1. Inki bansadi ya nkaka ya Yehowa ke kudiyulaka?

 YO KE pesaka beto kikesa mutindu beto me zabaka nde Yehowa ke ndimaka beto bansadi na yandi. Biblia ke tubaka nde: “Yehowa ke zolaka bantu na yandi.” (Nk. 149:4) Kansi bantangu ya nkaka, bampangi ya nkaka ke lembaka kibeni nitu mpi bo ke kudiyulaka nde: ‘Keti Yehowa ke ndimaka mono kibeni?’ Bantangu ya nkaka, bansadi ya Yehowa ya ntangu ya ntama, bayina vandaka kusadila yandi na mutindu ya mbote, vandaka mpi kudiyula kana Yehowa vandaka kusepela kibeni ti bo.—1 Sam. 1:​6-10; Yobi 29:​2, 4; Nk. 51:11.

2. Banani Yehowa ke ndimaka?

² Biblia ke tubaka na pwelele yonso nde Yehowa lenda ndima bantu ya kukonda kukuka. Inki mutindu? Beto fwete monisa lukwikilu na Yezu Kristu mpi beto fwete baka mbotika. (Yoa. 3:16) Kana beto sala mpidina, beto ta monisa nde beto me balula ntima na masumu na beto mpi beto me sila Nzambi nde beto ta sala kaka luzolo na yandi. (Bis. 2:38; 3:19) Yehowa ke vandaka na kiese ntangu beto ke salaka mambu yina sambu na kukuma ti kinduku ya ngolo ti yandi. Kana beto ke sala bikesa ya kulanda kuzitisa lusilu na beto ya kudipesa na Yehowa, yandi ke ndimaka beto mpi yandi ke kumisaka beto banduku na yandi ya ngolo.—Nk. 25:14.

3. Inki beto ta tubila na disolo yai?

³ Sambu na nki bantangu ya nkaka bampangi ya nkaka ke yindulaka nde Yehowa ke ndimaka bo ve? Inki mutindu Yehowa ke monisaka nde yandi ke ndimaka beto? Mpi nki mutindu Mukristu lenda ndima kibeni nde Yehowa ke ndimaka yandi?

SAMBU NA NKI BANTU YA NKAKA KE YINDULAKA NDE YEHOWA KE NDIMAKA BO VE?

4-5. Ata beto ke yindula nde beto kele ve mfunu, nki beto fwete ndima kibeni?

⁴ Banda ntangu bo vandaka bana-fioti, bampangi mingi na kati na beto vandaka kuyindula nde bo kele ve mfunu. (Nk. 88:15) Mpangi Adrián ke tuba nde: “Ntangu yonso, mono vandaka kuyindula nde mono kele ve mfunu. Mono ke yibuka nde ntangu mono  vandaka mwana-fioti, mono vandaka kusamba sambu dibuta na mono kuzinga na Paladisu ata mono vandaka kuyindula kibeni nde, mono ta vanda ve kuna sambu mono vandaka ve muntu ya mbote. Mpangi Tony yelaka ve na dibuta ya Bambangi ya Yehowa, yandi ke tuba nde: “Bibuti na mono songaka mono ve ata mbala mosi nde bo ke zolaka mono to nde bo ke sepelaka ti mono. Yo yina, mono vandaka kuyindula nde mono lenda sala ve ata kima mosi ya mbote yina lenda sepedisa bo.”

⁵ Kana bantangu ya nkaka beto ke yindula nde beto kele ve mfunu, beto fwete vila ve nde Yehowa yandi mosi muntu bendaka beto na yandi. (Yoa. 6:44) Yandi ke monaka bikalulu na beto ya mbote, yina mbala ya nkaka beto mosi ke monaka yo ve mpi yandi ke zabaka ntima na beto mbote kibeni. (1 Sam. 16:7; 2 Bans. 6:30) Yo yina, ntangu yandi ke tubaka nde beto kele mfunu mingi, beto fwete ndima yo kibeni.—1 Yoa. 3:​19, 20.

