1. Inki beto fwete vila ve mpi nki beto fwete ndima?

 BETO fwete vila ve nde bantu ya nkaka ta telemina beto ntangu beto ke longa nsangu ya mbote. Nkutu bo lenda telemina beto diaka ngolo na bilumbu ke kwisa. (Dan. 11:44; 2 Tim. 3:12; Kus. 16:21) Kansi, beto fwete ndima nde Yehowa ta sadisa beto. Sambu na nki? Sambu banda na ntangu ya ntama, Yehowa ke sadisaka bansadi na yandi na kusala kisalu yina yandi ke pesaka bo ata kisalu yango kele mpasi nki mutindu. Mu mbandu, beto tala mambu yina kuminaka profete Ezekiele yina longaka Bayuda yina vandaka na kimpika na Babilone.

2. Yehowa tubaka nde bantu ya teritware ya Ezekiele vandaka nki mutindu mpi nki beto ta tadila na disolo yai? (Ezekiele 2:3-6)

² Bantu vandaka nki mutindu na teritware yina Ezekiele vandaka kulonga nsangu ya mbote? Yehowa tubaka nde bo vandaka “ntu-ngolo,” “ntima-ngolo” mpi bantu “yina ke kolamaka.” Bo vandaka mbi kibeni bonso bansende mpi kigonsa bonso binkala-nkala. Yo yina Yehowa vandaka kusonga Ezekiele mbala na mbala nde: ‘Kuwa bo boma ve.’ (Tanga Ezekiele 2:3-6.) Ezekiele landaka kulonga nsangu ya mbote (1) sambu Yehowa muntu tindaka yandi, (2) sambu mpeve santu ya Nzambi pesaka yandi ngolo mpi (3) sambu mambu yina Nzambi tubaka kumisaka lukwikilu na yandi ngolo. Inki mutindu mambu yina tatu sadisaka Ezekiele? Inki mutindu yo ke sadisaka beto bubu yai?

3. Inki bangogo pesaka Ezekiele kikesa mpi nki Yehowa salaka sambu na kundimisa yandi nde yandi ta sadisa yandi?

³ Yehowa songaka Ezekiele nde: “Mono ke tinda nge.” (Ezek. 2:3, 4) Mambu yina Yehowa tubaka pesaka Ezekiele kikesa. Sambu na nki? Ntembe kele ve nde Ezekiele yibukaka nde Yehowa sadilaka  bangogo ya mutindu mosi ntangu yandi tindaka Moize mpi Yezaya yina vandaka baprofete na yandi. (Kub. 3:10; Yez. 6:8) Ezekiele zabaka mpi nde Yehowa sadisaka baprofete yina zole na kulungisa mikumba ya mpasi. Yo yina, ntangu Yehowa songaka Ezekiele mbala zole nde: “Mono ke tinda nge,” yandi vandaka ti kikuma ya mbote ya kundima nde Yehowa ta sadisa yandi. Diaka, na mukanda ya Ezekiele, bangogo “ndinga ya Yehowa kwisilaka mono” kele mbala mingi. (Ezek. 3:16) Katula yina, Ezekiele sonikaka mpi bangogo, “ndinga ya Yehowa kwisilaka mono diaka,” mbala mingi. (Ezek. 6:1) Ya kieleka, yo ndimisaka kibeni Ezekiele nde Yehowa muntu tindaka yandi. Diaka, papa ya Ezekiele vandaka nganga-nzambi. Ntembe kele ve nde yandi vandaka kusonga Ezekiele nde ntangu yonso Yehowa vandaka kundimisa baprofete na yandi nde yandi ta sadisa bo. Yehowa songaka Izaki, Yakobi mpi Yeremia nde: “Mono kele ti nge.”—Kuy. 26:24; 28:15; Yer. 1:8.

4. Inki mambu pesaka Ezekiele kikesa?

⁴ Inki bantu ya Izraele salaka ntangu Ezekiele longaka bo nsangu ya mbote? Yehowa tubaka nde: “Nzo ya Izraele ta buya kuwila nge, sambu bo ke zola ve kuwila mono.” (Ezek. 3:7) Ntangu bantu ya Izraele buyaka kuwila Ezekiele, yo monisaka nde bo buyaka Yehowa. Mambu yina ndimisaka Ezekiele nde yandi lungisaka mukumba na yandi mbote ata bantu buyaka kuwila yandi. Yehowa ndimisaka mpi Ezekiele nde ntangu mambu yina yandi ke longa ta lungana, bantu ta zaba nde ‘profete mosi vandaka na kati na bo.’ (Ezek. 2:5; 33:33) Ya kieleka, mambu yina pesaka Ezekiele kikesa ya kulanda kulonga nsangu ya mbote.

