1. Inki bantu mingi ke sosaka mingi bubu yai?

 BUBU yai, bantu mingi ke sosaka mingi kaka mambote na bo mosi. Mu mbandu, bo ke sadilaka basite ya Internet sambu na kubenda dikebi ya bantu na mambu yina bo ke sala mpi sambu na kudikumisa. Kansi bubu yai, bantu fioti mpamba ke kumisaka Yehowa Nzambi. Na disolo yai, beto ta pesa bamvutu na bangiufula yai: Kupesa Yehowa nkembo ke tendula nki? Sambu na nki beto ke pesaka yandi nkembo? Inki mutindu beto lenda pesa Nzambi nkembo yina yandi me fwana mpenza na kubaka? Mpi nki mutindu Yehowa ta pesa zina na yandi nkembo na bilumbu ke kwisa?

KUPESA YEHOWA NKEMBO KE TENDULA NKI?

2. Inki mutindu Yehowa monisaka bunene na yandi na Ngumba ya Sinai? (Tala mpi kifwanisu.)

² Ngogo nkembo ke tendula nki? Na Biblia, ngogo “nkembo” lenda tendula konso kima yina ke monisa bunene ya muntu mosi. Bilumbu fioti na nima ya kubasisa bantu ya Izraele na kimpika na Ezipte, Yehowa monisaka bo bunene na yandi. Yindula mambu yai: Bamilio ya bantu ya Izraele me vukana na nsi ya Ngumba ya Sinai sambu na kuwa mambu yina Yehowa ke zola kusonga bo. Dituti mosi ya ndombe me fika ngumba yango. Mpi na mbala mosi, ntoto me nikana ngolo, tiya mosi ya ke monana bonso tiya ya volcan ti nsemo ya nzasi ke basika na ngumba yango. Diaka, makelele ya ngolo ya nzasi ti makelele ya kibongo ke wakana na ngumba yango. (Kub. 19:16-18; 24:17; Nk. 68:8) Yindula mutindu bantu ya Izraele yitukaka ntangu Yehowa monisaka bo bunune na yandi.

3. Inki mutindu beto ke pesaka Yehowa nkembo?

³ Ebuna beto bubu yai? Keti beto lenda pesa mpi Yehowa nkembo? Ee, beto lenda sala yo. Mu mbandu, beto ke pesaka Yehowa nkembo ntangu beto ke songaka bantu ya nkaka bunene na yandi ya ke yitukisa mpi bikalulu na yandi ya mbote. Diaka, beto ke pesaka  Nzambi nkembo sambu na mambu yina beto ke salaka na lusadisu na yandi. (Yez. 26:12) Ntotila Davidi vandaka mbandu ya mbote kibeni na yina me tala kupesa Yehowa nkembo. Ntangu Davidi sambaka na ntwala ya dibundu ya mvimba ya bantu ya Izraele, yandi songaka Nzambi nde: “O Yehowa, bunene, ngolo, kitoko, lukumu, mpi nkembo kele ya nge, sambu bima yonso ya kele na zulu mpi na ntoto kele ya nge.” Ntangu Davidi manisaka kusamba, “dibundu ya mvimba kumisaka Yehowa.”​—1 Bans. 29:11, 20.

4. Inki mutindu Yezu vandaka kupesa Yehowa nkembo?

⁴ Awa na ntoto, Yezu pesaka Tata na yandi nkembo mutindu yandi vandaka kusonga bantu nde Yehowa muntu vandaka kupesa yandi ngolo ya kusala mambu ya kuyituka. (Mar. 5:18-20) Diaka, Yezu vandaka kupesa Yehowa nkembo na mutindu yandi vandaka kusadila bantu mambu mpi na mutindu yandi vandaka kulonga bo mambu ya Tata na yandi. Kilumbu mosi, Yezu vandaka kulonga na sinagoga mpi nkento mosi ya vandaka ti mpeve mosi ya mbi banda bamvula 18 vandaka mpi pana. Nkento yina vandaka ya kufumbama sambu na mpeve yina ya mbi. Yo yina, yandi vandaka kukuka ve ata fioti kutelama mbote. Yo vandaka diambu mosi ya mpasi mpenza! Yezu wilaka nkento yina mawa, yo yina yandi pusanaka pene-pene na yandi mpi yandi songaka yandi na mawete yonso nde: “Nkento, nge me beluka na maladi na nge.” Yandi tulaka maboko na yandi na zulu ya nkento yango mpi na mbala mosi yandi telamaka mbote mpi yandi “yantikaka kupesa Nzambi nkembo” sambu yandi belukaka mpenza! (Luka 13:10-13) Nkento yina vandaka ti kikuma ya mbote ya kupesa Yehowa nkembo mpi beto fwete sala mutindu mosi.