6. Inki ntumwa Polo vandaka kuyindula sambu na masumu yina yandi salaka na ntwala nde yandi kuma Mukristu?

⁶ Na ntwala ya kuzaba kieleka, bampangi ya nkaka salaka mambu ya mbi yina ke yangisaka bo tii bubu yai. (1 Pie. 4:3) Ata Bakristu yina ke sadilaka Yehowa na mutindu ya mbote lenda nwana mpi ti bangindu yina. Keti bantangu ya nkaka nge mpi ke nwanaka ti bangindu yina? Kana mpidina, nge ta baka kikesa kana nge zaba nde bansadi ya Yehowa ya ntangu ya ntama, bayina vandaka kusadila yandi na mutindu ya mbote, nwanaka mpi bantangu ya nkaka ti bangindu yina. Mu mbandu, ntangu ntumwa Polo vandaka kuyindula bifu na yandi, yandi tubaka nde yandi kele muntu ya mawa. (Bar. 7:24) Ya kieleka, Polo balulaka ntima na masumu yina yandi salaka mpi yandi bakaka mbotika. Ata mpidina, yandi kudibingaka nde yandi kele “muntu ya kuluta fioti na kati ya bantumwa” mpi “muntu ya ntete” na kati ya bansumuki.—1 Bak. 15:9; 1 Tim. 1:15.

7. Inki beto fwete vila ve sambu na masumu yina beto me salaka?

⁷ Tata na beto ya zulu ke sila nde yandi ta lolula beto kana beto me balula ntima. (Nk. 86:5) Yo yina, kana beto me wa kibeni mpasi sambu na masumu yina beto salaka, beto fwete ndima nde mambu yina Yehowa tubaka kele kieleka mpi yandi me lolulaka beto.—Bakol. 2:13.

8-9. Sambu na nki beto fwete yindula ve nde beto ta kuka ve kusala mambu yina ta sepedisa Yehowa?

⁸ Beto yonso ke zolaka kusala yonso yina beto lenda sala sambu na kusadila Yehowa mingi. Kansi bampangi ya nkaka ke yindulaka nde bo lenda kuka ve ata fioti kusala mambu yina ta sala nde Yehowa kundima bo. Mpangi-nkento Amanda ke tuba nde: “Mono ke yindulaka ntangu yonso nde kupesa Yehowa yonso yina mono lenda pesa, ke tendula nde mono fwete sala kaka mingi. Mbala mingi mono ke sosaka kusala mingi kuluta yina mono lenda kuka kusala. Yo yina, kana mono ke kuka ve kusala mambu yina mono ke zola kusala, mono ke yindulaka nde Yehowa ke sepela ve ti mono mutindu mono mosi mpi ke sepela ve.”

⁹ Inki mutindu beto lenda yambula kuyindula nde beto ta kuka ve kusala mambu yina ta sepedisa Yehowa? Kuvila ve nde Yehowa ke vandaka ve makambu ngolo. Yandi ke lombaka beto ve na kusala mambu yina beto ta kuka ve kusala. Yandi ke sepelaka ti mambu yina beto ke salaka sambu na yandi kana beto ke pesa yandi yonso yina beto lenda pesa. Diaka, yindula bambandu ya bantu yina Biblia ke tubilaka, bayina sadilaka Yehowa na ntima na bo ya mvimba. Yindula mbandu ya Polo. Yandi salaka ngolo mpi ti kikesa yonso bamvula mingi. Yandi salaka ba voyage ya nda mpi yandi kangulaka mabundu mingi. Keti Nzambi vandaka kundima diaka ve Polo ntangu mambu sobaka na luzingu na yandi mpi yo pesaka yandi diaka ve nzila ya kulonga mingi nsangu ya mbote mutindu yandi vandaka kusala yo ntete? Ve. Yandi landaka kusala yonso yina yandi lendaka kusala mpi Yehowa sakumunaka yandi. (Bis. 28:​30, 31) Mutindu mosi mpi, bantangu ya nkaka mambu lenda soba na luzingu na beto mpi yo lenda sala nde beto sala diaka ve mingi na kisalu ya Yehowa mutindu beto vandaka kusala ntete.  Kansi kima ya mfunu sambu na Yehowa kele bikuma yina ke pusa beto na kusadila yandi. Beto tadila ntangu yai mwa mitindu yina Yehowa ke monisaka nde yandi ke zolaka beto.

INKI MUTINDU YEHOWA KE MONISAKA NDE YANDI KE NDIMAKA BETO?

