DISOLO YA KULONGUKA 31
“Beno Kangama Ngolo, Beno Nikana Ve”
“Bampangi na mono ya mono ke zolaka mingi, beno kangama ngolo, beno nikana ve.”—1 BAK. 15:58.
NKUNGA 122 Beto Vanda Ngolo, mpi Beto Bwa Ve!
MAMBU YINA DISOLO YAI KE TUBILA a
1-2. Inki mutindu Mukristu kele bonso nzo mosi ya nda kibeni? (1 Bakorinto 15:58)
BO TUNGAKA nzo mosi ya nda kibeni na 1978, na Tokyo na Japon. Bantu vandaka kudiyula kana nzo yango ta bwa ve na kunikana ya ntoto yina vandaka kusalama mbala na mbala na Tokyo. Inki salaka nde yo bwa ve? Bantu yina tungaka yo, tungaka yo ngolo kibeni sambu kana kunikana ya ntoto me salama, yo nikana mwa fioti kansi yo bwa ve. Bakristu kele bonso nzo yina. Inki mutindu?
2 Mukristu fwete vanda ti bukati-kati na yina me tala kukangama ngolo mpi kuvanda ve makambu ngolo. Yandi fwete vanda ngolo mpi yandi fwete nikana ve na yina me tala kuzitisa bansiku mpi minsiku ya Yehowa. (Tanga 1 Bakorinto 15:58.) Yandi fwete vanda ya “kuyilama na kulemfuka” mpi yandi fwete fwa ve bansiku ya Nzambi. Kansi yandi fwete vanda ‘ve makambu ngolo’ na diambu yina yo ke lomba nde yandi vanda ve makambu ngolo. (Yak. 3:17) Mukristu fwete vanda ti bukati-kati, yandi fwete vanda ve makambu ngolo kibeni to kukanga meso na mambu ya mbi. Na disolo yai, beto ta tadila mambu yina beto lenda sala sambu na kunikana ve. Beto ta tadila mpi mambu tanu yina Satana ke salaka sambu na kupusa beto na kukangama ve ngolo na Yehowa. Diaka, beto ta tadila mambu yina beto lenda sala sambu na kubwa ve na mitambu ya Satana.
INKI BETO FWETE SALA SAMBU NA KUKANGAMA NGOLO?
3. Inki bansiku ya Muntu ya Kuluta Nene Yina Ke Pesaka Bansiku kele na Bisalu 15:28, 29?
3 Yehowa kele Muntu ya Kuluta Nene Yina Ke Pesaka Bansiku mpi ntangu yonso yandi ke salaka nde bantu kubakisa bansiku yina kukonda mpasi. (Yez. 33:22) Mu mbandu, Nto-Kimvuka ya mvu nkama ya ntete monisaka mambu tatu yina Bakristu fwete sala sambu na kukangama na Yehowa: (1) bo fwete sambila ve biteki; bo fwete sambila kaka Yehowa, (2) bo fwete bakisa nde menga kele kima ya santu mpi bo fwete zitisa yo, mpi (3) bo fwete zitisa bansiku ya bikalulu ya mbote yina kele na Biblia. (Tanga Bisalu 15:28, 29.) Inki mutindu Bakristu fwete sadila mambu yina tatu bubu yai sambu na kumonisa nde bo ke kangama ngolo na Yehowa?
4. Inki mutindu beto ke monisaka nde beto ke sambilaka kaka Yehowa? (Kusonga 4:11)
4 Beto ke sambilaka ve biteki; beto ke sambilaka kaka Yehowa. Yandi songaka bantu ya Izraele na kusambila kaka yandi. (Kul. 5:6-10) Diaka, ntangu Diabulu mekaka Yezu, yandi songaka yandi pwelele nde beto fwete sambila kaka Yehowa. (Mat. 4:8-10) Beto ke sambilaka ve biteki. Beto ke sambilaka mpi ve bantu, yo vanda bamfumu ya mabundu, bamfumu ya luyalu to bantu ya nene yina ke bulaka bansaka na nsi-ntoto yai. Beto ke bakaka bo ve bonso banzambi. Beto ke kangamaka ngolo na Yehowa mpi beto ke sambilaka kaka yandi, muntu yina “gangaka bima yonso.”—Tanga Kusonga 4:11.
