1. Yehowa ke zola nde beto sala nki bubu yai?

 BUBU yai, Nzambi ke zola nde beto longa nsangu ya mbote ya Kimfumu na ntoto ya mvimba. (Mar. 13:10; 1 Tim. 2:3, 4) Yo kele kisalu ya Yehowa mpi yo kele mfunu mingi. Yo yina, yandi me tulaka Mwana na yandi yina yandi ke zolaka mingi sambu na kutwadisa kisalu yango. Beto ke ndima nde sambu Yezu muntu ke twadisa kisalu yango, yo ta mana na ntangu yina Yehowa ke zola na ntwala nde nsuka kukwisa.—Mat. 24:14.

2. Inki beto ta mona na disolo yai?

² Na disolo yai, beto ta mona mutindu Yezu ke sadila “mpika ya kwikama mpi ya mayele” sambu na kupesa balongoki na yandi madia ya kimpeve mpi sambu na kuyidika bo sambu na kusala kampanie ya kuluta nene ya kisalu ya kulonga nsangu ya mbote. (Mat. 24:45) Beto ta mona mpi mambu yina konso muntu lenda sala sambu na kusadisa Yezu mpi mpika ya kwikama.

3. Inki kiyeka bo me pesaka Yezu?

³ Yezu ke twadisa kisalu ya kusamuna. Inki ke ndimisa beto yo? Ntangu fioti na ntwala nde Yezu kumata na zulu, yandi kutanaka ti balongoki na yandi yina kangamaka kaka na yandi na ngumba ya Galilea. Yandi songaka bo nde: “Nzambi me pesaka mono kiyeka yonso na zulu mpi na ntoto.” Na nima yandi songaka bo nde: “Yo yina, beno kwenda mpi beno kumisa bantu ya makanda yonso balongoki.” (Mat. 28:18, 19) Katula mambu ya nkaka yina bo pesaka Yezu, bo pesaka yandi mpi kiyeka ya kutwadisa kisalu ya kusamuna.

4. Inki ke ndimisa beto nde Yezu ke landa kutwadisa kisalu ya kusamuna?

 ⁴ Yezu tubaka nde kisalu ya kusamuna mpi ya kukumisa bantu balongoki ta salama “na makanda yonso” mpi nde yandi ta vanda ti balongoki na yandi “bilumbu yonso tii na nsukilu ya ngidika ya bima.” (Mat. 28:20) Mambu yina ke monisa pwelele nde Yezu ke landa kutwadisa kisalu ya kusamuna tii bubu yai.

5. Inki mutindu Nkunga 110:3 ke na kulungana?

⁵ Yezu kudiyangisaka ve nde na bilumbu ya nsuka, bantu ta vanda ve mingi sambu na kusala kisalu yango. Sambu yandi zabaka nde mambu yina muyimbi-bankunga tubaka ta lungana. Yandi tubaka nde: “Bantu na nge ta kudipesa na luzolo na bo mosi na kilumbu yina nge ta twadisa basoda na nge na bitumba.” (Nk. 110:3) Kana nge ke longaka nsangu ya mbote, yo ke monisa nde nge ke sadisa Yezu ti mpika ya kwikama mpi nge ke sala nde mambu yina muyimbi-bankunga tubaka kulungana. Kansi beto ke kutana mpi ti mambu ya mpasi na kisalu yango.

6. Inki kele mpasi ya ntete yina bansamuni ya Kimfumu ke kutana ti yo bubu yai?

⁶ Mpasi ya ntete yina bansamuni ya Kimfumu ke kutana ti yo, kele mbangika. Baaposta, bamfumu ya mabundu mpi bamfumu ya luyalu me songaka bantu mingi mambu ya luvunu na yina me tala kisalu na beto. Kana bantu ya mabuta na beto, bantu yina beto me zaba mpi bantu yina beto ke salaka ti bo kundima mambu yina ya luvunu, bo lenda pusa beto na kuyambula kusadila Yehowa mpi na kuyambula kusamuna. Na bansi ya nkaka, bambeni ke niokula bampangi na beto, bo ke nwanisa bo, bo ke kanga bo mpi nkutu bo ke tula bo na boIoko. Kansi yo ke yitukisa beto ve sambu Yezu tubaka nde: “Makanda yonso ta menga beno sambu na zina na mono.” (Mat. 24:9) Bampasi yonso yina beto ke kutana ti yo, ke monisa kibeni nde Yehowa ke ndima beto. (Mat. 5:11, 12) Diabulu muntu kele na kisina ya bampasi yina. Kansi Yezu me luta yandi na ngolo. Yezu ke sadisa beto na kulonga nsangu ya mbote na makanda yonso. Beto tala mambu yina ke monisa yo.

