1-2. Inki mambote muntu ke bakaka na nima ya mbotika?

 YO KELE kiese kibeni na kubaka mbotika mpi na kukota na dibuta ya Yehowa. Bantu yina me bakaka dezia mbotika lenda ndima mambu yai ya muyimbi-bankunga Davidi tubaka: “Kiese na muntu yina nge [Yehowa] me sola mpi yina nge me nata pene-pene sambu yandi zinga na bibansala na nge.”—Nk. 65:4.

² Yehowa ke nataka ve muntu yonso na bibansala na yandi. Mutindu beto monaka yo na disolo ya me luta, yandi ke kwendaka pene-pene ya bantu yina me monisa kibeni nde bo ke zola kukuma banduku na yandi ya mbote. (Yak. 4:8) Kana nge me kudipesa na Yehowa mpi nge me baka mbotika, yo ke monisa nde nge me kwenda kibeni pene-pene na Yehowa. Ndima kibeni nde na nima ya mbotika, yandi ta ‘nokisila nge lusakumunu bonso mvula tii kuna ata kima mosi ve ta konda.’—Mal. 3:10; Yer. 17:​7, 8.

3. Inki mukumba ya nene Bakristu yina me kudipesaka na Yehowa mpi me bakaka mbotika kele ti yo? (Longi 5:​4, 5)

³ Ya kieleka, mbotika kele kaka luyantiku. Na nima ya kubaka mbotika, nge fwete sala yonso sambu na kulungisa lusilu na nge ya kudipesa na Yehowa, ata ntangu nge ke kutana ti mpukumuna ya kusala diambu ya mbi to nge ke kutana ti bampasi. (Tanga Longi 5:​4, 5.) Sambu nge kele longoki ya Yezu, nge fwete landa mbandu na yandi mpi nge fwete zitisa bansiku na yandi mbote-mbote. (Mat. 28:​19, 20; 1 Pie. 2:21) Disolo yai ta sadisa nge na kusala yo.

“FULA KULANDA” YEZU ATA NGE KE KUTANA TI BAMPASI MPI MAMBU YINA KE MEKA LUKWIKILU NA NGE

4. Inki mutindu balongoki ya Yezu ke nataka ‘nti ya mpasi’? (Luka 9:23)

⁴ Kuyindula ve nde na nima ya kubaka mbotika, nge ta kutana ve ti bampasi. Nkutu, Yezu tubaka pwelele nde balongoki na yandi ta nata ‘nti ya mpasi.’ Ya kieleka, bo ta nata yo “konso kilumbu.” (Tanga Luka 9:23.) Keti Yezu zolaka kutuba nde balongoki  na yandi ta kutanaka kaka ti bampasi ntangu yonso? Mpidina ve. Yandi vandaka kutuba nde bo ta kutana kaka ve ti mambu ya mbote kansi bo ta kutana mpi ti bampasi. Nkutu, bampasi ya nkaka lenda vanda ngolo kibeni.

5. Yezu tubaka nde bantu yina me yambula bima mingi sambu na Yehowa ta baka nki mambote?

⁵ Mbala ya nkaka bantu ya dibuta na nge me teleminaka nge, to nge me yambulaka dibaku ya kukuma ti mbongo mingi to mbala ya nkaka diaka, nge me yambulaka bima ya nkaka ya kinsuni sambu na kutula mambote ya Kimfumu na kisika ya ntete. (Mat. 6:33) Kana mpidina, ndima kibeni nde Yehowa ke zaba mambu yonso yina nge me salaka sambu na yandi. (Baeb. 6:10) Ntembe kele ve nde nge me monaka nde mambu yai ya Yezu tubaka kele ya kieleka: “Ya kieleka mono ke tubila beno nde, ata muntu mosi ve me bikisaka nzo to bampangi ya babakala to bampangi ya bankento to mama to tata to bana to bilanga sambu na mono mpi sambu na nsangu ya mbote yina ta baka ve ntangu yai mbala 100 kuluta na nsungi yai ya ntangu—banzo, bampangi ya babakala, bampangi ya bankento, bamama, bana, mpi bilanga, ti mbangika—mpi na ngidika ya bima yina ke kwisa, luzingu ya mvula na mvula.” (Mar. 10:​29, 30) Mambote yina nge me bakaka kele mingi kibeni kuluta bima yonso yina nge me yambulaka sambu na Yehowa.—Nk. 37:4.