5. Sambu na nki beto ke lemfukilaka nsiku ya Yehowa ya me tala luzingu mpi menga?
5 Beto ke zitisaka nsiku ya Yehowa ya me tala luzingu mpi menga. Sambu na nki? Sambu Yehowa ke tuba nde menga kele luzingu, disongidila dikabu ya mfunu mingi yina yandi me pesaka beto. (Levi 17:14) Ntangu Yehowa songaka bantu na kukuma kudia bambisi, yandi songaka bo nde bo fwete dia ve menga. (Kuy. 9:4) Yandi vutukilaka diaka nsiku yina ntangu yandi pesaka bantu ya Izraele Nsiku ya Moize. (Levi 17:10) Yandi songaka diaka bampangi ya Nto-Kimvuka ya mvu nkama ya ntete na kusonga Bakristu yonso nde: “Beno landa kubuya . . . menga.” (Bis. 15:28, 29) Beto ke landaka kulemfuka na nsiku yina ntangu beto ke bakaka balukanu ya me tala mambu ya lusansu. b
6. Inki beto fwete sala sambu na kulemfuka na bansiku ya Yehowa ya me tala bikalulu ya mbote?
6 Beto ke lemfukilaka kibeni bansiku ya Yehowa ya me tala bikalulu ya mbote. (Baeb. 13:4) Ntumwa Polo tubaka nde beto fwete “fwa” bitini ya nitu na beto, disongidila beto fwete sala yonso sambu na kukatula banzala ya mbi. Beto fwete tala ve ata fioti mpi beto fwete sala ve ata fioti kima yina lenda pusa beto na kusala mansoni. (Bakol. 3:5; Yobi 31:1) Kana beto me kutana ti mpukumuna, mbala mosi beto fwete katula bangindu ya mbi mpi beto fwete sala ve mambu yina ta bebisa kinduku na beto ti Yehowa.
7. Inki beto fwete sala mpi sambu na nki?
7 Yehowa ke zolaka nde beto ‘lemfuka na ntima ya mvimba.’ (Bar. 6:17) Mambu yina yandi ke songaka beto ke vandaka kaka sambu na mambote na beto mpi beto fwete soba ve bansiku na yandi. (Yez. 48:17, 18; 1 Bak. 6:9, 10) Beto fwete sala bikesa ya kusepedisa Yehowa mpi ya kuvanda ti lukanu yina muyimbi bankunga vandaka ti yo. Yandi tubaka nde: “Mono me bakaka lukanu ya kuzitisa bansiku na nge ntangu yonso, tii na nsuka.” (Nk. 119:112) Kansi Satana ta sala yonso sambu na kupusa beto na kulungisa ve lukanu yina. Inki bametode yandi ke sadilaka?
INKI SATANA KE SALAKA SAMBU BETO LUNGISA VE LUKANU NA BETO?
8. Inki mutindu Satana ke sadilaka mbangika sambu na kupusa beto na kulungisa ve lukanu na beto?
8 Mbangika. Diabulu ke pusaka bantu na kutubila beto mambu ya mbi mpi na kubula beto ngolo sambu beto lungisa ve lukanu na beto. Lukanu na yandi kele ya “kudia” beto, disongidila ya kufwa kinduku na beto ti Yehowa. (1 Pie. 5:8) Bo vandaka kuniokula kibeni Bakristu ya mvu nkama ya ntete, kubula bo mpi kufwa bo sambu bo vandaka ti lukanu ya kukangama ngolo na Yehowa. (Bis. 5:27, 28, 40; 7:54-60) Bubu yai mpi Satana ke landa kusadila mbangika. Yo ke monana pwelele mutindu bo ke bula ngolo kibeni bampangi na beto ya babakala mpi ya bankento na Russie mpi na bansi ya nkaka. Bambeni ke niokula mpi bampangi na beto na mitindu ya nkaka.
