1. Inki lukanu ya mfunu bantu yonso fwete baka?

 BUBU yai, bantu fwete baka lukanu mosi ya mfunu kibeni. Keti bo ta pesa maboko na Kimfumu ya Yehowa Nzambi yina kele Mfumu ya mbote ya ntoto mpi ya zulu to bo ta pesa maboko na kimfumu ya Satana Diabulu, muntu ya nku yina kele mbeni ya Yehowa? Konso muntu fwete pona kimfumu yina yandi ta pesa maboko. Yandi fwete bikala ve kaka mpidina kukonda kupona. Konso lukanu yina bo ta baka ta monisa kana bo ta zinga mvula na mvula na bilumbu ke kwisa to ve. (Mat. 25:31-33, 46) Na “mpasi ya nene,” bo ta tula bantu kidimbu sambu na kuguluka to sambu na kufwa.—Kus. 7:14; 14:9-11; Ezek. 9:4, 6.

2. (a) Baebreo 10:35-39 ke siamisa beto na kusala nki? (b) Inki mutindu mukanda ya Kusonga ta sadisa beto?

² Tanga Baebreo 10:35-39. Kana nge me ponaka na kupesa maboko na Kimfumu ya Yehowa, nge me bakaka lukanu ya mbote kibeni. Bubu yai, nge ke vandaka ti mpusa ya ngolo ya kusadisa bantu ya nkaka na kubaka mpi lukanu yina ya mbote. Nge lenda sadila mambu yina kele na mukanda ya Kusonga sambu na kusadisa bo. Mukanda ya Kusonga ke tubilaka mambu yina ta kumina bantu yina ke teleminaka Yehowa kansi yo ke tubilaka mpi mambu ya mbote yina ta kumina bantu yina ke pesaka maboko kaka na Kimfumu ya Yehowa. Beto fwete longuka bakieleka yina ya mfunu. Sambu yo ta pesa beto kikesa ya kulanda kusadila Yehowa mingi. Yo ta sadisa beto mpi na kusadila mambu yina beto me longuka sambu na kusadisa bantu ya nkaka na kubaka lukanu ya kusadila Yehowa mpi ya kulanda kusadila yandi.

3. Inki beto ta tadila na disolo yai?

 ³ Na disolo yai, beto ta tadila bangiufula yai: Inki ta kumina bantu yina ke pesaka maboko na Kimfumu ya Nzambi? Inki ta kumina bantu yina ke pona na kupesa mbisi ya mfinda ya mbwaki ya ngolo maboko, mbisi yina mukanda ya Kusonga ke tubila?

4. Inki kimvuka ntumwa Yoane monaka ti Yezu na zulu?

⁴ Ntumwa Yoane monaka na mbona-meso mosi bimvuka zole ya bantu yina ke pesa Kimfumu ya Yehowa maboko mpi bo ke baka mambote mpi luzingu ya mvula na mvula. Kimvuka ya ntete kele ti bantu 144000. (Kus. 7:4) Bo ke baka bo na ntoto sambu na kusala guvernema to Kimfumu ti Yezu na zulu. Bo ke yala ntoto ti Yezu. (Kus. 5:9, 10; 14:3, 4) Na mbona-meso yango, Yoane monaka bo me telema ti Yezu Kristu na Ngumba ya Sioni na zulu.—Kus. 14:1.

5. Ntama mingi ve, nki ta kumina bantu ya kele na kimvuka ya bantu 144000 bayina kele awa na ntoto?

⁵ Banda na ntangu ya bantumwa tii bubu yai, bo me ponaka bantu mingi sambu na kuvanda na kati ya kimvuka yina ya bantu 144000. (Luka 12:32; Bar. 8:17) Kansi bo songaka Yoane nde bantu fioti mpamba na kati ya kimvuka yina ta vanda na luzingu na ntoto na bilumbu ya nsuka. “Bayina me bikala” ta baka “kidimbu” ya nsuka sambu na kumonisa nde Yehowa me ndima bo na ntwala nde mpasi ya nene kuyantika. (Kus. 7:2, 3; 12:17) Na ntangu mosi buna na mpasi ya nene, bo ta nata bantu yina na zulu sambu bo vukana ti bayina me fwaka dezia ya me kwendaka na zulu ya kele na kati ya kimvuka ya bantu 144000, bayina sadilaka Yehowa na mutindu ya mbote. Bo ta yala ti Yezu na zulu na Kimfumu ya Nzambi.—Mat. 24:31; Kus. 5:9, 10.

