1. Inki Yehowa salaka kaka na ntangu Adami ti Eva salaka disumu? (Kuyantika 3:15)

 KAKA ntangu Adami ti Eva salaka disumu, Yehowa pesaka bana na bo kivuvu na nzila ya mbikudulu mosi ya mfunu mingi. Mbikudulu yango kele na Kuyantika 3:15.—Tanga.

2. Sambu na nki mbikudulu ya kele na Kuyantika 3:15 kele mfunu mingi?

² Mbikudulu yango kele na mukanda ya ntete ya Biblia. Ata mpidina, mikanda yonso ya Biblia ke wakanaka ti yo. Kaka mutindu kimpusu ya mukanda ke vukisaka bapapie yonso ya kele na kati ya mukanda, mutindu mosi mpi bangogo yina kele na Kuyantika 3:15 ke vukisaka mambu yonso ya kele na Biblia. Mpi yo ke salaka kaka nsangu yai mosi: Nzambi ta tinda Ngulusi sambu na kufwa Diabulu mpi bantu na yandi yonso. * Yo ta vanda kibeni lusakumunu mosi ya nene sambu na bantu yina ke zolaka Yehowa!

3. Inki beto ta tubila na disolo yai?

³ Na disolo yai beto ta pesa bamvutu na bangiufula yai sambu na Kuyantika 3:15: Banani mbikudulu yango ke tubila? Inki mutindu mbikudulu yango lunganaka? Mpi Inki mambote yo ke natila beto?

4. Nani kele “nioka” mpi nki mutindu beto me zaba yo?

⁴ Kuyantika 3:14, 15 ke tubila “nioka,” “mwana” ya nioka, “nkento” mpi “mwana” yina nkento ta buta. Biblia ke sadisa  beto na kubakisa ntendula na yo. * Beto tubila ntete “nioka.” Kana yo vandaka kibeni nioka, yo zolaka ve kubakisa mambu yina Yehowa tubaka na kilanga ya Edeni. Ya kieleka, Yehowa pesaka ndola yina na kigangwa mosi ya ke bakisaka mambu. Kigangwa yango kele nani? Kusonga 12:9 ke tendula yo pwelele. Verse yango ke monisa pwelele nde “nioka ya ntama” kele Satana Diabulu. Ebuna nani kele mwana ya nioka?

5. Mwana ya nioka kele banani?

⁵ Ntangu Biblia ke sadilaka ngogo mwana na mutindu ya kifwani, yo ke tubilaka bantu yina ke yindulaka mpi ke salaka mambu kaka bonso tata na bo ya kifwani. Yo yina, mwana ya nioka kele bigangwa ya kimpeve mpi bantu yina ke lemfukaka ve na Nzambi mpi ke teleminaka bansadi na yandi kaka bonso Satana. Bawanzio yina bikisaka kisika na bo na zulu na bilumbu ya Noa mpi bantu ya mbi yina ke salaka mambu kaka bonso tata na bo Diabulu kele mpi mwana ya nioka.—Kuy. 6:1, 2; Yoa. 8:44; 1 Yoa. 5:19; Yude 6.

6. Sambu na nki “nkento” yina mbikudulu ya Kuyantika 3:15 ke tubila lenda vanda ve Eva?

⁶ Sesepi yai, “nkento” kele nani? Sambu na nki nkento yango lenda vanda ve Eva? Beto tadila kikuma mosi ya ke ndimisa beto yo. Mbikudulu yango ke tuba nde mwana yina nkento ta buta ta “niata” nioka na ntu. Kaka mutindu beto me katuka kumona yo, nioka kele wanzio mosi ya mbi disongidila, Satana. Yo yina, ata muntu mosi ve ya kukonda kukuka yina me butuka na Eva lenda kuka kuniata yandi. Kansi nani zolaka kuniata Satana?