5. Mutindu Yezaya 44:8 ke monisa yo, nki ke pesaka beto kikesa?

⁵ Bubu yai, beto ke bakaka mpi kikesa sambu beto ke zabaka nde Yehowa muntu ke tindaka  beto na kulonga nsangu ya mbote. Yandi ke pesaka beto lukumu mutindu yandi ke bingaka beto “bambangi” na yandi. (Yez. 43:10) Yo kele dibaku ya nene kibeni. Kaka mutindu Yehowa songaka Ezekiele nde: “Kuwa ve boma,” Yehowa ke songaka beto mpi nde: “Beno wa boma ve.” Sambu na nki beto fwete wa ve bambeni na beto boma? Bonso Ezekiele, Yehowa muntu ke tindaka beto mpi yandi ke sadisaka beto.—Tanga Yezaya 44:8.

6. (a) Inki Yehowa ke tuba sambu na kundimisa beto nde yandi ke sadisaka beto? (b) Inki ke pesaka beto kikesa?

⁶ Yehowa ke ndimisa beto nde yandi ta sadisa beto. Mu mbandu, na ntwala nde Yehowa kutuba nde: “Beno kele bambangi na mono,” yandi tubaka nde: “Ntangu nge ta luta na kati ya bamasa, mono ta vanda ti nge, mpi ntangu nge ta luta na kati ya banzadi, yo ta dindisa nge ve. Ntangu nge ta tambula na kati ya tiya, nge ta zika ve, ludimi ya tiya ta yoka nge mpi ve.” (Yez. 43:2) Ntangu beto ke longaka nsangu ya mbote, bantangu ya nkaka beto ke kutanaka ti bampasi yina kele bonso nzadi to bampasi yina kele bonso tiya. Ata mpidina, Yehowa ke sadisaka beto na kulanda kulonga nsangu ya mbote. (Yez. 41:13) Bubu yai, bantu mingi ke buyaka nsangu ya beto ke longaka bonso na bilumbu ya Ezekiele. Beto ke zabaka nde beto ke longaka mbote nsangu ya mbote ata bantu ya nkaka ke buya yo. Beto ke bakaka kikesa sambu beto ke zabaka nde Yehowa ke sepelaka ntangu beto ke landaka kulonga nsangu ya mbote. Ntumwa Polo tubaka nde: “Konso muntu ta baka matabisi na yandi na kutadila kisalu na yandi.” (1 Bak. 3:8; 4:1, 2) Mpangi-nkento mosi ya mupasudi-nzila ya me sala bamvula mingi ke tuba nde: “Mono ke waka kiese mingi ntangu mono ke zabaka nde Yehowa ke sakumunaka beto sambu na bikesa yina beto ke salaka.”

7. Ntangu yonso yina Ezekiele vandaka kuyindula mbona-meso yina yandi monaka, nki yo vandaka kundimisa yandi? (Tala kifwanisu ya lutiti ya zulu.)

⁷ Ezekiele bakisaka kibeni nde mpeve ya Nzambi kele ngolo mingi. Mambu yina Ezekiele monaka na mbona-meso sadisaka yandi na kubakisa nde mpeve santu vandaka kusadisa bawanzio ya ngolo mpi yo vandaka kupusa makulu ya nene ya pusu-pusu ya zulu. (Ezek. 1:20, 21) Inki Ezekiele salaka? Yandi sonikaka mambu yina yandi monaka. Yandi sonikaka nde: “Ntangu mono monaka yo, mono fukamaka luse na ntoto.” Ezekiele yitukaka mingi yo yina yandi fukamaka na ntoto. (Ezek. 1:28) Na nima, ntangu yonso yina Ezekiele vandaka kuyindula mbona-meso yina ya kuyituka, yo vandaka kundimisa yandi kibeni nde mpeve ya Nzambi ta sadisa yandi na kulanda kulonga nsangu ya mbote.

8-9. (a) Mambu yina Yehowa songaka Ezekiele pesaka yandi nki? (b) Inki Yehowa salaka diaka sambu na kupesa Ezekiele kikesa ya kulonga na teritware na yandi ya mpasi?

