1. Inki ke vandaka mpasi mingi sambu na beto yonso?

 BETO ke bakaka balukanu konso kilumbu. Balukanu ya nkaka ke vandaka pete na kubaka, mu mbandu kubaka balukanu sambu na bima yina beto fwete dia to ntangu yina beto fwete lala. Kansi yo ke vandaka mpasi mingi sambu na beto yonso na kubaka balukanu na mambu ya nkaka. Sambu balukanu yina beto ke bakaka lenda natila beto kiese to mpasi, yo lenda vanda ti bupusi na sante na beto, na bampangi na beto mpi na kinduku na beto ti Yehowa. Beto ke zolaka nde balukanu na beto kunatila beto mpi bantu ya mabuta na beto mambote. Kima ya kuluta mfunu kele nde, beto ke zolaka nde balukanu na beto kupesa Yehowa kiese.​—Bar. 12:1, 2.

2. Inki nge lenda sala sambu na kubaka balukanu ya mbote?

² Nge lenda baka balukanu ya mbote kana (1) nge ke tadila mambu yonso mbote-mbote, (2) nge ke sosa lutwadisu ya Yehowa na mambu yango mpi (3) nge ke yindula mbote-mbote lukanu yina nge ke zola kubaka. Na disolo yai, beto ta longuka mutindu ya kusadila mambu yai tatu mpi yo ta sadisa beto na kuzaba mutindu beto lenda sadila mayele na beto ya kubakisa mambu sambu na kubaka balukanu ya mbote.​—Bing. 2:11.

TADILA MAMBU YONSO MBOTE-MBOTE

3. Pesa mbandu mosi ya ke monisa mfunu ya kutadila mambu yonso na ntwala ya kubaka balukanu.

³ Sambu na kubaka balukanu ya mbote, nge fwete tadila ntete mambu yonso mbote-mbote. Sambu na nki yo kele mfunu? Yindula nde muntu mosi me kwenda kukutana ti munganga sambu na maladi mosi  ya ngolo yina yandi ke bela. Keti munganga yina ta baka mbala mosi lukanu ya kupesa yandi bankisi kukonda kusala yandi ekzame to kukonda kuyula yandi bangiufula? Ata fioti ve. Mutindu mosi mpi, nge ta baka balukanu ya mbote kana nge ke tadila ntete mambu yonso ya me tala balukanu yango. Inki mutindu nge lenda sala yo?

4. Mutindu Bingana 18:13 ke monisa yo, nki lenda sadisa nge na kutadila mambu yonso mbote-mbote? (Tala mpi kifwanisu.)

⁴ Mbala mingi, sambu na kutadila mambu yonso mbote-mbote, yo ke vandaka mfunu na kuyula bangiufula. Yindula nde muntu mosi me bingisa nge na feti mosi. Keti nge fwete kwenda? Kana nge me zabana ve mbote ti munkwa ya feti yango to nge me zaba ve mambu yina yandi me yidika sambu na feti yango, nge lenda yula yandi bangiufula bonso yai: “Feti yango ta salama na wapi mpi na nki ntangu? Bantu ikwa ta vanda na feti yango? Nani ta twadisa feti yango? Banani ta vanda na feti yango? Inki mambu beno me yidika sambu na feti yango? Keti bo ta pesa mpi bantu malafu na feti yango?” Bamvutu na bangiufula yai ta sadisa nge na kubaka lukanu ya mbote.​—Tanga Bingana 18:13.

5. Inki nge fwete sala na nima ya kutadila mambu yonso mbote-mbote?

⁵ Na nima ya kutadila mambu yonso, yindula mbote-mbote. Mu mbandu, nki nge ta sala kana nge me zaba nde bantu mingi yina ta vanda na feti yango ke zitisaka ve minsiku ya Biblia to mpi nde bantu ta nwa malafu mpila bo me zola kukonda muntu ya kulandila bo? Nge lenda bakisa dezia na ntwala nde feti ya mutindu yai lenda kuma feti yina bantu ke salaka mambu ya kisaka-saka. (1 Pie. 4:3) To nki nge fwete  sala kana ntangu yina bo me tula feti yango ta pesa nge ve nzila ya kukwenda na lukutakanu ya dibundu to na kisalu ya kulonga nsangu ya mbote? Kana nge tadila mambu yonso mbote-mbote, yo ta sadisa nge na kubaka lukanu ya mbote. Kansi kele mpi ti kima ya nkaka yina nge fwete sala. Na nima ya kutadila mambu yonso mbote-mbote, sosa mpi kuzaba mutindu Yehowa ke tadilaka yo.​—Bing. 2:6.