9. Pesa mbandu ya ke monisa nde beto fwete keba na mayele ya mbi ya Satana.
9 Satana ke sadilaka mpi mayele ya mbi sambu na kupusa beto na kufwa bansiku ya Yehowa. Yandi ke sadilaka “mayele ya mbi.” (Baef. 6:11) Beto tadila mbandu ya mpangi Bob yina kotaka opitale sambu bo sala yandi operasio mosi ya ngolo kibeni. Yandi songaka munganga nde ata nki mutindu, yandi ta ndima ve nde bo vutula yandi menga. Munganga ndimaka. Kansi na mpimpa na ntwala nde bo sala mpangi Bob operasio, munganga yina ke tobulaka anestezi kwisaka kutala yandi ntangu bantu ya dibuta ya mpangi Bob vutukaka na nzo. Yandi songaka mpangi Bob nde bo ta vutula yandi ve menga kansi bo ta tula yo pembeni sambu mbala ya nkaka bo lenda vanda ti mfunu na yo. Mbala ya nkaka munganga yina yindulaka nde mpangi Bob ta soba lukanu na yandi mutindu bantu ya dibuta na yandi vandaka ve pana. Kansi mpangi Bob kangamaka ngolo na lukanu na yandi mpi yandi tubaka nde bo fwete vutula yandi ve menga ata fioti.
10. Sambu na nki kulanda bangindu ya bantu kele kigonsa? (1 Bakorinto 3:19, 20)
10 Bangindu ya bantu. Kana beto ke landa bangindu ya bantu, yo lenda sala nde beto yambula Yehowa mpi beto lemfuka ve na bansiku na yandi. (Tanga 1 Bakorinto 3:19, 20.) Mbala mingi “mayele ya nsi-ntoto yai” ke pusaka bantu na kulemfukila ve Nzambi. Bakristu ya nkaka na Pergame mpi na Tiatire landaka bantu yina vandaka kuzinga pene-pene ti bo, bayina vandaka kusala mansoni mpi kusambila biteki. Yezu pesaka mabundu yina zole bandongisila ya ngolo sambu bo vandaka kukanga meso na mansoni yina vandaka kusalama. (Kus. 2:14, 20) Bubu yai mpi bantu yina ke zingaka pene-pene ti beto lenda pusa beto na kundima bangindu na bo ya mbi. Bantu ya mabuta mpi bantu yina beto me zabana ti bo lenda songa beto nde beto kele makambu ngolo mpi kupusa beto na kufwa bansiku ya Yehowa. Mu mbandu, bo lenda songa beto nde yo kele ve mfunu na kuzitisa bansiku ya Yehowa mpi nde bansiku ya bikalulu ya mbote yina kele na Biblia me manaka ngala.
11. Inki beto fwete sala ve sambu na kukangama ngolo na Yehowa?
11 Bantangu ya nkaka, beto lenda yindula nde bansiku ya Yehowa kele ve kibeni pwelele. Nkutu beto lenda bwa na mutambu ya ‘kulanda ve kaka mambu yina bo me sonikaka.’ (1 Bak. 4:6) Na bilumbu ya Yezu, bamfumu ya mabundu bwaka mpi na mutambu yina. Bo vandaka kuyika bansiku na bo mosi na zulu ya Nsiku ya Moize. Yo yina yo vandaka mpasi sambu bantu ya nkaka kuzitisa Nsiku yango. (Mat. 23:4) Yehowa ke pesaka beto bansiku na yandi ya pwelele na nzila ya Ndinga na yandi mpi ya dibundu na yandi. Beto kele ve ata ti kikuma mosi ya kuyika diaka bansiku ya nkaka na zulu ya bansiku yina yandi ke pesaka. (Bing. 3:5-7) Kana beto sala mutindu yina, beto ta landa kaka mambu yina bo me sonikaka na Biblia mpi beto ta tudila ve bampangi bansiku na mambu yina Biblia me pesaka ve bansiku.