SAMBU NA NKI BETO KE PESAKA YEHOWA NKEMBO?

5. Sambu na nki beto ke zitisaka Yehowa?

⁵ Beto ke pesaka Yehowa nkembo sambu beto ke zitisaka yandi mingi. Beto kele ti bikuma mingi ya ke pusaka beto na kupesa yandi luzitu. Mu mbandu, Yehowa kele Nkwa-Ngolo Yonso, disongidila yandi kele ti ngolo mingi mpenza. (Nk. 96:4-7) Mayele na yandi ya mingi ke monanaka pwelele na bima yina yandi me salaka. Yandi muntu ke pesaka beto luzingu mpi bima yina ke sadisaka beto na kuzinga. (Kus. 4:11) Yandi kele Nzambi ya kwikama. (Kus. 15:4) Mambu yonso yina yandi ke salaka ke nungaka mpi yandi ke lungisaka ntangu yonso mambu yina yandi ke silaka. (Yoz. 23:14) Yo yina, profete Yeremia tubaka mambu yai sambu na Yehowa: “Na kati ya bantu yonso ya mayele ya makanda mpi na kati ya bimfumu na bo yonso, kele ve ata ti muntu mosi yina kele bonso nge”! (Yer. 10:6, 7) Ya kieleka, beto kele ti bikuma ya mbote ya kuzitisa Tata na beto ya zulu. Kansi, beto fwete suka kaka ve na kuzitisa yandi, beto fwete zola yandi mpi.

6. Sambu na nki beto ke zolaka Yehowa?

⁶ Beto ke pesaka Yehowa nkembo sambu beto ke zolaka yandi mingi. Beto ke zolaka Yehowa sambu yandi kele ti bikalulu mingi ya mbote. Yandi ke wilaka bantu mawa. (Nk. 103:13; Yez. 49:15) Ntangu beto ke kutanaka ti bampasi, yandi ke kuditulaka na kisika na beto. (Zek. 2:8) Yandi ke sadisaka beto na kuzaba yandi mpi na kukuma banduku na yandi. (Nk. 25:14; Bis. 17:27) Yandi kele Nzambi ya kudikulumusa. Yo yina, yandi ke “niekaka sambu na kutala zulu ti ntoto, yandi ke katulaka muntu ya kukonda mfunu na mfututu mpi ke tedimisaka yandi.” (Nk. 113:6, 7) Bikuma yai yonso ke pusaka beto na kupesa nkembo na Nzambi na beto ya nene.​—Nk.86:12.

7. Inki mukumba ya mfunu mingi beto kele ti yo?

⁷ Beto ke pesaka Yehowa nkembo ntangu beto ke sadisaka bantu na kuzaba yandi. Bantu mingi ke zabaka ve kieleka sambu na Yehowa. Sambu na nki? Sambu Satana me fikaka mabanza na bo na mambu ya luvunu yina yandi ke tubaka sambu na Nzambi. (2 Bak. 4:4) Satana me ndimisaka bantu mingi nde Yehowa kele Nzambi ya nku, yandi ke kudiyangisaka ve sambu na bampasi na beto mpi nde yandi muntu kele na kisina ya bampasi mingi  na nsi-ntoto. Kansi beto me zaba kieleka sambu na Nzambi na beto! Yo yina, beto kele ti mukumba ya kusonga bantu bikalulu ya Nzambi na beto mpi ya kusadisa bo na kupesa yandi nkembo. (Yez. 43:10) Nkunga 96 ke tubila mingi-mingi nkembo yina beto fwete pesa Yehowa. Ntangu beto ke longuka mwa baverse ya nkunga yai, yindula mambu yina nge fwete sala sambu na kupesa Yehowa nkembo yina yandi me fwana mpenza na kubaka.