SOSA LUTWADISU YA YEHOWA

6. Mutindu Yakobo 1:5 ke monisa yo, sambu na nki beto fwete samba Yehowa na kusadisa beto?

⁶ Lomba Yehowa na kusadisa nge na kubakisa mutindu yandi ke tadilaka lukanu yango. Yehowa ke songaka beto nde yandi ta pesa beto mayele yina ta sadisa beto na kubaka balukanu yina ta pesa yandi kiese. Yandi “ke kabaka mingi [mayele yango] na bantu yonso mpi kukonda kunganina.”​—Tanga Yakobo 1:5.

7. Inki nge fwete sala sambu na kuzaba bangindu ya Yehowa sambu na lukanu mosi ya nge ke zola kubaka? Pesa mbandu.

⁷ Na nima ya kusamba sambu na kusosa lutwadisu ya Yehowa, nge fwete tula mpenza dikebi na mvutu yina yandi ta pesa nge. Mu mbandu: Kana nge me vila nzila ntangu nge ke sala voyage, nge lenda lomba na muntu mosi ya ke zingaka na kisika yina na kusadisa nge. Keti nge ta landa kaka kutambula na ntwala nde muntu yina kupesa nge mvutu? Nge ta sala mpidina ve. Nge ta tula ntete dikebi na lutwadisu yina yandi ke pesa nge. Mutindu mosi mpi, na nima ya kusamba Yehowa sambu yandi pesa nge mayele, nge fwete sosa mvutu na yandi na Biblia, disongidila bansiku mpi minsiku yina ke wakana ti lukanu  ya nge ke zola kubaka. Mu mbandu, na ntwala ya kubaka lukanu ya kukwenda to ve na feti yina beto me katuka kutubila, nge lenda tadila mambu yina Biblia ke longaka sambu na bafeti yina bantu ke salaka mambu ya kisaka-saka, sambu na banduku ya mbi mpi mfunu ya kutula mambote ya Kimfumu ya Nzambi na kisika ya ntete na kisika ya kusosa kusala kaka mambu yina ke sepedisa nge.​—Mat. 6:33; Bar. 13:13; 1 Bak. 15:33.

8. Inki nge fwete sala kana nge ke zola kuzwa bamvutu yina nge kele na yo mfunu? (Tala mpi kifwanisu.)

⁸ Kansi bantangu ya nkaka nge lenda vanda ti mfunu ya lusadisu sambu na kuzwa bamvutu yina nge kele na yo mfunu. Nge lenda lomba bandongisila na mpangi-bakala to mpangi-nkento mosi ya kuyela na kimpeve. Kansi, yo ta vanda mpi sambu na mambote na nge kana nge ke sala mpi bansosa nge mosi. Beto kele ti mikanda mpi bavideo mingi yina lenda sadisa nge mingi, mu mbandu Mukanda ya Bansosa Sambu na Bambangi ya Yehowa mpi mukanda Malongi Sambu na Bansadi ya Nzambi. Kuvila ve nde kima ya kuluta mfunu kele ya kubaka lukanu yina ta pesa Yehowa kiese.

9. Inki mutindu beto lenda zaba kana lukanu na beto ta sepedisa Yehowa? (Baefezo 5:17)

⁹ Inki mutindu beto lenda zaba kana lukanu na beto ta sepedisa Yehowa? Ntete, beto fwete sosa kuzaba yandi mbote. Biblia ke tuba nde: “Nzayilu ya Muntu ya Kuluta Santu kele mayele ya kubakisa mambu.” (Bing. 9:10) Ee, beto ta kuma mpenza ti mayele ya kubakisa mambu kana beto me zaba mbote bikalulu ya Yehowa, mambu yina yandi ke kana kusala mpi mambu yina yandi ke zolaka to yina yandi ke mengaka. Kudiyula nde: ‘Inki mutindu mambu yina mono me zaba sambu na Yehowa lenda sadisa mono na kubaka lukanu yina ta sepedisa yandi?’​—Tanga Baefezo 5:17.

