1. Inki mutindu beto me zaba nde Yehowa ke zolaka kuvanda pene-pene ti beto?

 YEHOWA ke bingaka beto na kukwenda pene-pene na yandi. (Yak. 4:8) Yandi ke zolaka kuvanda Nzambi na beto, Papa na beto mpi Nduku na beto. Yandi ke pesaka mvutu na bisambu na beto mpi yandi ke sadisaka beto na bantangu ya mpasi. Yandi ke sadilaka mpi organizasio na yandi sambu na kulonga beto mpi kutanina beto. Kansi, nki beto fwete sala sambu na kukwenda pene-pene ya Yehowa?

2. Inki mutindu beto lenda kwenda pene-pene ya Yehowa?

² Beto ta kwenda pene-pene ya Yehowa kana beto ke samba yandi, kana beto ke tanga Ndinga na yandi mpi ke yindula mbote-mbote mambu yina beto ke tanga. Kana beto sala mutindu yina, beto ta kuma kuzola yandi mingi mpi ta pesaka yandi mersi mingi. Yo ke pusaka beto na kulemfukila yandi mpi na kukumisa yandi sambu yandi mpamba muntu me fwana na kubaka nkembo. (Kus. 4:11) Kana beto ke zaba Yehowa mbote, beto ta kuma kutudila yandi ntima mingi. Beto ta kuma mpi kutula ntima na organizasio na yandi yina yandi me pesaka sambu na kusadisa beto.

3. Inki mutindu Diabulu ke sosaka kukabula beto ti Yehowa kansi nki ta sadisa beto na kuyambula ve ata fioti Yehowa mpi organizasio na yandi? (Nkunga 31:13, 14)

³ Kansi Diabulu ke salaka yonso sambu na kukabula beto ti Yehowa mingi-mingi ntangu beto ke kutana ti bampasi. Inki yandi ke salaka? Yandi ke sosaka kupusa beto malembe-malembe na kutudila diaka ve Yehowa mpi organizasio na yandi ntima. Kansi, beto lenda telemina yandi. Kana beto kele ti lukwikilu ya ngolo  mpi kana beto ke tudila Yehowa ntima mingi, beto ta yambula yandi ve mpi beto ta yambula ve organizasio na yandi.—Tanga Nkunga 31:13, 14.

4. Inki beto ta tubila na disolo yai?

⁴ Na disolo yai, beto ta tubila mambu tatu ya mpasi yina lenda katuka na nganda ya dibundu. Konso diambu ya mpasi lenda sala nde beto landa ve kutudila Yehowa ntima mpi organizasio na yandi. Inki mutindu bampasi yina lenda kabula beto ti Yehowa? Inki beto fwete sala sambu na kutelemina Satana?

5. Inki mutindu bampasi lenda sala nde beto tudila ve Yehowa mpi organizasio na yandi ntima?

⁵ Bantangu ya nkaka, beto ke kutanaka ti bampasi. Mu mbandu, bantu ya dibuta na beto lenda telemina beto to kisalu na beto lenda fwa. Inki mutindu bampasi yina lenda sala nde beto tudila diaka ve organizasio ya Yehowa ntima mpi nki mutindu yo lenda kabula beto ti Yehowa? Kana beto ke kutana ti bampasi yina ke wumela, beto lenda konda kivuvu mpi beto lenda niokwama na mabanza. Satana ke sadilaka bantangu yina ya mpasi sambu na kupusa beto na kuyindula nde Yehowa ke zolaka beto ve. Diabulu ke zolaka nde beto yindula nde Yehowa to organizasio na yandi kele na kisina ya bampasi na beto. Bantu ya nkaka ya Izraele yina vandaka na Ezipte kutanaka mpi ti diambu ya mutindu yina. Ntete, bo ndimaka kibeni nde Yehowa muntu ponaka Moize mpi Aroni sambu na kukatula bo na kimpika. (Kub. 4:29-31) Kansi na nima, ntangu Farao kumaka kuniokula bo mingi, bo pesaka Moize mpi Aroni foti sambu na bampasi na bo. Bo songaka bo nde: “Beno me sala nde Farao ti bansadi na yandi kumenga beto, mpi beno me tula mbele ya bitumba na maboko na bo sambu bo fwa beto.” (Kub. 5:19-21) Bo pesaka Moize ti Aroni foti. Yo vandaka diambu ya mpasi kibeni. Kana nge ke kutana ti bampasi yina ke wumela, nki mutindu nge lenda landa kutudila Yehowa mpi organizasio na yandi ntima?

