1. Inki mambote beto ke bakaka sambu beto kele na organizasio ya Yehowa?

 BETO kele na kiese mingi kibeni sambu beto kele na organizasio ya Yehowa na bilumbu yai ya nsuka ya kele mpasi mingi kibeni. Mambu na nsi-ntoto yai ke landa kubeba kibeni, kansi Yehowa me pesaka beto dibuta ya bampangi yina kele na bumosi mpi yina ke sadisaka beto. (Nk. 133:1) Yandi ke sadisaka beto na kuvanda ti dibuta ya kiese. (Baef. 5:33–6:1) Mpi yandi ke pesaka beto mayele yina beto kele ti yo mfunu sambu na kuvanda na ngemba ya kieleka.

2. Inki beto fwete sala mpi sambu na nki?

² Kansi, beto fwete landa kusala bikesa mingi sambu na kulanda kusadila Yehowa na mutindu ya mbote. Sambu na nki? Sambu bantangu ya nkaka, bantu ya nkaka lenda tuba to bo lenda sala mambu yina lenda pesa beto mpasi. Beto lenda lemba mpi nitu kana beto ke sala bifu, mingi-mingi kana beto ke sala bifu ya mutindu mosi mbala na mbala. Beto fwete sala bikesa ya kulanda kusadila Yehowa (1) kana mpangi mosi me tuba to me sala kima mosi ya me pesa beto mpasi, (2) kana nkwelani na beto me tuba to me sala kima mosi yina me pesa beto mpasi, mpi (3) kana beto me lemba nitu sambu na bifu na beto. Na disolo yai, beto ta tadila mambu yina tatu. Beto ta tadila mpi malongi yina beto lenda baka na bambandu ya bantu tatu yina Biblia ke tubilaka.

LANDA KUSADILA YEHOWA ATA MPANGI MOSI ME PESA NGE MPASI

3. Inki diambu ya mpasi bansadi ya Yehowa ke kutanaka ti yo?

³ Diambu ya mpasi. Bampangi ya nkaka kele ti bikalulu ya nkaka yina ke pesaka beto makasi. Bankaka lenda sala kima mosi yina lenda pesa beto mpasi to bo lenda sadila beto mambu na mutindu ya mbi. Bampangi yina kele ti mikumba lenda sala mpi bifu.  Mambu yina lenda sala nde bantu ya nkaka kudiyula kana yai kele kibeni organizasio ya Nzambi. Na kisika ya kulanda kusadila Nzambi “dipeka na dipeka” ti bampangi na bo, bo lenda buya kusolula ti bampangi yina salaka mambu yina pesaka bo mpasi to nkutu, bo lenda yambula kukwenda na balukutakanu. (Sef. 3:9) Keti yo kele mbote na kusala mutindu yina? Beto tadila disolo ya muntu mosi na Biblia yina kutanaka mpi ti mambu ya mutindu yina mpi beto tala dilongi yina beto lenda baka na mbandu na yandi.

4. Inki mambu ya mpasi ntumwa Polo kutanaka ti yo?

⁴ Mbandu ya Biblia. Ntumwa Polo zabaka nde bampangi na yandi Bakristu vandaka bantu ya kukonda kukuka. Mu mbandu, Bakristu ya nkaka na Yeruzalemi vandaka kundima ve nde yandi kumaka kibeni Mukristu. (Bis. 9:26) Na nima, bantu ya nkaka vandaka kutuba mambu ya mbi sambu na yandi sambu na kupusa bantu ya nkaka na kutudila yandi ve ntima. (2 Bak. 10:10) Polo monaka mutindu mpangi mosi yina vandaka ti mikumba bakaka lukanu mosi ya mbi, yina mbala ya nkaka budisaka bantu ya nkaka sakuba. (Bag. 2:​11, 12) Diaka, Marko nduku na yandi mosi ya ngolo, salaka diambu mosi yina pesaka yandi mpasi mingi. (Bis. 15:​37, 38) Polo lendaka kubika nde mambu yina kupusa yandi na kuvukana diaka ve ti bampangi yina, kansi yandi landaka kuzola bampangi mpi yandi landaka kusadila Yehowa na mutindu ya mbote. Inki sadisaka yandi?