10. Sambu na nki kusadila minsiku ya Biblia kele mfunu mingi kuluta kusala mambu na kulanda bangindu ya bantu ya mabuta na beto to ya bantu ya kisika yina beto ke zingaka?

¹⁰ Sambu na kupesa Yehowa kiese, bantangu ya nkaka yo ta lomba nde beto baka balukanu yina ta pesa bantu ya mabuta mpi banduku na beto mpasi. Mu mbandu, bibuti ya nkaka lenda pusa mwana na bo ya nkento na kubala bakala yina kele ti mbongo mingi to bakala yina lenda pesa bo bima mingi ya makwela ata bakala yango kele ve ti kimpeve ya mbote. Ya kieleka, bo ke zola nde mwana na bo ya nkento kuvanda ti luzingu ya mbote. Ata mpidina, keti bakala yina ta sadisa yandi mpenza na kuvanda ti kinduku ya mbote ti Yehowa? Inki mutindu Yehowa ke tadilaka lukanu ya mutindu yai? Mvutu na ngiufula yai kele na Matayo 6:33. Verse yai ke lombaka Bakristu na kulanda “kusosa ntete Kimfumu.” Ata beto ke zolaka kupesa bibuti na beto lukumu mpi kuzitisa bantu ya kisika yina beto ke zingaka, kima ya kuluta mfunu sambu na beto kele ya kubaka lukanu yina ta pesa Yehowa kiese.

YINDULA MBOTE-MBOTE LUKANU YINA NGE KE ZOLA KUBAKA

11. Mutindu Bafilipi 1:9, 10 ke monisa yo, nki kikalulu ta sadisa nge na kuyindula mbote-mbote lukanu yina nge ke zola kubaka?

¹¹ Na nima ya kutadila minsiku ya Biblia yina lenda sadisa nge na kubaka lukanu ya mbote, nge fwete yindula mbote-mbote lukanu yina nge ke zola kubaka. (Tanga Bafilipi 1:9, 10.) Mayele ya kubakisa mambu ta sadisa nge na kubakisa mambu yina lenda kumina nge kana nge me baka lukanu mosi buna. Bantangu ya nkaka, yo ke vandaka pete na kubaka lukanu mosi buna. Kansi balukanu yonso ve ke vandaka pete na kubaka. Yo yina, mayele ya kubakisa mambu ta sadisa nge na kubaka lukanu ya mbote ata na mambu ya mpasi.

12-13. Inki mutindu mayele ya kubakisa mambu lenda sadisa nge ntangu nge ke sosa kisalu?

¹² Tadila diambu yai: Yindula nde nge ke sosa kisalu sambu na kusadisa dibuta na nge mpi bisalu zole me monana. Nge me tadila mambu yonso mbote-mbote. Mu mbandu, nge me sosa kuzaba kana yo kele bisalu ya nki mutindu, ntangu yina yo ta bakaka nge sambu na kukuma na kisika ya kisalu mpi mambu ya nkaka. Mpi nge me bakisa nde bisalu yango yonso zole kele mbi ve sambu na Bakristu. Mbala ya nkaka nge me pona kisalu mosi sambu nge me sepela ti yo to sambu yo kele ti salere ya mingi.  Ata mpidina, kele ti mambu ya nkaka ya mfunu yina nge fwete tadila sambu na kubaka lukanu ya mbote.

¹³ Mu mbandu, keti kisalu yina nge ke pona ta bikilaka nge ntangu ya kukwenda na balukutakanu ya dibundu? Keti yo ta bikilaka nge ntangu ya kusadisa bantu ya dibuta na nge na kuvanda na lutaninu, na kiese mpi na kinduku ya mbote ti Yehowa? Kudiyula bangiufula ya mutindu yai ta sadisa nge na kutula “mambu ya kuluta mfunu” na kisika ya ntete, disongidila bampusa ya kimpeve ya dibuta na nge mpi ya nge mosi na kisika ya kusosa ntete kuzwa mbongo mingi. Mpidina, Yehowa ta sakumuna lukanu ya mbote yina nge ta baka.

