DISOLO YA KULONGUKA 27
“Tula Kivuvu na Yehowa”
“Tula kivuvu na Yehowa; vanda kikesa mpi ngolo na ntima.”—NK. 27:14.
NKUNGA 128 Kanga Ntima tii na Nsuka
MAMBU YINA DISOLO YAI KE TUBILA *
1. (a) Inki kivuvu Yehowa me pesaka beto? (b) ‘Kutula kivuvu na Yehowa’ ke tendula nki? (Tala “Ntendula ya Bangogo.”)
YEHOWA me pesaka bantu yonso yina ke zolaka yandi kivuvu ya kitoko. Kubika fioti yandi ta katula maladi, mawa mpi lufwa. (Kus. 21:3, 4) Yandi ta sadisa “bantu ya kudikulumusa” yina ke tulaka kivuvu na yandi na kukumisa ntoto paladisu. (Nk. 37:9-11) Yandi ta sala nde konso muntu na kati na beto kuvanda ti kinduku ya mbote ti yandi, kuluta kinduku yina beto kele ti yo bubu yai. Yo kele kivuvu mosi ya mbote kibeni! Kansi nki ke ndimisa beto mpenza nde mambu yina Nzambi me silaka ta lungana? Mambu yonso yina Yehowa ke tubaka ke lunganaka kaka. Yo yina beto fwete “tula kivuvu na Yehowa.” * (Nk. 27:14) Sambu na kumonisa nde beto ke tula kivuvu na Yehowa, beto fwete kinga ti ntima-nda mpi kiese ntangu yina Nzambi ta lungisa mambu yina yandi me silaka.—Yez. 55:10, 11.
2. Inki mambu Yehowa me salaka dezia?
2 Yehowa me monisaka dezia nde yandi ke lungisaka mambu yina yandi ke silaka. Beto tadila mbandu mosi ya ke benda dikebi. Na mukanda ya Kusonga, Yehowa silaka nde na bilumbu na beto yandi ta vukisa bantu ya makanda yonso, ya mabuta yonso mpi ya bandinga yonso na lusambu ya bunkete. Bubu yai bantu yina kele ‘kimvuka ya nene.’ (Kus. 7:9, 10) Bantu ya kimvuka yango me swaswana. Kimvuka yango kele ti babakala, bankento, bana, bantu ya mpusu ya nitu ya kuswaswana, ya ke tubaka ndinga mosi ve mpi ya me katuka na bisika ya mutindu na mutindu. Ata mpidina, bo ke zingaka na dibuta mosi mpi na ngemba. (Nk. 133:1; Yoa 10:16) Bantu ya kimvuka ya nene ke longaka mpi nsangu ya mbote na kikesa. Bo ke vandaka ntangu yonso ya kuyilama na kusonga bantu yina ke zola kuwa, kivuvu yina bo ke vandaka ti yo ya nsi-ntoto mosi ya mpa. (Mat. 28:19, 20; Kus. 14:6, 7; 22:17) Kana nge kele na kati ya kimvuka ya nene, beto ke ndima nde kivuvu ya mambu ya mbote yina ta salama na bilumbu ke kwisa kele mfunu sambu na nge.
3. Satana ke zolaka nde nge sala nki?
3 Diabulu ke zolaka nde nge vanda diaka ve ti kivuvu sambu na bilumbu ke kwisa. Yandi ke zolaka nde nge ndima kibeni nde Yehowa ke zolaka nge ve mpi nde yandi ta lungisa ve mambu yina yandi me silaka. Kana Satana me pusa beto na kuvanda diaka ve ti kivuvu, beto ta vanda diaka ve kikesa mpi nkutu beto lenda yambula kusambila Yehowa. Mutindu beto ta mona yo, Diabulu sosaka kupusa Yobi na kuvanda diaka ve ti kivuvu mpi na kuyambula kusambila Yehowa.
4. Inki beto ta longuka na disolo yai? (Yobi 1:9-12)
4 Na disolo yai, beto ta longuka mayele ya mbi yina Satana sadilaka sambu na kupusa Yobi na kukangama diaka ve na Yehowa. (Tanga Yobi 1:9-12.) Beto ta tubila mpi malongi yina beto lenda baka na mbandu ya Yobi mpi sambu na nki beto fwete vila ve nde Nzambi ke zolaka beto mpi yandi ta lungisa mambu yina yandi me silaka.