12. Inki mutindu Satana ke mwangaka “bangindu ya luvunu ti ya mpamba-mpamba”?
12 Luvunu. Satana ke sadilaka “bangindu ya luvunu ti ya mpamba-mpamba” mpi “mambu ya ntete-ntete ya nsi-ntoto” sambu na kukusa bantu mpi kukabula bo. (Bakol. 2:8) Na mvu nkama ya ntete, yandi vandaka kusadila bangindu ya bantu, malongi ya Bayuda yina vandaka ve na Masonuku mpi dilongi yina vandaka kutuba nde Bakristu fwete zitisa Nsiku ya Moize. Yo vandaka mambu ya luvunu sambu yo vandaka kukatula dikebi ya bantu na Yehowa, Nto ya mayele. Bubu yai, Satana ke sadilaka bima yina ke mwangaka bansangu mpi internet sambu na kupanza mambu ya luvunu mpi bansangu ya luvunu yina bamfumu ya politiki ke pesaka. Beto monaka yo mingi na nsungi ya maladi ya coronavirus. c Bambangi ya Yehowa yina landaka bansiku yina organizasio ya Yehowa pesaka vandaka ve ti basusi ya mpamba-mpamba yina bantu yina landaka bansangu ya luvunu vandaka ti yo.—Mat. 24:45.
13. Sambu na nki beto fwete keba na mambu yina lenda katula dikebi na beto?
13 Mambu ya ke katulaka dikebi. Beto fwete vila ve “mambu ya kuluta mfunu.” (Bafil. 1:9, 10) Mambu yina ke katulaka dikebi lenda baka beto ntangu mingi mpi ngolo ya kusala mambu ya mfunu. Mambu yina beto ke salaka na luzingu, mu mbandu kunwa, kudia, kusala bansaka ya kulutisila ntangu mpi bisalu ya kinsuni lenda katula dikebi na beto na mambu ya mfunu kana beto ke tula yo na kisika ya ntete na luzingu na beto. (Luka 21:34, 35) Diaka, konso kilumbu beto ke waka bansangu ya me tala mavwanga yina bantu ke basisaka mpi mambu ya politiki. Beto fwete bika ve nde mambu yina kukatula dikebi na beto na mambu ya mfunu. Kana ve beto lenda yantika kukota na mambu yina na mabanza na beto mpi na bantima na beto. Satana ke sadilaka bametode yina yonso sambu na kupusa beto na kusala ve mambu ya mbote. Beto tala mutindu beto lenda telemina Satana mpi kukangama ngolo na Yehowa.
INKI BETO LENDA SALA SAMBU NA KULANDA KUKANGAMA NGOLO?
Sambu na kuvanda ngolo, yindula mutindu nge kudipesaka na Yehowa mpi nge bakaka mbotika, longuka Ndinga ya Nzambi mpi yindula mambu yina nge ke tanga, vanda ti ntima ya ngolo mpi tudila Yehowa ntima (Tala baparagrafe 14-18)
14. Inki ta sadisa beto na kukangama ngolo na Yehowa?
14 Yindula kikuma yina pusaka nge na kudipesa na Yehowa mpi na kubaka mbotika. Nge salaka yo sambu nge vandaka kuzola kuvanda na lweka ya Yehowa. Yindula mambu yina sadisaka nge na kundima kibeni nde nge zwaka kieleka. Nge zabaka Yehowa mbote mpi nge yantikaka kuzitisa yandi mpi kuzola yandi sambu yandi kele Tata na nge ya zulu. Nge kumaka ti lukwikilu mpi yo pusaka nge na kubalula ntima. Ntima na nge pusaka nge na kuyambula kusala mambu ya mbi mpi na kusala luzolo ya Nzambi. Nge waka mbote ntangu nge bakisaka nde Nzambi lolulaka nge. (Nk. 32:1, 2) Nge kumaka kukwenda na balukutakanu mpi nge yantikaka kusonga bantu ya nkaka mambu ya kitoko yina nge longukaka. Awa ya nge me kudipesa na Yehowa mpi me baka mbotika, nge ke na kutambula na nzila ya luzingu mpi baka lukanu ya kulanda kutambula kaka na nzila yango.—Mat. 7:13, 14.
