1. Inki mambote beto ke bakaka ntangu beto ke kwendaka konso mvula na Nkinsi ya Kuyibuka Lufwa ya Yezu?

 NTEMBE kele ve nde, nge ke ndimaka nde kimenga ya Yezu kele dikabu mosi ya kuluta nene! (2 Bak. 9:15) Mutindu Yezu ndimaka kupesa luzingu na yandi, yo ke sadisaka beto na kuvanda ti kinduku ya mbote ti Yehowa Nzambi. Yo ke pesaka beto mpi kivuvu ya kuzinga mvula na mvula. Yo me fwana mpenza nde beto monisa ntonda sambu na kimenga ya Yezu mpi sambu na Yehowa yina ndimaka na zola yonso na kupesa Mwana na yandi sambu na beto! (Bar. 5:8) Yezu salaka Nkinsi ya Kuyibuka Lufwa na yandi, yina yandi songaka beto na kusalaka konso mvula, sambu na kusadisa beto na kulanda kumonisa ntonda mpi kulanda kuyibuka mambu yina yandi ti Tata na yandi me sadilaka beto.​—Luka 22:19, 20.

2. Inki beto ta longuka na disolo yai?

² Na mvula yai, beto ta sala Nkinsi ya Kuyibuka Lufwa ya Yezu na Mposo 12 avril 2025. Ntembe kele ve nde beto yonso ke na kuyilama sambu na kukwenda na nkinsi yai. Beto ta baka mambote mingi kana na nsungi ya Nkinsi ya Kuyibuka Lufwa ya Yezu, beto ke baka ntangu ya kuyindula mingi a mambu yina Yehowa ti Mwana na yandi me salaka sambu na beto. Na disolo yai, beto ta longuka mambu yina kimenga ya Yezu ke longa beto sambu na Yehowa mpi Mwana na yandi. Disolo ya ke landa ta sadisa beto na kubakisa mambu yina beto fwete sala sambu kimenga ya Yezu kunatila beto mambote mpi mutindu  beto lenda monisa ntonda sambu na kimenga yango.

MAMBU YINA KIMENGA YA YEZU KE LONGA BETO SAMBU NA YEHOWA

3. Inki mutindu lufwa ya muntu mosi lendaka kukatula bamilio ya bantu na kimpika ya disumu mpi ya lufwa? (Tala mpi kifwanisu.)

³ Kimenga ya Yezu ke longa beto nde Yehowa ke zolaka lunungu. (Kul. 32:4) Na nki mutindu? Beto tadila diambu yai: Kukonda bulemfu ya Adami me salaka nde beto baka disumu yina ke nataka na lufwa. (Bar. 5:12) Sambu na kukatula beto na kimpika ya disumu mpi ya lufwa, Yehowa tindaka Yezu sambu yandi pesa luzingu na yandi sambu na beto. Kansi nki mutindu lufwa ya muntu mosi ya kukuka lendaka kukatula bamilio ya bantu na kimpika ya disumu mpi ya lufwa? Ntumwa Polo sonikaka nde: “Mutindu bantu mingi kumaka bansumuki na nzila ya kukonda bulemfu ya muntu mosi [Adami], mutindu mosi mpi bantu mingi ta kuma bantu ya lunungu na nzila ya bulemfu ya muntu mosi [Yezu].” (Bar. 5:19; 1 Tim. 2:6) Na kutuba ya nkaka, Polo zolaka kumonisa nde beto me kumaka bantu ya masumu mpi ke fwaka sambu na kukonda bulemfu ya muntu mosi ya kukuka. Yo yina, yo lombaka mpi nde kaka muntu mosi ya kukuka yina ke lemfukilaka Nzambi kukatula beto na kimpika ya disumu mpi ya lufwa.