INKI MUTINDU BETO LENDA PESA YEHOWA NKEMBO YINA YANDI ME FWANA NA KUBAKA?

8. Tanga mwa mambu yina beto lenda sala sambu na kupesa Yehowa nkembo. (Nkunga 96:1-3)

⁸ Tanga Nkunga 96:1-3. Beto ke pesaka Yehowa nkembo ntangu beto ke tubaka mambu ya mbote sambu na yandi. Baverse yai ke lomba beto bansadi ya Yehowa na ‘kuyimbila yandi,’ na ‘kukumisa yandi,’ na ‘kuzabisa nsangu ya mbote ya luguluku na yandi’ mpi na ‘kuzabisa nkembo na yandi na makanda.’ Beto ta kumisa Tata na beto ya zulu kana beto ke sala mambu yai yonso. Bansadi ya Nzambi ya ntangu ya ntama vandaka na kiese ya kusonga bantu mambu yonso ya mbote yina Yehowa sadilaka bo mpi bikalulu na yandi ya mbote. (Dan. 3:16-18; Bis. 4:29) Inki mutindu beto lenda landa mbandu na bo?

9-10. Mbandu ya Angelena ke longa beto nki? (Tala mpi kifwanisu.)

⁹ Beto tadila mbandu ya mpangi-nkento Angelena a na États-Unis. Yandi tubilaka ti kikesa mpenza bikalulu ya Yehowa na kisika ya kisalu. Ntangu bo bakaka Angelena na kisalu, bo bingisaka yandi ti bantu ya nkaka yina bo katukaka mpi kubaka na kisalu yango sambu bo tubila mambu ya luzingu na bo. Angelena yidikaka mwa bafoto sambu na kusonga bo kiese yina kuvanda Mbangi ya Yehowa ke natilaka yandi. Kansi ntangu fioti na ntwala nde bo lomba yandi na kutuba, muntu mosi yina bo bakaka mpi na kisalu yango yantikaka kutuba nde yandi yelaka na dibuta ya Bambangi ya Yehowa mpi yandi tubaka mambu ya mbi sambu na mambu yina beto ke kwikilaka. Angelena ke tuba nde: “Ntima na mono vandaka kubula sambu na boma. Ata mpidina, mono kuditubilaka nde: ‘Keti mono fwete bika muntu yai kusonga bo mambu ya luvunu sambu na Yehowa? To keti mono fwete songa bo mambu ya kieleka sambu na Yehowa?’”

¹⁰ Ntangu muntu yango manisaka kutuba, na mbala mosi Angelena salaka kisambu na nsi ya ntima. Na nima yandi songaka muntu yina na mawete yonso nde: “Mambu ya luzingu na mono me fwanana ti ya nge. Mono me yelaka mpi na dibuta  ya Bambangi ya Yehowa mpi tii bubu yai, mono kele kaka Mbangi ya Yehowa.” Angelena vandaka diaka ve ti boma. Yandi songaka bantu yina bafoto yina yandi bakaka ti bampangi ya nkaka na balukutakanu na beto sambu na kusonga bo kiese yina kusadila Yehowa ke natilaka bo. Mpi na luzitu yonso, yandi tendudilaka bo mambu yina yandi ke kwikilaka. (1 Pie. 3:15) Inki salamaka na nima? Ntangu Angelena manisaka kutuba, muntu yina vandaka kutuba mambu ya mbi sambu na Bambangi ya Yehowa bikaka kutuba mambu yina ya mbi. Nkutu, muntu yango tubilaka bantangu ya kiese yina yandi lutisaka mpi ti Bambangi ya Yehowa na kileke. Angelena ke tuba nde: “Yo me fwana nde beto kotila Yehowa. Kuzabisa bantu kieleka sambu na zina ya Yehowa kele lukumu ya nene.” Yo kele mpi lukumu ya nene sambu na beto na kupesa Yehowa nkembo ata ntangu bantu ke tuba mambu ya mbi sambu na yandi.