6. Sambu na nki nge fwete landa kunwana ti “nzala ya nitu” na nima ya mbotika?

⁶ Yo ta lomba nde nge landa kunwana ti “nzala ya nitu” na nima ya mbotika. (1 Yoa. 2:16) Sambu nge kele kaka muntu ya masumu. Bantangu ya nkaka, nge lenda wa mutindu ntumwa Polo vandaka kuwa. Yandi sonikaka nde: “Na ntima na mono, mono ke monaka kiese kibeni na nsiku ya Nzambi, kansi mono ke mona na nitu na mono nsiku ya nkaka yina ke nwana ti nsiku ya mabanza na mono mpi yo ke nata mono na kimpika ya nsiku ya disumu yina kele na nitu na mono.” (Bar. 7:​22, 23) Nge lenda lemba nitu kana nge ke nwana ti banzala ya mbi. Kansi kana nge ke yindula mambu yina nge songaka Yehowa ntangu nge kudipesaka na yandi, yo ta pesa nge ngolo ya kunwana ti banzala yina ya kusala disumu. Diambu ya kieleka kele nde mambu yina nge songaka Yehowa ntangu nge kudipesaka na yandi, ta sadisa nge ntangu nge ta kutana ti mambu yina ke meka nge. Inki mutindu?

7. Inki mutindu kudipesa na Yehowa ta sadisa nge na kulanda kusadila yandi na mutindu ya mbote?

⁷ Ntangu nge me kudipesa na Yehowa, yo ke tendula nde nge me kudibuya. Yo ke tendula nde nge me buya kulungisa banzala na nge mpi balukanu na nge yina ta sepedisa ve Yehowa. (Mat. 16:24) Yo yina kana nge me kutana ti diambu yina ke meka nge, nge ta lutisa ve ntangu ya kuyindula mambu yina nge fwete sala sambu nge bakaka dezia lukanu ya mambu yina nge ta sala, disongidila lukanu ya kulanda kusadila Yehowa na mutindu ya mbote. Nge ta sala yonso sambu na kusepedisa Yehowa. Nge ta vanda bonso Yobi. Ata yandi kutanaka ti bampasi ya ngolo kibeni, yandi tubaka ti kundima yonso nde: “Mono ta yambula ve kwikama na mono!”—Yobi 27:5.

8. Inki mutindu kuyindula kisambu ya kudipesa na Yehowa yina nge salaka, ta sadisa nge na kutelemina kima yina lenda meka nge?

⁸ Kana nge yindula kisambu ya kudipesa na Yehowa yina nge salaka, yo ta pesa nge ngolo ya kutelemina konso kima yina lenda meka lukwikilu na nge. Mu mbandu, keti nge ta monisila nkwelani ya muntu ya nkaka mawi ya zola? Nge ta sala yo ve. Sambu nge songaka dezia Yehowa nde nge ta sala ve ata fioti diambu ya mutindu yina. Kana nge ke bika ve nde banzala ya mbi kuyela na ntima na nge, yo ta lomba ve mpi nde nge nwana sambu na kukatula yo. Nge ta ‘buya nzila ya bantu ya mbi.’—Bing. 4:​14, 15.

9. Inki mutindu kuyindula kisambu ya kudipesa yina nge salaka ta sadisa nge mpi na kulanda kutula mambu ya kimpeve na kisika ya ntete?