6-7. (a) Inki kimvuka Yoane monaka na nima mpi nki beto me zaba sambu na bantu ya kimvuka yango? (b) Sambu na nki mambu yina Kusonga kapu 7 ke tuba ke tadila kimvuka ya bantu 144000 bayina kele awa na ntoto mpi ‘kimvuka ya nene’?

⁶ Na nima ya kumona kimvuka yina na zulu, Yoane monaka “kimvuka mosi ya nene ya bantu.” Kimvuka yango kele ve bonso kimvuka ya bantu 144000. Sambu mpila ya kutanga ntalu ya bantu ya kimvuka yango kele ve. (Kus. 7:9, 10) Inki mambu beto me zaba sambu na kimvuka yango? Bo songaka Yoane nde: “Bo kele bantu yina me katuka na mpasi ya nene; bo me yobisaka bamvwela na bo mpi bo me kumisaka yo mpembe na menga ya Mwana-Dimeme.” (Kus. 7:14) Na nima ya kuguluka na mpasi ya nene, kimvuka yina ya nene, ta zinga awa na ntoto mpi bo ta baka mambote mingi.—Nk. 37:9-11, 27-29; Bing. 2:21, 22; Kus. 7:16, 17.

⁷ Yo vanda bo me pona beto sambu na kukwenda na zulu to sambu na kuzinga awa na ntoto, beto fwete ndima nde mambu yina Kusonga kapu 7 ke tuba, ke tadila beto mpi. Yo ta vanda ntangu mosi ya kiese kibeni sambu na bimvuka zole yina ya bansadi ya Nzambi. Beto ta vanda na kiese mingi mutindu beto ponaka na kupesa Kimfumu ya Yehowa maboko. Inki diaka mukanda ya Kusonga ke tuba sambu na mpasi ya nene?—Mat. 24:21.

8. Inki mutindu mpasi ya nene ta yantika mpi nki bantu mingi ta sala?

⁸ Mutindu beto monaka yo na disolo ya me luta, ntama mingi ve bimvuka ya politiki ya nsi-ntoto yai ta balukila Babilone ya Nene, disongidila kimvuka ya mabundu yonso ya luvunu ya nsi-ntoto. (Kus. 17:16, 17) Yo ta vanda luyantiku ya mpasi ya nene. Keti yo ta sala nde bantu mingi kuyantika kusambila Yehowa?  Ve. Kusonga kapu 6 ke monisa nde na ntangu yina bantu yina ke sambilaka ve Yehowa ta sosa lutaninu na bimvuka ya politiki mpi ya mumbongo ya nsi-ntoto yai yina kele bonso bangumba. Sambu bo ta pesa ve maboko na Kimfumu ya Nzambi, bo ta vanda bambeni ya Yehowa.—Luka 11:23; Kus. 6:15-17.

9. Sambu na nki bansadi ya Yehowa ta vanda ve bonso bantu ya nkaka na mpasi ya nene mpi nki ta kumina bo?

⁹ Bansadi ya Yehowa yina ke sambilaka yandi na mutindu ya mbote ta vanda ve bonso bantu yina na mpasi ya nene. Bo mpamba ta landa kusambila Nzambi mpi bo ta buya kupesa “mbisi ya mfinda” maboko. (Kus. 13:14-17) Sambu bo ta landa kaka kukangama na Yehowa, yo ta pesa bantu yina ke teleminaka Yehowa makasi mingi kibeni. Yo yina, kimvuka ya makanda ta nwanisa bansadi ya Nzambi na ntoto ya mvimba. Biblia ke binga yo nde bitumba ya Gogi ya Magogi.—Ezek. 38:14-16.

10. Mutindu Kusonga 19:19-21 ke monisa yo, nki Yehowa ta sala ntangu bo ta nwanisa bansadi na yandi?

¹⁰ Inki Yehowa ta sala ntangu bo ta nwanisa bansadi na yandi? Yandi ke songa beto nde: “Nganzi na mono ya ngolo ta pela.” (Ezek. 38:18, 21-23) Kusonga kapu 19 ke tubila mambu yina ta salama na nima. Yehowa ta tinda Mwana na yandi sambu na kutanina bansadi na yandi mpi kufwa bambeni na bo. Na bitumba yina, Yezu ta vukana ti “makesa ya zulu” disongidila bawanzio ya kwikama mpi bantu 144000. (Kus. 17:14; 19:11-15) Inki mutindu bitumba yango ta suka? Bo ta fwa bantu yonso mpi bimvuka yonso yina ke teleminaka Yehowa.—Tanga Kusonga 19:19-21.