7. Mutindu Kusonga 12:1, 2, 5, 10 ke monisa yo, nkento yina Kuyantika 3:15 ke tubila ke tendula nki?

⁷ Mukanda ya nsuka ya Biblia ke tendula  mbote-mbote nkento yina Kuyantika 3:15 ke tubila. (Tanga Kusonga 12:1, 2, 5, 10.) Biblia ke tuba nde nkento yina kele ve awa na ntoto. Ngonda kele na makulu na yandi mpi mpu ya kimfumu ya bambwetete 12 kele na zulu ya ntu na yandi. Nkento yango me buta mwana mosi ya kuyituka, disongidila Kimfumu ya Nzambi. Kimfumu yango kele na zulu. Yo yina nkento yina mpi fwete vanda na zulu. Nkento yina ke tendula kitini ya organizasio ya Yehowa ya kele na zulu disongidila, bawanzio na yandi ya bulemfu.—Bag. 4:26.

8. Nani kele kitini ya ntete ya mwana yina nkento butaka ya Kuyantika ke tubila mpi nki ntangu Yehowa ponaka yandi? (Kuyantika 22:15-18)

⁸ Ndinga ya Nzambi ke sadisa beto mpi na kuzaba nani kele kitini ya ntete ya mwana yina nkento butaka. Mwana yina fwete vanda mwana ya Abrahami. (Tanga Kuyantika 22:15-18.) Kaka mutindu mbikudulu tubilaka yo, Yezu vandaka mwana ya Abrahami yina vandaka kulemfuka na Nzambi. (Luka 3:23, 34) Kansi mwana yina fwete vanda ngolo mingi kuluta bantu yonso sambu yandi niata Satana Diabulu mpi kufwa yandi. Yo yina, ntangu Yezu lungisaka bamvula 30 Yehowa tulaka yandi mafuta na nsadisa ya mpeve santu. Ntangu Yehowa tulaka Yezu mafuta na nsadisa ya mpeve santu, yandi kumaka kitini ya ntete ya mwana yina nkento ya Kuyantika ke tubila butaka. (Bag. 3:16) Na nima ya lufwa mpi ya lufutumuku ya Yezu, Nzambi “pesaka yandi nkembo ti lukumu” mpi yandi pesaka yandi “kiyeka yonso na zulu mpi na ntoto.” Nzambi pesaka yandi diaka kiyeka ya “kufwa bisalu ya Diabulu.”—Baeb. 2:7; Mat. 28:18; 1 Yoa. 3:8.

9-10. (a) Banani mpi kele kitini ya mwana yina nkento butaka mpi nki ntangu bo ke kumaka kitini ya mwana yina nkento butaka? (b) Sesepi yai nki beto ta tadila na bunkufi?

⁹ Katula Yezu, kele mpi ti kitini ya zole ya mwana yina nkento butaka. Ntumwa Polo monisaka pwelele kitini ya zole ya mwana yina ntangu yandi songaka Bakristu yina bo tulaka mafuta, bayina vandaka Bayuda mpi Bantu ya Makanda nde: “Kana beno kele bantu ya Kristu, beno kele kibeni bana ya Abrahami, bantu yina ta baka dikabu yina bo silaka.” (Bag. 3:28, 29) Ntangu Yehowa ke tulaka Mukristu mosi mafuta na nsadisa ya mpeve santu, Mukristu yango ke kumaka mpi kitini ya mwana ya nkento. Yo yina, mwana yina nkento butaka kele Yezu ti Bakristu 144 000 yina ta yala ti yandi. (Kus. 14:1) Bo yonso ke landaka mbandu ya Tata na bo Yehowa Nzambi na mambu ya bo ke salaka mpi ke yindulaka.

¹⁰ Beto me bakisa bantu yina mukanda ya Kuyantika 3:15 ke tubila, sesepi yai beto tadila na bunkufi mutindu Yehowa me yantikaka kulungisa mbikudulu yina malembe-malembe mpi mambote yina yo ke natila beto.

11. Inki mutindu mwana yina nkento butaka lwalaka “na dikulu”?

¹¹ Mbikudulu ya Kuyantika 3:15 tubaka nde nioka ta tatika mwana yina nkento ta buta “na dikulu” (na talon). Yo lunganaka ntangu Satana pusaka Bayuda mpi Baroma na kufwa Mwana ya Nzambi. (Luka 23:13, 20-24) Kana muntu kele ti mputa na nsi ya dikulu, yandi ke kukaka ve kutambula mbote. Mutindu mosi mpi Yezu kukaka ve kusala ata kima mosi ntangu yandi vandaka ya kufwa bilumbu tatu na maziamu.—Mat. 16:21.

