DISOLO YA KULONGUKA 5
NKUNGA 108 Zola ya Kwikama ya Nzambi
Mambote Yina Zola ya Yehowa Ke Natilaka Beto
“Kristu Yezu kwisaka na nsi-ntoto sambu na kugulusa bansumuki.”—1 TIM. 1:15.
NA BUNKUFI
Mambote yina kimenga ya Yezu ke natilaka beto mpi mutindu beto lenda monisila Yehowa ntonda.
1. Inki beto fwete sala sambu na kupesa Yehowa kiese?
YINDULA nde nge me pesa muntu mosi ya nge ke zolaka mingi kado mosi ya kitoko mpi ya mfunu mingi. Yo ta sala nge mpasi kana muntu yango me losa kado yango na kisika mosi buna mpi ke kipe yo ve! Kansi nge ta vanda na kiese kana muntu yango me sepela ti kado yango mpi ke sadila yo mbote. Mbandu yai ke longa beto nki? Yehowa pesaka Mwana na yandi sambu yandi kufwa sambu na beto. Yehowa ta vanda na kiese mingi mpenza kana beto ke monisa ntonda sambu na dikabu ya mfunu mingi ya kimenga ya Yezu mpi sambu na zola na yandi yina pusaka yandi na kupesa dikabu yango!—Yoa. 3:16; Bar. 5:7, 8.
2. Inki beto ta longuka na disolo yai?
2 Na nima ya bamvula, beto lenda kuma kubaka diaka ve kimenga ya Yezu na valere mingi. Diaka, kaka bonso kado mosi ya kitoko ya bo me losa na kisika mosi buna, beto lenda kuma kutudila yo diaka ve dikebi to nkutu kuyindula yo diaka ve. Sambu mambu ya mutindu yai kukumina beto ve, beto fwete yindula mbala na mbala mambu yina Nzambi mpi Kristu me salaka sambu na beto. Disolo yai ta sadisa beto na kuzaba mutindu ya kusala yo. Beto ta longuka mambote yina kimenga ya Yezu ke natilaka beto bubu yai mpi mambote yina yo ta natila beto na bilumbu ke kwisa. Beto ta longuka mpi mambu yina beto lenda sala, mingi-mingi na nsungi yai ya Nkinsi ya Kuyibuka Lufwa ya Yezu, sambu na kumonisa diaka ntonda ya mingi na zola yina Yehowa me monisilaka beto.
MAMBOTE YINA KIMENGA YA YEZU KE NATILAKA BETO BUBU YAI
3. Tubila mutindu mosi yina kimenga ya Yezu ke natilaka beto mambote bubu yai.
3 Kimenga ya Kristu ke natilaka beto dezia mambote bubu yai. Mu mbandu, Yehowa ke lolulaka masumu na beto na nsadisa ya kimenga ya Yezu. Ata muntu mosi ve ke pusaka Yehowa na kulolula beto kansi yandi ke salaka yo na luzolo yonso. Sambu na kumonisila Yehowa ntonda sambu na kikalulu na yandi ya kulolula, muyimbi-bankunga yimbaka nde: “Sambu nge, O Yehowa, nge kele mbote mpi ya kuyilama na kulolula.”—Nk. 86:5; 103:3, 10-13.
4. Yehowa pesaka kimenga ya Yezu sambu na banani? (Luka 5:32; 1 Timoteo 1:15)
4 Bantu ya nkaka lenda yindula nde Yehowa ta lolula ve ata fioti masumu na bo. Na kutuba ya masonga, yo me fwana ve nde Yehowa kulolula masumu na beto. Nkutu ntumwa Polo tubaka nde yo ‘fwanaka ve nde bo binga yandi ntumwa.’ Kansi yandi yikaka nde: “Sambu na ntima ya mbote ya nene ya Nzambi, mono kele mutindu mono kele.” (1 Bak. 15:9, 10) Yehowa ke lolulaka beto ntangu beto ke balulaka ntima na masonga yonso na masumu na beto. Sambu na nki? Yandi ke loluka beto sambu yandi ke zolaka beto kansi ve sambu beto me fwana nde yandi lolula beto. Kana nge ke monaka nde nge me fwana ve nde Yehowa kulolula masumu na nge, kuvila ve nde yandi pesaka kimenga ya Yezu sambu na bantu ya masumu yina ke balulaka ntima kansi ve sambu na bantu ya kukuka.—Tanga Luka 5:32; 1 Timoteo 1:15.
