1-2. Inki muntu fwete sala na ntwala ya kubaka mbotika?

 BANTU kuluta milio mosi me baka mbotika mpi me kuma Bambangi ya Yehowa na bamvula tanu ya me katuka kuluta. Mingi na kati na bo longukaka kieleka “yantika bumwana” bonso Timoteo na mvu-nkama ya ntete. (2 Tim. 3:​14, 15) Bankaka longukaka kieleka na kimbuta mpi bankaka na kimununu. Mwa bamvula me luta, nkento mosi yina longukaka Biblia ti Bambangi ya Yehowa bakaka mbotika ti bamvula 97.

² Kana nge ke longuka Biblia to nge ke yela na dibuta ya Bambangi ya Yehowa, keti nge kele ti lukanu ya kubaka mbotika? Kana mpidina, yo kele lukanu ya mbote kibeni. Kansi na ntwala nde nge baka mbotika, nge fwete kudipesa ntete na Yehowa. Disolo yai ta tubila nki kudipesa na Yehowa ke tendula. Yo ta sadisa nge mpi na kubakisa sambu na nki nge fwete wa ve boma ya kudipesa na Yehowa mpi ya kubaka mbotika kana nge kele ya kuyilama na kusala yo.

KUDIPESA NA YEHOWA KE TENDULA NKI?

3. Pesa bambandu ya bantu yina Biblia ke tubila, bayina kudipesaka na Yehowa.

³ Na Biblia, muntu yina me kudipesa na Yehowa kele muntu yina bo me pona to bo me tula na lweka sambu na kulungisa mukumba mosi ya mfunu. Bantu ya Izraele vandaka dikanda yina kudipesaka na Yehowa. Kansi bantu ya nkaka ya dikanda yina kudipesaka na Yehowa na mutindu mosi ya spesiali. Mu mbandu Aroni lwataka “kidimbu ya santu ya kudipesa.” Kidimbu yango vandaka kinzanza ya wolo yina vandaka kusema na ntwala ya tirbani na yandi. Kinzanza yina ya wolo vandaka kumonisa nde bo ponaka yandi sambu na kusadila Yehowa na mutindu ya spesiali, disongidila kuvanda nganga-nzambi ya nene ya Izraele. (Levi 8:9) Banazire mpi kudipesaka na Yehowa na mutindu ya spesiali. Ngogo “Nazire”  me katuka na ngogo ya Kiebreo nazirʹ disongidila “Muntu Yina Me Kabwanaka,” to “Muntu Yina Me Kudipesaka.” Banazire vandaka kulemfuka na bansiku yina bo sonikaka sambu na bo na Nsiku ya Moize.—Kut. 6:​2-8.

4. (a) Kana nge me kudipesa na Yehowa, nki fwete kuma kima ya kuluta mfunu na luzingu na nge? (b) “Kudibuya” ke tendula nki? (Tala mpi kifwanisu ya ke wakana ti paragrafe yai.)

⁴ Kana nge me kudipesa na Yehowa, nge me pona kukuma longoki ya Yezu Kristu mpi kusala luzolo ya Nzambi me kuma kima ya kuluta mfunu na luzingu na nge. Kana nge kudipesa na Nzambi, yo ta lomba nde nge sala nki? Yezu tubaka nde: “Kana muntu ke zola kulanda mono, bika yandi kudibuya.” (Mat. 16:24) Bangogo ya Kigreki ya bo me balula na bangogo “bika yandi kudibuya” lenda tendula mpi nde “yandi fwete zinga diaka ve sambu na yandi mosi.” Kana nge me kudipesa na Yehowa, nge fwete buya mambu yonso yina ke sepedisaka yandi ve. (2 Bak. 5:​14, 15) Yo ke tendula nde nge fwete buya “Bisalu ya nitu,” mu mbandu pite. (Bag. 5:​19-21; 1 Bak. 6:18) Keti kulemfukila bansiku yina ta vanda mpasi sambu na nge? Kana nge ke zola Yehowa mpi nge ke ndima kibeni nde bansiku yina kele sambu na mambote na nge, yo ta vandila nge ve mpasi na kulemfukila yo. (Nk. 119:97; Yez. 48:​17, 18) Mpangi Nicholas ke tuba nde: “Nge lenda tadila minsiku ya Yehowa bonso bibaka ya boloko yina ke kanga nge nzila ya kusala mambu yina nge ke zola kusala to nge lenda tadila yo bonso bibende yina bo me tula na lupangu ya ntambu ya ke tanina nge na kigonsa.”

5. (a) Inki mutindu nge fwete kudipesa na Yehowa? (b) Sambu na nki kudipesa na Yehowa me swaswana ti mbotika? (Tala mpi kifwanisu ya ke wakana ti paragrafe yai.)