4. Sambu na nki yo fwanaka ve kaka nde Yehowa kubika nde bana ya bulemfu ya Adami kuzinga mvula na mvula?

⁴ Keti yo lombaka kaka nde Yezu kufwa sambu na kugulusa beto? Keti yo fwanaka ve kaka nde Yehowa kubika nde bana ya bulemfu ya Adami kuzinga mvula na mvula? Beto bantu ya kukonda kukuka, beto lenda yindula nde kusala mpidina zolaka kuvanda mutindu ya mbote ya kuyidika mambu. Kansi kusala mutindu yai, zolaka ve kumonisa nde Yehowa ke salaka mambu na lunungu. Yehowa kele Nzambi ya lunungu, yo yina yandi lendaka ve ata fioti kukanga meso na mambu ya mbi yina Adami salaka.

5. Inki ke ndimisa beto nde Yehowa ke salaka ntangu yonso mambu ya mbote?

⁵ Inki zolaka kusalama kana Yehowa salaka ve mambu na lunungu, disongidila kana yandi bikaka kaka nde bana ya bulemfu ya Adami kuzinga mvula na mvula na kisika ya kupesa kimenga ya Yezu? Mbala ya nkaka, bantu zolaka kuyindula nde na mambu ya nkaka, Nzambi ke salaka ve mambu na lunungu to bo lendaka mpi kubuya kundima nde Yehowa ta lungisa balusilu na yandi. Beto fwete kudiyangisa ve mutindu mambu me salamaka ve mpidina. Mutindu Yehowa ndimaka kusala mambu na lunungu, disongidila kupesa kimenga ya Mwana na yandi sambu na beto ata yo vandilaka yandi ve pete, yo ke ndimisa beto nde yandi ke salaka ntangu yonso mambu ya mbote.

6. Tubila mutindu mosi yina kimenga ya Yezu ke monisaka zola ya Yehowa. (1 Yoane 4:9, 10)

⁶ Kimenga ya Yezu ke longa beto nde Yehowa kele Nzambi ya lunungu mpi yo ke sadisaka beto mingi-mingi na kubakisa zola ya mingi yina Yehowa ke vandaka ti yo sambu na beto. (Yoa. 3:16; tanga 1 Yoane 4:9, 10.) Kimenga ya Yezu ke longa beto  nde Yehowa ke zolaka nde beto zinga mvula na mvula mpi beto kota mpenza na dibuta na yandi. Tadila mbandu yai: Ntangu Adami salaka disumu, Yehowa basisaka yandi na kati ya dibuta ya bansadi na yandi. Yo yina, beto yonso ke butukaka mpi ve na kati ya dibuta ya bansadi ya Nzambi. Kansi na nzila ya kimenga ya Yezu, Yehowa ke lolulaka masumu na beto mpi ke kotisaka bantu yonso yina ke monisaka bulemfu mpi lukwikilu, na kati ya dibuta ya bansadi na yandi. Nkutu bubu yai, beto ke vandaka ti kinduku ya mbote ti Yehowa mpi ti bampangi na beto Bakristu. Ya kieleka, Yehowa ke zolaka beto mingi!​—Bar. 5:10, 11.

7. Inki mutindu mpasi yina Yezu monaka ke sadisaka beto na kubakisa mingi ya zola yina Yehowa ke vandaka ti yo sambu na beto?

⁷ Sambu na kubakisa zola ya mingi yina Yehowa ke vandaka ti yo sambu na beto, beto fwete yindula mpasi ya mingi yina yandi waka ntangu bantu vandaka kuniokula Mwana na yandi. Satana tubaka nde ata nsadi mosi ve ya Nzambi ta landa kukangama na Nzambi na ntangu ya mpasi. Sambu na kumonisa nde mambu yina Satana tubaka vandaka ya luvunu, Yehowa bikaka nde Mwana na yandi kuniokwama na ntwala ya kufwa. (Yobi 2:1-5; 1 Pie. 2:21) Yehowa vandaka kumona mutindu bamfumu ya mabundu vandaka kuseka Mwana na yandi, mutindu basoda vandaka kubula yandi mpi mutindu bo bulaka yandi minsonso na zulu ya nti ya mpasi. Na nima, Yehowa monaka mutindu Mwana na yandi, yina yandi ke zolaka mingi, fwaka lufwa mosi ya mpasi. (Mat. 27:28-31, 39) Yehowa vandaka ti ngolo ya kukanga nzila na mambu yina yonso. Mu mbandu ntangu bantu tubaka nde: “Bika Nzambi kugulusa yandi ntangu yai kana yandi ke zolaka yandi,” Yehowa lendaka kugulusa yandi. (Mat. 27:42, 43) Kansi kana Nzambi salaka mutindu yina, Yezu zolaka diaka ve kupesa kimenga na yandi mpi beto zolaka ve kuvanda ti kivuvu. Yo yina, Yehowa bikaka nde Mwana na yandi kumona mpasi mpi kufwa.

