DISOLO YA KULONGUKA 23
Bibuti, Beno Sadisa Bana na Beno na Kuzola Yehowa
“Nge fwete zola Yehowa Nzambi na nge na ntima na nge ya mvimba, na moyo na nge ya mvimba, mpi na mabanza na nge yonso.”—MAT. 22:37.
NKUNGA 134 Bana Kele Dikabu ya Me Katuka na Nzambi
MAMBU YINA DISOLO YAI KE TUBILA *
1-2. Sambu na nki malongi ya nkaka ya Biblia ke kumaka mfunu mingi sambu na beto kana mambu ya luzingu na beto me soba?
NA KILUMBU ya makwela, bakala ti nkento ke landaka mbote-mbote diskure ya me katuka na Biblia yina bo ke salaka ya ke tubila makwela. Bo ke zabaka dezia malongi ya Biblia yina bo ke longaka na diskure yina. Kansi banda kilumbu yina, malongi yina ke kumaka mfunu mingi kuluta sambu na bo. Sambu na nki? Sambu bo ta sadila yo na makwela na bo.
2 Yo kele mpi mutindu mosi ntangu bakala ti nkento yina kele Bakristu me kuma bibuti. Yo lenda vanda nde bamvula mingi, bo me landaka badiskure mingi ya ke tubila kusansa bana. Kansi, ntangu bo me kuma ti bana, badiskure yina me kuma kibeni mfunu mingi sambu na bo. Bo ke kuma ti mwana na bo mosi yina bo ta sansa. Yo kele mukumba mosi ya nene kibeni. Ya kieleka, kana mambu ya luzingu na beto me soba, malongi ya nkaka ya Biblia ke kumaka mfunu mingi sambu na beto. Yo yina, bansadi ya Yehowa ke tangaka Biblia mpi ke yindulaka yo mingi “bilumbu yonso” ya luzingu na bo mutindu Yehowa songaka bantotila ya Izraele na kusala.—Kul. 17:19.
3. Inki beto ta tubila na disolo yai?
3 Bibuti, beno kele ti mukumba ya nene kibeni disongidila mukumba ya kulonga bana na beno mambu ya Yehowa. Kansi, beno fwete suka kaka ve na kulonga bo mambu ya Nzambi. Beno fwete sadisa bo na kuzola Yehowa mingi. Inki beno lenda sala sambu na kusadisa bana na beno na kuzola Yehowa? Na disolo yai, beto ta tubila malongi iya ya Biblia yina ta sadisa beno na kusadisa bana na beno. (2 Tim. 3:16) Beto ta mona mpi mutindu bibuti ya nkaka ya Bakristu me bakaka mambote ya kusadila bandongisila ya Biblia.
MALONGI IYA YINA LENDA SADISA BIBUTI
Kana beno ke sosa ntangu yonso lutwadisu ya Yehowa mpi beno ke pesa bana na beno mbandu ya mbote, yo ta pusa bo na kusala nki? (Tala baparagrafe 4, 8)
4. Inki kele dilongi yina ta sadisa bibuti na kusadisa bana na bo na kuzola Yehowa? (Yakobo 1:5)
4 Dilongi 1: Beno sosa lutwadisu ya Yehowa. Beno lomba Yehowa na kupesa beno mayele yina beno kele ti yo mfunu sambu na kusadisa bana na beno na kuzola yandi mingi. (Tanga Yakobo 1:5.) Yandi ta pesa beno bandongisila ya mbote kibeni. Mambu mingi ke monisa sambu na nki yandi ke salaka mutindu yina. Beto tadila mambu zole. Ya ntete, Yehowa me zaba mambu mingi sambu yandi mpi kele kibuti. (Nk. 36:9) Ya zole, bandongisila ya mbote yina yandi ke pesaka ke nataka kaka mambote.—Yez. 48:17.