6. Mbandu ya profete Habakuki ke longa beto nki na yina me tala kukanga ntima na bampasi na beto? (Habakuki 3:17-19)

⁶ Songa Yehowa mambu yonso yina kele na ntima na nge na kisambu mpi lomba yandi lusadisu. Profete Habakuki kutanaka ti bampasi mingi. Na ntangu mosi buna, yandi yindulaka nde Yehowa ke tudila yandi diaka ve dikebi. Yo yina, yandi songaka Yehowa mambu yonso yina vandaka kuyangisa yandi na kisambu. Yandi tubaka nde: “O Yehowa, tii nki ntangu mono fwete dila sambu na kulomba lusadisu, kansi nge ke wa ve? . . . Sambu na nki nge ke pesa nzila nde bo niokula bantu?” (Hab. 1:2, 3) Yehowa pesaka mvutu na kisambu yina nsadi na yandi Habakuki salaka, kisambu yina katukaka na ntima. (Hab. 2:2, 3) Ntangu Habakuki yindulaka mbote-mbote mutindu Yehowa gulusaka bansadi na yandi, yandi vutukilaka diaka kiese na yandi. Yandi ndimaka kibeni nde Yehowa vandaka kutanina yandi mpi kusadisa yandi na kukanga ntima na bampasi. (Tanga Habakuki 3:17-19.) Yo ke longa beto nki? Kana nge ke kutana ti bampasi, samba Yehowa mpi songa yandi mambu yina ke yangisa nge. Lomba yandi lusadisu. Kana nge sala mpidina, ndima nde Yehowa ta pesa nge ngolo sambu na kukanga ntima. Kana nge mona mutindu Yehowa me sadisa nge, lukwikilu na nge ta kuma diaka ngolo.

7. Inki muntu mosi ya dibuta ya mpangi Shirley songaka yandi mpi nki sadisaka mpangi Shirley na kuyambula ve kutudila Yehowa ntima?

⁷ Landa kusala mambu ya kimpeve. Beto tala mutindu kulanda kusala mambu ya kimpeve sadisaka mpangi-nkento Shirley na kukanga ntima na bampasi. * Yandi ke zingaka na Papouasie-Nouvelle-Guinée. Dibuta ya mpangi Shirley vandaka bansukami mpi bantangu ya  nkaka yo vandaka mpasi sambu bo zwa madia ya me fwana. Muntu mosi ya dibuta na bo sosaka kupusa yandi na kuyambula kutudila Yehowa ntima. Yandi songaka mpangi Shirley nde: “Nge ke tubaka nde mpeve santu ya Nzambi ke sadisaka nge, kansi wapi lusadisu yango? Dibuta na beto kele kaka bansukami. Kansi nge ke lutisa ntangu na nge na kulonga nsangu ya mbote.” Mpangi Shirley ke tuba nde: “Mono kudiyulaka nde: ‘Keti Nzambi ke tudilaka beto dikebi?’ Yo yina, kukonda kusukinina mono sambaka Yehowa mpi mono songaka yandi mambu yonso yina vandaka kuyangisa mono. Mono landaka kutanga Biblia mpi mikanda na beto mpi mono landaka kulonga nsangu ya mbote mpi kukwenda na balukutakanu.” Ntangu fioti na nima, mpangi Shirley bakisaka nde Yehowa vandaka kutudila dibuta na bo dikebi. Dibuta na bo vandaka ve kulala nzala mpi bo vandaka na kiese. Mpangi Shirley ke tuba nde: “Mono bakisaka nde Yehowa pesaka mvutu na bisambu na mono.” (1 Tim. 6:6-8) Kana nge ke landa kusala mambu ya kimpeve, nge mpi ta bika ve nde bampasi to badute kukabula nge ti Yehowa.