7. Inki ke monisa nge kibeni nde Kusonga 14: 6, 7 ke na kulungana?

⁷ Mpasi ya nkaka yina beto ke kutanaka ti yo ntangu beto ke longaka nsangu ya mbote kele yai, bantu mingi ke tubaka ve ndinga yina beto ke tubaka. Na mbona-meso yina Yezu monisaka ntumwa Yoane, Yezu monisaka yandi nde na bilumbu na beto, bo ta longa nsangu ya mbote na bandinga yonso. (Tanga Kusonga 14:6, 7.) Inki mutindu? Beto ke pesa bantu mingi kibeni dibaku ya kundima nsangu ya mbote. Bubu yai, na ntoto ya mvimba bantu ke tangaka mikanda yina ke tendulaka Biblia na site ya Internet na beto jw.org sambu yo kele ti bansangu na bandinga kuluta 1000. Nto-Kimvuka ndimaka nde bo balula mukanda yina ke sadisa beto na kukumisa bantu balongoki, mukanda Zinga Mvula na Mvula! na bandinga kuluta 700. Bo ke pesa mpi bifwa-makutu madia ya kimpeve na nzila ya bavideo. Bifwa-meso mpi ke baka madia ya kimpeve na nzila ya mikanda na bisono ya bifwa-meso. Beto ke mona mutindu bambikudulu ya Biblia ke lungana. Bantu “ya bandinga yonso ya makanda” ke longuka mutindu ya kutuba “ndinga ya bunkete” ya kieleka ya Biblia. (Zek. 8:23; Sef. 3:9) Mambu yonso yina ke salama na nsi ya lutwadisu ya Yezu Kristu yina ke twadisa mbote.

8. Inki mambote kisalu na beto ya kulonga nsangu ya mbote ke nata?

⁸ Bubu yai, bantu kuluta 8 000 000 na bansi 240 kele na kati ya organizasio ya Yehowa mpi konso mvula, bantu mingi kibeni ke baka mbotika. Kima ya kuluta mfunu kele ve ntalu ya bantu yina ke baka mbotika kansi kima ya kuluta mfunu kele bikalulu yina Bakristu fwete vanda  ti yo, disongidila “kimuntu ya mpa” yina balongoki yina ya mpa ke kuma ti yo. (Bak. 3:8-10) Bantu mingi me yambulaka mansoni, mubulu, bo ke vandaka diaka ve ti bangindu ya mbi sambu na bantu ya nkaka mpi bo ke yindulaka diaka ve nde insi na bo me luta insi ya bantu ya nkaka. Mambu yina kele na Yezaya 2:4 ke lungana. Bo ke “longuka mpi diaka ve bitumba.” Sambu beto ke salaka bikesa ya kulwata kimuntu ya mpa, beto ke bendaka bantu na organizasio ya Yehowa mpi beto ke monisaka kibeni nde beto ke landaka nkengi na beto Kristu Yezu. (Yoa. 13:35; 1 Pie. 2:12) Sambu na nki mambu yonso yina ke salama? Yo ke salama sambu Yezu muntu ke sadisa beto.

9. Mutindu Matayo 24:45-47 ke monisa yo, Yezu tubaka nde nki ta salama na bilumbu ya nsuka?

⁹ Tanga Matayo 24:45-47. Yezu tubaka nde na ntangu ya nsuka, yandi ta tula “mpika ya kwikama mpi ya mayele” sambu na kupesa beto madia ya kimpeve. Mpika yina ke salaka ngolo bubu yai. Yo ke monana pwelele. Yezu ke sadila kimvuka ya fioti ya bantu yina bo me tulaka mafuta sambu na kupesa bansadi ya Nzambi mpi bantu yina ke ndima kieleka, ‘madia ya kimpeve na ntangu ya me fwana.’ Bampangi yina ke monaka ve nde bo kele bamfumu ya lukwikilu ya bantu ya nkaka. (2 Bak. 1:24) Kansi bo ke zabaka nde Yezu Kristu kele “ntwadisi mpi komanda” ya bantu na yandi.—Yez. 55:4.