11. Inki diambu ya kuluta mfunu yina ta salama ya mukanda ya Kusonga ke tubila?

¹¹ Mona na mabanza mutindu bantu yina ke sambilaka Yehowa na mutindu ya mbote ta wa ntangu bo ta guluka ntangu bo ta fwa bambeni yonso ya Yehowa. Yo ta vanda ntangu mosi ya kiese kibeni. Kiese ta vanda mingi na zulu ntangu bo ta fwa Babilone ya Nene kansi kele diaka ti kima ya nkaka yina ta nata kiese mingi mpenza. (Kus. 19:1-3) Yo kele diambu ya kuluta mfunu yina mukanda ya Kusonga ke tubila, “makwela ya Mwana-Dimeme.”—Kus. 19:6-9.

12. Mutindu Kusonga 21:1, 2 ke monisa yo, nki ntangu makwela ya Mwana-Dimeme ta salama?

¹² Inki ntangu makwela yango ta salama? Bantu yonso ya kimvuka ya bantu 144000 ta vanda na zulu na ntwala nde bitumba ya Armagedoni kuyantika. Ata mpidina, makwela ya Mwana-Dimeme ta salama ve na ntangu yina. (Tanga Kusonga 21:1, 2.) Makwela ya Mwana-Dimeme ta salama na nima ya bitumba ya Armagedoni mpi na nima ya kufwa bambeni yonso ya Nzambi.—Nk. 45:3, 4, 13-17.

13. Inki ta salama na makwela ya Mwana-Dimeme?

¹³ Inki ta salama na makwela ya Mwana-Dimeme? Makwela ke vukisaka bakala ti nkento. Mutindu mosi mpi makwela yina ya kifwani ta vukisa Ntotila, Yezu Kristu ti “nkento” na yandi, disongidila bantu 144000. Diambu yina ya mfunu ta sala guvernema ya mpa yina ta yala ntoto bamvula 1000.—Kus. 20:6.

14-15. Kusonga kapu 21 ke fwanisa bantu 144000 ti nki? (Tala kifwanisu ya lutiti ya zulu.)

¹⁴ Kusonga kapu 21 ke fwanisa bantu 144000 ti mbanza mosi ya kitoko kibeni yina Biblia ke bingaka nde “Yeruzalemi ya Mpa.” (Kus. 21:2, 9) Mbanza yina kele ti matadi 12 ya fondasio mpi bo me sonika “bazina 12 ya bantumwa 12 ya Mwana-Dimeme” na zulu ya matadi yango. Sambu na nki yo bendaka kibeni dikebi ya Yoane? Sambu yandi monaka zina  na yandi ya kusonika na ditadi mosi na kati ya matadi yango. Yo vandaka kibeni dibaku ya nene.—Kus. 21:10-14; Baef. 2:20.

¹⁵ Ata mbanza mosi ve kele bonso mbanza yina. Yo kele ti balabala mosi ya nene ya wolo ya kukonda kuvukisa ti kima ya nkaka, bakielo 12 ya mayaka, bibaka mpi bafondasio na yo kele ti matadi ya ntalu mpi bo me tesa mbote kibeni ba-nda na yo. (Kus. 21:15-21) Kansi Yoane monaka nde kima mosi vandaka ve. Yandi tubaka nde: “Mono monaka ve tempelo na kati na yo, sambu Yehowa Nzambi Nkwa-Ngolo Yonso mpi Mwana-Dimeme kele tempelo na yo. Mpi mbanza vandaka ve na mfunu nde ntangu to ngonda kupesa yo nsemo, sambu nkembo ya Nzambi vandaka kupesa yo nsemo, mpi Mwana-Dimeme vandaka mwinda na yo.” (Kus. 21:22, 23) Bantu yina kele na kati ya Yeruzalemi ya Mpa ta vanda ti Yehowa. (Baeb. 7:27; Kus. 22:3, 4) Yehowa ti Yezu kele tempelo na mbanza yina.