5. Inki sadisaka Polo na kuyambula ve bampangi na yandi? (Bakolosai 3:​13, 14) (Tala mpi kifwanisu ya ke wakana ti paragrafe yai.)

⁵ Polo vandaka kuzola bampangi na yandi. Yo sadisaka yandi na kutula ve dikebi na bifu na bo kansi na bikalulu na bo ya mbote. Zola sadisaka mpi Polo na kusadila mambu yina yandi sonikaka na Bakolosai 3:​13, 14. (Tanga.) Beto tala mutindu yandi lolulaka Marko. Ata Marko yambulaka Polo na voyage ya ntete ya kimisionere yina yandi salaka, Polo kangilaka yandi ve makasi. Na nima, ntangu Polo sonikilaka dibundu ya Kolose mukanda mosi ya ke pesa kikesa, yandi tubaka nde Marko kele nduku na yandi ya kisalu ya yandi ke zolaka mingi mpi yina ‘ke lembikaka yandi mingi.’ (Bakol. 4:​10, 11) Ntangu yandi vandaka na boloko na Roma, yandi lombaka nde Marko kukwisa kusadisa yandi. (2 Tim. 4:11) Ya kieleka, Polo lolulaka bampangi na yandi mpi yandi yambulaka bo ve. Mbandu na yandi ke longa beto nki?

6-7. Inki mutindu beto fwete landa kuzola bampangi na beto ata bo ke sala bifu? (1 Yoane 4:7)

⁶ Dilongi. Yehowa ke zola nde beto landa kusala bikesa sambu na kulanda kuzola bampangi na beto. (Tanga 1 Yoane 4:7.) Kana mpangi mosi me sala kima mosi yina me pesa beto mpasi, beto lenda ndima kibeni nde yandi me sala yo ve  na luzolo yonso mpi nde yandi ke salaka bikesa ya kusala mambu ya mbote. (Bing. 12:18) Nzambi ke zolaka bansadi na yandi ya kwikama ata bo ke salaka bifu. Ata beto me sala bifu, yandi ke landaka kuvanda nduku na beto mpi yandi ke kangilaka beto ve makasi. (Nk. 103:9) Yo kele mfunu nde beto landa mbandu ya Tata na beto yina ke lolulaka.—Baef. 4:32–5:1.

⁷ Kuvila mpi ve nde beto fwete vanda ti kinduku ya mbote ti bampangi na beto sambu nsuka me kuma pene-pene. Bantu ta niokula beto diaka mingi kibeni. Nkutu, bo lenda tula beto na boloko sambu na lukwikilu na beto. Kana bo tula beto na boloko, beto ta vanda diaka ti mfunu ya bampangi na beto mingi kuluta. (Bing. 17:17) Beto tadila mambu yina kuminaka mpangi Josep a yina kele nkuluntu na Espagne. Bo tulaka yandi ti bampangi ya nkaka na boloko sambu bo buyaka kusala kisalu ya kisoda. Yandi ke tuba nde: “Na boloko, beto yonso vandaka kuzinga kisika mosi. Yo yina bantangu ya nkaka, mpangi mosi lenda sala diambu yina lenda pesa nge makasi. Yo lombaka nde beto lolulana mbala na mbala na ntima ya mvimba. Yo sadisaka beto na kulanda kuvanda na bumosi mpi na kuditanina. Beto vandaka kuzinga na kati ya bantu yina vandaka kusadila ve Yehowa. Kilumbu mosi mono lwalaka na diboko mpi bo kangaka mono bande, yo yina mono kukaka ve kusadila diboko yango. Kansi, mpangi mosi vandaka kuyobisa bilele na mono mpi kusala mambu mingi sambu na kusadisa mono. Mono monaka kibeni zola ya kieleka ntangu mono vandaka ti mfunu na yo mingi kuluta.” Beto kele ti bikuma ya mbote ya kuyidika mambu ti bampangi na beto banda bubu yai.

