1. Inki ke yitukisaka bantu mingi ntangu bo ke kwendaka na balukutakanu na beto na mbala ya ntete? (Tala mpi kifwanisu ya lutiti ya zulu.)

 MONA na mabanza muntu mosi ti nkento na yandi me kwenda na lukutakanu ya Bambangi ya Yehowa na Nzo ya Kimfumu na mbala ya ntete. Bo ke yituka mutindu bo me yamba bo mbote mpi mutindu bampangi ke monisa zola. Na nima ya lukutakanu, ntangu bo ke vutuka, nkento ke songa bakala na yandi nde: ‘Bambangi ya Yehowa kele mpenza ya kuswaswana ti bantu ya nkaka. Mono ke sepela kuvukana ti bo.’

2. Sambu na nki bantu ya nkaka me yambulaka kusadila Yehowa?

² Zola yina bansadi ya Yehowa ke vandaka ti yo ke monanaka pwelele. Ya kieleka, Bambangi ya Yehowa ke vandaka ve bantu ya kukuka. (1 Yoa. 1:8) Ntangu beto ke yantika kuzaba mbote-mbote bampangi na dibundu, beto ta mona mpi bifu na bo ya nkaka. (Bar. 3:23) Diambu ya mawa kele nde bantu ya nkaka me bikaka nde bifu ya bampangi kupusa bo na kuyambula kusadila Yehowa.

3. Inki ke salaka nde bantu kuzaba Bakristu ya kieleka? (Yoane 13:34, 35)

³ Tala diaka verse ya me simba disolo yai. (Tanga Yoane 13:34, 35.) Inki ke salaka nde bantu mingi kuzaba Bakristu ya kieleka? Sambu Bakristu ya kieleka ke zolanaka kansi ve sambu bo kele bantu ya kukuka. Kuvila ve nde Yezu tubaka ve nde: ‘Na diambu yai beno ta zaba nde beno kele balongoki na mono’ kansi yandi tubaka nde: “Na diambu yai bantu yonso ta zaba nde beno kele balongoki na mono.” Yezu tubaka nde ata bantu yina kele ve balongoki na yandi ta zaba Bakristu ya kieleka sambu bo ke zolanaka.

4. Inki bangiufula bantu ya nkaka lenda kudiyula sambu na Bakristu ya kieleka?

 ⁴ Bantu ya nkaka yina kele ve Bambangi ya Yehowa lenda kudiyula nde: ‘Inki mutindu zola lenda sadisa beto na kuzaba Bakristu ya kieleka? Inki mutindu Yezu monisilaka bantumwa na yandi zola? Mpi nki mutindu beto lenda landa mbandu ya Yezu bubu yai?’ Bambangi ya Yehowa mpi fwete yindula bamvutu na bangiufula yina. Kusala mpidina lenda sadisa beto na kumonisilana diaka zola mingi, mingi-mingi ntangu bampangi ke sala bifu.​—Baef. 5:2.

5. Mambu yina Yezu tubaka ya kele na Yoane 15:12, 13 ke tendula nki?

⁵ Yezu tubaka pwelele nde balongoki na yandi ta zolana na mutindu yina ta yitukisa. (Tanga Yoane 15:12, 13.) Yezu songaka bo nde: “Beno zolana beno na beno mutindu mono me zolaka beno.” Yo ke tendula nki? Mutindu Yezu tendulaka yo, yo kele zola ya kuditambika disongidila zola yina fwete pusa Mukristu na kufwa sambu na mpangi na yandi. b

6. Inki mutindu Ndinga ya Nzambi ke monisaka nde zola kele mfunu mingi?

⁶ Ndinga ya Nzambi ke longa beto nde zola kele mfunu mingi. Mu mbandu, bantu mingi ke sepelaka ti baverse yai: “Nzambi kele zola.” (1 Yoa. 4:8) “Nge fwete zola nkweno na nge bonso nge mosi.” (Mat. 22:39) “Zola ke fikaka masumu mingi.” (1 Pie. 4:8) “Zola ke sukaka ve.” (1 Bak. 13:8) Baverse yina ti baverse ya nkaka ke monisa pwelele nde yo kele mfunu mingi na kumonisa kikalulu yina ya kitoko.