15. Sambu na nki kulonguka mpi kuyindula kele mfunu?
15 Longuka Ndinga ya Nzambi mpi yindula yo mingi. Kaka mutindu nti ke telemaka ngolo kana misisa na yo me simbama ngolo, beto mpi ta kangama ngolo kana lukwikilu na beto me simbama ngolo na Ndinga ya Nzambi. Kana nti ke yela, misisa na yo ke landaka kudinda na ntoto mpi yo ke panzanaka kibeni. Kana beto ke longuka mpi ke yindula mingi mambu yina beto ke longuka, beto ta kumisa lukwikilu na beto ngolo mpi beto ta ndima kibeni nde bansiku ya Nzambi kele mbote kuluta. (Bakol. 2:6, 7) Yindula mutindu bansiku ya Yehowa, bandongisila na yandi mpi lutaninu na yandi me sadisaka bansadi na yandi na ntangu ya ntama. Mu mbandu, Ezekiele tulaka dikebi ya mingi kibeni ntangu wanzio mosi vandaka kubaka mbote-mbote bamezire ya tempelo yina yandi monaka na mbona-meso. Mbona-meso yina kumisaka lukwikilu ya Ezekiele ngolo mpi yo ke pesa beto malongi ya mfunu ya me tala mutindu ya kuzitisa bansiku ya Yehowa sambu na kusambila yandi mbote. d (Ezek. 40:1-4; 43:10-12) Beto mpi ta baka mambote kana beto ke baka ntangu ya kulonguka mpi ya kuyindula mambu ya mudindu yina kele na Ndinga ya Nzambi.
16. Inki mutindu ntima ya ngolo taninaka mpangi Bob? (Nkunga 112:7)
16 Kumisa ntima na nge ngolo. Ntotila Davidi monisaka nde yandi ta yambula ve kuzola Yehowa ntangu yandi yimbaka nde: “Ntima na mono kele ngolo, O Nzambi.” (Nk. 57:7) Beto mpi lenda vanda ti ntima ya ngolo, disongidila kutudila Yehowa ntima ya mvimba. (Tanga Nkunga 112:7.) Beto tala mutindu kuvanda ti ntima ya ngolo sadisaka mpangi Bob yina beto tubilaka. Ntangu bo songaka yandi nde bo ta tula menga pembeni, mbala mosi yandi songaka bo nde kana bo ke zola kuvutula yandi menga, yandi ta basika na opitale yina kukonda kusukinina. Na nima, mpangi Bob tubaka nde: “Mono vandaka ve ti badute ata fioti mpi mono vandaka ve kuwa boma sambu na mambu yina lendaka kukumina mono.”
Kana beto kele ti lukwikilu ya ngolo, beto ta landa kuvanda ngolo ata beto ke kutana ti bampasi ya nki mutindu (Tala paragrafe 17)
17. Mbandu ya mpangi Bob ke longa beto nki? (Tala mpi kifwanisu ya ke wakana ti paragrafe yai.)
17 Mpangi Bob vandaka ngolo sambu yandi bakaka lukanu ya kukangama ngolo na Yehowa na ntwala nde yandi kwenda na opitale. Ya ntete, yandi vandaka ti lukanu ya kupesa Yehowa kiese. Ya zole, yandi longukaka mbote-mbote mambu yina Biblia mpi mikanda na beto ke tubaka ya ke monisa nde luzingu mpi menga kele santu. Ya tatu, yandi vandaka kundima kibeni nde yandi ta baka mambote yina ke wumelaka kana yandi lemfukila nsiku ya Yehowa. Beto mpi lenda vanda ti ntima ya ngolo ata beto ke kutana ti bampasi ya nki mutindu.