SATANA SOSAKA KUPUSA YOBI NA KUVANDA DIAKA VE TI KIVUVU
5-6. Inki mambu kuminaka Yobi kaka na nsungi ya ntangu mosi ya fioti?
5 Yobi vandaka ti luzingu ya mbote kibeni. Yandi vandaka ti kinduku ya mbote ti Yehowa. Yandi vandaka ti dibuta ya nene, ya vandaka na kiese mpi yandi vandaka kibeni mvwama. (Yobi 1:1-5) Kansi kaka na kilumbu mosi, Yobi vidisaka bima na yandi yonso. Ntete, yandi vidisaka bimvwama na yandi. (Yobi 1:13-17) Na nima, bana na yandi yonso yina yandi vandaka kuzola mingi fwaka. Sambu na kubakisa mpasi ya ngolo yina Yobi waka, yindula mpasi yina bibuti ke waka kana mwana na bo mosi me fwa. Ebuna meka kumona na mabanza mpasi, mawa mpi susi ya ngolo yina Yobi mpi nkento na yandi waka ntangu bo songaka bo nde bana na bo yonso kumi me fwa. Yo yina beto fwete yituka ve mutindu Yobi pasulaka bilele na yandi na mafwa mpi bwaka na ntoto!—Yobi 1:18-20.
6 Na nima, Satana losilaka Yobi maladi mosi ya mpasi kibeni mpi ya nzanzi. (Yobi 2:6-8; 7:5) Na ntwala nde mambu yina kusalama, bantu vandaka kuzitisa Yobi mingi. Bantu vandaka kukwisa kulomba yandi bandongisila. (Yobi 31:18) Kansi ntangu mambu yina ya mpasi kuminaka yandi, bo tinaka yandi. Bampangi na yandi ya dibuta, banduku na yandi ya ngolo mpi nkutu ata bansadi na yandi buyaka yandi!—Yobi 19:13, 14, 16.
Bampangi mingi bubu yai ke bakisaka mutindu Yobi waka ntangu yandi kutanaka ti bampasi sambu bo me kutanaka ti bampasi ya mutindu mosi (Tala paragrafe 7) *
7. (a) Yobi yindulaka nde bampasi na yandi katukaka na nani, kansi nki yandi salaka ve? (b) Mutindu kifwanisu ke monisa yo, Mukristu lenda kutana ti nki bampasi?
7 Satana zolaka kupusa Yobi na kundima nde yandi vandaka kuniokwama sambu Yehowa wilaka yandi makasi. Mu mbandu, Satana sadilaka mupepe mosi ya ngolo sambu yo bwisa nzo yina bana yonso kumi ya Yobi vandaka kudia kisika mosi. (Yobi 1:18, 19) Yandi salaka mpi nde tiya kukatuka na zulu mpi kuyoka bambisi ya Yobi mpi bantu yina vandaka kutanina yo. (Yobi 1:16) Sambu mupepe mpi tiya yina katukaka na zulu, Yobi yindulaka nde Yehowa muntu tindaka yo. Yo pusaka Yobi na kundima nde yandi salaka mambu yina sepedisaka ve Yehowa. Ata mpidina, Yobi tubaka ve mambu ya mbi sambu na Tata na yandi ya zulu. Yobi zabaka nde Yehowa pesaka yandi bima mingi ya mbote na luzingu na yandi. Yo yina yandi tubaka nde mutindu yandi ndimaka bima ya mbote yina Nzambi pesaka yandi, yo lombaka mpi nde yandi ndima bampasi. Yo yina Yobi tubaka nde: “Bika nde zina ya Yehowa kulanda kubaka lukumu.” (Yobi 1:20, 21; 2:10) Ata Yobi vidisaka mbongo na yandi, bana na yandi mpi yandi belaka maladi ya ngolo, yandi landaka kukangama na Yehowa. Kansi Satana bikaka yandi ve.
8. Inki mayele ya nkaka Satana sadilaka sambu na kumeka Yobi?
8 Satana sadilaka mayele ya nkaka. Yandi sadilaka banduku tatu ya mbi, sambu na kupusa Yobi na kudimona kukonda mfunu. Bantu yina tubaka nde Yobi vandaka kuniokwama sambu yandi salaka mambu mingi ya mbi. (Yobi 22:5-9) Bo sosaka mpi kundimisa yandi nde ata yandi salaka ve mambu ya mbi, bikesa yonso yina yandi vandaka kusala sambu na kusepedisa Nzambi vandaka ve ata fioti mfunu na meso ya Nzambi. (Yobi 4:18; 22:2, 3; 25:4) Bo vandaka kusosa kupusa Yobi na kuyindula nde Nzambi ke zolaka yandi ve, nde yandi ta sadisa yandi ve mpi nde yo kele ve mfunu na kusambila yandi. Mambu yina bo tubaka lendaka kupusa Yobi na kuyindula nde yandi vandaka ve ti kivuvu na mambu yina yandi vandaka kukutana ti yo.