7. Sambu na nki Satana ta kuka ve ata fioti kuvukisa bantu yina ta zolana na masonga yonso?

⁷ Bantu mingi ke kudiyulaka nde: ‘Inki mutindu mono lenda zaba dibundu ya kieleka? Mabundu yonso ke tubaka nde bo ke longaka kieleka, kansi konso dibundu ke longaka malongi  ya kuswaswana ya me tala Nzambi.’ Satana me basisaka mabundu mingi ya luvunu, yo yina yo ke vandaka mpasi sambu bantu kuzaba dibundu ya kieleka. Kansi yandi lenda kuka ve kuvukisa bantu ya ntoto ya mvimba mpi bo zolana. Kaka Yehowa mpamba muntu lenda sala yo. Yo kele sambu zola ya kieleka ke katukaka kaka na Yehowa. Kaka bantu yina yandi ke pesaka mpeve santu na yandi mpi bayina yandi ke sakumunaka lenda zolana. (1 Yoa. 4:7) Yo yina Yezu tubaka nde kaka balongoki na yandi mpamba ta zolana na masonga yonso.

8-9. Zola ya Bambangi ya Yehowa me pusaka bantu mingi na kusala nki?

⁸ Mutindu Yezu tubaka yo, bantu mingi me zabaka balongoki na yandi ya kieleka sambu bo ke zolanaka na masonga yonso. Mu mbandu, mpangi Yan ke yibuka lukutakanu ya distrike ya ntete yina yandi kwendaka. Yo salamaka na stade mosi pene-pene na nzo na yandi. Mpangi Yan kwendaka sambu na kutala nsaka mosi na stade yina mwa bangonda na ntwala ya lukutakanu. Yandi ke tuba nde: “Bambangi ya Yehowa na lukutakanu yina vandaka mpenza ya kuswaswana ti bantu yina vandaka kutala nsaka yina mono kwendaka kutala. Bambangi ya Yehowa vandaka luzitu mpi bo lwataka mbote. Bana na bo mpi vandaka ti bikalulu ya mbote.” Yandi ke tuba diaka nde: “Kima ya kuluta mfunu kele nde, yo vandaka kumonana nde bo kele bantu yina ke sepelaka ti bima yina bo kele ti yo mpi bantu ya ngemba. Yo kele bima yina mono vandaka ti yo mfunu na luzingu na mono. Mono ke yibukaka diaka ve badiskure ya bo salaka kilumbu yina kansi mono ke vilaka ve ata fioti kikalulu yina mono monaka na Bambangi ya Yehowa kilumbu yina.” c Ya kieleka, Bambangi ya Yehowa ke monisaka kikalulu yina sambu bo ke zolanaka na masonga yonso. Beto ke zolaka bampangi na beto yo yina beto ke monisilaka bo ntima mbote mpi beto ke sadilaka bo mambu na luzitu yonso.

⁹ Mpangi John monaka mpi mambu yina mpangi Yan monaka ntangu yandi kwendaka na mbala ya ntete na lukutakanu ya Bambangi ya Yehowa. Yandi ke tuba nde: “Mono yitukaka mingi mpenza sambu bantu yonso vandaka mawete . . . Bo vandaka kumonana bonso nde bo kele basantu. Zola na bo ya masonga ndimisaka mono nde mono zwaka kibeni dibundu ya kieleka.” d Bambandu ya mutindu yai mpi bambandu mingi ya nkaka ke monisaka nde Bambangi ya Yehowa kele kibeni Bakristu ya kieleka.

10. Inki ntangu beto lenda monisa nde beto ke zolaka bampangi na beto? (Tala mpi noti na nsi ya lutiti.)

¹⁰ Mutindu beto tubilaka yo na luyantiku, bampangi na beto yonso ke vandaka bantu ya kukonda kukuka. Bantangu ya nkaka, bo lenda tuba to kusala mambu yina ta pesa beto makasi. e (Yak. 3:2) Kana mpangi mosi me pesa beto makasi, beto ta monisa nde beto ke zolaka yandi na mambu yina beto ta tuba to ta sala na nima. Kana mpidina, nki malongi beto lenda baka na mbandu ya Yezu?​—Yoa. 13:15.

11. Inki bikalulu ya mbi Yakobo ti Yoane monisaka? (Tala mpi kifwanisu ya ke wakana ti paragrafe yai.)

¹¹ Yezu vandaka kuvingila ve nde balongoki na yandi kusala mambu na mutindu ya kukuka. Kansi na zola yonso, yandi sadisaka bo na kuyambula  bikalulu ya mbi yina bo vandaka ti yo sambu na kusepedisa Yehowa. Kilumbu mosi, Yakobo ti Yoane, bantumwa zole ya Yezu, songaka mama na bo na kusonga Yezu nde yandi pesa bo bisika ya lukumu na Kimfumu. (Mat. 20:20, 21) Mambu yina Yakobo ti Yoane salaka monisaka kikalulu ya lulendo mpi yo monisaka nde bo vandaka kuzola kukuma bantu ya kuluta mfunu.​—Bing. 16:18.