LANDA KUSADILA YEHOWA ATA NKWELANI NA NGE ME PESA NGE MPASI

8. Inki diambu ya mpasi bankwelani ke kutanaka ti yo?

⁸ Diambu ya mpasi. Bankwelani yonso ke kutanaka ti bampasi. Biblia ke tubaka na pwelele yonso nde bantu yina ke kwela ta kutana ti “bampasi na nitu.” (1 Bak. 7:28) Sambu na nki? Sambu makwela ke vukisaka bantu zole ya kukonda kukuka mpi bo ke vandaka ti bikalulu ya kuswaswana. Bantangu ya nkaka, bakala ti nkento ke zolaka mpi ve mambu ya mutindu mosi. Mbala ya nkaka, bo yelaka ve na bisika ya mutindu mosi. Bantangu ya nkaka, bo lenda monisa bikalulu ya nkaka yina monanaka ve na ntwala nde bo kwelana. Mambu yina lenda nata mavwanga. Na kisika ya kundima nde konso muntu salaka kifu mpi bo sala kumosi sambu na kuyidika mavwanga yina, bo lenda kudipesana foti. Nkutu, bo lenda yindula nde kima ya mbote ya kusala kele kukabwana to kufwa makwela. Kana bo sala mpidina, keti bo ta vanda na kiese? b Beto tadila disolo ya muntu mosi yina Biblia ke tubilaka, yina landaka kuvanda na makwela ya mpasi kibeni.

9. Inki diambu ya mpasi Abigaile kutanaka ti yo?

⁹ Mbandu ya Biblia. Abigaile vandaka nkento ya Nabale, yina Biblia ke tubaka nde yandi vandaka muntu ya nku mpi yandi vandaka kusala mambu na mutindu ya mbi. (1 Sam. 25:3) Yo vandaka kibeni mpasi sambu na Abigaile na kuzinga ti bakala ya mutindu yina. Keti Abigaile zwaka dibaku ya kufwa makwela yina? Ee. Yandi zwaka dibaku yina ntangu Davidi, yina zolaka kukuma ntotila ya Izraele, vandaka kukwisa sambu na kufwa bakala na yandi sambu yandi fingaka Davidi mpi bantu na yandi. (1 Sam. 25:​9-13) Abigaile lendaka kutina mpi kubika nde Davidi kufwa bakala na yandi. Kansi yandi tinaka ve mpi yandi bondilaka Davidi na kufwa ve Nabale. (1 Sam. 25:​23-27) Inki pusaka yandi na kusala mutindu yina?

10. Yo ke monana nde nki pusaka Abigaile na kulanda kuvanda na makwela ya mpasi?

 ¹⁰ Abigaile vandaka kuzola Yehowa mpi yandi vandaka kuzitisa minsiku na yandi ya makwela. Ntembe kele ve nde yandi zabaka mbote mambu yina Nzambi songaka Adami ti Eva ntangu yandi salaka makwela ya ntete. (Kuy. 2:24) Abigaile zabaka nde makwela kele kima ya santu na meso ya Yehowa. Yandi zolaka kusepedisa Nzambi mpi yo pusaka yandi na kusala yonso yina yandi lendaka kusala sambu na kugulusa bantu ya nzo na yandi ti bakala na yandi mpi. Yandi salaka mambu na nswalu yonso sambu na kukanga Davidi nzila ya kufwa Nabale. Na luzolo yonso, yandi lombaka Davidi pardo ata yandi ve muntu salaka diambu ya mbi. Ya kieleka, Yehowa vandaka kuzola nkento yai ya kikesa mpi ya kukonda bwimi. Inki dilongi babakala mpi bankento lenda baka na mbandu ya Abigaile?

11. (a) Inki Yehowa ke zolaka nde bankwelani kusala? (Baefezo 5:33) (b) Mutindu mpangi Carmen salaka yonso sambu na kutanina makwela na yandi ke longa nge nki? (Tala mpi kifwanisu ya ke wakana ti paragrafe yai.)