9. Inki sadisaka Yobi na kuvanda kikesa mpi ngolo?
9 Meka kumona na mabanza mambu yina ke kumina Yobi. Yobi ke kutana ti bampasi ya ke mana ve mpi yandi me vanda na putulu ya tiya. (Yobi 2:8) Banduku na yandi ke landa kutuba nde yandi kele muntu ya mbi mpi nde mambu yonso ya yandi ke salaka kele ve mfunu. Ntangu Yobi ke kudiyangisa ngolo sambu na bana na yandi yina me fwa, bampasi ke nokila yandi bonso mvula ya matadi. Yobi me vanda ntete pima. (Yobi 2:13–3:1) Kana banduku ya Yobi ke yindula nde mutindu yandi me vanda pima yo ke tendula nde yandi ke buya Nzambi na yandi, bo ke sala kifu ya nene. Na ntangu mosi buna, Yobi me nangula ntu na yandi mpi yandi ke songa banduku na yandi nde: “Tii kuna mono ta fwa, mono ta yambula ve kwikama na mono!” (Yobi 27:5) Inki sadisaka Yobi na kuvanda kikesa mpi ngolo na bampasi yina yonso? Ata ntangu yandi lembaka kibeni nitu, yandi vandaka kundima nde Nzambi na yandi ya zola ta sadisa yandi. Yandi zabaka nde ata kana yandi me fwa, Yehowa ta futumuna yandi.—Yobi 14:13-15.
INKI MUTINDU BETO LENDA LANDA MBANDU YA YOBI?
10. Disolo ya Yobi ke longa beto nki?
10 Disolo ya Yobi ke longa beto nde Satana lenda buyisa beto ve na ngolo na kuyambula Yehowa mpi nde Yehowa ke zabaka mambu yonso ya beto ke kutanaka ti yo. Mambu yina Yobi kutanaka ti yo ke sadisa beto na kubakisa mpi mbote nde ntembe yina Satana tulaka ke tadila beto mpi. Beto tadila mwa malongi yina beto lenda baka na disolo ya Yobi.
11. Inki ta salama kana beto ke landa kutudila Yehowa ntima? (Yakobo 4:7)
11 Yobi monisaka kibeni nde kana beto ke tudila Yehowa ntima, beto ta kanga ntima na bampasi mpi beto ta kuka kutelemina Satana. Kana beto sala mpidina nki ta salama? Ndinga ya Nzambi ke ndimisa beto nde kana beto sala mpidina, Diabulu ta tina ntama ti beto.—Tanga Yakobo 4:7.
12. Inki mutindu kivuvu ya lufutumuku pesaka Yobi kikesa?
12 Beto fwete ndima kibeni nde lufutumuku ta vanda. Mutindu beto monaka yo na disolo yina me luta, mbala mingi Satana ke sadilaka boma ya lufwa yina beto ke vandaka ti yo sambu na kupusa beto na kukangama diaka ve na Yehowa. Sambu na Yobi, Satana tubaka nde Yobi ta sala konso kima yina, nkutu ata yo ke lomba nde yandi yambula kusambila Yehowa kaka sambu yandi tanina luzingu na yandi. Mambu yina Satana tubaka vandaka luvunu. Ata ntangu Yobi vandaka kuniokwama ngolo mpi yandi monaka lufwa na meso, yandi landaka kaka kukangama na Yehowa. Yandi tulaka ntima na bumbote ya Yehowa mpi yandi vandaka ti kivuvu ya ngolo nde, nsuka-nsuka Yehowa ta yidika mambu. Yo sadisaka yandi na kukanga ntima. Yobi vandaka kundima nde ata Yehowa kusadisa yandi ve ntangu yandi vandaka na luzingu, yandi ta futumuna yandi na bilumbu ke kwisa. Yobi vandaka kundima mpenza nde lufutumuku ta salama. Kana beto ke ndima mpenza nde lufutumuku ta salama, beto ta landa kukangama kaka na Yehowa yo vanda beto ke zola kufwa.