12. Keti kaka Yakobo ti Yoane mpamba bantu monisaka bikalulu ya mbi? Tendula.

¹² Yakobo ti Yoane mpamba ve bantu monisaka bikalulu ya mbi kilumbu yina. Beto tala mpi mambu yina bantumwa ya nkaka salaka. Biblia ke tuba nde: “Ntangu bantumwa ya nkaka kumi waka mambu yina, bo wilaka bampangi yina zole makasi.” (Mat. 20:24) Beto lenda mona na mabanza mutindu Yakobo, Yoane ti bantumwa ya nkaka vandaka kuswana. Mbala ya nkaka bantumwa yina ya nkaka tubaka nde: ‘Beno ke yindula nde beno kele banani sambu bo pesa beno kisika ya lukumu na Kimfumu? Kaka beno ve bantu ke salaka ngolo ti Yezu, beto mpi me fwana na kubaka bisika ya lukumu bonso beno!’ Yo vanda mpidina to ve, bantumwa bikaka nde diambu yina salamaka kilumbu yina kupusa bo na kuvila nde bo fwete zolana ntangu yonso mpi bo fwete sadilana mambu na mawete.

13. Inki Yezu salaka ntangu bantumwa na yandi vandaka kusala bifu ya fioti-fioti? (Mat. 20:25-28)

¹³ Inki Yezu salaka? Yandi waka ve makasi.  Yezu tubaka ve nde yandi ke sosa bantumwa ya kuluta mbote, disongidila bantu ya kudikulumusa mpi bayina ta zolanaka ntangu yonso. Kansi Yezu monisilaka bo ntima-nda mpi yandi solulaka ti bo mbote-mbote sambu yandi zabaka nde bo ke zolaka kusala mambu ya mbote. (Tanga Matayo 20:25-28.) Yezu landaka kusadila bo mambu na zola yonso ata yo vandaka ve mbala ya ntete to mbala ya nsuka yina bantumwa sosaka kuzaba nani na kati na bo vandaka muntu ya kuluta nene.​—Mar. 9:34; Luka 22:24.

14. Bantumwa ya Yezu yelaka na kisika ya nki mutindu?

¹⁴ Ntembe kele ve nde Yezu vilaka ve nde mutindu bantumwa na yandi yelaka lendaka kusala nde bo vanda ti bikalulu ya mutindu yina. (Yoa. 2:24, 25) Bo yelaka na bisika yina bamfumu ya mabundu vandaka kulonga bantu nde kaka bantu yina kele ti mikumba ya nene vandaka mfunu mingi. (Mat. 23:6) Bamfumu ya mabundu ya Bayuda vandaka mpi kuyindula nde bo kele mbote mingi kuluta bantu ya nkaka. f (Luka 18:9-12) Yezu bakisaka nde bangindu ya mutindu yina lendaka kusala nde bantumwa na yandi kuyindula nde bo me luta bantu ya nkaka. (Bing. 19:11) Yandi yindulaka ve ata fioti nde balongoki na yandi ta sala ve bifu mpi yandi monisilaka bo ntima-nda ntangu bo vandaka kusala bifu. Yandi zabaka nde bo vandaka kuzola kusala mambu ya mbote. Yezu monisilaka bo ntima-nda mpi yandi longaka bo na kuvanda ti kudikulumusa mingi mpi na kumonisila bantu ya nkaka zola na kisika ya kusosa kuvanda bantu ya kuluta nene.

15. Mambu yina kuminaka Yakobo ti Yoane mpi balongoki ya nkaka ke longa beto nki?

¹⁵ Beto lenda baka malongi mingi na mambu yina kuminaka Yakobo mpi Yoane. Bo salaka mbi mutindu bo lombaka bisika ya lukumu na Kimfumu. Kansi bantumwa ya nkaka salaka mpi mbi sambu bo bikaka nde diambu yina kupusa bo na kuvanda diaka ve na bumosi sambu na mwa ntangu. Yezu monisilaka bantumwa na yandi yonso 12 ntima-mbote mpi zola. Yo ke longa beto nki? Beto fwete tula dikebi kaka ve na mambu yina bantu ya nkaka ke sala kansi mpi na mambu yina beto ke salaka kana bo me sala bifu. Inki lenda sadisa beto? Kana mpangi mosi me pesa beto makasi, beto lenda kudiyula nde: ‘Sambu na nki diambu yina yandi me sala ke pesa mono makasi mingi? Keti yo ke monisa nde mono kele ti kikalulu mosi ya mbi yina mono fwete yambula? Keti muntu yina me pesa mono makasi ke kutana ti mambu ya mpasi? Ata kana mono ke yindula nde mono kele ti raison ya kuwa makasi, keti mono lenda monisila yandi zola mpi kulolula yandi kaka?’ Kana beto ke zolana, beto ta monisa nde beto kele kibeni balongoki ya kieleka ya Yezu.