⁹ Inki nge ta sala kana bo me pesa nge kisalu yina ta kanga nge nzila ya kukwenda mbala na  mbala na balukutakanu? Nge me zaba kima yina nge ta sala. Sambu nge bakaka dezia na ntwala lukanu ya kubuya kisalu ya mutindu yina. Yo yina, nge ta ndima ve kisalu ya mutindu yina mpi nge ta sosa mutindu ya kulanda kaka kutula Yehowa na kisika ya ntete. Kana nge yindula lukanu ya Yezu ya kusepedisa Tata na yandi, yo ta sadisa nge na kubuya nswalu kibeni mpi na kikesa yonso, konso kima yina ta sepedisa ve Nzambi sambu nge kudipesaka na yandi.—Mat. 4:10; Yoa. 8:29.

10. Inki mutindu Yehowa ta sadisa nge na ‘kufula kulanda Yezu’ na nima ya mbotika?

¹⁰ Diambu ya kieleka kele nde mambu ya mpasi yina nge ke kutana ti yo mpi mambu yina ke meka nge, ke pesa nge dibaku ya kumonisa nde nge ke zola kaka ‘kufula kulanda Yezu.’ Ndima nde Yehowa ta sadisa nge na kufula kulanda Yezu. Biblia ke tuba nde: “Nzambi kele ya kwikama, mpi yandi ta pesa ve nzila nde beno kutana ti mpukumuna kuluta yina beno lenda kangila ntima, kansi ntangu mpukumuna ke kwisa yandi ta yidika mpi nzila sambu beno kuka kukangila yo ntima.”—1 Bak. 10:13.

INKI NGE LENDA SALA SAMBU NA KUFULA KULANDA YEZU?

11. Inki kele mutindu ya kuluta mbote ya kufula kulanda Yezu? (Tala mpi kifwanisu ya ke wakana ti paragrafe yai.)

¹¹ Yezu sadilaka Yehowa na ntima na yandi ya mvimba mpi yandi vandaka kusamba Yehowa mbala na mbala sambu na kulanda kuvanda ti kinduku ya ngolo ti yandi. (Luka 6:12) Ya kieleka, nge fwete landa kusala mambu yina ta sadisa nge na kulanda kukwenda pene-pene ya Yehowa sambu na kufula kulanda Yezu na nima ya mbotika. Biblia ke tuba nde: “Na kiteso yina beto me yela, beto landa kutambula na mutindu yina me fwana na nzila yai mosi.” (Bafil. 3:16) Mbala na mbala, nge ta wa masolo ya bampangi yina bakaka lukanu ya kusala mingi na kisalu ya Yehowa. Mbala ya nkaka, bo kotaka Nzo-Nkanda ya Bansamuni ya Kimfumu to bo kwendaka kisika  yina mpusa ya bansamuni vandaka mingi. Kana mambu ya luzingu na nge ke pesa nge nzila ya kuditudila lukanu yina, sala yonso sambu na kulungisa yo. Bansadi ya Yehowa ke vandaka ti mpusa ya ngolo ya kusala mingi kibeni na kisalu na yandi. (Bis. 16:9) Ebuna, nki nge lenda sala kana bubu yai nge lenda sala ve mingi na kisalu ya Yehowa? Kuyindula ve nde bampangi yina ke sala mingi me luta nge. Kima ya mfunu yina Mukristu yonso fwete sala kele kulanda kukanga ntima. (Mat. 10:22) Kuvila ve nde nge ke sepedisaka Yehowa mingi kibeni ntangu nge ke salaka mambu yina nge lenda sala na kutadila makuki na nge mpi mambu ya luzingu na nge. Yo kele kima ya mfunu ya nge lenda sala sambu na kufula kulanda Yezu na nima ya mbotika.—Nk. 26:1.

12-13. Inki nge lenda sala kana kikesa na nge me yantika kumana? (1 Bakorinto 9:​16, 17) (Tala mpi lupangu “ Landa Kubaka Ntinu.”)