¹¹ Dilongi. Yehowa ke zolaka nde bakala ti nkento yina me kwelana kukabwana ve, ata nkwelani mosi kele ti bikalulu ya mbi. Nzambi ke vandaka na kiese mingi ntangu yandi ke monaka bakala ti nkento yina me kwelana ke sala yonso sambu na kuyidika mambu na makwela na bo mpi bo ke monisa nde bo ke zolana mpi bo ke zitisana. (Tanga Baefezo 5:33.) Beto tadila mbandu ya mpangi Carmen. Banvula kiteso ya 6 na nima ya makwela na bo, mpangi-nkento Carmen yantikaka kulonguka Biblia ti Bambangi ya Yehowa mpi na nima yandi bakaka mbotika. Yandi ke tuba nde: “Bakala na mono sepelaka ve. Yandi vandaka kuwila Yehowa kimpala. Yandi vandaka kufinga mono mpi kusonga mono nde yandi ta yambula mono.” Ata mpidina, mpangi Carmen landaka kaka kuvanda na makwela na yandi. Yandi salaka yonso sambu na kuzola bakala na yandi mpi kuzitisa yandi na nsungi ya bamvula 50. Yandi ke tuba nde: “Na nsungi ya bamvula, mono kumaka kubakisa mbote kibeni bakala na mono mpi mono vandaka kusolula ti yandi na mawete yonso. Mono zabaka nde makwela kele kima ya santu na meso ya Yehowa. Yo yina, mono salaka yonso sambu na kutanina yo. Mono fwaka ve makwela na mono sambu mono ke zolaka Yehowa.” c Kana nge ke kutana ti mambu ya mpasi na makwela na nge, ndima kibeni nde Yehowa ta pesa nge kikesa mpi yandi ta sadisa nge na kulanda kuvanda na makwela na nge.

LANDA KUSADILA YEHOWA ATA NTANGU NGE ME SALA BIFU YA NENE

12. Kana beto me sala disumu mosi ya nene, nki diambu ya mpasi beto lenda kutana ti yo?

¹² Diambu ya mpasi. Beto lenda lemba kibeni nitu kana beto me sala disumu ya nene. Biblia ke  tubaka nde masumu lenda sala nde beto vanda na ‘mawa mpi beto niokwama.’ (Nk. 51:17) Mpangi Robert salaka bikesa bamvula mingi sambu na kukuma nsadi ya kisalu. Kansi, yandi salaka disumu mosi ya nene kibeni mpi yandi bakisaka nde diambu yina yandi salaka pesaka Yehowa mpasi mingi kibeni. Yandi ke tuba nde: “Kansansa na mono vandaka kuyangisa mono mingi sambu na diambu yina mono salaka. Na nima, mono waka mpasi mingi kibeni na ntima. Mono dilaka ngolo mpi mono sambaka Yehowa. Mono yindulaka nde Yehowa lenda wa diaka ve ata fioti bisambu na mono sambu mono salaka diambu yina pesaka yandi mpasi mingi kibeni.” Kana beto me sala disumu mosi ya nene, beto lenda wa mpasi mingi kibeni na ntima mpi beto lenda yindula nde Yehowa me yambula beto mpi beto kele diaka ve ti kikuma ya kusadila yandi. (Nk. 38:4) Kana nge mpi nge ke yindula mutindu yina, tadila mbandu ya muntu mosi na Biblia yina landaka kusadila Yehowa ata yandi salaka disumu mosi ya nene.

13. Inki disumu ya nene ntumwa Piere salaka mpi nki bifu ya nkaka yandi salaka na ntwala ya kusala disumu yina?

¹³ Mbandu ya Biblia. Na mpimpa ya nsuka ya Yezu awa na ntoto, ntumwa Piere salaka bifu mingi mpi yo salaka nde yandi sala disumu mosi ya nene kibeni. Ntete, Piere monisaka nde yandi vandaka kuditudila ntima mingi. Yandi bulaka ntulu nde yandi ta yambula ve Yezu ata bantumwa ya nkaka kuyambula yandi. (Mar. 14:​27-29) Na nima, ntangu bo vandaka na kilanga ya Getsemane, Piere lalaka mbala na mbala mpi yandi landaka ve kukengila. (Mar. 14:​32, 37-41) Na nima, ntangu kimvuka mosi ya nene ya bantu kwisaka ti bambele ya bitumba mpi banti sambu na kukanga Yezu, Piere yambulaka yandi. (Mar. 14:50) Nsuka-nsuka, Piere buyaka mbala tatu nde yandi ke zaba ve Yezu, nkutu yandi salaka lusilu sambu na luvunu yina. (Mar. 14:​66-71) Inki Piere salaka ntangu yandi bakisaka nde yandi me sala disumu mosi ya nene? Yandi lembaka nitu mpi yandi dilaka ngolo, mbala ya nkaka yandi kudiyangisaka mingi kibeni sambu na diambu yango. (Mar. 14:72) Yindula mpasi ya ngolo yina Piere waka na nima, ntangu bo fwaka nduku na yandi Yezu. Piere yindulaka nde yandi kele muntu ya kukonda mfunu.

