda kuka ve kusala mambu mutindu beto ke salaka dezia. Kaka mutindu mupepe ya ngolo ke nikisa-nikisaka maswa, beto mpi lenda wa bonso nde mpasi yina ke nikisa-nikisa beto. Mpangi Ana yina beto me tubila tubaka nde yandi kumaka kisaka-saka na nima ya lufwa ya bakala na yandi Luis. Yandi tubaka nde: “Bantangu ya nkaka, mono vandaka kuniokwama na mabanza mpi mono vandaka kudiwila mawa, mono vandaka mpi kuwa makasi mutindu yandi fwaka.” Diaka, mpangi Ana vandaka kudiwa yandi mosi mpi yandi vandaka kuwa makasi mutindu yandi vandaka kubaka balukanu na mambu yina mpangi Luis vandaka kusala mbote. Bantangu ya nkaka, yandi vandaka kuwa bonso nde yandi vandaka na nzadi yina mupepe ya ngolo ke bula. Inki mutindu Yehowa ta sadisa beto kana bampasi yina beto ke kutana ti yo ke dindisa beto?

8. Mutindu Nkunga 16:8 ke monisa yo, nki Yehowa ke ndimisa beto?

⁸ Inki mutindu Yehowa ta sadisa beto? Yandi ke ndimisa beto nde yandi ta sadisa beto na kunikana ve ata fioti. (Tanga Nkunga 16:8.) Kana mupepe ya ngolo ke bula na nzadi, maswa lenda yantika kunikana-nikana ngolo kibeni mpi yo lenda vanda kigonsa. Yo yina, na bamaswa mingi, bo ke tulaka bima mosi yina ke vandaka bonso mapapu na balweka na yo sambu yo nikana-nikana ve kana mupepe ya ngolo ke bula. Yo ke salaka nde bantu yina kele na maswa kuvanda na lutaninu mpi bo sala voyage ya mbote. Kansi, bima yina ke salaka nde maswa kunikana-nikana ve kana maswa ke tambula. Mutindu mosi mpi, Yehowa ta tanina beto kana beto ke sadila yandi na mutindu ya mbote na bantangu ya mpasi.

9. Inki mutindu bima yina beto ke sadilaka bansosa lenda sadisa beto? (Tala mpi kifwanisu ya ke wakana ti paragrafe yai.)

 ⁹ Inki beto fwete sala? Kana bampasi me lutila nge, sala yonso sambu na kulanda kusala mambu ya kimpeve. Ya kieleka, nge lenda kuka ve kusala mambu yonso mutindu nge vandaka kusala ntete, kansi kuvila ve nde Yehowa ke vandaka ve makambu ngolo. (Tala mpi Luka 21:1-4.) Diaka, baka ntangu ya kulonguka Biblia mpi ya kuyindula mambu yina nge ke longuka. Sambu na nki? Na nzila ya organizasio ya Yehowa, yandi me pesaka beto masolo mpi bavideo ya kitoko yina lenda sadisa beto na kulanda kuvanda ngolo ntangu beto ke kutana ti bampasi. Sambu na kuzwa bima yina nge kele ti yo mfunu, nge lenda sosa bima ya kusadila bansosa ya kele na ndinga na beno. Mu mbandu JW Library^®, Index des publications des Témoins de Jéhovah mpi Mukanda ya Bansosa Sambu na Bambangi ya Yehowa. Mpangi Monika yina beto tubilaka tubaka nde yandi vandaka kusadila bima yina ya kusadila bansosa sambu na kusosa bandongisila, ntangu mpasi yina yandi vandaka kuwa vandaka kaka kukuma ngolo. Mu mbandu, yandi sosaka ngogo “makasi.” Bantangu ya nkaka, yandi vandaka kusosa bangogo “kuteka muntu” to “kwikama.” Na nima, yandi vandaka kutanga tii ntangu yandi vandaka kuwa mbote. Yandi tubaka nde: “Ntangu mono vandaka kusala bansosa, mono vandaka ti basusi ya ngolo. Kansi ntangu mono vandaka kulanda kaka kutanga, mono vandaka kuwa bonso nde Yehowa ke yamba mono. Ntangu mono vandaka kutanga, mono vandaka kubakisa mpi nde Yehowa vandaka kubakisa mutindu mono vandaka kuwa mpi yandi vandaka kusadisa mono.” Yehowa lenda sadisa nge na kudiyala tii ntangu nge ta kuma na ngemba.​—Nk. 119:143, 144.