10. Na kati ya mikanda yina kele na bifwanisu, nki mukanda ndimisaka nge kibeni nde nge yantikaka kutambula na nzila yina ke nata na luzingu ya mvula na mvula?

¹⁰ Banda na 1919, mpika ya kwikama me basisaka mikanda mingi sambu na kupesa bantu yina ke ndima kieleka dibaku ya kulonguka kieleka na Ndinga ya Nzambi. Na 1921, mpika basisaka mukanda La Harpe de Dieu sambu na kusadisa bantu yina ndimaka nsangu na kulonguka malongi ya ntete-ntete ya Biblia. Na nima, mpika basisaka diaka mikanda ya nkaka.  Inki mukanda sadisaka nge na kuzaba Tata na beto ya zulu mpi na kuzola yandi? Keti yo kele mukanda “ Que Dieu soit reconnu pour vrai ! ”, La vérité qui conduit à la vie éternelle, Nge lenda zinga mvula na mvula na ntoto yina takituka paladisu, Nzayilu ya Kenataka na Luzingu ya Mvula na Mvula, Inki Biblia Kelongaka Mpenza?, Inki Biblia Ke Longa Beto?, to mukanda na beto ya mpa, Zinga Mvula na Mvula! Bo basisaka mikanda yina yonso sambu na kusadisa beto na kukumisa bantu balongoki. Yo vandaka kibeni mikanda yina beto vandaka ti yo mfunu na ntangu yina bo basisaka yo.

11. Sambu na nki yo kele mfunu mingi nde beto yonso kubaka madia ya kimpeve?

¹¹ Madia ya ngolo ya kimpeve kele ve kaka sambu na bantu yina me katuka kundima kieleka. Beto yonso kele ti mfunu na yo. Ntumwa Polo sonikaka nde: “Madia ya ngolo kele sambu na bantu ya kuyela.” Yandi tubaka diaka nde kana beto ke sadila mambu yina beto ke longuka na Biblia, yo ta sadisa beto na “kuswaswanisa mambu ya mbote ti ya mbi.” (Baeb. 5:14) Yo lenda vanda mpasi kibeni na kulemfukila bansiku ya Yehowa bubu yai sambu bantu mingi me kuma kusala mansoni mingi. Kansi Yezu ke salaka yonso sambu beto longuka mambu yina beto kele ti yo mfunu sambu yo sadisa beto na kulanda kuvanda ti lukwikilu ya ngolo. Madia yina ya kimpeve ke katukaka na Biblia, Ndinga ya Nzambi. Mpika ya kwikama ke yidikaka madia yina mpi ke kabulaka yo na lutwadisu ya Yezu.

12. Inki mutindu beto ke pesaka zina ya Nzambi lukumu bonso Yezu?

¹² Beto ke pesaka zina ya Nzambi lukumu yina yo me fwana na kubaka mutindu Yezu salaka. (Yoa. 17:6, 26) Mu mbandu na 1931, beto bakaka zina, Bambangi ya Yehowa ya kele na Biblia. Beto me monisaka nde zina ya Nzambi kele mfunu mingi sambu na beto mpi nde beto ke zolaka nde bantu kuzaba beto na zina ya  Tata na beto ya zulu. (Yez. 43:10-12) Banda na Octobre 1931, zina ya Nzambi yantikaka kubasika na lutiti ya zulu ya konso nimero ya Nzozulu ya Nkengi. Diaka, Biblia—Mbalula ya Nsi-Ntoto ya Mpa me vutulaka zina ya Nzambi na bisika yonso yina yo fwete vanda na Ndinga na yandi. Kansi, mabundu ya Kikristu me katulaka zina ya Yehowa na bambalula na bo mingi ya Biblia.