5. Keti kele ti muntu mosi ya lenda tuba nde yandi me fwana mpenza nde Yehowa kulolula masumu na yandi? Tendula.
5 Ata muntu mosi ve na kati na beto fwete yindula nde yandi me fwana mpenza nde Yehowa kulolula masumu na yandi kaka sambu yandi me sadilaka yandi bamvula mingi. Ya kieleka, Yehowa ke vilaka ve mambu yonso ya mbote yina beto ke salaka sambu na yandi. (Baeb. 6:10) Yandi pesaka beto dikabu ya ofele ya kimenga ya Mwana na yandi. Yandi pesaka beto yo ve sambu na kufuta beto sambu na mambu yonso ya mbote yina beto ke salaka sambu na yandi. Kana beto ke tuba to ke yindula nde Nzambi fwete lolula beto to nde beto me fwana mpenza nde yandi lolula beto kaka sambu beto me salaka mambu mingi sambu na yandi, na mutindu mosi buna, beto ta monisa nde yo vandaka ve mfunu nde Kristu kufwa sambu na beto.—Fwanisa ti Bagalatia 2:21.
6. Sambu na nki Polo vandaka kudipesa mingi na kisalu ya Yehowa?
6 Polo zabaka nde yandi fwanaka ve nde Nzambi kulolula masumu na yandi. Ebuna sambu na nki yandi vandaka kudipesa mingi na kisalu ya Yehowa? Yandi vandaka kusala yo ve sambu na kumonisa nde yandi fwanaka mpenza nde Nzambi kulolula masumu na yandi, kansi sambu na kumonisa ntonda sambu na ntima ya mbote ya nene ya Nzambi. (Baef. 3:7) Bonso Polo, beto ke landaka kudipesa ti kikesa na kisalu ya Yehowa sambu na kumonisila yandi ntonda mutindu yandi ke lolulaka beto kansi ve sambu na kumonisa nde beto me fwana nde yandi lolula beto.
7. Tubila mambote ya nkaka yina kimenga ya Yezu ke natilaka beto bubu yai. (Baroma 5:1; Yakobo 2:23)
7 Mambote ya nkaka yina kimenga ya Yezu ke natilaka beto bubu yai yo yai: Yo ke sadisaka beto na kuvanda ti kinduku ya mbote ti Yehowa. a Mutindu beto longukaka yo na disolo ya me luta, beto ke butukaka ve ti kinduku ya mbote ti Nzambi. Kansi kimenga ya Yezu ke sadisaka beto na kukuma “na ngemba ti [Nzambi]” mpi na kinduku ya mbote ti yandi.—Tanga Baroma 5:1; Yakobo 2:23.
8. Sambu na nki beto fwete pesa Yehowa mersi mingi sambu na dikabu ya kisambu?
8 Beto tubila mosi ya makabu yina ke sadisaka beto na kuvanda ti kinduku ya mbote ti Yehowa. Dikabu yango kele kisambu. Yehowa ke waka bisambu yina beto ke salaka na kimvuka mpi bisambu yina konso muntu ke salaka. Kisambu lenda pesa bantima na beto kikesa mpi kusadisa beto na kuvanda na ngemba, kansi yo me suka kaka pana ve. Yo ke kumisaka mpi ngolo kinduku na beto ti Nzambi. (Nk. 65:2; Yak. 4:8; 1 Yoa 5:14) Awa na ntoto, Yezu vandaka kusamba mingi sambu yandi zabaka nde Yehowa vandaka kuwa bisambu na yandi mpi nde bisambu yango vandaka kukumisa diaka ngolo kinduku na yandi ti Tata na yandi. (Luka 5:16) Beto ke pesa Yehowa mersi mingi sambu kimenga ya Yezu ke sadisaka beto na kuvanda banduku na yandi mpi nkutu na kusamba Yehowa!