5. (a) Inki organizasio ya Yehowa ke basisaka sambu na kusadisa bibuti? (b) Ntangu beno talaka video yina, nki malongi beno bakaka na mutindu mpangi-bakala Amorim ti nkento na yandi sansaka bana na bo?
5 Yehowa ke pesaka bibuti madia mingi ya kimpeve na nzila ya Ndinga na yandi mpi ya organizasio na yandi. Yo ke sadisaka bo na kusadisa bana na bo na kuzola Yehowa. (Mat. 24:45) Mu mbandu, beno lenda zwa bandongisila mingi ya mbote na masolo ya kulandana “Lusadisu Sambu na Dibuta.” Bamvula mingi, masolo yina vandaka kubasika na zulunalu Telama! kansi bubu yai, yo ke basikaka na site ya Internet na beto. Diaka, bavideo mingi ya kele na jw.org na kitini bainterview mpi badrame lenda sadisa bibuti na kusadila bandongisila ya Yehowa sambu na kusansa bana na bo. *—Bing. 2:4-6.
6. Inki mutindu papa mosi ke waka na yina me tala lutwadisu yina yandi ti nkento na yandi ke bakaka na nzila ya organizasio ya Yehowa?
6 Bibuti mingi me pesaka mersi mutindu Yehowa me sadisaka bo na nzila ya organizasio na yandi. Mpangi Joe yina kele tata ke tuba nde: “Kusansa bana tatu na kieleka kele ve pete. Mono ti nkento na mono ke sambaka Yehowa ntangu yonso sambu yandi sadisa beto. Mbala mingi, beto ke monaka nde disolo mosi to video mosi me basika na ntangu yina beto vandaka kibeni ti mfunu na yo sambu yo sadisa beto na diambu yina beto ke kutana ti yo. Konso kilumbu, beto ke sosaka lutwadisu ya Yehowa.” Mpangi Joe ti nkento na yandi me bakisaka nde, masolo yina mpi bavideo yina ke sadisaka bo na kusadisa bana na bo na kukwenda pene-pene ya Yehowa.
7. Sambu na nki yo kele mfunu nde bibuti kusala bikesa ya kuvanda bambandu ya mbote? (Baroma 2:21)
7 Dilongi 2: Beno vanda bambandu ya mbote. Bana ke talaka bibuti na bo mbote-mbote mpi mbala mingi bo ke salaka mambu yina bo ke monaka na bibuti na bo. Ya kieleka, bibuti kele bantu ya kukonda kukuka. (Bar. 3:23) Ata mpidina, bo fwete sala yonso sambu na kupesa bana na bo mbandu ya mbote. (Tanga Baroma 2:21.) Na yina me tala bana, papa mosi tubaka nde: “Bana kele bonso eponge yina ke minaka masa.” Yandi ke tuba diaka nde: “Kana beto ke sala ve mambu yina beto ke longa bo, bo ke songaka beto.” Yo yina kana beto ke zola nde bana na beto kuzola Yehowa, beto mosi ntete fwete zola yandi mingi mpi yo fwete monana pwelele.
8-9. Mambu yina mpangi Andrew mpi mpangi Emma me tuba ke longa nge nki?
8 Bibuti lenda longa bana na bo na kuzola Yehowa na mitindu mingi. Mpangi Andrew kele ti bamvula 17 mpi yandi ke tuba nde: “Bibuti na mono vandaka kulonga mono ntangu yonso nde kisambu kele mfunu mingi. Konso mpimpa, papa vandaka kusamba ti mono ata kana mono salaka dezia kisambu na mono. Bibuti na beto vandaka kuyibusa beto ntangu yonso nde: ‘Beno lenda solula ti Yehowa mbala mingi mutindu beno me zola.’ Kisambu kumaka mfunu mingi sambu na mono. Bubu yai, mono ke sambaka Yehowa kukonda mpasi mpi mono ke zabaka nde yandi kele Tata yina ke zolaka mono.” Bibuti, beno vila ve nde kana beno ke zola Yehowa, yo lenda sadisa bana na beno na kuzola yandi mpi.