8. Inki lenda kumina bampangi yina kele ti mikumba na organizasio ya Yehowa?

⁸ Na nzila ya televizio mpi ya Internet, bambeni na beto ke tubaka mambu ya luvunu sambu na bampangi yina kele ti mikumba na organizasio ya Yehowa. (Nk. 31:13) Bo me kangaka bampangi na beto ya nkaka mpi bo me kusilaka bo makambu nde bo kele bantu ya mubulu. Bakristu ya mvu-nkama ya ntete kutanaka mpi ti diambu ya mutindu mosi ntangu bo kusilaka ntumwa Polo makambu mpi ntangu bo kangaka yandi. Inki Bakristu yina salaka?

9. Inki bampangi ya nkaka salaka ntangu bo tulaka ntumwa Polo na boloko?

⁹ Bakristu ya nkaka ya mvu-nkama ya ntete yambulaka kusadisa ntumwa Polo ntangu bo tulaka yandi na boloko na Roma. (2 Tim. 1:8, 15) Sambu na nki? Keti bo waka nsoni sambu bantu vandaka kutadila Polo bonso muntu ya mubulu? (2 Tim. 2:8, 9) To keti bo waka boma nde bo ta tula bo mpi na boloko mutindu bo tulaka Polo? Yo vanda mpidina to ve, yindula mutindu Polo kudiwaka. Yandi kutanaka ti bampasi mingi mpi  nkutu yandi tulaka luzingu na yandi na kigonsa sambu na bo. (Bis. 20:18-21; 2 Bak. 1:8) Beto fwete vanda ve ata fioti bonso bampangi yina buyaka kusadisa Polo ntangu yandi vandaka na mpasi. Inki beto fwete vila ve ntangu bo ke niokula bampangi yina kele ti mikumba na organizasio ya Yehowa?

10. Inki beto fwete vila ve ntangu bo ke niokula bampangi yina kele ti mikumba mpi sambu na nki?

¹⁰ Kuvila ve kikuma yina ke pusaka bantu na kuniokula beto mpi muntu yina ke pusaka bo na kusala yo. 2 Timoteo 3:12 ke tuba nde: “Bantu yonso yina ke zola kuzinga na kukangama na Nzambi na bumosi ti Kristu Yezu, bo ta monisa bo mpi mpasi.” Yo yina, beto fwete yituka ve mutindu Satana ke niokulaka mingi-mingi bampangi yina kele ti mikumba. Yandi ke zolaka kupusa bo na kuyambula kusadila Yehowa mpi yandi ke zolaka kulembisa lukwikilu na beto.—1 Pie. 5:8.

11. Mbandu ya Onezifore ke longa beto nki? (2 Timoteo 1:16-18)

¹¹ Landa kusadisa bampangi yina kele ti mikumba mpi kangama ti bo. (Tanga 2 Timoteo 1:16-18.) Na mvu-nkama ya ntete, mpangi Onezifore salaka diambu mosi ntangu bo tulaka Polo na boloko. ‘Yandi waka ve nsoni ya miniololo ya Polo.’ Kansi, Onezifore sosaka Polo mpi ntangu yandi monaka yandi, yandi salaka yonso sambu na kusadisa yandi. Onezifore tulaka luzingu na yandi na kigonsa sambu na kusadisa Polo. Yo ke longa beto nki? Beto fwete wa ve bantu boma sambu na kusadisa bampangi na beto yina bo ke niokula. Kansi beto fwete sala yonso ya beto lenda sala sambu na kusadisa bo. (Bing. 17:17) Bo kele ti mfunu nde beto zola bo mpi beto sadisa bo.

12. Mbandu ya bampangi na beto ya Russie ke longa beto nki?

¹² Beto tadila mutindu bampangi na beto na Russie ke sadisaka bampangi yina kele na boloko. Ntangu bo ke sambisaka bampangi ya nkaka, bampangi mingi ke kwendaka na tribinale sambu na kupesa bo kikesa. Yo ke longa beto nki? Kana bo ke tuba mambu ya mbi sambu na bampangi yina kele ti mikumba, bo me kanga bo to ke niokula bo, kuwa ve boma. Samba sambu na bo, sadisa bantu ya mabuta na bo mpi sala yonso sambu na kupesa bo kikesa.—Bis. 12:5; 2 Bak. 1:10, 11.