MAMBOTE YINA KIMENGA YA YEZU TA NATILA BETO NA BILUMBU KE KWISA
9. Inki mambote kimenga ya Yezu ta natila bansadi ya kwikama ya Yehowa na bilumbu ke kwisa?
9 Inki mambote kimenga ya Yezu ta natila bansadi ya kwikama ya Yehowa na bilumbu ke kwisa? Yehowa ta pesa bo luzingu ya mvula na mvula. Bantu mingi ke yindulaka nde yo lenda salama ve ata fioti sambu banda ntama bantu mingi ke fwaka. Kansi banda na luyantiku, Yehowa zolaka nde bantu kuzinga mvula na mvula. Kana Adami salaka ve disumu, luzingu ya mvula na mvula zolaka ve kuvanda kima ya kuyituka sambu na bantu yonso, sambu beto yonso zolaka kuzinga mvula na mvula. Mpi bubu yai, ata luzingu ya mvula na mvula lenda monana kima ya kuyituka sambu na bantu, beto fwete vila ve nde Yehowa pesaka kimenga ya Yezu sambu na kupesa beto diaka kivuvu ya kuzinga mvula na mvula.—Bar. 8:32.
10. Luzingu ya nki mutindu Bakristu yina bo me tulaka mafuta mpi mameme ya nkaka ke vingilaka?
10 Ata Yehowa ta pesa beto luzingu ya mvula na mvula na bilumbu ke kwisa, yandi ke zolaka nde beto banda kuyindula yo bubu yai. Bakristu yina bo me tulaka mafuta ke vingilaka na kiese mpenza luzingu ya kitoko na zulu ntangu bo ta yala ntoto ti Kristu. (Kus. 20:6) Mameme ya nkaka ke vingilaka na kiese mpenza luzingu ya kitoko na Paladisu awa na ntoto, disongidila luzingu ya kukonda mpasi mpi mawa. (Kus. 21:3, 4) Keti nge kele na kati ya mameme ya nkaka yina kele ti kivuvu ya kuzinga mvula na mvula awa na ntoto? Kuyindula ve nde kaka dikabu ya kuzinga na zulu kele kitoko kansi ve dikabu ya kuzinga mvula na mvula awa na ntoto! Yehowa salaka bantu sambu bo zinga mvula na mvula awa na ntoto. Yo yina, luzingu ya mvula na mvula na ntoto ta pesaka beto kiese mingi kibeni.
11-12. Tubila mwa mambote yina beto ta baka na Paladisu. (Tala mpi bifwanisu.)
11 Yindula mutindu nge ta zinga na Paladisu awa na ntoto. Nge ta kudiyangisaka diaka ve sambu na maladi to lufwa. (Yez. 25:8; 33:24) Yehowa ta lungisa mpenza banzala na nge yonso ya mbote. Inki mambu nge ke sepelaka kulonguka? Keti nge ta sepela kulonguka mambu ya me tala bambisi to bandeke? Keti nge ta sepela kulonguka kubula miziki to mutindu ya kusala bifwanisu? Ntembe kele ve nde na Paladisu, beto ta vanda na mfunu ya bantu yina ke salaka ba plan ya banzo, ya bantu yina ke tungaka yo mpi ya bantu yina ke salaka bisalu ya bilanga. Ya kieleka, beto ta vanda mpi na mfunu ya lusadisu na bisalu ya nkaka, mu mbandu bisalu ya kulamba madia, ya kusala bisadilu yina beto ta vanda ti yo mfunu, ya kuyidika ntoto, disongidila bisalu ya kukuna banti mpi bintuntu. (Yez. 35:1; 65:21) Ntangu nge ta zinga mvula na mvula, nge ta vanda ti ntangu ya kulonguka bisalu yai yonso mpi bisalu mingi ya nkaka yina nge ke sepelaka ti yo.