13. Sambu na nki beto fwete tula dikebi na mayele ya mbi yina Satana sadilaka sambu na kumeka Yobi?
13 Beto fwete tula dikebi ya mingi na mayele ya mbi yina Satana sadilaka sambu na kumeka Yobi sambu yandi ke sadilaka mayele ya mutindu mosi bubu yai. Satana tubaka nde: “Muntu [Yobi mpamba ve] ta pesa konso kima yina yandi kele na yo sambu na luzingu na yandi.” (Yobi 2:4, 5) Satana ke tubaka nde beto ke zolaka mpenza ve Yehowa Nzambi mpi nde beto ta buya yandi kana yo ke lomba nde beto gulusa luzingu na beto. Satana ke tubaka diaka nde Nzambi ke zolaka beto ve mpi nde yandi ke monaka ve bikesa ya beto ke salaka sambu na kusepedisa Yehowa. Sambu beto me zaba mayele ya mbi yina Satana ke sadilaka, beto bantu yina ke tulaka kivuvu na Yehowa beto ke ndimaka ve ata fioti mambu ya luvunu yina yandi ke tubaka.
14. Bampasi lenda sadisa beto na kumona nki? Pesa mbandu.
14 Kana beto ke kutana ti bampasi, beto fwete mona yo dibaku ya mbote sambu beto kudizaba mbote. Bampasi yina Yobi kutanaka ti yo sadisaka yandi na kuzaba bifu yina yandi vandaka ti yo mpi na kusoba yo. Mu mbandu, yo longaka yandi nde yandi fwete yedisa kikalulu ya kudikulumusa mingi mpenza. (Yobi 42:3) Beto mpi beto lenda zaba bifu na beto ntangu beto ke kutana ti bampasi. Mpangi Nikolay * vandaka kubela ngolo mpi bo tulaka yandi na boloko. Yandi ke tuba nde: “Boloko kele bonso apareyi yina minganga ke sadilaka sambu na kumona maladi yina kele ya kubumbana. Yo ke sadisaka Mukristu na kumona bifu yina yandi ke vandaka ti yo, ya yandi ke zabaka ve.” Kana beto me zaba bifu na beto, beto ta sala yonso sambu na kusoba yo.
15. Beto fwete wa nani mpi sambu na nki?
15 Beto fwete wa mambu yina Yehowa ke songa beto kansi ve yina bambeni na beto ke tuba. Yobi tulaka dikebi ya mingi ntangu Yehowa vandaka kutubila yandi. Nzambi yulaka Yobi bangiufula yai: ‘Keti nge ke mona ve ngolo na mono na bima yina mono me salaka? Mono ke zaba mambu yonso yina nge ke kutana ti yo. Nge ke ndima ve nde mono ke zolaka nge?’ Yobi pesaka Yehowa mvutu na kudikulumusa mpi yandi pesaka Yehowa mersi mingi sambu na bumbote na yandi. Yandi tubaka nde: “Makutu na mono me waka mambu na nge, kansi ntangu yai mono me mona nge ti meso na mono.” (Yobi 42:5) Ntangu Yobi tubaka bangogo yina, yandi vandaka ya kuvanda na putulu ya tiya, nitu na yandi vandaka ya kufuluka ti bivimbu mpi yandi vandaka kudila bana na yandi yina fwaka. Yehowa monisaka Yobi nde yandi ke zolaka yandi mpi nde yandi ke ndimaka yandi.—Yobi 42:7, 8.
16. Mutindu Yezaya 49:15, 16 ke monisa yo, nki beto fwete vila ve ntangu beto ke kutana ti bampasi?
16 Bubu yai mpi bantu lenda finga beto to bo lenda mona beto kukonda mfunu. Bo ke sosaka kubebisa lukumu na beto to ya organizasio na beto mpi bo ‘ke kusilaka beto makambu ya mutindu na mutindu.’ (Mat. 5:11) Disolo ya Yobi ke longa beto nde Yehowa ke ndimaka nde beto ta landa kukangama kaka na yandi ntangu beto ke kutana ti bampasi. Yehowa ke zolaka beto mpi yandi ta yambula ve ata fioti bantu yina ke tulaka kivuvu na yandi. (Tanga Yezaya 49:15, 16.) Kutula ve dikebi na mambu ya mbi yina bambeni ya Nzambi ke tubaka sambu na beto. Mpangi James ke zingaka na Turquie mpi dibuta na yandi kutanaka ti bampasi ya ngolo. Yandi ke tuba nde: “Beto bakisaka nde kana beto ke wa mambu ya luvunu yina bantu ke tubaka sambu na bansadi ya Nzambi, yo ta lembisa beto nitu. Yo yina, beto tulaka dikebi na kivuvu na beto ya Kimfumu ya Nzambi mpi beto kudipesaka na kisalu ya Yehowa. Yo sadisaka beto na kutanina kiese na beto.” Yo yina bonso Yobi, beto fwete wa mambu yina Yehowa ke songa beto. Beto fwete bika ve nde mambu ya luvunu yina bambeni na beto ke tuba kukatula kivuvu na beto.