9 Beto tadila mpi mbandu ya mpangi-nkento Emma. Ntangu papa na bo yambulaka dibuta na bo, yandi bikisaka mama na bo ti bamfuka mingi. Mpangi Emma ke tuba nde: “Kana mama kele ve ti mbongo, yandi vandaka kutubila mutindu Yehowa ke kebaka bansadi na yandi mpi mutindu yandi ke pesaka bo bima yina bo kele ti yo mfunu. Luzingu na yandi monisaka nde yandi vandaka kundima kibeni mambu yina. Mama vandaka kusadila mambu yina yandi vandaka kulonga mono.” Inki yo ke longa bibuti? Yo ke longa bibuti nde, bo fwete vanda bambandu ya mbote sambu na bana na bo ata na bantangu ya mpasi.—Bag. 6:9.
10. Inki mabaku bibuti mingi ya Izraele vandaka ti yo ya kusolula ti bana na bo? (Kulonga 6:6, 7)
10 Dilongi 3: Beno solula ti bana na beno mbala na mbala. Yehowa songaka bantu ya Izraele na kulonga bana na bo mambu na yandi mbala na mbala. (Tanga Kulonga 6:6, 7.) Bibuti yina vandaka ti mabaku mingi na kilumbu ya kulonga bana na bo mpi ya kusadisa bo na kuzola Yehowa. Mu mbandu, mwana-bakala ya Izraele lendaka kulutisa ntangu mingi ti papa na yandi ntangu yandi ke sadisa yandi na kukuna bima na bilanga to na kukatula bima na bilanga. Mpangi na yandi ya nkento lendaka kulutisa ntangu mingi na kilumbu ti mama na yandi ntangu yandi ke sadisa yandi na kutunga mpi na kusala bisalu ya nkaka ya nzo. Ntangu bibuti vandaka kusala ti bana na bo, bo vandaka kusolula mambu mingi ya mfunu. Mu mbandu, bo vandaka kutubila kikalulu ya bumbote ya Yehowa mpi mutindu yandi vandaka kusadisa dibuta na bo.
11. Bubu yai, nki ntangu bibuti lenda solula ti bana na bo?
11 Bubu yai, mambu me sobaka. Na bansi mingi, bibuti ke lutisaka ve ntangu mingi ti bana sambu bibuti lenda vanda na kisalu mpi bana lenda vanda na nzo-nkanda. Yo yina, bibuti fwete sosa ntangu ya kusolula ti bana na bo. (Baef. 5:15, 16; Bafil. 1:10) Bo lenda solula ti bana na bo na lusambu ya dibuta. Mpangi Alexander kele toko mpi yandi ke tuba nde: “Ntangu yonso papa vandaka kuyidika mambu sambu beto sala lusambu ya dibuta mpi yandi vandaka kusala yonso sambu ata kima mosi ve kukanga beto nzila ya kusala yo. Kana beto me manisa kusala lusambu ya dibuta, beto vandaka kusolula.”
12. Inki mfumu ya dibuta fwete sala ntangu bo ke sala lusambu ya dibuta?
12 Kana nge kele mfumu ya dibuta, nki nge lenda sala sambu bana na nge kusepela ti lusambu ya dibuta? Nge lenda longuka ti bo mukanda Zinga Mvula na Mvula! Mukanda yina ta sadisa nge na kusolula ti bo mbote kukonda mpasi. Nge ke zola nde bana na nge kusonga nge mambu yina bo ke yindula mpi mambu yina ke yangisa bo. Yo yina, kunganina bo ve mpi kusungika bo ve ntangu beno ke sala lusambu ya dibuta. Kuwa ve makasi kana bantangu ya nkaka bo ke tuba mambu yina ke wakana ve ti mambu yina Biblia ke tubaka. Na kisika ya kuwa makasi, nge fwete sepela ntangu bo ke songa nge na masonga yonso mambu yina bo ke yindula mpi siamisa bo na kulanda kusala mutindu yina. Nge ta sadisa bana na nge mbote kana nge ke zaba mambu yina bo ke yindula.