12 Beto ta vanda na kiese mingi ya kuyamba bantu yina ta futumuka! (Bis. 24:15) Yindula mpi kiese yina beto ta vanda ti yo ya kulonguka mambu mingi ya me tala Yehowa na nzila ya bima mingi yina yandi me salaka. (Nk. 104:24; Yez. 11:9) Diambu ya kuluta mfunu, yindula kiese yina beto ta vanda ti yo ya kusambila Yehowa kukonda kusala masumu mpi kukonda kudiyangisa sambu na yo! Keti yo ta vanda mayele na kuvidisa luzingu yai ya kitoko kaka sambu na “kiese ya ntangu fioti ya disumu”? (Baeb. 11:25) Ata fioti ve! Yo me fwana nde beto sala bikesa bubu yai sambu na kubaka luzingu yai ya kitoko. Kima ya beto fwete vila ve kele nde, beto ta vanda diaka ve na mfunu ya kivuvu sambu na luzingu na Paladisu sambu nsuka-nsuka ntoto ta kuma Paladisu, kisika yina beto ta zinga mvula na mvula. Mambu yai yonso ta salama sambu Yehowa ke zolaka beto mingi mpi sambu yandi pesaka kimenga ya Mwana na yandi!
Inki mambote nge ke vingilaka mpenza na kubaka na Paladisu? (Tala baparagrafe 11-12)
MUTINDU NGE LENDA MONISILA YEHOWA NTONDA SAMBU NA ZOLA NA YANDI
13. Inki mutindu beto lenda monisila Yehowa ntonda sambu na zola na yandi? (2 Bakorinto 6:1)
13 Inki mutindu beto lenda monisila Yehowa ntonda sambu na zola yina pusaka yandi na kupesa kimenga ya Yezu? Beto lenda sala yo kana beto ke tula kisalu na yandi na kisika ya ntete na luzingu na beto. (Mat. 6:33) Kima ya kuluta mfunu kele nde, Yezu fwaka “sambu bantu yina ke zinga kuzinga diaka ve sambu na bo mosi, kansi sambu na muntu yina fwaka sambu na bo mpi yina Nzambi futumunaka.” (2 Bak. 5:15) Ya kieleka, beto fwete vila ve na kumonisila Yehowa ntonda sambu na ntima na yandi ya mbote ya nene.—Tanga 2 Bakorinto 6:1.
14. Inki mutindu beto lenda monisa nde beto ke tulaka ntima na lutwadisu ya Yehowa?
14 Beto lenda monisila mpi Yehowa ntonda sambu na zola na yandi kana beto ke tudila yandi ntima mpi ke landa lutwadisu na yandi. Inki mutindu beto lenda sala yo? Beto lenda sala yo kana beto ke sosa lutwadisu ya Yehowa na ntwala ya kubaka balukanu, mu mbandu sambu na banzo-nkanda to kisalu yina beto ke zola kusala. (1 Bak. 10:31; 2 Bak. 5:7) Kana beto ke tudila Yehowa ntima ntangu beto ke baka balukanu, kinduku na beto ti yandi ke kumaka diaka ngolo mingi mpi beto ke kumaka diaka kundima mpenza nde kivuvu ya kuzinga mvula na mvula kele ya kieleka.—Bar. 5:3-5; Yak. 2:21, 22.