KIVUVU NA NGE TA SADISA NGE
Yehowa sakumunaka Yobi sambu yandi kangamaka kaka na yandi. Yobi ti nkento na yandi zingaka mingi mpi bo vandaka ti luzingu ya kiese (Tala paragrafe 17) *
17. Inki malongi nge me baka na mbandu ya babakala mpi bankento yina Baebreo kapu 11 ke tubila, bayina kangamaka kaka na Yehowa?
17 Yobi kele na kati ya bansadi ya Yehowa yina landaka kuvanda kikesa mpi ngolo ntangu bo vandaka kukutana ti bampasi ya ngolo. Ntangu ntumwa Polo sonikilaka Bakristu ya Ebreo mukanda, yandi bingaka bansadi mingi ya Yehowa ‘dituti ya nene ya bambangi.’ (Baeb. 12:1) Bo yonso kutanaka ti bampasi ya ngolo kansi bo landaka kukangama na Yehowa luzingu na bo ya mvimba. (Baeb. 11:36-40) Keti kukanga ntima na bo mpi kisalu ya ngolo yina bo vandaka kusala vandaka ya mpamba? Ata fioti ve! Ata bo monaka ve kulungana ya mambu yonso ya Nzambi silaka ntangu bo vandaka na luzingu, bo landaka kutula kivuvu na bo na Yehowa. Sambu bo zabaka kibeni nde Yehowa vandaka kundima bo, bo ndimaka nde mambu yonso yina Yehowa me silaka ta lungana mpi bo ta mona yo. (Baeb. 11:4, 5) Mbandu na bo ke pesa beto kikesa ya kulanda kutula kivuvu na beto na Yehowa.
18. Inki nge fwete sala? (Baebreo 11:6)
18 Bubu yai, beto ke zinga na nsi-ntoto yina ke landa kaka kubeba. (2 Tim. 3:13) Satana ke landa kaka kumeka bansadi ya Nzambi. Yo vanda beto ta kutana ti bampasi ya nki mutindu na bilumbu ke kwisa, beto fwete kangama kaka na Yehowa mpi kundima kibeni nde “beto me tulaka kivuvu na beto na Nzambi ya moyo.” (1 Tim. 4:10) Mambu ya mbote yina Nzambi sadilaka Yobi na nima ke monisa kibeni nde “Yehowa kele kibeni ti lutondo mpi yandi ke wilaka bantu mawa.” (Yak. 5:11) Beto mpi fwete landa kukangama kaka na Yehowa mpi kundima kibeni nde yandi ta sakumuna “bantu yina ke sosaka yandi na masonga yonso.”—Tanga Baebreo 11:6.
NKUNGA 150 Sosa Nzambi Sambu Nge Guluka
^ Kana beto ke zola kutubila muntu yina me kutanaka ti bampasi ya ngolo, beto ke yibukaka mbala mosi Yobi. Inki malongi beto lenda baka na mbandu ya muntu yai ya sadilaka Nzambi na mutindu ya mbote? Mbandu na yandi ke longa beto nde Satana lenda kuka ve kukanga beto nzila ya kusambila Yehowa. Diaka, yo ke longa beto nde Yehowa ke zabaka bampasi yonso ya beto ke kutanaka ti yo. Mpi kaka mutindu Yehowa manisaka bampasi ya Yobi, beto ke zaba nde kilumbu kele yandi ta manisa bampasi na beto yonso. Beto ta vanda na kati ya bantu yina ke ‘tulaka kibeni kivuvu na Yehowa,’ kana mambu ya beto ke sala ke monisa nde beto ke ndima mambu yina.
^ NTENDULA YA BANGOGO: Ngogo ya Kiebreo ya bo me balula na ngogo “kivuvu” ke tendula ntete “kukinga” kima mosi ti nzala ya ngolo. Yo ke tendulaka mpi kutudila muntu ntima.—Nk. 25:2, 3; 62:5.
^ Beto me soba bazina ya nkaka.