12. Inki ntangu mpi nki mutindu Yezu ta niata ntu ya nioka?

¹² Mbikudulu ya Kuyantika 3:15 ke monisa nde yo lombaka ve nde Yezu kubikala na maziamu. Sambu na nki? Sambu mbikudulu monisaka nde mwana yina nkento butaka ta niata  nioka na ntu. Yo yina, yo lombaka nde Yezu kufutumuka ntete. Yo salamaka kaka mutindu yina. Bilumbu tatu na nima ya lufwa ya Yezu, yandi futumukaka kigangwa ya kimpeve yina lenda fwa diaka ve. Yezu ta niata Satana, disongidila yandi ta fwa yandi na ntangu yina Nzambi yandi mosi me tulaka. (Baeb. 2:14) Diaka, Yezu mpi bantu yina ta yala ti yandi ta fwa bambeni yonso ya Nzambi disongidila, mwana ya nioka.—Kus. 17:14; 20:4, 10. *

13. Inki mambote kulungana ya mbikudulu ya Kuyantika 3:15 ke natila beto?

¹³ Kana nge ke sambilaka Yehowa, nge ke baka mambote na kulungana ya mbikudulu yai. Yezu kwisaka na ntoto ti nitu ya kimuntu. Ata mpidina, yandi monisaka bikalulu ya Tata na yandi mbote-mbote. (Yoa. 14:9) Yo yina beto me zabaka Yehowa Nzambi mpi beto ke zolaka yandi sambu beto ke longukaka luzingu ya Yezu. Beto ke bakaka mpi mambote na malongi ya Yezu mpi mutindu yandi ke twadisaka dibundu ya Bambangi ya Yehowa bubu yai. Malongi ya Yezu ke sadisaka beto na kusala mambu yina ke sepedisaka Yehowa. Kansi nki mutindu mpila nioka tatikaka Yezu na dikulu disongidila, lufwa ya Yezu ke natila beto yonso mambote? Ntangu Yezu futumukaka, yandi pesaka valere ya menga na yandi bonso kimenga ya kukuka yina “ke katula masumu na beto yonso.”—1 Yoa. 1:7.

14. Inki mutindu beto me zaba nde mbikudulu yina lunganaka ve na kilanga ya Edeni? Tendula.

¹⁴ Bangogo yina Yehowa tubaka na kilanga ya Edeni ke monisa nde mwa ntangu fwete luta na ntwala nde mbikudulu yina kulungana ya mvimba. Yo ta baka ntangu sambu nkento kubuta mwana ya lusilu, sambu Diabulu kuvukisa bantu na yandi mpi sambu kimbeni kukota na bimvuka yina zole. Kuzaba ntendula ya mbikudulu yai kele mfunu sambu na beto, sambu yo ke monisa nde nsi-ntoto yai ya Satana ke yala ta menga bansadi ya Yehowa. Yezu songaka balongoki na yandi mpi nde bo ta menga bo. (Mar. 13:13; Yoa. 17:14) Ya kieleka, beto me mona kulungana ya kitini ya ntete ya mbikudulu yai, mingi-mingi na bamvula 100 ya me katuka kuluta. Inki mutindu?

15. Sambu na nki nsi-ntoto ke mengaka bansadi ya Nzambi diaka mingi? Kansi sambu na nki beto fwete wa ve Satana boma?

¹⁵ Ntangu Yezu kumaka Ntotila na 1914, ntangu fioti na nima, yandi kulaka Satana na zulu. Sesepi yai Satana kele na ntoto, yandi ta vutuka diaka ve na zulu ata fioti mpi yandi ke vingila kaka lufwa na yandi. (Kus. 12:9, 12) Satana me kanga ve maboko. Yandi kele ti makasi ya ngolo, yo yina yandi ke nwanisa bansadi ya Nzambi. (Kus. 12:13, 17) Nsi-ntoto ke menga diaka mingi bansadi ya Nzambi. Ata mpidina, beto fwete banga ve Satana mpi bantu na yandi. Na kisika ya kuwa bo boma, beto fwete vanda ti kundima bonso ntumwa Polo. Yandi sonikaka nde: “Kana Nzambi kele sambu na beto, nani ta nwanisa beto?” (Bar. 8:31) Beto fwete tudila Yehowa ntima ya mvimba sambu kaka mutindu beto me mona yo, kitini ya nene ya mbikudulu ya Kuyantika 3:15 me lungana dezia.