10. Inki mutindu beto lenda “wa” ndinga ya Yehowa ke songa beto nde yandi ke ndima beto? (Yoane 16:27)

¹⁰ Na nzila ya Biblia. Yehowa ke sosaka mabaku ya kumonisa bansadi na yandi nde yandi ke zolaka bo mpi nde yandi ke ndimaka bo. Biblia ke tubila bambala zole yina Yehowa songaka Yezu nde yandi kele Mwana na yandi yina yandi ke zolaka mingi mpi yina yandi ke ndimaka. (Mat. 3:17; 17:5) Keti nge mpi ke zolaka nde Yehowa kusonga nge nde yandi ke ndimaka nge? Yehowa ke solulaka ve ti beto kimuntu-kimuntu, kansi yandi ke solulaka ti beto na nzila ya Biblia. Kana beto ke tanga mambu yina Yezu songaka balongoki na yandi na zola yonso na Baevanzile, yo kele bonso nde beto ke “wa” Yehowa ke songa beto mambu yango. (Tanga Yoane 16:27.) Yezu landaka mbandu ya Tata na yandi na mutindu ya kukuka. Yo yina, ntangu beto ke tangaka mutindu Yezu vandaka kusonga balongoki na yandi ya kukonda kukuka, bayina vandaka kusadila Yehowa na mutindu ya mbote nde yandi ke ndimaka bo, beto lenda mona na mabanza mutindu Yehowa ke songa beto mpi mambu yina.—Yoa. 15:​9, 15.

11. Kana beto ke kutana ti bampasi, sambu na nki yo ke tendula ve nde Nzambi ke ndima beto diaka ve? (Yakobo 1:12)

¹¹ Na nzila ya mambu yina yandi ke salaka. Yehowa ke vandaka ti nzala ya ngolo ya kusadisa beto. Mu mbandu, yandi ke pesaka beto bima ya kinsuni yina beto kele ti yo mfunu. Bantangu ya nkaka Yehowa ke pesaka nzila nde beto kutana ti bampasi, mutindu yandi pesaka nzila nde Yobi mpi kukutana ti bampasi. (Yobi 1:​8-11) Kana beto ke kutana ti bampasi, yo ke tendula ve nde Nzambi ke ndima beto diaka ve. Kansi, bampasi yina ke pesaka beto mabaku ya kumonisa nde beto ke zolaka Nzambi mingi mpi beto ke tudilaka yandi ntima. (Tanga Yakobo 1:12.) Diaka, ntangu beto ke kutana ti bampasi yina, beto ta mona mutindu Yehowa ke zolaka beto mpi mutindu yandi ke sadisaka beto na kukanga ntima.

12. Mbandu ya mpangi Dmitrii ke longa beto nki?

¹² Beto tadila mbandu ya mpangi Dmitrii na Asie. Kisalu na yandi fwaka mpi yandi salaka bangonda mingi kukonda kuzwa kisalu ya nkaka. Yo yina, yandi bakaka lukanu ya kulonga mingi nsangu ya mbote sambu na kumonisa nde yandi ke tudilaka Yehowa ntima. Bangonda mingi lutaka kansi yandi vandaka kuzwa kaka ve kisalu. Na nima, yandi belaka maladi mosi ya ngolo kibeni mpi yandi kangamaka kaka na mbeto. Yo  yina, yandi yantikaka kuyindula nde yandi vandaka diaka ve bakala ya mbote mpi tata ya mbote. Diaka, yandi yantikaka kudiyula kana Yehowa vandaka kundima yandi kaka. Kilumbu mosi na nkokila, mwana na yandi ya nkento sonikaka na papie mosi mambu yina kele na Yezaya 30:15. Yo ke tuba nde: “Beno ta vanda ngolo kana beno bikala pima mpi beno tula ntima.” Yandi nataka yo na lweka ya mbeto na yandi mpi songaka yandi nde: “Papa, kana nge ke wa ve mbote, nge lenda yindula verse yai.” Mpangi Dmitrii bakisaka nde Yehowa vandaka kaka kusadisa dibuta na yandi, sambu bo vandaka ti madia, bilele mpi kisika ya kuzinga. Yandi ke tuba nde: “Kima yina yo lombaka nde mono sala vandaka kaka kubikala pima mpi kulanda kutudila Nzambi na mono ntima.” Kana nge mpi ke kutana ti diambu ya mutindu mosi, ndima nde Yehowa ke zolaka nge mpi yandi ta sadisa nge na kukanga ntima.