¹² Inki nge fwete sala kana na nima ya bantangu nge ke mona nde, bisambu na nge ke katuka diaka ve na ntima to nge ke sepela diaka ve ti kisalu ya kulonga nsangu ya mbote mutindu nge vandaka kusepela ti yo ntete? Inki nge fwete sala kana nge ke mona nde kutanga Biblia ke sepedisa nge diaka ve mutindu yo vandaka kusepedisa nge ntete? Kana mambu yina me kumina nge na nima ya kubaka mbotika, kuyindula ve nde nge kele diaka ve ti mpeve ya Yehowa. Beto kele bantu ya kukonda kukuka mpi mawi na beto lenda soba mbala na mbala. Kana kikesa na nge me yantika kumana, yindula mbandu ya ntumwa Polo. Ata yandi vandaka kusala bikesa ya kulanda mbandu ya Yezu, yandi zabaka nde bantangu ya nkaka, yandi lenda vanda ve ti nzala ya ngolo ya kusala mambu yina yo ke lomba nde yandi sala. (Tanga 1 Bakorinto 9:​16, 17.) Yandi tubaka nde: “Ata mono sala yo ve na luzolo na mono, mono kele kaka ti kisalu ya kikapita yina bo me pesaka mono.” Yo ke tendula nde, yo lombaka nde Polo kulanda kaka kusala kisalu ya Yehowa ata yandi vandaka ve ti mpusa ya ngolo ya kusala yo.

 ¹³ Mutindu mosi mpi, kubaka ve balukanu na kutadila kaka mawi na nge. Baka lukanu ya kusala mambu ya mbote ata kana nge kele ve ti mpusa ya ngolo ya kusala yo. Kana nge landa kusala mambu ya mbote, na nima ya bantangu mawi na nge lenda soba. Kana nge ke longuka Biblia mbala na mbala, nge ke samba mbala na mbala, nge ke kwenda na balukutakanu mbala na mbala mpi nge ke longa nsangu ya mbote mbala na mbala, yo ta sadisa nge na kufula kulanda Yezu na nima ya mbotika. Kana nge ke landa kusala mambu yina, bampangi ya nkaka mpi ta baka kikesa.—1 Bate. 5:11.

“LANDA KUDIMEKA . . . LANDA KUDITALA”

14. Inki nge fwete tadila mbala na mbala mpi sambu na nki? (2 Bakorinto 13:5)

¹⁴ Kuditadila mbala na mbala na nima ya mbotika ta sadisa nge mpi. (Tanga 2 Bakorinto 13:5.) Kuditadila mbala na mbala sambu na kumona kana nge ke sambaka konso kilumbu, kana nge ke tangaka Biblia konso kilumbu mpi nge ke longukaka yo mbala na mbala, kana nge ke kwendaka na balukutakanu mbala na mbala mpi kana nge ke longaka nsangu ya mbote mbala na mbala. Sala bikesa ya kusala mambu yina na kiese yonso mpi bakila yo mambote. Mu mbandu, kudiyula bangiufula yai: ‘Keti mono lenda tendudila bantu ya nkaka malongi ya ntete-ntete ya Biblia? Keti kele ti mambu ya nkaka yina mono lenda sala sambu na kusepela diaka mingi ti kisalu ya kulonga nsangu ya mbote? Keti bisambu na mono ke katukaka kibeni na ntima mpi keti yo ke monisaka nde mono ke tudilaka Yehowa ntima ya mvimba? Keti mono ke kwendaka mbala na mbala na balukutakanu? Inki mono lenda sala sambu na kutula diaka dikebi mingi na balukutakanu mpi kupesa bamvutu?’

15-16. Inki dilongi nge me baka na disolo ya mpangi Robert na yina me tala kutelemina diambu yina lenda meka nge?