Inki mutindu bibuti lenda sadila bima yina Yehowa me salaka sambu na kulonga bana na bo bikalulu ya Yehowa? (Tala paragrafe 13)
13. Inki ntangu diaka bibuti lenda sadisa bana na bo na kukwenda pene-pene ya Yehowa?
13 Bibuti, konso kilumbu beno sosa mabaku ya kusadisa bana na beno na kukwenda pene-pene ya Yehowa. Sambu na kulonga bo mambu ya me tala Nzambi na beto ya zola, yo ke lomba ve kaka nde beno sala yo ntangu beno ke longuka Biblia ti bo. Mpangi Lisa kele mama mpi yandi ke tuba nde: “Beto vandaka kusadila bima yonso na lweka na beto sambu na kulonga bana na beto mambu ya Yehowa. Mu mbandu, kana mbwa na beto me sala kima yina me sekisa bana, beto vandaka kusonga bo nde yo ke monisa nde Yehowa kele Nzambi ya kiese mpi yandi ke zolaka nde beto vanda na kiese mpi beto sepela ti bima ya mbote.”
Bibuti, keti beno ke zaba banduku ya bana na beno? (Tala paragrafe 14) *
14. Sambu na nki yo kele mfunu nde bibuti kusadisa bana na bo na kupona banduku ya mbote? (Bingana 13:20)
14 Dilongi 4: Beno sadisa bana na beno na kuvanda ti banduku ya mbote. Ndinga ya Nzambi ke monisa pwelele nde banduku na beto lenda pusa beto na kukuma ti bikalulu ya mbote to ya mbi. (Tanga Bingana 13:20.) Bibuti, keti beno ke zaba banduku ya bana na beno? Keti beno me monaka bo mpi beno me lutisaka dezia mwa ntangu ti bo? Inki beno lenda sala sambu na kusadisa bana na beno na kuta kinduku ti bantu yina ke zolaka Yehowa? (1 Bak. 15:33) Beno lenda bingisa bampangi yina ke vandaka ti kimpeve ya mbote na nzo na beno mpi beno sala ti bo mambu ya kimpeve.—Nk. 119:63.
15. Inki bibuti lenda sala sambu na kusadisa bana na bo na kuvanda ti banduku ya mbote?
15 Beto tadila mbandu ya mpangi Tony yina kele papa. Yandi ke tendula mutindu yandi ti nkento na yandi me sadisaka bana na bo na kukuma ti banduku ya mbote. Yandi ke tuba nde: “Na nsungi ya bamvula mingi, mono ti nkento na mono vandaka kubingisa bampangi mingi ya bambuta mpi ya baleke na nzo na beto. Beto vandaka kudia ti bo mpi kusala lusambu ya dibuta ti bo. Yo kele mutindu ya mbote kibeni ya kuzaba bantu yina ke zolaka Yehowa mpi bayina ke sadilaka yandi na kiese. Beto vandaka na kiese ya kuyamba bankengi ya nziunga, bamisionere mpi bampangi ya nkaka na nzo na beto. Masolo na bo, kikesa na bo mpi kikalulu na bo ya kuditambika sadisaka kibeni bana na beto na kukwenda pene-pene ya Yehowa.” Bibuti, beno fwete sadisa bana na beno na kuvanda ti banduku ya mbote.