16-18. Inki mambote kubakisa Kuyantika 3:15 me natilaka mpangi Curtis, mpangi Ursula mpi mpangi Jessica?

¹⁶ Lusilu ya Yehowa ya kele na Kuyantika 3:15 lenda sadisa beto na kukanga ntima na bampasi yonso yina lenda bwila beto. Mpangi Curtis kele misionere na Guam. Yandi ke tuba nde: “Mono me kutanaka ti bampasi mingi yina salaka nde yo kuma mpasi sambu mono landa kukangama na Yehowa. Mono yindulaka  mingi mbikudulu ya kele na Kuyantika 3:15. Yo sadisaka mono na kulanda kutudila Tata na mono ya zulu ntima.” Mpangi Curtis ke vingilaka na kiese yonso kilumbu yina Yehowa ta katula bampasi yonso.

¹⁷ Mpangi-nkento Ursula ke zingaka na provense ya Bavière na Allemagne. Yandi ke tuba nde kubakisa ntendula ya Kuyantika 3:15, sadisaka mono na kundima kibeni nde Biblia kele mukanda ya Nzambi. Yandi monaka mutindu bambikudulu yonso ya Biblia ke wakana ti mbikudulu yai mpi yo yitukisaka yandi mingi kibeni. Yandi ke tuba diaka nde: “Ntangu mono zabaka nde Yehowa salaka kima mosi kukonda kusukinina sambu na kupesa beto diaka kivuvu, yo simbaka kibeni ntima na mono.”

¹⁸ Mpangi Jessica ke zingaka na Micronésie. Yandi ke tuba nde: “Mono ke landaka kuyibuka mutindu mona waka ntangu mono bakisaka nde mono me zwa kieleka. Mbikudulu ya kele na Kuyantika 3:15 vandaka kulungana. Yo me sadisaka mono na kuyibuka nde luzingu ya beto kele ti yo bubu, kele ve yina Yehowa zolaka de beto vanda ti yo. Mbikudulu yai ke ndimisaka mono nde kusadila Yehowa ke natilaka mono mambote bubu yai mpi yo ta natila mono mambote mingi na bilumbu ke kwisa.”

19. Sambu na nki beto fwete ndima kibeni nde kitini ya nsuka ya mbikudulu yina ta lungana kibeni?

¹⁹ Mutindu beto me mona yo, mbikudulu ya kele na Kuyantika 3:15 ke landa kulungana. Beto me zaba nani kele mwana yina nkento butaka mpi nani kele mwana ya nioka. Yezu kele kitini ya ntete ya mwana yina nkento butaka. Yandi me futumukaka mpi bubu yai yandi kele Ntotila mosi ya ngolo ya kele ti nitu yina ke fwaka ve. Bubu yai, Yehowa me ponaka dezia bantu mingi yina ta yala ti Mwana na yandi na zulu mpi ntalu na bo ke zola kulunga. Sambu kitini ya ntete ya mbikudulu yai me lunganaka, beto ke ndima kibeni nde kitini ya nsuka ta lungana mpi, disongidila mwana yina nkento butaka ta niata nioka na ntu. Bantu yina ke sambilaka Yehowa na masonga yonso ta vanda na kiese kibeni ntangu bo ta fwa Satana. Beto fwete landa kusambila Yehowa tii ntangu mambu yango ta salama. Beto fwete tudila yandi kibeni ntima. Na nzila ya mwana yina nkento butaka, Yehowa ta sakumuna “makanda yonso ya ntoto.”—Kuy. 22:18.