Baraki ti bantu na yandi ke landa Sisera ti basoda na yandi na kikesa yonso (Tala disolo ya kulonguka 31, paragrafe 18)
18. Inki mutindu mbandu ya Baraki ke longa beto na kutudila Yehowa ntima? (Tala kifwanisu ya lutiti ya zulu.)
18 Tudila Yehowa ntima. Beto tala mutindu Baraki nungaka sambu yandi sadilaka lutwadisu ya Yehowa. Na ntangu yina, bantu ya Izraele vandaka ve ya kuyilama sambu na bitumba. Nkutu bo vandaka ve ti binwaninu kansi Yehowa songaka Baraki na kukwenda kunwanisa Sisera, mfumu ya basoda ya Kanana yina vandaka ti binwaninu ya ngolo. (Baz. 5:8) Profete ya nkento Debora songaka Baraki na kukulumuka na ngumba sambu na kunwanisa Sisera mpi bapusu-pusu na yandi ya bitumba 900. Na kisika yina ya kukonda ngumba, bapusu-pusu ya bitumba zolaka kutambula mbote mpi yo zolaka kuvanda mpasi sambu bantu ya Izraele kunwanisa bo. Ata mpidina, Baraki lemfukaka kaka. Ntangu basoda ya Izraele kulumukaka na ngumba ya Tabore, Yehowa nokisaka mvula ya ngolo kibeni. Bapusu-pusu ya Sisera kangamaka na poto-poto mpi Yehowa nungisaka Baraki. (Baz. 4:1-7, 10, 13-16) Mutindu mosi mpi, Yehowa ta nungisa beto kana beto ke tudila yandi ntima mpi kana beto ke sadila lutwadisu yina yandi ke pesaka beto na nzila ya organizasio na yandi.—Kul. 31:6.
BAKA LUKANU YA KULANDA KUVANDA NGOLO
19. Sambu na nki beto fwete landa kuvanda ngolo?
19 Mutindu beto ke zinga na nsi-ntoto yai ya mbi, beto ta landa kunwana sambu na kuvanda ngolo. (1 Tim. 6:11, 12; 2 Pie. 3:17) Yo yina, beto fwete bika ve nde mambu yai kubwisa beto: mbangika, mayele ya mbi ya Satana, bangindu ya bantu, mambu ya luvunu mpi mambu yina ke katulaka dikebi. (Baef. 4:14) Beto fwete telema ngolo, beto fwete kangama ngolo na Yehowa mpi beto fwete lemfuka na bansiku na yandi. Kansi beto fwete vanda mpi ti bukati-kati. Na disolo ya ke landa, beto ta tubila mutindu Yehowa mpi Yezu kele bambandu ya kukuka na yina me tala bukati-kati.
NKUNGA 129 Beto Ta Landa Kukanga Ntima
a Banda na ntangu ya Adami ti Eva, Satana ke salaka yonso sambu na kundimisa bantu nde bo mosi kele ti nswa ya kupona mambu yina kele mbote mpi yina kele mbi. Yandi ke zolaka nde beto vanda mpi ti ngindu ya mutindu yina na yina me tala bansiku ya Yehowa mpi bansiku ya nkaka yina organizasio na yandi ke pesaka beto. Disolo yai ta sadisa beto na kulanda ve mpeve ya kukolama ya nsi-ntoto yai ya Satana mpi na kukumisa ngolo lukanu na beto ya kulanda kukangama na Yehowa.
b Sambu na kuzaba mambu mingi ya me tala mutindu Mukristu fwete zitisa nsiku ya me tala menga, tala dilongi 39 ya mukanda Zinga Mvula na Mvula!
c Tala disolo “Keba na Bansangu ya Luvunu” ya kele na jw.org.
d Sambu na kuzaba mambu mingi, tala kapu 13 mpi 14 ya mukanda Yehowa Me Vutula Lusambu ya Bunkete!