13. Inki ke ndimisa nge nde Yezu ke sadila “mpika ya kwikama mpi ya mayele” bubu yai? (Yoane 6:68)

¹³ Na nzila ya “mpika ya kwikama mpi ya mayele,” Yezu me salaka organizasio mosi ya kuluta mbote na ntoto sambu lusambu ya bunkete kulanda kuvanda. Inki nge ke yindula sambu na organizasio yango? Mbala ya nkaka nge ke yindula mutindu ntumwa Piere yindulaka ntangu yandi songaka Yezu nde: “Na nani beto ta kwenda? Nge kele ti bangogo ya luzingu ya mvula na mvula.” (Yoa. 6:68) Na wapi beto zolaka kuvanda bubu yai kana beto vandaka ve na organizasio ya Yehowa? Na nzila na yo, Kristu ke salaka yonso sambu na kudisa beto mbote na kimpeve. Yandi ke pesaka beto mpi formasio sambu beto longa mbote nsangu ya mbote. Diaka, yandi ke sadisaka beto na kulwata “kimuntu ya mpa” sambu beto sepedisa Yehowa.—Baef. 4:24.

14. Inki mambote nge bakaka na organizasio ya Yehowa na nsungi ya maladi ya coronavirus?

¹⁴ Yezu ke pesaka beto lutwadisu ya mbote na bantangu ya mpasi. Mambote ya lutwadisu yango monanaka pwelele ntangu maladi ya coronavirus yantikaka. Bantu mingi na nsi-ntoto zabaka ve mambu yina bo fwete sala. Kansi Yezu salaka yonso sambu beto zaba mambu yina beto fwete sala sambu na kuditanina. Bo siamisaka beto na kulwata bamaske kana beto kele na bisika ya bantu mingi mpi na kupusana ve pene-pene ti bantu. Bo yibusaka bankuluntu  na kusolula mbala na mbala ti bampangi yonso na dibundu mpi na kuzaba bampusa na bo ya kinsuni mpi ya kimpeve. (Yez. 32:1, 2) Beto bakaka lutwadisu ya nkaka mpi kikesa na nzila ya barapore ya Nto-Kimvuka.

15. Inki lutwadisu bo pesaka na mutindu ya kusala balukutakanu ya dibundu mpi ya kulonga nsangu ya mbote na nsungi ya maladi ya coronavirus, mpi nki mambote yo nataka?

¹⁵ Na nsungi ya maladi ya coronavirus, bo pesaka beto mpi lutwadisu ya pwelele na mutindu ya kusala balukutakanu ya dibundu mpi ya kulonga nsangu ya mbote. Kukonda kusukinina beto yantikaka kusala balukutakanu ya dibundu, balukutakanu ya nene mpi balukutakanu ya distrike na nzila ya Internet. Beto yantikaka mpi kulonga nsangu ya mbote na nzila ya mikanda yina beto vandaka kusonikila bantu mpi na nzila ya telefone. Yehowa sakumunaka bikesa na beto. Babetele mingi tindaka barapore yina monisaka nde ntalu ya bansamuni kumaka mingi kibeni. Diaka, bampangi mingi kutanaka ti mambu mingi yina pesaka kikesa na nsungi ya maladi ya coronavirus.—Tala lupangu “ Yehowa Ke Sakumunaka Kisalu na Beto ya Kusamuna.”

16. Inki beto ke ndima?

¹⁶ Bantu ya nkaka yindulaka nde organizasio lutisaka ndilu na bansiku yina bo vandaka kupesa sambu na maladi ya coronavirus. Kansi na nima, yo monanaka pwelele mbala na mbala nde bansiku yina bo vandaka kupesa beto vandaka mbote kibeni. (Mat. 11:19) Kana beto yindula mutindu Yezu ke twadisa bantu na yandi na zola yonso, yo ke monisa beto kibeni nde, Yehowa ti Mwana na yandi yina yandi ke zolaka ta vanda ti beto ata mambu ya nki mutindu kusalama na bilumbu ke kwisa.—Tanga Baebreo 13:5, 6.

17. Kusala na nsi ya lutwadisu ya Yezu ke pusa nge na kudiwa nki mutindu?

¹⁷ Beto kele na kiese mingi ya kusala na nsi ya lutwadisu ya Yezu. Beto kele na organizasio mosi yina kele ve ya kukabwana na mambu ya me tala mpusu ya nitu, bansi mpi bandinga. Beto ke diaka mbote na kimpeve mpi beto ke bakaka formasio ya me fwana sambu na kusala mbote kisalu ya kulonga nsangu ya mbote. Bo ke longaka beto yonso mutindu ya kulwata kimuntu ya mpa mpi bo ke longaka beto na kuzolana. Yo me fwana kibeni nde beto bula ntulu sambu Yezu kele nkengi na beto.