8. Keti Yehowa waka mpasi ntangu yandi monaka mutindu bantu vandaka kuniokula Mwana na yandi? Tendula. (Tala mpi kifwanisu.)

⁸ Beto fwete yindula ve nde Nzambi ke waka ve mawa to mpasi na ntima sambu yandi kele nkwa-ngolo yonso! Yandi me salaka beto na kifwani na yandi ti mawi ya kiese mpi ya mawa. Yo yina yo ke pusa beto na kundima nde Yehowa ke kudiwaka mpi bonso beto. Biblia ke tuba nde Yehowa ke waka “mpasi na ntima” mpi “mawa.” (Nk. 78:40, 41) Beto tadila mpi disolo ya Abrahami ti Izaki. Kuvila ve nde Yehowa songaka Abrahami na kutambika mwana na yandi mosi kaka. (Kuy. 22:9-12; Baeb. 11:17-19) Yindula mpasi mpi mawa yina Abrahami vandaka na yo ntangu yandi vandaka kuyilama sambu na kufwa mwana na yandi ti mbele. Ebuna, meka kuyindula mpasi ya ngolo yina Yehowa waka ntangu yandi monaka mutindu bantu ya mbi vandaka kuniokula na nku yonso Mwana na yandi mpi kufwa yandi!​—Tala video Landa Mbandu ya Lukwikilu na Bo​—Abrahami, Kitini 2 na jw.org.

9. Inki mutindu Baroma 8:32, 38, 39 ke sadisa beto na kubakisa mingi ya zola yina Yehowa ke vandaka ti yo sambu na beto mpi bampangi na beto?

⁹ Kimenga ya Yezu ke longa beto nde ata muntu mosi ve ke zolaka beto mingi bonso Yehowa, yo vanda bantu ya mabuta na beto yina beto ke zolaka  mingi to banduku na beto ya ngolo. (Tanga Baroma 8:32, 38, 39.) Ntembe kele ve nde, Yehowa ke zolaka beto mingi kuluta mutindu beto mosi ke kudizolaka. Keti nge ke zolaka kuzinga mvula na mvula? Yehowa ke zolaka nkutu mingi nde nge zinga mvula na mvula kuluta nge mosi. Keti nge ke zolaka nde Yehowa kulolula masumu na nge? Yehowa ke zolaka nkutu mingi kulolula masumu na nge. Yandi ke lombaka beto kaka na kumonisa ntonda ya mingi na kimenga ya Yezu, disongidila kumonisa lukwikilu mpi kulemfukila yandi. Kimenga ya Yezu ke ndimisaka beto mpenza nde Nzambi ke zolaka beto mingi. Mpi na nsi-ntoto ya mpa, beto ta longuka diaka mambu mingi sambu na zola ya Yehowa.​—Lon. 3:11.

MAMBU YINA KIMENGA YA YEZU KE LONGA BETO SAMBU NA YEZU

10. (a) Sambu na nki Yezu waka mpasi mingi? (b) Inki mutindu Yezu santisaka zina ya Yehowa? (Tala mpi lupangu “ Mutindu Kwikama ya Yezu Santisaka Zina ya Yehowa.”)

¹⁰ Yezu ke kudiyangisaka mingi sambu na lukumu ya Tata na yandi. (Yoa. 14:31) Yezu waka mpasi mingi mutindu bantu yina fwaka yandi vandaka kutuba nde yandi ke vwezaka Nzambi mpi nde yandi ke pusaka bantu na kukolama, sambu yo lendaka kufingisa zina ya Tata na yandi. Yo yina yandi sambaka nde: “Tata na mono, kana mpila kele, bika nde dikopa yai kuluta ntama ti mono.” (Mat. 26:39) Mutindu Yezu kangamaka na Yehowa tii na lufwa na yandi, yandi santisaka zina ya Tata na yandi.