YEHOWA TA SADISA NGE

10. Inki mutindu beto lenda wa kana beto me kutana ti mpasi mosi ya ngolo?

¹⁰ Diambu ya mpasi. Kana diambu mosi ya mpasi kibeni me kumina beto, bilumbu ya nkaka, beto lenda wa ve ngolo na nitu mpi na mabanza. Beto lenda wa bonso muntu yina ke salaka nsaka ya kubaka ntinu, yina vandaka kubaka ntinu ngolo, kansi ntangu yai yandi me kuma kutambula tengu sambu yandi me lwala. Yo lenda vanda mpasi sambu beto sala mambu yina beto vandaka kusala kukonda mpasi to beto lenda wa ve nzala ya kusala mambu yina beto vandaka kusepela kusala ntete. Bonso Eliya, beto lenda kuka ve kutelema. Beto lenda zola kaka kulala. (1 Bant. 19:5-7) Yehowa ke sila nde nki yandi ta sala sambu na beto ntangu beto ke wa ve ngolo?

11. Inki mutindu diaka Yehowa ke sadisaka beto? (Nkunga 94:18)

 ¹¹ Inki mutindu Yehowa ta sadisa beto? Yandi ke sila beto nde yandi ta sadisa beto. (Tanga Nkunga 94:18.) Kaka mutindu muntu yina ke salaka nsaka ya kubaka ntinu ya me lwala ke vandaka ti mfunu ya lusadisu sambu na kutambula, beto mpi lenda vanda ti mfunu ya lusadisu sambu na kusadila Yehowa. Na bantangu yina, Yehowa ke ndimisaka beto nde: “Mono Yehowa Nzambi na nge, mono ke simba ngolo diboko na nge ya kitata, mono muntu ke tubila nge nde, ‘kuwa boma ve. Mono ta sadisa nge.’” (Yez. 41:13) Yehowa sadisaka ntotila Davidi. Ntangu yandi kutanaka ti bampasi mpi ntangu bambeni na yandi sosaka kufwa yandi, yandi songaka Yehowa nde: “Diboko na nge ya kitata ke sadisa mono.” (Nk. 18:35) Kansi, nki mutindu Yehowa ke sadisaka beto?

12. Banani Yehowa lenda sadila sambu na kusadisa beto ntangu beto me lemba?

¹² Mbala mingi, Yehowa ke sadisaka beto ntangu yandi ke pusaka bantu ya nkaka na kusadisa beto. Mu mbandu, ntangu Davidi vandaka ve kuwa ngolo, nduku na yandi Yonatani kwendaka kutala yandi sambu na kupesa yandi ngolo mpi kikesa. (1 Sam. 23:16, 17) Mutindu mosi mpi, Yehowa ponaka Elisha sambu na kusadisa Eliya. (1 Bant. 19:16, 21; 2 Bant. 2:2) Bubu yai, Yehowa lenda sadila bantu ya dibuta na beto, banduku to bankuluntu sambu na kusadisa beto. Kansi, kana beto ke wa mpasi ya ngolo na ntima, beto lenda zola kuvanda beto mosi. Kuwa mutindu yina kele mbi ve. Kansi nki beto lenda sala sambu Yehowa kusadisa beto?

13. Inki beto fwete sala sambu Yehowa kusadisa beto? (Tala mpi kifwanisu ya ke wakana ti paragrafe yai.)

¹³ Inki beto fwete sala? Sala bikesa sambu na kuvanda ve nge mosi. Kana beto ke kudivandila, beto ta yantika kutula dikebi kaka na beto mosi mpi kuyindula kaka bampasi yina beto ke kutana ti yo. Yo lenda sala nde beto baka ve balukanu ya mbote. (Bing. 18:1) Ya kieleka, beto yonso ke zolaka kuvanda beto mosi. Mingi-mingi kana beto ke kutana ti bampasi ya ngolo. Kansi, kana beto ke kudivandila ntangu ya nda, beto lenda buya lusadisu ya bantu yina Yehowa ke sadila sambu na kusadisa beto. Yo yina ata yo lenda vanda mpasi, sala yonso sambu na kundima lusadisu ya bantu ya dibuta na nge, ya banduku mpi ya bankuluntu. Tadila bo bonso nzila yina Yehowa ke sadila sambu na kusadisa nge.​—Bing. 17:17; Yez. 32:1, 2.

