Bonso bantu mingi ya nkaka, mbala ya nkaka yo ke vandilaka nge mpasi na kuyibuka mambu yina nge ke longuka. Kansi, yo ke vandaka pete na kuyibuka mambu yina Yezu longaka sambu yandi vandaka kusadila mingi-mingi bambandu yina vandaka kukwisila bantu mbala mosi na mabanza. Beto lenda mona mpi bambandu yango na mabanza mpi yo ke sadisaka beto na kuyibuka mambu yina Yezu longaka. Mutindu mosi, nge lenda yibuka mambu mingi ya nge ke longuka kana nge ke meka kumona yo na mabanza. Inki mutindu nge lenda sala yo? Nge lenda sala yo kaka kana nge ke sala bifwanisu na yo ntangu nge ke longuka.

Mbala mingi, bantu yina ke salaka bifwanisu ya mambu yina bo ke longuka, ke yibukaka yo kukonda mpasi. Kusala mutindu yai ke sadisaka bo na kubakisa mbote mambu ya bo ke longuka mpi bangindu ya mfunu ya mambu yango. Mpi bifwanisu na bo ke vandaka ve mpasi. Kusala bifwanisu ke sadisaka mingi-mingi bambuta na kuyibuka kukonda mpasi mambu yina bo ke longuka.

Na mbala ya nima yina nge ta longuka, nge lenda meka kusala bifwanisu ya mambu yina nge ke longuka. Kana nge ke sala mpidina, nge lenda yituka na kumona mutindu nge lenda yibuka mambu mingi ya nge me longuka!