⁵ Inki mutindu nge fwete kudipesa na Yehowa? Nge fwete sila yandi na kisambu nde nge ta sambila kaka yandi mpi nde kusala luzolo na yandi ta vanda kima ya kuluta mfunu na luzingu na nge. Yo ke tendula nde nge ta landa kuzola  Yehowa “na ntima na nge ya mvimba, na moyo na nge ya mvimba, na mabanza na nge yonso, mpi na ngolo na nge yonso.” (Mar. 12:30) Nge ta sala ve kisambu yina ya kudipesa na meso ya bantu kansi nge ta baka mbotika na meso ya bantu sambu na kumonisa bo nde nge kudipesaka na Yehowa. Lusilu ya kudipesa na Yehowa kele ve kima ya kubaka na nsaka. Lukanu na nge fwete vanda ya kulanda kulungisa yo mpi Yehowa ke zola nde nge sala mutindu yina.—Lon. 5:​4, 5.

SAMBU NA NKI NGE FWETE KUDIPESA NA YEHOWA?

6. Inki ke pusaka muntu na kudipesa na Yehowa?

⁶ Kima ya ntete-ntete yina fwete pusa nge na kudipesa na Yehowa, kele zola na nge sambu na yandi. Zola yina fwete vanda ve kaka ya mawi. Kansi, “nzayilu ya sikisiki” yina nge kele ti yo sambu na yandi mpi sambu na lukanu na yandi ta sala nde nge kuma kuzola yandi mingi. (Bakol. 1:9) Kulonguka na nge ya Biblia me ndimisa nge kibeni (1) nde Yehowa kele kibeni, (2) nde Biblia kele Ndinga ya Nzambi, mpi (3) nde Yehowa ke sadila organizasio na yandi sambu na kulungisa luzolo na yandi.

7. Inki beto fwete sala na ntwala ya kudipesa na Yehowa?

⁷ Bantu yina ke kudipesaka na Yehowa fwete zaba malongi ya ntete-ntete ya Biblia mpi bo fwete zitisa bansiku ya Nzambi. Bo ke salaka yonso sambu na kusonga mpi bantu ya nkaka mambu yina bo me longuka. (Mat. 28:​19, 20) Zola na bo sambu na Yehowa ke kumaka ngolo mpi bo ke kumaka ti nzala ya kusambila kaka yandi. Keti yo kele mpi mutindu mosi sambu na nge? Kana nge ke zola Yehowa na ntima na nge ya mvimba, nge ta kudipesa na yandi mpi nge ta baka mbotika. Nge ta sala yo ve sambu na kusepedisa longi na nge ya Biblia, bibuti na nge to sambu na kusala mutindu banduku na nge ya nkaka ke sala.

8. Inki mutindu kumonisa ntonda ke pusaka nge na kudipesa na Yehowa? (Nkunga 116:​12-14)

 ⁸ Kana nge yindula mambu yonso yina Yehowa me salaka sambu na nge, yo ta pusa nge na kumonisila yandi ntonda mpi yo ta pesa nge nzala ya kudipesa na yandi. (Tanga Nkunga 116:​12-14.) Biblia ke tubaka nde Yehowa kele Muntu ya ke pesaka “konso dikabu ya mbote mpi konso kado ya kukuka.” (Yak. 1:17) Kado ya kuluta mbote yina yandi me pesaka beto kele kimenga ya Mwana na yandi, Yezu. Yindula fioti: Kimenga ya Yezu me pesaka nge dibaku ya kuvanda ti kinduku ya ngolo ti Yehowa. Diaka, Yehowa me pesaka nge kivuvu ya kuzinga mvula na mvula. (1 Yoa. 4:​9, 10, 19) Kudipesa na Yehowa kele mutindu ya kumonisila yandi ntonda sambu na zola na yandi ya kuluta nene yina yandi me monisilaka nge mpi sambu na mambu ya nkaka ya mbote yina yandi me sadilaka nge. (Kul. 16:17; 2 Bak. 5:15) Bo me tubila mambu yina nge lenda sala na dilongi 46 na kantu-diambu 4 ya mukanda Zinga Mvula na Mvula! Yo kele mpi ti video ya minuta tatu ya kele ti ntu-diambu, Beno Pesa Nzambi Makabu na Beno.

KETI NGE KELE YA KUYILAMA SAMBU NA KUDIPESA NA YEHOWA MPI KUBAKA MBOTIKA?