BENO NDIMA NDE BO TA SADILA YEHOWA
16. Inki bibuti ta sala kana mwana mosi kutuba nde yandi ke zola ve kusadila Yehowa?
16 Bibuti, kana beno me sala bikesa ya kusadisa bana na beno kansi mwana mosi me tuba nde yandi ke zola ve kusadila Yehowa, nki beno ta sala? Beno yindula ve nde beno me kuka ve kulungisa mukumba na beno. Yehowa me pesaka beto yonso ti bana na beno mpi nswa ya kupona kusadila yandi to ve. Kana mwana na beno me baka lukanu ya kuyambula Yehowa, beno ndima nde kilumbu kele yandi ta vutukila Yehowa. Beno yibuka mbandu ya mwana yina vilaka. (Luka 15:11-19, 22-24) Mwana yina salaka mambu mingi ya mbi kansi nsuka-nsuka, yandi vutukaka na papa na yandi. Bantu ya nkaka lenda tuba nde, “yo kele kaka kingana. Keti yo lenda salama kibeni?” Ee, yo lenda salama kibeni. Mambu yina kuminaka mpangi Elie yina kele toko.
17. Inki mutindu disolo ya mpangi Elie me sadisa nge?
17 Mpangi Elie ke tuba mambu yai sambu na bibuti na yandi. Yandi ke tuba nde: “Bo salaka bikesa ya kusadisa mono na kuzola Yehowa mpi Ndinga na yandi Biblia. Kansi, ntangu mono kumaka ti bamvula kiteso ya 15, mono yantikaka kukolama.” Mpangi Elie yantikaka kusala mambu ya mbi na kinsweki. Bibuti na yandi salaka yonso sambu na kusadisa yandi na kukwenda pene-pene ya Yehowa kansi yandi zolaka ve. Ntangu yandi katukaka na nzo, yandi kumaka kusala mambu ya mbi mingi. Ata mpidina, bantangu ya nkaka yandi vandaka kusolula mambu ya Biblia ti nduku na yandi mosi. Yandi ke tuba nde: “Ntangu mono vandaka kusolula mingi mambu ya Yehowa ti nduku na mono, mono vandaka kuyindula diaka mingi mambu ya Yehowa. Malembe-malembe, bankeni ya kieleka yina vandaka na ntima na mono, disongidila bankeni ya kieleka yina bibuti na mono salaka ngolo sambu na kukuna, yantikaka kuyela.” Nsuka-nsuka, Elie vutukilaka Yehowa. * Yindula kiese yina bibuti na yandi waka mutindu bo salaka bikesa ya kulonga yandi banda na kileke na kuzola Yehowa.—2 Tim. 3:14, 15.
18. Inki nge lenda tuba sambu na bibuti yina ke salaka bikesa ya kulonga bana na bo na kuzola Yehowa?
18 Bibuti, Yehowa me pesaka beno mukumba ya mbote kibeni ya kusadisa bana na beno na kusadila yandi. (Nk. 78:4-6) Yo kele ve pete mpi beto ke sikisa beno na masonga yonso sambu na bikesa yina beno ke landa kusala sambu na kusadisa bana na beno. Kana beno ke landa kusala bikesa ya kusadisa bana na beno na kuzola Yehowa mpi na kulemfukila yandi, Tata na beto ya zulu yina ke zolaka beto ta sepela mingi.—Baef. 6:4.
NKUNGA 135 “Mwana na Mono, Vanda Mayele”
^ Bibuti yina kele Bakristu ke zolaka bana na bo mingi kibeni. Bo ke salaka ngolo sambu na kusansa bana na bo mpi sambu bana na bo kuvanda na kiese. Diambu ya kuluta mfunu kele nde, bo ke salaka yonso sambu na kusadisa bana na bo na kuzola Yehowa mingi. Disolo yai ta tubila malongi iya ya Biblia yina ta sadisa bibuti na kusadisa bana na bo na kuzola Yehowa.
^ Tala video Yehowa Ke Longaka Beto Mutindu ya Kulungisa Bampusa ya Mabuta na Beto na jw.org.
^ Tala disolo “La Bible transforme des vies” na Nzozulu ya Nkengi ya Kifalansa ya Aprili 1, 2012.
^ NTENDULA YA KIFWANISU: Papa mosi ke bula basket ti mwana na yandi mpi nduku ya mwana na yandi sambu na kuzaba banduku ya mwana na yandi.