14. Inki mutindu mayele ya kubakisa mambu mpi zola ta sadisa beto na kubudisa ve bantu ya nkaka sakuba?

¹⁴ Mayele ya kubakisa mambu ta sadisa beto mpi na kuyindula mutindu bantu ya nkaka ta kudiwa sambu na lukanu yina beto ke zola kubaka sambu beto “budisa ve bantu ya nkaka sakuba.” (Bafil. 1:10) Yo kele mfunu mingi na kuyindula mambu yai ntangu beto ke zola kubaka balukanu sambu na bilele yina beto ta lwata mpi mutindu ya kuyidika nitu. Mu  mbandu, beto lenda sepela kulwata to kuyidika nitu na mutindu mosi buna. Kansi nki beto fwete sala kana yo ke yangisa bampangi na beto Bakristu mpi bantu ya nkaka? Mayele ya kubakisa mambu ta sadisa beto na kuzitisa mutindu na bo ya kutadila mambu. Zola ta pusa beto na kusosa mambote ya ‘bantu ya nkaka’ mpi na kuzitisa bandilu na beto. (1 Bak. 10:23, 24, 32; 1 Tim. 2:9, 10) Mpidina lukanu yina beto ta baka ta monisa nde beto ke zolaka bantu ya nkaka mpi ke zitisaka bo.

15. Inki nge fwete sala na ntwala ya kubaka lukanu mosi ya nene?

¹⁵ Kana nge ke zola kubaka lukanu mosi ya nene, yindula mambu yina yo ta lomba nde nge sala sambu na kulungisa yo. Yezu me longaka beto nde na ntwala ya kusala konso kima, beto fwete ‘tadila bima yina yo ta lomba.’ (Luka 14:28) Yo yina, na ntwala ya kubaka lukanu yango, nge fwete tadila ntangu yina yo ta bakaka nge, bima yina yo ta lomba mpi bikesa yina yo ta lomba nde nge sala sambu na kulungisa yo. Bantangu ya nkaka, yo lenda lomba nde nge solula ti bantu ya dibuta na beno sambu na kuzaba mambu yina konso muntu na kati na bo lendaka kusala sambu na kulungisa lukanu yango. Sambu na nki kusala mambu mutindu yai kele mfunu? Sambu yo lenda sadisa nge na kusoba mambu ya nkaka ya lukanu yango to nkutu kubaka lukanu ya nkaka ya mbote mingi kuluta. Kana nge ke lomba mpi bandongisila na bantu ya dibuta na beno mpi nge ke sadila yo, bo ta vanda na kiese ya kusadisa nge na kubaka lukanu ya mbote.​—Bing. 15:22.

BAKA BALUKANU YINA TA SEPEDISA YEHOWA

16. Inki mambu ta sadisa nge na kubaka balukanu ya mbote? (Tala mpi lupangu “ Mambu Yina Nge Lenda Sala Sambu na Kubaka Balukanu ya Mbote.”)

¹⁶ Kana nge ke sadila mambu yina beto me tubila na disolo yai, nge ta bakaka balukanu ya mbote. Kana nge ke tadila mambu yonso mbote-mbote mpi kana nge sadila minsiku ya Biblia, nge ta bakaka balukanu yina ke sepedisaka Yehowa. Mpi na nima, nge lenda lomba Yehowa na kusadisa nge na kubaka balukanu ya mbote.

17. Inki kima ya kuluta mfunu lenda sadisa nge na kubaka balukanu ya mbote?

¹⁷ Ata nge me bakaka dezia balukanu mingi ya mbote na bilumbu me luta, kuvila ve nde kima ya kuluta mfunu sambu na kubaka balukanu ya mbote kele kutudila Yehowa ntima na kisika ya kutula ntima na mayele na nge to na mambu yina nge me zaba. Yehowa mpamba muntu lenda pesa nge mayele ya kubakisa mambu mpi nzayilu ya kieleka, yina kele mfunu mingi sambu na kukuma mayele. (Bing. 2:1-5) Yehowa lenda sadisa nge na kubaka balukanu yina ke pesaka yandi kiese.​—Nk. 23:2, 3.