9. Sambu na nki muntu fwete kudipesa na Yehowa na luzolo na yandi mosi?

⁹ Nge lenda yindula nde nge kele ve ya kuyilama sambu na kudipesa na Yehowa mpi kubaka mbotika. Mbala ya nkaka yo ke lomba nde nge soba mambu ya nkaka na luzingu na nge sambu na kulemfuka na bansiku yonso ya Yehowa. To mbala ya nkaka yo ke lomba nde nge baka ntangu ya kukumisa lukwikilu na nge ngolo. (Bakol. 2:​6, 7) Balongoki yonso ya Biblia ke yelaka ve na kimpeve mutindu mosi mpi baleke yonso ve ke vandaka ya kuyilama sambu na kudipesa na Yehowa mpi kubaka mbotika na ntangu mosi. Tala bisika yina yo ke lomba nde nge yidika mpi sala bikesa ya kuyidika yo. Kudifwanisa ve ti muntu ya nkaka.—Bag. 6:​4, 5.

10. Inki nge lenda sala kana nge me bakisa nde nge kele ntete ve ya kuyilama sambu na kudipesa na Yehowa mpi na kubaka mbotika? (Tala mpi lupangu “ Sambu na Baleke Yina Bibuti na Bo Kele Bambangi ya Yehowa.”)

¹⁰ Ata kana nge me bakisa nde nge kele ntete ve ya kuyilama sambu na kudipesa na Yehowa, landa kuvanda ti lukanu yina. Samba Yehowa sambu yandi sadisa nge na bikesa yina nge ke sala sambu na kusala bansoba ya me fwana na luzingu na nge. (Bafil. 2:13; 3:16) Ndima kibeni nde yandi ta wa kisambu na nge mpi yandi ta pesa mvutu.—1 Yoa. 5:14.

SAMBU NA NKI BANTU YA NKAKA KE WAKA BOMA?

11. Inki mutindu Yehowa ta sadisa beto na kulanda kusadila yandi na mutindu ya mbote?

¹¹ Bantu ya nkaka ke vandaka ya kuyilama sambu na kudipesa na Yehowa mpi sambu na kubaka mbotika kansi bo ke waka boma. Bo lenda wa boma nde na nima ya kubaka mbotika, bo lenda sala disumu ya nene mpi bo basisa bo na dibundu. Kana nge ke wa boma, ndima kibeni nde Yehowa ta pesa nge konso kima yina nge kele ti yo mfunu sambu na ‘kutambula na mutindu yina me fwana na yandi, sambu na kupesa yandi kiese kibeni.’ (Bakol. 1:10) Yandi ta pesa nge mpi ngolo ya kusala mambu ya mbote. Yandi me sadisaka dezia bantu mingi na kusala mambu ya mbote. (1 Bak. 10:13) Yo yina, bo ke basisaka bantu fioti mpamba na dibundu. Yehowa ke sadisaka bansadi na yandi na kulanda kusadila yandi na mutindu ya mbote.

12. Inki beto fwete sala sambu na kusala ve disumu ya nene?

¹² Bantu yonso ya kukonda kukuka ke kutanaka ti mpukumuna ya kusala mambu ya mbi. (Yak. 1:14) Kansi nge mosi muntu ta pona kana nge ta bwa na mpukumuna to ve. Ya kieleka, nge mosi muntu fwete pona mutindu yina nge ke zola kuzinga. Bantu ya nkaka ke tubaka nde beto ta kuka ve kudiyala, kansi yo kele luvunu. Nge lenda longuka mutindu ya kuyala banzala na nge  ya mbi. Yo yina, ata kana nge kele ti banzala ya nki mutindu ya kusala mambu ya mbi, nge lenda baka lukanu ya kusala yo ve. Samba konso kilumbu sambu na kubwa ve. Landa kulonguka Ndinga ya Nzambi mbala na mbala. Kwendaka na balukutakanu. Songa bantu ya nkaka mambu yina nge ke kwikilaka. Kana nge ke sala mambu yina mbala na mbala, yo ta pesa nge ngolo ya kulanda kusadila Yehowa na mutindu ya mbote. Ndima kibeni nde Yehowa ta sadisa nge na kusala yo.—Bag. 5:16.

13. Inki mbandu ya mbote Yozefi me bikilaka beto?

¹³ Yo ta vandila nge pete na kulanda kusadila Yehowa na mutindu ya mbote kana nge ke yindula na ntwala mambu yina nge ta sala kana nge kutana ti diambu mosi yina lenda meka nge. Biblia ke tubila bantu mingi yina salaka mutindu yina, ata bo mpi vandaka bantu ya kukonda kukuka. Mu mbandu, nkento ya Potifare vandaka kupusa Yozefi mbala na mbala na kuvukisa nitu ti yandi. Kansi Yozefi zabaka dezia na ntwala diambu ya kusala. Biblia ke tuba nde “yandi buyaka” mpi yandi tubaka nde: “Inki mutindu mono lenda sala mbi yai ya nene mpi kusala kibeni disumu na ntwala ya Nzambi?” (Kuy. 39:​8-10) Yo kele pwelele nde Yozefi zabaka mambu yina yandi ta sala na ntwala nkutu nde nkento yina kupusa yandi na kuvukisa nitu ti yandi. Yo vandilaka yandi pete na kusala mambu ya mbote ntangu yandi kutanaka ti diambu yina mekaka yandi.