11. Inki mutindu banda ntama bansadi ya Yehowa ke sadilaka mambu yina kele na Nkunga 96:8?

¹¹ Tanga Nkunga 96:8. Beto ke pesaka Yehowa nkembo ti bima na beto ya valere. Banda ntama, bansadi ya kwikama ya Yehowa ke pesaka yandi nkembo ntangu yonso ti bima na bo ya valere. (Bing. 3:9) Mu mbandu, bantu ya Izraele pesaka mbongo ti bima na bo ya valere sambu na bisalu ya kutunga mpi ya kuyidika tempelo. (2 Bant. 12:4, 5; 1 Bans. 29:3-9) Balongoki ya nkaka ya Yezu “vandaka kusadila bima na bo” sambu na kusadisa Yezu ti bantumwa na yandi. (Luka 8:1-3) Diaka, Bakristu ya ntete tindilaka bampangi na bo, yina vandaka na mpasi, lusadisu. (Bis. 11:27-29) Bubu yai, beto ke kumisaka mpi Yehowa ntangu beto ke pesaka makabu ya luzolo ya mbote.

12. Inki mutindu makabu na beto ke pesaka Yehowa nkembo? (Tala mpi kifwanisu.)

¹² Beto tadila mbandu mosi ya ke monisa mutindu makabu na beto ke pesaka Yehowa nkembo. Rapore mosi ya 2020 ke monisa nde, musipu mosi ya ngolo bakaka ntangu ya nda na Zimbabwe. Yo yina bantu mingi mpenza, ti mpangi-nkento Prisca mpi, zolaka kufwa na musipu yango sambu na nzala. Ata mpidina, mpangi-nkento Prisca landaka kulonga nsangu ya mbote konso Kitatu mpi konso Kitanu ata na ntangu ya kubundula bilanga kaka mutindu yandi vandaka kusala yo. Bantu ya nkaka ya bwala na bo vandaka kuseka yandi sambu yandi vandaka kukwenda kulonga nsangu ya mbote na kisika ya kukwenda na bilanga. Nkutu bo vandaka kusonga yandi nde: “Nge ta fwa na nzala.” Mpangi-nkento Prisca vandaka kutula ntima nde Yehowa ta lungisa bampusa na yandi. Yo yina yandi vandaka kuvutudila bantu yina nde: “Yehowa ke yambulaka ve ata fioti bansadi na yandi.” Ntangu fioti na nima, yandi zwaka mpi bima yina dibundu ya Yehowa  tindilaka bampangi na Zimbabwe. Bampangi na beto zwaka bima yina sambu na makabu ya luzolo ya mbote yina beto ke pesaka. Ntangu bantu yina vandaka kuseka mpangi Prisca monaka bima yina, bo yitukaka mingi mpi bo songaka yandi nde: “Nzambi me yambula nge ve ata fioti. Yo yina, beto ke zola mpi kulonguka mambu mingi ya me tala yandi.” Bantu nsambwadi na kati ya bantu yina yantikaka kukwenda na balukutakanu na beto ya dibundu.

13. Mutindu Nkunga 96:9 ke monisa yo, nki beto fwete sala sambu na kupesa Yehowa nkembo?

¹³ Tanga Nkunga 96:9. Beto ke pesaka Yehowa nkembo ntangu beto ke salaka mambu ya mbote. Yo vandaka kulomba nde banganga-nzambi yina vandaka kusala na nzo-tenta mpi na nima na tempelo ya Yehowa kuvanda bunkete na nitu. (Kub. 40:30-32) Ata mpidina, kuvanda bunkete na mambu ya beto ke yindula mpi ke sala kele mfunu kuluta kuvanda bunkete na nitu. (Nk. 24:3, 4; 1 Pie. 1:15, 16) Beto fwete sala ngolo sambu na kuyambula “kimuntu ya ntama,” disongidila kubuya kuyindula mpi kusala mambu ya mbi. Diaka, beto fwete lwata “kimuntu ya mpa,” disongidila kuyindula mpi kusala mambu na mutindu yina ta monisa bantu nde beto ke landaka mbandu ya bikalulu ya mbote ya Yehowa. (Bakol. 3:9, 10) Yehowa ke sadisaka nkutu ata bantu yina vandaka kusala mambu ya mbi kibeni na kusoba mpi na kulwata kimuntu ya mpa.