13. Banani Yehowa lenda sadila sambu na kumonisa nde yandi ke ndimaka beto mpi nki mutindu yandi lenda sadila bo?

¹³ Na nzila ya bampangi. Yehowa ke sadilaka bampangi na beto sambu na kumonisa nde yandi ke ndimaka beto. Mu mbandu, yandi lenda pusa bantu ya nkaka na kupesa beto kikesa na ntangu yina beto kele kibeni ti mfunu na yo. Yo kuminaka mpangi-nkento mosi na Asie, ntangu yandi vandaka ti basusi mingi kibeni. Kisalu na yandi fwaka mpi yandi belaka ngolo kibeni. Na nima, bakala na yandi salaka disumu mosi ya nene mpi yandi vandaka diaka ve nkuluntu. Yandi ke tuba nde: “Mono vandaka kubakisa ve sambu na nki mambu yina yonso vandaka kukumina mono. Mono yindulaka nde mbala ya nkaka mono salaka kima mosi ya mbi mpi Yehowa vandaka kundima mono diaka ve.” Mpangi-nkento yina bondilaka Yehowa sambu yandi ndimisa yandi nde yandi ke zolaka yandi kibeni. Inki Yehowa salaka? Yandi ke tuba nde: “Bankuluntu solulaka ti mono mpi bo ndimisaka mono nde Yehowa ke zolaka mono.” Na nima, yandi lombaka diaka Yehowa lusadisu. Yandi ke tuba diaka nde: “Kaka kilumbu yina, mono zwaka mukanda mosi yina  kimvuka mosi ya bampangi ya dibundu na beto sonikilaka mono. Ntangu mono vandaka kutanga mambu ya ke pesa kikesa yina bo sonikilaka mono, mono bakisaka nde Yehowa waka kisambu na mono.” Ya kieleka, mbala mingi Yehowa ke monisaka nde yandi ke ndimaka beto na nzila ya mambu ya ke pesa kikesa yina bampangi na beto ke songaka beto.—Nk. 10:17.

14. Inki mutindu diaka Yehowa ke monisaka nde yandi ke ndimaka beto?

¹⁴ Yehowa ke monisaka mpi nde yandi ke ndimaka beto ntangu yandi ke sadilaka bampangi na beto sambu na kupesa beto bandongisila na ntangu yina beto kele kibeni ti mfunu na yo. Mu mbandu, na mvu-nkama ya ntete, Yehowa sadilaka ntumwa Polo sambu na kusonikila bampangi na yandi Bakristu mikanda 14 na nsadisa ya mpeve santu. Na mikanda yina, ntumwa Polo pesaka bampangi na yandi bandongisila ya ngolo mpi na zola yonso. Sambu na nki Yehowa pusaka Polo na kupesa bandongisila yina ya ngolo? Yehowa kele Tata ya mbote mpi yandi ke pesaka ndola na bana na yandi “yina yandi ke zolaka.” (Bing. 3:​11, 12) Yo yina, kana mpangi mosi me pesa beto ndongisila ya me katuka na Biblia, yo ke tendula ve nde Yehowa me wila beto makasi, kansi yo ke monisa nde yandi ke zolaka beto. (Baeb. 12:6) Inki mambu ya nkaka Yehowa ke salaka sambu na kumonisa nde yandi ke ndimaka beto?

MAMBU YA NKAKA YA KE MONISA NDE YEHOWA KE NDIMAKA BETO

15. Banani Yehowa ke pesaka mpeve santu mpi yo ke ndimisa beto nki?

¹⁵ Yehowa ke pesaka mpeve santu na yandi na bantu yina yandi ke ndimaka. (Mat. 12:18) Beto lenda kudiyula nde: ‘Keti mono ke monisaka mwa bikalulu ya mbuma ya mpeve ya Nzambi?’ Banda nge me kumaka Mbangi ya Yehowa, keti nge me bakisaka nde nge ke monisilaka bantu ntima-nda mingi? Ya kieleka, kana nge ke yedisa mingi bikalulu ya mbuma ya mpeve, ndima kibeni nde Yehowa ke ndimaka nge.—Tala lupangu “ Mbuma ya Mpeve Kele . . . ”