13. Kana bantu ke mona beto mpamba, nki mutindu yo lenda sala nde beto landa ve kutudila Yehowa ntima mpi organizasio na yandi?

¹³ Bantu ya mabuta na beto yina ke sambilaka ve Yehowa, banduku na beto ya kisalu to banduku na beto ya nzo-nkanda lenda seka beto sambu beto ke longaka nsangu ya mbote to sambu beto ke zitisaka bansiku ya Yehowa. (1 Pie. 4:4) Bo lenda tuba nde: “Mono ke zolaka nge kansi dibundu na beno ke vandaka makambu ngolo kibeni mpi yo ke tubaka ve mambu ya kieleka.” Bantu ya nkaka lenda tubila beto mambu ya mbi na mutindu beto ke tadilaka bantu yina bo me basisaka na dibundu. Bo lenda tuba nde: “Inki mutindu beno lenda tuba nde beno ke zolaka bantu?” Mambu ya mutindu yina lenda pusa beto na kudiyula kana bansiku ya Yehowa kele ngolo to ve. Beto lenda kudiyula nde: ‘Keti Yehowa ke lombaka mono mambu mingi kuluta mambu yina mono lenda sala? Keti organizasio na yandi ke vandaka makambu ngolo kibeni?’ Kana nge ke kutana ti mambu ya mutindu yina, nki nge lenda sala sambu nge landa kukangama na Yehowa mpi na organizasio na yandi?

14. Inki beto fwete sala kana bantu ya nkaka ke seka beto sambu beto ke zitisaka bansiku ya Yehowa? (Nkunga 119:50-52)

¹⁴ Landa kuzitisa bansiku ya Yehowa. Yobi vandaka kuzitisa bansiku ya Yehowa ata bantu vandaka kuseka yandi. Nkutu, nduku mosi ya Yobi sosaka kundimisa yandi nde Nzambi vandaka kutula ve dikebi kana Yobi vandaka kulemfukila bansiku na Yandi to ve. (Yobi 4:17, 18; 22:3) Kansi Yobi ndimaka ve mambu yina ya luvunu.  Yandi zabaka nde bansiku ya Yehowa ya me tala mambu ya mbote mpi mambu ya mbi kele mbote mpi yandi vandaka ti lukanu ya kulemfukila yo. Yandi bikaka ve nde bantu ya nkaka kupusa yandi na kuyambula Yehowa. (Yobi 27:5, 6) Yo ke longa beto nki? Kana bantu ke seka nge, kubika ve nde yo pusa nge na kulemfukila ve bansiku ya Yehowa. Yindula mambu yina nge mosi kutanaka ti yo. Ntembe kele ve nde nge me bakisaka nde, mbala mingi ntangu nge ke zitisaka bansiku ya Yehowa, yo ke natilaka nge mambote. Landa kuvanda na organizasio yina ke zitisaka bansiku ya Yehowa. Yo yina, ata bantu kuseka nge nki mutindu, yo ta kabula nge ve ti Yehowa.—Tanga Nkunga 119:50-52.

15. Sambu na nki bantu sekaka mpangi Brizit?

¹⁵ Beto tadila mbandu ya mpangi-nkento Brizit ya ke zingaka na Inde. Bantu ya dibuta na bo vandaka kuseka yandi sambu na lukwikilu na yandi. Yandi bakaka mbotika na 1997 mpi ntangu fioti na nima, kisalu ya bakala na yandi yina vandaka ve kusambila Yehowa fwaka. Yo yina, bakala na yandi bakaka lukanu nde yandi, mpangi Brizit mpi bana na bo ya bankento kukwenda kuzinga ti bibuti ya bakala ya mpangi Brizit. Bibuti yango vandaka kuzinga na mbanza ya nkaka. Kansi kuna, mpangi Brizit kutanaka ti bampasi kuluta yina yandi kutanaka ti yo ntete. Bakala na yandi vandaka ve ti kisalu. Yo yina, yo lombaka nde mpangi Brizit kusala mingi sambu na kusadisa dibuta na yandi. Diaka, dibundu yina vandaka pene-pene na bo vandaka bakilometre kiteso ya 350. Diambu ya mpasi kele nde, bantu ya dibuta ya bakala ya mpangi Brizit vandaka kutelemina yandi sambu na lukwikilu na yandi. Bo teleminaka mpangi Brizit ngolo kibeni. Yo yina, yo lombaka nde dibuta ya mpangi Brizit kukatuka pana. Na nima, bakala ya mpangi Brizit fwaka na kintulumukina. Diaka, mwana na bo ya nkento fwaka ti maladi ya kansere ntangu yandi vandaka ti bamvula 12. Nkutu, bantu ya dibuta ya mpangi Brizit tubaka mambu ya mbi sambu na kupesa yandi mpasi. Bo tubaka nde kana mpangi Brizit kumaka ve Mbangi ya Yehowa, mambu yina yonso zolaka kusalama ve. Kansi mpangi Brizit landaka kutudila Yehowa ntima mpi yandi landaka kukangama na organizasio ya Yehowa.