14. Inki mutindu beto lenda buya kusala mambu ya mbi?

¹⁴ Inki mutindu nge lenda landa mbandu ya Yozefi mpi kusala mambu ya mbote kana nge me kutana ti diambu yina ke meka kwikama na nge? Nge lenda yindula banda bubu yai mambu yina nge ta sala kana nge me kutana ti diambu yina ta meka kwikama na nge. Buya na mbala mosi mambu yina Yehowa ke mengaka mpi nkutu, kuyindula yo ve ata fioti. (Nk. 97:10; 119:165) Yo ta sala nde nge sala ve disumu ntangu yina nge ta kutana ti diambu yina ta meka kwikama na nge. Nge ta zaba dezia mambu yina nge ta sala sambu nge yindulaka yo dezia na ntwala mpi nge bakaka dezia lukanu.

15. Inki mutindu muntu lenda monisa nde yandi ke “sosaka Yehowa na masonga yonso”?

¹⁵ Mbala ya nkaka nge ke zaba nde nge me zwa kieleka mpi nge ke zola kusadila Yehowa na ntima nge ya mvimba, kansi kima mosi ke kanga nge nzila ya kudipesa na yandi mpi ya kubaka mbotika. Nge lenda sala mutindu ntotila Davidi salaka. Nge lenda songa Yehowa nde: “Fimpa mono, O Nzambi, mpi zaba ntima na mono. Tala mono, mpi zaba bangindu ya ke yangisa mono.  Tala kana na kati na mono kele ti nzila ya ke pesa mpasi, mpi twadisa mono na nzila ya mvula na mvula.” (Nk. 139:​23, 24) Yehowa ke sakumunaka bantu yina ke “sosaka yandi na masonga yonso.” Mambu ya nge ke sala sambu na kulungisa lukanu ya kudipesa na Yehowa mpi ya kubaka mbotika ke monisa nde nge ke sosa yandi na masonga yonso.—Tanga Baebreo 11:6.

LANDA KUPUSANA PENE-PENE NA YEHOWA

16-17. Inki mutindu Yehowa ke bendaka bana yina bibuti na bo kele Bambangi ya Yehowa? (Yoane 6:44)

¹⁶ Yezu tubaka nde Yehowa muntu ke bendaka balongoki na yandi. (Tanga Yoane 6:44.) Yindula mutindu diambu yina ke yitukisa kibeni mpi nki mutindu yo ke tadila nge. Yehowa ke monaka diambu ya mbote na konso muntu yina yandi ke bendaka na yandi. Yandi ke tadilaka muntu yina bonso “kima na yandi ya mfunu mingi” to “kima na yandi ya ntalu.” (Kul. 7:6; noti na nsi ya lutiti.) Yandi ke tadilaka nge mpi mutindu yina.

¹⁷ Mbala ya nkaka nge kele leke mpi bibuti na nge kele Bambangi ya Yehowa. Nge lenda yindula nde nge ke sadilaka Yehowa kaka sambu bibuti na nge ke sadilaka yandi, kansi ve sambu yandi me bendaka nge na yandi. Kansi Biblia ke tubaka nde: “Beno kwenda pene-pene na Nzambi, ebuna yandi ta kwisa pene-pene na beno.” (Yak. 4:8; 1 Bans. 28:9) Kana nge me baka lukanu ya kukwenda pene-pene na Yehowa, yandi ta kwisa pene-pene na nge. Yehowa ke monaka nge ve kaka bonso muntu yina ke sadila yandi na kati ya kimvuka mosi. Yehowa ke bendaka konso muntu, yo vanda muntu yina bibuti na yandi kele Bambangi ya Yehowa. Mutindu Yakobo 4:8 ke monisa yo, kana muntu kubaka lukanu ya kukwenda pene-pene na Yehowa, yandi mpi ke pusanaka pene-pene na yandi.—Tala mpi 2 Batesalonika 2:13.

18. Inki beto ta tadila na disolo ya ke landa? (Nkunga 40:8)

¹⁸ Kana nge me kudipesa na Yehowa mpi nge me baka mbotika, nge ke landa mbandu ya Yezu. Yandi kudimonisaka na luzolo yonso na ntwala ya Tata na yandi sambu na kusala mambu yonso yina Tata na yandi lombaka yandi na kusala. (Tanga Nkunga 40:8; Baeb. 10:7) Na disolo ya ke landa, beto ta tadila mambu yina ta sadisa nge na kulanda kusadila Yehowa na mutindu ya mbote na nima ya mbotika.