¹⁵ Nge fwete kuditadila mpi mbote-mbote na masonga yonso sambu na kuzaba bifu na nge. Mpangi Robert ke tubila diambu yina yandi kutanaka ti yo ya ke monisa mfunu ya kuzaba bifu na nge. Yandi ke tuba nde: “Ntangu mono vandaka ti bamvula kiteso ya 20, mono vandaka kusala kisalu mosi ya ntangu fioti. Kilumbu mosi na nima ya kisalu, nkento mosi yina beto vandaka kusala ti yandi bingisaka mono na nzo na yandi. Yandi songaka mono nde beto ta vanda kaka beto zole mpi nde beto ta ‘lutisa ntangu ya mbote.’ Ntete, mono buyaka kaka mpidina, kansi nsuka-nsuka mono buyaka kibeni mpi mono tendudilaka yandi sambu na nki.” Mpangi Robert teleminaka diambu yina mekaka yandi mpi beto ke sikisa yandi. Kansi na nima, yandi yindulaka mambu yina salamaka mpi yandi bakisaka nde yo lombaka nde yandi sala mambu mutindu ya nkaka. Yandi ke tuba nde: “Mono buyaka ve ti kikesa yonso mpi na nswalu yonso mutindu Yozefi  teleminaka nkento ya Potifare. (Kuy. 39:​7-9) Ya kieleka, mono yitukaka na kumona mutindu yo vandilaka mono mpasi na kubuya. Diambu yina sadisaka mono na kubakisa nde yo lombaka nde mono kumisa kinduku na mono ngolo ti Yehowa.”

¹⁶ Nge lenda baka mambote kana nge kuditadila bonso mpangi Robert. Ata kana nge me telemina diambu yina me meka nge, kudiyula nde: ‘Yo bakaka mono bantangu ikwa na ntwala ya kubuya?’ Kana nge me mona kisika yina nge fwete yidika, kulemba ve nitu kansi vanda na kiese mutindu nge me zaba kifu yina. Samba Yehowa sambu na yo mpi sala mambu yina ta sadisa nge na kukumisa ngolo mpusa na nge ya kuzitisa minsiku ya bikalulu ya mbote ya Yehowa.—Nk. 139:​23, 24.

17. Inki mutindu mpangi Robert kumisaka zina ya Yehowa?

¹⁷ Disolo ya mpangi Robert kele diaka ti dilongi ya nkaka. Yandi ke tuba diaka nde: “Ntangu mono buyaka kukwenda na nzo ya nkento yina beto vandaka kusala ti yandi, yandi tubaka nde: ‘Nge me nunga.’ Mono yulaka yandi nde yo ke tendula nki. Yandi songaka mono nde nduku na yandi mosi ya bakala yina vandaka ntete Mbangi ya Yehowa, songaka yandi nde baleke yonso ya kele Bambangi ya Yehowa ke salaka masumu na kinsweki kana bo me zwa dibaku ya kusala yo. Yo yina, yandi songaka nduku na yandi yina nde yandi ta meka mono sambu na kutala kana yo kele kibeni mutindu yina. Mono vandaka na kiese mingi mutindu mono kumisaka zina ya Yehowa.”

18. Inki nge fwete sala na nima ya mbotika? (Tala mpi lupangu “ Masolo Zole Yina Ta Sepedisa Nge.”)

¹⁸ Ntangu nge me kudipesa na Yehowa mpi nge me baka mbotika, nge ke monisa nde nge ke zola kusantisa zina ya Yehowa ata nge kutana ti diambu ya nki mutindu. Ndima kibeni nde Yehowa ke zaba bampasi yina nge ke kutana ti yo mpi mambu yina nge ke telemina, ya ke meka lukwikilu na nge. Yandi ta sakumuna bikesa yina nge ke sala sambu na kulanda kusadila yandi na mutindu ya mbote. Ndima mpi nde na nsadisa ya mpeve santu na yandi, yandi ta pesa nge ngolo ya kulanda kusadila yandi na mutindu ya mbote. (Luka 11:​11-13) Ya kieleka, Yehowa ta sadisa nge na kufula kulanda Yezu na nima ya mbotika.