16. Inki ta kumina bantu na Luyalu ya Bamvula Funda ya Kimfumu ya Nzambi?

¹⁶ Bakristu yina bo me tulaka mafuta kele na kiese mingi ya kuyindula mbanza yina. Bantu yina kele ti kivuvu ya kuzinga awa na ntoto fwete sepela mpi ti mbanza yango. Na Luyalu ya Bamvula Funda ya Kimfumu ya Nzambi, Yeruzalemi ya Mpa ta nata mambote mingi kibeni. Yoane monaka mambote yina ke kulumuka bonso “nzadi ya masa ya luzingu.” “Banti ya luzingu” vandaka na balweka yonso zole ya nzadi yango mpi yo vandaka kubasisa matiti “sambu na kubelula makanda.” (Kus. 22:1, 2) Bantu yonso yina ta zinga na ntangu yina ta baka mambote ya bima yina ya kitoko. Bantu yonso ya bulemfu ta kuma bantu ya kukuka malembe-malembe. Maladi ta vanda diaka ve, mpasi ta vanda diaka ve mpi bantu ta basisaka diaka ve mansanga ya mawa.—Kus. 21:3-5.

17. Mutindu Kusonga 20:11-13 ke monisa yo, banani ta baka mambote ya Luyalu ya Bamvula Funda?

¹⁷ Banani ta baka mambote ya bima yina ya kitoko? Bantu ya ntete yina ta bakila yo mambote ta vanda bantu ya kimvuka ya nene yina ta guluka na Armagedoni ti bana yonso yina lenda butuka na nsi-ntoto ya mpa. Kusonga kapu 20 ke tuba mpi nde bafwa ta futumuka. (Tanga Kusonga 20:11-13.) Bantu ya “lunungu” yina sadilaka Yehowa na mutindu ya mbote bayina fwaka mpi bantu ya “kukonda  lunungu” bayina zwaka ve dibaku ya kulonguka mambu ya Yehowa, bo yonso ta futumuka sambu na kuzinga awa na ntoto. (Bis. 24:15; Yoa. 5:28, 29) Keti yo ke tendula nde bantu yonso ta futumuka na Luyalu ya Bamvula Funda? Ve. Bantu yina buyaka na nku yonso na kusambila Yehowa na ntwala nde bo fwa, ta futumuka ve. Bo vandaka ti dibaku ya kulonguka mambu ya Yehowa kansi bo monisaka nde bo vandaka ve ti mfunu ya kuzinga na Paladisu awa na ntoto.—Mat. 25:46; 2 Bate. 1:9; Kus. 17:8; 20:15.

18. Bantu ta vanda nki mutindu awa na ntoto na nsuka ya bamvula 1000?

¹⁸ Na nsuka ya bamvula 1000, bantu yonso yina ta zinga awa na ntoto, ta kuma bantu ya kukuka. Ata muntu mosi ve ta vanda diaka ti disumu yina beto me bakaka na Adami. (Bar. 5:12) Bampasi yonso ya disumu ya Adami ta vanda diaka ve. Yo ke tendula nde bantu yina ta zinga awa na ntoto ta ‘vutuka na luzingu’ sambu bo ta kuma bantu ya kukuka na nsuka ya bamvula 1000.—Kus. 20:5.

19. Sambu na nki kumekama ya nsuka kele mfunu?

¹⁹ Beto ke zaba nde Yezu salaka ve ata fioti mambu yonso yina Satana pusaka yandi na kusala sambu na kubebisa kinduku na yandi ti Yehowa. Yandi bikalaka kaka ya kukangama na Yehowa. Keti bantu yonso ya kukuka ta sala mpi bonso Yezu ntangu bo ta pesa Satana dibaku ya kumeka bo? Konso muntu ta kuka kupesa mvutu na ngiufula yina ntangu bo ta basisa Satana na dibulu ya nda na nsuka ya bamvula 1000. (Kus. 20:7) Bantu yina ta kangama kaka na Yehowa na nsungi ya kumekama ya nsuka, ta baka luzingu ya mvula na mvula mpi kimpwanza ya kieleka. (Bar. 8:21) Bantu yina ta kolama na Yehowa, ta fwa kimakulu ti Diabulu mpi bademo na yandi.—Kus. 20:8-10.

20. Inki mutindu nge ke wa sambu na mambu ya kitoko yina kele na mukanda ya Kusonga?

²⁰ Inki mutindu nge me wa na nima ya kutadila mwa mambu ya beto me tubila ya kele na mukanda ya Kusonga? Keti nge kele na kiese ya kudimona na kati ya mambu ya kitoko yina beto me tubila? Ntembe kele ve nde yo ke pusa nge na kubingisa bantu ya nkaka na kuvukana ti beto na lusambu ya bunkete. (Kus. 22:17) Mambu yina beto me tubila yina ta salama na bilumbu ke kwisa me pesa beto kiese mingi. Yo yina beto ke zola kutuba bonso ntumwa Yoane nde: “Amen! Mfumu Yezu, Kwisa.”—Kus. 22:20.