11. Inki mutindu Yezu monisaka nde yandi ke zolaka mingi bantu? (Yoane 13:1)

¹¹ Kimenga ya Yezu ke longa beto mpi nde Yezu ke zolaka mingi bantu, mingi-mingi balongoki na yandi. (Bing. 8:31; tanga Yoane 13:1.) Mu mbandu Yezu zabaka nde na ntoto, yo ta vandila yandi mpasi mingi na kundima kulungisa mambu ya nkaka, mu mbandu kundima kufwa lufwa mosi ya mpasi. Ata mpidina, Yezu salaka mambu yai yonso ya mpasi sambu yandi ke zolaka bantu kansi ve kaka sambu Yehowa muntu lombaka yandi na kusala yo. Yo yina, Yezu kudipesaka na ntima ya mvimba na kulonga bantu mpi na kusadisa bo. Nkutu na kilumbu  ya lufwa na yandi, yandi bakaka ntangu ya kuyobisa makulu ya bantumwa na yandi, ya kulonga bo mpi ya kupesa bo kikesa. (Yoa. 13:12-15) Ata ntangu Yezu vandaka na zulu ya nti ya mpasi, yandi bakaka ntangu ya kupesa kivuvu na muntu mosi ya mbi yina vandaka na lweka na yandi mpi yandi lombaka Yoane na kukeba mama na yandi. (Luka 23:42, 43; Yoa. 19:26, 27) Yezu monisaka nde yandi ke zolaka mpenza bantu mutindu yandi ndimaka kufwa sambu na bo mpi mutindu yandi sadilaka bo mambu na mawete mpi na zola luzingu na yandi ya mvimba.

12. Inki mambu Yezu ke landaka kusala sambu na beto?

¹² Ata Kristu fwaka “mbala mosi mpamba,” yandi ke landaka kusala mambu mingi sambu na beto. (Bar. 6:10) Na nki mutindu? Tii bubu yai, yandi ke landaka kusadisa beto na kubaka mambote na kimenga na yandi. Beto tubila mikumba mingi yina yandi kele ti yo bubu yai. Yandi kele Ntotila, Nganga-Nzambi ya Nene mpi Mfumu ya dibundu. (1 Bak. 15:25; Baef. 5:23; Baeb. 2:17) Yandi kele mpi ti mukumba ya kuvukisa Bakristu yina bo me tulaka mafuta mpi bantu ya kimvuka ya nene mpi yandi ta manisa kisalu yai na ntwala nde mpasi ya nene kusuka. b (Mat. 25:32; Mar. 13:27) Diaka, yandi ke sadisaka mpika ya kwikama na kudisa mbote bansadi ya Yehowa na bilumbu yai ya nsuka. (Mat. 24:45) Mpi na Luyalu ya Bamvula 1 000, yandi ta landa kusala mambu mingi sambu na mambote na beto. Yehowa pesaka mpenza Mwana na yandi sambu na beto!

LANDA KULONGUKA MAMBU MINGI

13. Inki nge lenda sala sambu na kulanda kulonguka mambu mingi sambu na zola yina Nzambi mpi Kristu ke vandaka ti yo sambu na beto?

¹³ Nge lenda landa kulonguka mambu mingi sambu na zola yina Yehowa Nzambi mpi Yezu Kristu ke vandaka ti yo sambu na beto kana nge ke landa kuyindula mingi mambu yina bo me salaka sambu na beto. Na nsungi yai ya Nkinsi ya Kuyibuka Lufwa ya Yezu, nge lenda tanga ti dikebi ya mingi Evanzile mosi to Baevanzile mingi. Kansi kutanga ve bakapu mingi na mbala mosi. Nge fwete tanga yo malembe-malembe mpi kusosa bikuma ya nkaka yina fwete pusa nge na kuzola diaka mingi Yehowa mpi Yezu. Diaka, songa bantu ya nkaka mambu yina nge me longuka na lutangu na nge ya Biblia.