16. Inki mambote mpangi Brizit bakaka sambu yandi kangamaka kaka na Yehowa mpi na organizasio?

¹⁶ Mpangi Brizit vandaka kuzinga ntama ti dibundu,  yo yina nkengi ya nziunga siamisaka yandi na kulonga nsangu ya mbote na kisika yina yandi vandaka kuzinga mpi na kutwadisa balukutakanu na nzo na yandi. Ntete, mpangi Brizit yindulaka nde yandi ta kuka ve kusala mutindu yina. Kansi yandi sadilaka mambu yina nkengi ya nziunga songaka yandi. Yandi vandaka kulonga nsangu ya mbote, yandi vandaka kusala balukutakanu na nzo na yandi mpi yandi vandaka kusala lusambu ya dibuta ti bana na yandi ya bankento. Inki mbuma yo butaka? Mpangi Brizit yantikaka kulonguka Biblia ti bantu mingi mpi mingi na kati na bo bakaka mbotika. Na 2005, yandi kumaka mupasudi-nzila ya ntangu yonso. Yehowa sakumunaka mpangi Brizit sambu yandi vandaka kutudila yandi ntima mpi yandi kangamaka kaka na organizasio ya Yehowa. Bana na yandi ya bankento ke landa kusadila Yehowa na mutindu ya mbote mpi bubu yai mabundu kele zole na kisika yina. Mpangi Brizit ke ndimaka kibeni nde Yehowa pesaka yandi ngolo ya kukanga ntima na bampasi mpi ya kukanga ntima ntangu bantu ya dibuta na yandi vandaka kuseka yandi.

17. Inki beto fwete sala?

¹⁷ Satana ke pusaka beto na kuyindula nde Yehowa ta yambula beto na bantangu ya mpasi mpi nde kana beto ke pesa maboko na organizasio ya Yehowa, yo ta natila beto bampasi mingi. Satana ke pusaka beto na kuwa boma ntangu bantu ke tuba mambu ya mbi sambu na bampangi yina kele ti mikumba, ntangu bo ke niokula bo to ntangu bo ke tula bo na boloko. Satana ke pusaka bantu na kuseka beto sambu beto zitisa ve bansiku ya Yehowa mpi sambu beto kangama diaka ve na organizasio na yandi. Ata mpidina, beto ke zabaka mbote mayele ya mbi yina Satana ke sadilaka mpi beto ke bwaka ve na mitambu na yandi. (2 Bak. 2:11) Sala yonso sambu na kuwa ve mambu ya luvunu yina Satana ke tubaka kansi kangama kaka na Yehowa mpi na organizasio na yandi. Kuvila ve nde Yehowa ta yambula nge ve ata fioti. (Nk. 28:7) Yo yina, kubika ve ata fioti nde kima mosi kukabula nge ti Yehowa.—Bar. 8:35-39.

18. Inki beto ta tubila na disolo ya ke landa?

¹⁸ Na disolo yai, beto me tubila bampasi yina beto lenda kutana ti yo na nganda ya dibundu. Kansi bampasi yina beto lenda kutana ti yo na dibundu lenda sala mpi nde beto tudila ve Yehowa ntima mpi beto kangama ve kaka na organizasio na yandi. Inki ta sadisa beto na kukanga ntima na bampasi yina? Beto ta tubila yo na disolo ya ke landa.