15. Inki mutindu beto lenda monisila Yehowa ntonda na nsungi ya Nkinsi ya Kuyibuka Lufwa ya Yezu?
15 Kele ti mutindu ya nkaka diaka yina beto lenda monisila Yehowa ntonda sambu na zola na yandi. Beto lenda sala yo kana na nsungi ya Nkinsi ya Kuyibuka Lufwa ya Yezu, beto ke sala yonso sambu na kumonisa ntonda sambu na kimenga ya Yezu. Diaka, ntangu beto ke kudibongisa sambu na nkinsi yango, beto lenda bingisa mpi bantu ya nkaka. (1 Tim. 2:4) Tendudila bantu yina nge ke bingisa mambu yina ta salama na nkinsi yango. Yo ta vanda mfunu nde nge songa bo bavideo Sambu na Nki Yezu Fwaka? mpi Beto Yibuka Lufwa ya Yezu na jw.org. Bankuluntu fwete bingisa bampangi yina ke longaka diaka ve nsangu ya mbote. Yindula kiese yina ta vanda na zulu mpi na ntoto kana mameme ya nkaka ya Yehowa, yina me vilaka nzila, me vutuka diaka na dibundu na yandi! (Luka 15:4-7) Na Nkinsi ya Kuyibuka Lufwa ya Yezu, beto fwete pesa ve mbote kaka na bampangi na beto yina beto ke vukanaka ti bo mbala na mbala kansi beto fwete sala yo mingi-mingi na bantu yina me kwisa na mbala ya ntete to na bantu yina ke vukanaka diaka ve banda ntama ti beto. Beto fwete sadisa bo na kudiwa mbote!—Bar. 12:13.
16. Sambu na nki beto fwete kudipesa mingi na kisalu ya kulonga na nsungi ya Nkinsi ya Kuyibuka Lufwa ya Yezu?
16 Keti nge lenda kudipesa diaka mingi na mambu ya kimpeve na nsungi ya Nkinsi ya Kuyibuka Lufwa ya Yezu? Kusala mutindu yai kele mutindu mosi ya mbote ya kumonisa ntonda sambu na mambu yonso yina Nzambi mpi Kristu me salaka sambu na beto. Kana beto ke kudipesa mpenza na kisalu ya Yehowa, yandi ta sadisa beto mingi mpi beto ta kuma kutudila yandi diaka mpenza ntima. (1 Bak. 3:9) Diaka, beto fwete landa kutanga baverse yina bo ke tulaka sambu na Nkinsi ya Kuyibuka Lufwa ya Yezu na kamukanda Beto Fimpa Masonuku Konso Kilumbu to na mukanda ya lukutakanu ya kati-kati ya mposo. Nge lenda sadila nkutu baverse yango na kulonguka na nge mosi.
17. Inki ke sepedisaka Yehowa? (Tala mpi lupangu “ Mutindu Beto Lenda Monisa Ntonda Sambu na Zola ya Yehowa.”)
17 Ya kieleka, mbala ya nkaka mambu ya luzingu na nge ke pesa nge ve nzila ya kusala mambu yonso yina beto me tubila na disolo yai. Kansi kuvila ve nde, Yehowa ke fwanisaka ve mambu ya nge ke salaka sambu na yandi ti yina bantu ya nkaka ke sadilaka yandi. Yandi ke talaka na ntima na nge zola yina nge ke vandaka ti yo sambu na yandi. Yandi ke sepelaka na kumona ntonda yina nge ke vandaka ti yo sambu na dikabu ya mfunu mingi ya kimenga ya Yezu.—1 Sam. 16:7; Mar. 12:41-44.
18. Sambu na nki beto fwete monisa ntonda na Yehowa Nzambi mpi na Yezu Kristu?
18 Kimenga ya Yezu kele kima mosi mpamba yina ke salaka nde Yehowa kulolula masumu na beto, beto vanda ti kinduku ya mbote ti yandi mpi kivuvu ya kuzinga mvula na mvula. Bika beto vanda ti lukanu ya kumonisa ntangu yonso ntonda sambu na zola ya Yehowa, yina me pusaka yandi na kupesa beto balusakumunu yai yonso. (1 Yoa. 4:19) Bika beto monisa mpi ntonda na Yezu yina zolaka beto mpi fwaka sambu na beto!—Yoa. 15:13.
NKUNGA 154 Zola Ke Sukaka Ve
a Yehowa lolulaka nkutu ata masumu ya bantu yina sadilaka yandi na ntwala nde Kristu kupesa kimenga na yandi. Yehowa lolulaka bo sambu yandi vandaka kutula ntima nde Mwana na yandi ta landa kukangama na yandi tii na lufwa. Na meso ya Yehowa, yo vandaka bonso nde Yezu pesaka dezia kimenga na yandi banda ntama.—Bar. 3:25.