14. Mutindu Nkunga 119:97 mpi noti na nsi ya lutiti ke monisa yo, nki mutindu kusala bansosa lenda sadisa beto na kulanda kulonguka mambu mingi sambu na kimenga ya Yezu mpi sambu na mambu mingi ya nkaka? (Tala mpi kifwanisu.)

¹⁴ Ata nge me kumaka nsadi ya Yehowa banda bamvula mingi, nge lenda kudiyula kana kele ti mambu ya nkaka ya mpa yina nge lenda longuka  na mambu ya nge me zabaka mbote, mu mbandu lunungu ya Nzambi, zola na yandi mpi kimenga ya Yezu. Ya kieleka, beto ta landa kaka kuvanda ti mambu mingi ya kulonguka sambu na mambu yai mpi na mambu mingi ya nkaka. Yo yina, nki nge lenda sala? Tanga mpi longuka mbote-mbote mambu ya mfunu na mikanda na beto. Kana nge me tanga verse mosi mpi nge me bakisa yo ve mbote, nge lenda sadila yo bansosa. Na nima, kilumbu ya mvimba nge lenda yindula mingi mambu ya mpa yina nge me longuka mpi mambu yina yo ke longa nge sambu na Yehowa, Mwana na yandi mpi zola yina bo ke vandaka ti yo sambu na nge.​—Tanga Nkunga 119:97 mpi noti na nsi ya lutiti.

15. Sambu na nki beto fwete landa kusosa kulonguka mambu ya mpa na Biblia?

¹⁵ Kulemba ve nitu kana nge me zwa ve kima mosi ya mpa to ya me sepedisa nge na konso mbala yina nge ke tanga to ke sala bansosa. Yindula nde nge kele muntu yina ke sosaka wolo. Yo ta lomba nde nge vanda ntima-nda sambu bantu ya ke sosaka wolo ke salaka bilumbu to bantangu mingi sambu na kuzwa ata kitini ya fioti ya wolo. Ata mpidina, bo ke landaka kaka kusosa sambu konso kitini ya fioti ya wolo ke vandaka mfunu mingi sambu na bo. Kansi konso kima ya mpa ya beto me longuka na Biblia ke vandaka mfunu mingi kuluta wolo! (Nk. 119:127; Bing. 8:10) Yo yina, vanda ntima-nda mpi landa kuzitisa manaka na nge ya kutanga Biblia.​—Nk. 1:2.

16. Inki mutindu beto lenda landa mbandu ya Yehowa mpi ya Yezu?

¹⁶ Ntangu nge ke longuka, yindula mitindu nge lenda sadila mambu yina nge ke longuka. Mu mbandu, mutindu nge lenda landa mbandu ya lunungu ya Yehowa, disongidila kusadila bantu yonso mambu ya mbote kukonda kupona-pona. Yindula mpi mutindu nge lenda landa mbandu ya zola yina Yezu ke vandaka ti yo sambu na Tata na yandi mpi sambu na bantu, disongidila kundima kuniokwama sambu na zina ya Yehowa mpi kudipesa sambu na kusadisa bampangi na beto Bakristu. Nge lenda landa mpi mbandu ya Yezu kana nge ke longa bantu nsangu ya mbote sambu na kupesa bo dibaku ya kumonisa lukwikilu na kimenga ya Yezu, dikabu ya kuluta mfunu yina Yehowa me pesaka beto.

17. Inki beto ta longuka na disolo ya ke landa?

¹⁷ Kana beto ke landa kulonguka mambu mingi sambu na kimenga ya Yezu, yo ta pusa beto diaka na kuzola mingi Yehowa ti Mwana na yandi. Mpidina, Yehowa ti Yezu ta zola beto mpi diaka mingi. (Yoa. 14:21; Yak. 4:8) Yo yina, beto landa kusadila mbote Biblia mpi mikanda yonso yina Yehowa ke pesaka beto na dibundu na yandi sambu na kulanda kulonguka mambu mingi sambu na kimenga ya Yezu. Na disolo ya ke landa, beto ta longuka mambote ya nkaka yina kimenga ya Yezu ke natilaka beto mpi mutindu beto lenda monisa ntonda na zola yina Yehowa me monisilaka beto.