YEHOWA TA PESA NGE KIKESA

14. Inki mambu lenda pesa beto boma?

¹⁴ Diambu ya mpasi. Beto lenda wa boma ntangu beto ke kutana ti bampasi. Na Biblia, bansadi  ya Yehowa tubilaka bantangu yina bo vandaka kuniokwama mpi kuwa boma sambu na bambeni na bo to sambu na mambu yina bantu ya nkaka vandaka kupusa bo na kusala. (Nk. 18:4; 55:1, 5) Mutindu mosi, bo lenda niokula beto na nzo-nkanda to na kisalu. Bantu ya mabuta na beto to bamfumu ya luyalu lenda telemina beto mpi. Nkutu, beto lenda wa boma nde beto ta fwa sambu na maladi mosi yina beto ke bela. Na bantangu ya mutindu yina, beto lenda yindula nde beto me konda lusadisu mpi beto lenda kudiwa bonso mwana-fioti. Inki mutindu Yehowa ke sadisaka beto na bantangu ya mutindu yina?

15. Mutindu Nkunga 94:19 ke monisa yo, nki Yehowa lenda sala?

¹⁵ Inki mutindu Yehowa ta sadisa beto? Yandi ke pesaka beto kikesa mpi ke lembikaka beto. (Tanga Nkunga 94:19.) Verse yina lenda pusa beto na kuyindula mwana mosi ya fioti ya nkento yina ke wa boma mpi ke kuka ve kulala sambu na makelele ya banzasi yina ke bula. Beto lenda mona na mabanza mutindu papa na yandi me kwenda kisika yina yandi kele, me baka yandi na maboko tii ntangu yandi me lala. Ata banzasi ke landa kaka kubula, mwana yina ta kudiwa mbote mpi na lutaninu na maboko ya papa na yandi. Ntangu beto ke kutana ti bampasi yina ke pesa beto boma, beto lenda vanda ti mfunu nde Tata na beto ya zulu kubaka beto na maboko na yandi na mutindu ya kifwani tii ntangu beto ta wa mbote. Inki mutindu Yehowa lenda pesa beto kikesa ya mutindu yina?

16. Inki beto lenda sala sambu Yehowa kupesa beto kikesa? (Tala mpi kifwanisu ya ke wakana ti paragrafe yai.)

¹⁶ Inki beto fwete sala? Lutisa ntangu mbala na mbala ti Yehowa, disongidila samba yandi mpi tanga Ndinga na yandi. (Nk. 77:1, 12-14) Kana nge sala mutindu yina, ntangu nge ke kutana ti bampasi, kima ya ntete yina nge ta sala kele kusosa lusadisu na Tata na nge ya zulu. Songa Yehowa mambu yina ke pesa nge boma mpi ya ke yangisa nge. Bika nde yandi solula ti nge mpi yandi pesa nge kikesa na nzila ya Biblia. (Nk. 119:28) Nge lenda bakisa nde baverse ya nkaka ya Biblia lenda pesa nge kikesa, mingi-mingi ntangu nge ke wa boma. Mu mbandu, nge lenda baka kikesa na mukanda ya Yobi, ya Bankunga, ya Bingana mpi na mambu yina Yezu tubaka ya kele na Matayo kapu 6. Kana nge ke samba Yehowa mpi nge ke tanga Ndinga na yandi, nge ta baka kikesa.

17. Inki beto fwete ndima?

¹⁷ Beto fwete ndima nde Yehowa ta sadisa beto ntangu beto ke kutana ti bampasi ya ngolo. Beto kele ve beto mosi. (Nk. 23:4; 94:14) Yehowa ke sila nde yandi ta tanina beto, ta simba beto, ta sadisa beto mpi ta pesa beto kikesa. Yezaya 26:3 ke tuba mambu yai sambu na Yehowa: “Nge ta tanina bantu yina ke yekamaka kibeni na nge; nge ta pesa bo ngemba ya ntangu yonso, sambu bo ke tudilaka nge ntima.” Yo yina, tudila Yehowa ntima mpi sala yonso sambu na kubaka lusadisu yonso yina yandi ke pesa nge. Kana nge sala mutindu yina, nge ta landa kuvanda kikesa ata na bantangu ya mpasi.