14. Mbandu ya Jack ke longa nge nki? (Tala mpi kifwanisu.)

¹⁴ Beto tadila mbandu ya Jack yina vandaka mubulu mpi kigonsa mingi. Bo vandaka nkutu kubinga yandi nde Demo. Bo zengilaka yandi nkanu ya lufwa sambu na mambu ya mbi yina yandi salaka. Kansi na ntwala nde kilumbu yina bo zolaka kufwa Jack kulunga, yandi ndimaka kulonguka Biblia ti mpangi-bakala mosi yina kwisaka kutala bantu na boloko yina bo tulaka Jack. Ata Jack salaka mambu ya mbi kibeni, yandi yambulaka bikalulu ya mbi mpi na nima ya mwa ntangu, yandi bakaka mbotika mpi kumaka Mbangi ya Yehowa. Jack sobaka mpenza. Yo yina na kilumbu yina yo lombaka nde bo fwa yandi, bantu ya nkaka ya ke kengilaka boloko vandaka kudila ntangu bo vandaka kupesa yandi mbote ya nsuka. Mfumu mosi ya basoda yina vandaka kusala na boloko yango tubaka nde: “Jack vandaka ntete muntu ya kuluta mbi na boloko yai, kansi yandi me kumaka muntu ya kuluta mbote.” Mposo yina landaka na nima ya lufwa ya Jack, bampangi yina vutukaka na boloko yango sambu na kutwadisa lukutakanu, kutanaka ti muntu mosi ya boloko yina kwisaka na lukutakanu yango na mbala ya ntete. Inki pusaka yandi na kukwisa na lukutakanu  yina? Yandi kwisaka sambu yandi yitukaka na kumona bikalulu ya mbote yina Jack kumaka ti yo mpi yandi zolaka kuzaba mambu yina yo lombaka nde yandi sala sambu na kukuma kusambila Yehowa. Ya kieleka, bikalulu na beto ya mbote ke pesaka nkembo na Tata na beto ya zulu!​—1 Pie. 2:12.

INKI MUTINDU YEHOWA TA PESA ZINA NA YANDI NKEMBO NA BILUMBU KE KWISA?

15. Inki mutindu Yehowa ta santisa mbote-mbote zina na yandi na bilumbu ke kwisa? (Nkunga 96:10-13)

¹⁵ Tanga Nkunga 96:10-13. Baverse ya nsuka ya Nkunga 96 ke monisa nde Yehowa kele Ntotila mpi Zuzi ya lunungu. Yehowa ta pesa zina na yandi nkembo na bilumbu ke kwisa ntangu yandi ta sambisa ntoto ya mvimba. Kubika fioti, yandi ta fwa Babilone ya Nene sambu yo ke fingisaka zina na yandi ya santu. (Kus. 17:5, 16; 19:1, 2) Ntangu bo ta fwa Babilone ya Nene, bantu ya nkaka lenda baka lukanu ya kusambila Yehowa ti beto. Mpi nsuka-nsuka na Armagedoni, Yehowa ta fwa nsi-ntoto yai ya Satana ti bantu yonso yina ke teleminaka Yehowa mpi ke vwezaka zina na yandi. Kansi yandi ta gulusa bantu yina ke pesaka yandi nkembo, disongidila bantu yina ke zolaka yandi mpi ke zitisaka yandi. (Mar. 8:38; 2 Bate. 1:6-10) Na kumekama ya nsuka na nima ya Luyalu ya Bamvula 1000 ya Kristu, Yehowa ta santisa zina na yandi mbote-mbote. (Kus. 20:7-10) Na ntangu yina, “ntoto ta fuluka ti nzayilu ya nkembo ya Yehowa mutindu masa ke fulusaka nzadi-mungwa.”​—Hab. 2:14.

16. Inki lukanu nge me baka? (Tala mpi kifwanisu.)

¹⁶ Yindula kiese ya mingi yina beto ta vanda ti yo ntangu bawanzio ti bantu yonso ta pesaka Yehowa nkembo yina me fwana na zina na yandi. Kansi bubu yai dezia, beto fwete sadila mabaku yonso yina beto kele ti yo sambu na kupesa Nzambi na beto nkembo. Sambu na kusadisa beto na kubakisa mfunu ya kupesa Yehowa nkembo, Nto-Kimvuka me pona Nkunga 96:8, verse ya mvula sambu na 2025 yina ke tuba nde: “Beno pesa Yehowa nkembo yina me fwana na zina na yandi.”