16. Mbandu ya Yezu ke longa beto diaka nki?

¹⁶ Mbandu ya Yezu ke longa beto mpi nde, beto fwete sosa kuzaba mbote bampangi na beto Bakristu. (Bing. 20:5) Yezu ke vandaka ti makuki ya kuzaba mambu yina kele na bantima ya bantu. Kansi beto kele ve ti makuki yina. Beto lenda monisila bampangi na beto ntima-nda kana bo me pesa beto makasi. (Baef. 4:1, 2; 1 Pie. 3:8) Yo ta vanda pete na kusala yo kana beto ke zaba bo mbote-mbote. Beto tadila mbandu mosi.

17. Inki mambote nkengi ya nziunga mosi bakaka sambu yandi sosaka kuzaba mpangi mosi mbote?

¹⁷ Nkengi ya nziunga mosi ke yibuka mpangi  mosi yina yandi monaka ntangu yandi vandaka kutala mabundu na Esti ya Afrika. Ntete yandi yindulaka nde mpangi yango vandaka ve mawete. Kansi nki nkengi ya nziunga yina salaka? Yandi ke tuba nde: “Na kisika ya kusosa kuvanda ntama ti mpangi yina, mono bakaka lukanu ya kusosa kuzaba yandi mbote.” Nkengi ya nziunga yina lutisaka ntangu ti mpangi yina, yandi bakisaka nde mutindu mpangi yina yelaka vandaka kusala nde, yandi sadila bantu mambu mutindu yina. Yandi ke tuba diaka nde: “Ntangu mono bakisaka mutindu mpangi yina salaka ngolo sambu na kusoba bikalulu na yandi mpi na kuzinga mbote ti bantu ya nkaka mpi mutindu yandi sobaka dezia na mambu mingi ya nkaka, yo pusaka mono na kuzola yandi diaka mingi. Beto kumaka banduku ya ngolo.” Ya kieleka, kana beto ke sala yonso sambu na kuzaba bampangi na beto mbote, yo ta vanda pete sambu beto zola bo.

18. Inki bangiufula beto lenda kudiyula kana mpangi mosi me sala diambu yina me pesa beto makasi? (Bingana 26:20)

¹⁸ Bantangu ya nkaka beto lenda mona nde yo ke lomba kaka nde beto solula ti mpangi mosi yina me pesa beto makasi. Kansi yo ta vanda mbote nde beto kudiyula ntete bangiufula yai: ‘Keti mono ke bakisa mpenza mambu yonso yina salamaka?’ (Bing. 18:13) ‘Keti yandi salaka diambu yango na luzolo?’ (Lon. 7:20) ‘Keti mono me salaka dezia kifu ya mutindu yina?’ (Lon. 7:21, 22) ‘Kana mono solula ti yandi sambu na yo, keti mono ta tula diaka ve mafuta na tiya?’ (Tanga Bingana 26:20.) Kana beto baka ntangu ya kudiyula bangiufula yina, beto lenda mona nde zola na beto sambu na mpangi yina ta pusa beto na kuvila diambu yina mpi na kubika kuyindula yo.

19. Inki nge fwete sala?

¹⁹ Bambangi ya Yehowa ke monisaka nde bo kele kibeni balongoki ya kieleka ya Yezu sambu bo ke zolanaka. Konso muntu na kati na beto ke monisaka mpi nde yandi kele longoki ya kieleka ya Yezu, ntangu yandi ke monisilaka bampangi zola ya kieleka ata bo ke sala bifu. Kana beto ke zola bampangi na beto na masonga yonso, beto ta sadisa bantu ya nkaka na kuzaba dibundu ya kieleka mpi na kuvukana ti beto sambu na kusambila Yehowa Nzambi ya zola. Beto fwete sala yonso sambu na kulanda kumonisa zola yina ke salaka nde bantu kuzaba Bakristu ya kieleka.