14. Inki sadisaka Piere na kulanda kusadila Yehowa? (Tala ya lutiti ya zulu.)

¹⁴ Piere landaka kusadila Yehowa sambu na bikuma mingi. Yandi kudivandilaka ve kansi yandi kwendaka na bampangi na yandi ya kimpeve mpi ntembe kele ve nde bo pesaka yandi kikesa. (Luka 24:33) Diaka, ntangu Yezu futumukaka, yandi kutanaka ti Piere mpi yo ke monana nde yo vandaka sambu na kupesa yandi kikesa. (Luka 24:34; 1 Bak. 15:5) Na nima, Yezu nganinaka ve Piere sambu na bifu yina yandi salaka kansi yandi songaka yandi nde yandi ta baka mikumba ya  nene. (Yoa. 21:​15-17) Piere zabaka nde yandi salaka disumu ya nene kibeni, kansi yandi vandaka kusala bikesa ya kusala mambu ya mbote. Sambu na nki? Sambu yandi zabaka nde Mfumu na yandi Yezu, vandaka kuzola yandi kaka. Mpi bampangi ya Piere ya kimpeve landaka kusadisa yandi. Mbandu na yandi ke longa beto nki?

15. Yehowa ke zola nde beto ndima kibeni nki? (Nkunga 86:5; Baroma 8:​38, 39) (Tala mpi kifwanisu ya ke wakana ti paragrafe yai.)

¹⁵ Dilongi. Yehowa ke zola nde beto ndima kibeni nde yandi ke zolaka beto mpi nde yandi ke vandaka ya kuyilama na kulolula beto. (Tanga Nkunga 86:5; Baroma 8:​38, 39.) Kana beto me sala disumu, beto ke kudiyangisaka. Yo kele ve mbi. Kansi, beto fwete yindula ve nde Yehowa ke zola beto diaka ve to nde yandi ta lolula beto ve ata fioti. Beto fwete sosa lusadisu nswalu. Mpangi Robert yina beto me tubila ke tuba nde: “Mono salaka disumu sambu mono tulaka ntima na ngolo na mono mosi ya kutelemina diambu yina lenda meka mono.” Yandi bakisaka nde yandi fwete solula ti bankuluntu. Yandi ke tuba diaka nde: “Ntangu mono solulaka ti bankuluntu, mbala mosi mono monaka zola ya Yehowa na nzila na bo. Bo yambulaka mono ve mpi bo sadisaka mono na kubakisa nde Yehowa yambulaka mono ve.” Beto mpi fwete ndima nde Yehowa ke zolaka beto mingi kibeni mpi yandi ke lolulaka beto kana beto me balula ntima na masumu yina beto me sala, kana beto me sosa lusadisu mpi kana beto ke sala bikesa sambu na kuvutukila yo diaka ve. (1 Yoa. 1:​8, 9) Kana beto ke ndima kibeni mpidina, yo ta sadisa beto na kulanda kusadila Yehowa kana beto me sala kifu.

16. Sambu na nki nge fwete landa kusadila Yehowa?

¹⁶ Yehowa ke sepelaka mingi kibeni ti bikesa yina beto ke salaka sambu na kulanda kusadila yandi na bilumbu yai ya nsuka ya kele mpasi mingi kibeni. Yehowa ta sadisa beto na kulanda kusadila yandi ata beto ke kutana ti mambu ya mpasi. Beto lenda landa kuzola bampangi na beto mpi kulolula bo ata kana bo me sala diambu yina me pesa beto mpasi. Beto lenda monisa nde beto ke zolaka Nzambi mingi mpi beto ke zitisaka makwela kana beto ke sala bikesa ya kuyidika mambu ya mpasi yina lenda basika na makwela na beto. Mpi kana beto me sala disumu, beto fwete sosa lusadisu ya Yehowa, beto fwete ndima nde yandi ke zolaka beto mpi nde yandi me lolula beto, mpi beto fwete landa kusadila yandi. Beto fwete ndima kibeni nde Yehowa ta sakumuna beto mingi kibeni kana beto ke “yambula ve kusala mambu ya mbote.”—Bag. 6:9.