16. Banani Yehowa me pesaka mukumba ya kulonga nsangu ya mbote mpi yo ke pusa nge na kuwa nki mutindu? (1 Batesalonika 2:4)

¹⁶ Yehowa ke vandaka na kiese ya kupesa mukumba ya kulonga nsangu ya mbote na bantu yina yandi ke ndimaka. (Tanga 1 Batesalonika 2:4.) Mpangi Jocelyn ndimaka kibeni mambu yina ntangu yandi vandaka kulonga bantu nsangu ya mbote. Kilumbu mosi, mpangi Jocelyn telamaka na suka mpi yandi vandaka kuniokwama na mabanza. Yandi ke tuba nde: “Mono vandaka kuwa ve ngolo mpi mono yindulaka nde mono kele ve mfunu. Kansi mono vandaka mupasudi-nzila mpi yo vandaka kilumbu na mono ya kulonga nsangu ya mbote. Yo  yina mono sambaka mpi mono kwendaka kulonga nsangu ya mbote.” Kaka kilumbu yina na suka, mpangi Jocelyn kutanaka ti Mary, nkento mosi ya mawete yina ndimaka kulonguka Biblia. Mwa bangonda na nima, Mary songaka mpangi Jocelyn nde yandi vandaka kusamba Nzambi sambu yandi sadisa yandi ntangu mpangi Jocelyn bulaka na porte na yandi. Yo longaka mpangi Jocelyn nki? Yandi ke tuba nde: “Mono waka bonso Yehowa ke songa mono nde: ‘Mono ke ndima nge.’” Ya kieleka, bantu yonso ve ta ndima nsangu yina beto ke longaka bo. Kansi beto fwete ndima kibeni nde Yehowa ke sepelaka ntangu beto ke salaka bikesa ya kulonga bantu nsangu ya mbote.

17. Mambu yina mpangi Vicky tubaka sambu na kimenga ya Yezu ke longa nge nki? (Nkunga 5:12)

¹⁷ Yehowa ke salaka nde bantu yina yandi ke ndimaka kubakila kimenga ya Yezu mambote. (1 Tim. 2:​5, 6) Kansi, nki beto ta sala kana ntima na beto ke pusa beto na kuyindula nde Yehowa ke ndimaka beto ve ata beto ke kwikilaka na kimenga ya Yezu mpi beto me bakaka mbotika? Kuvila ve nde beto fwete tula ve ntima na mawi na beto ntangu yonso, kansi beto fwete tudila Yehowa ntima. Yandi ke zabaka nde bantu yina ke kwikilaka na kimenga ya Yezu kele bantu ya lunungu na meso na yandi mpi yandi ke sila nde yandi ta sakumuna bo. (Tanga Nkunga 5:12; Bar. 3:26) Kuyindula mingi kimenga ya Yezu sadisaka mingi mpangi Vicky. Kilumbu mosi na nima ya kuyindula mingi kimenga ya Yezu, yandi bakisaka nsuka-nsuka nde: “Yehowa me monisilaka mono ntima-nda bantangu mingi. . . . Ya kieleka, yo vandaka bonso mono vandaka kusonga yandi nde: ‘Nge lenda zola ve muntu bonso mono. Kimenga ya Mwana na nge ta kuka ve kusala nde nge lolula masumu na mono.’” Ntangu yandi vandaka kuyindula mingi kimenga ya Yezu, yandi yantikaka kubakisa nde Yehowa ke zolaka yandi. Kana beto mpi ke yindula kimenga ya Yezu, beto ta bakisa nde Yehowa ke zolaka beto mpi nde yandi ke ndimaka beto.

18. Inki beto fwete ndima kibeni kana beto ke landa kuzola Tata na beto ya zulu?

¹⁸ Ata beto lenda sala bikesa ya kusadila mambu yina beto me longuka na disolo yai, bantangu ya nkaka beto lenda lemba nitu mpi beto lenda kudiyula kana Yehowa ke ndimaka beto kibeni. Kana yo me kumina nge, kuvila ve nde Yehowa ke ndimaka “bantu yina ke landaka kuzola yandi.” (Yak. 1:12) Yo yina, landa kupusana pene-pene na Yehowa mpi sosa mambu yonso yina ke monisa nde yandi ke ndimaka nge. Kuvila ve ata fioti nde Yehowa “kele ntama ve ti konso muntu na kati na beto.”—Bis. 17:27.