⁸ Yehowa songaka Ezekiele nde: “Mwana ya muntu, telama sambu mono tuba ti nge.” Mambu yina Yehowa songaka Ezekiele mpi mpeve santu na yandi pesaka Ezekiele ngolo yina yandi vandaka ti yo mfunu sambu na kutelama na ntoto. Ezekiele sonikaka nde: “Mpeve kwisilaka mono mpi tedimisaka mono.” (Ezek. 2:1, 2) Ntangu yandi vandaka kulonga, “diboko” ya Nzambi disongidila mpeve santu ya Nzambi vandaka kutwadisa yandi. (Ezek. 3:22; 8:1; 33:22; 37:1; 40:1) Mpeve ya Nzambi pesaka Ezekiele ngolo ya kulungisa mukumba na yandi. Disongidila, mukumba ya kulonga bantu ‘ya ntu-ngolo mpi ya ntima-ngolo’ yina vandaka na teritware na yandi. (Ezek. 3:7) Yehowa songaka Ezekiele nde: “Mono me kumisa luse na nge ngolo kaka bonso baluse na bo mpi mbunzu na nge ngolo kaka bonso bambunzu na bo. Mono me kumisa mbunzu na nge bonso diama, ngolo kuluta ditadi  ya sileksi. Kuwa bo boma ve mpi kutekita ve sambu na baluse na bo.” (Ezek. 3:8, 9) Yo vandaka bonso nde Yehowa songaka Ezekiele nde: ‘Kulemba ve nitu sambu na bikalulu ya mbi ya bantu yina. Mono ta pesa nge ngolo.’

⁹ Na nima, mpeve ya Nzambi nataka Ezekiele na teritware na yandi sambu na kulonga. Ezekiele sonikaka nde: “Diboko ya Yehowa vandaka ngolo na zulu na mono.” Ezekiele salaka mposo mosi sambu na kulonguka mbote-mbote mpi kubakisa nsangu yina yo lombaka nde yandi longa sambu yandi longa yo kukonda mpasi. (Ezek. 3:14, 15) Na nima Yehowa songaka yandi na kukwenda na muwanda mosi kisika yina “mpeve kotaka na kati na [yandi].” (Ezek. 3:23, 24) Ezekiele vandaka ya kuyilama sambu na kuyantika kulonga nsangu ya mbote.

10. Beto ke vandaka ti mfunu ya nki sambu na kulanda kulonga nsangu ya mbote mpi sambu na nki?

¹⁰ Beto ke vandaka ti mfunu ya nki sambu na kulanda kulonga nsangu ya mbote? Sambu na kuzwa mvutu, yindula mambu yina kuminaka Ezekiele. Na ntwala nde yandi yantika kulonga nsangu ya mbote, mpeve ya Nzambi pesaka yandi ngolo yina yandi vandaka ti yo mfunu. Bonso Ezekiele, bubu yai beto mpi ta landa kulonga nsangu ya mbote kaka kana mpeve ya Nzambi kusadisa beto. Sambu na nki? Sambu Satana ke nwanisaka beto sambu beto yambula kulonga nsangu ya mbote. (Kus. 12:17) Bantu mingi ke yindulaka nde Satana kele ngolo mingi mpi beto ta kuka ve kununga yandi. Kansi ntangu beto ke longaka nsangu ya mbote, beto ke nungaka yandi. (Kus. 12:9-11) Inki mutindu? Ntangu beto ke longaka nsangu ya mbote, beto ke monisaka nde beto ke waka ve Satana boma. Konso ntangu yina beto ke longaka nsangu ya mbote, beto ke nungaka Satana. Inki beto lenda tuba mutindu beto ke landaka kulonga nsangu ya mbote ata bambeni ke telemina beto? Beto lenda tuba nde mpeve santu ke pesaka beto ngolo mpi nde beto ke sepedisaka Yehowa.—Mat. 5:10-12; 1 Pie. 4:14.

11. Mpeve ya Nzambi ta sadisa beto na kusala nki mpi nki beto fwete sala sambu yo landa kusadisa beto?

¹¹ Inki diaka beto ke bakisa ntangu beto ke  yindula mutindu Yehowa kumisaka luse mpi mbunzu ya Ezekiele ngolo na mutindu ya kifwani? Mpeve ya Nzambi lenda sadisa beto na kununga konso mpasi yina beto ke kutana ti yo ntangu beto ke longa nsangu ya mbote. (2 Bak. 4:7-9) Ebuna nki beto fwete sala sambu mpeve ya Nzambi kulanda kusadisa beto? Beto fwete landa kusamba Yehowa sambu na kulomba yandi yo mpi beto fwete ndima nde Yehowa ta wa bisambu na beto. Yezu longaka balongoki na yandi nde: “Beno landa na kulomba, . . . beno landa na kusosa, . . . beno landa na kubula.” Sambu Yehowa ke ‘pesaka mpeve santu na bantu yina ke lombaka yandi yo.’—Luka 11:9, 13; Bis. 1:14; 2:4.

12. Mutindu Ezekiele 2:9–3:3 ke monisa yo, rulo yina katukaka na wapi mpi nki vandaka na kati na yo?

¹² Mpeve ya Nzambi pesaka Ezekiele ngolo ya kulanda kulonga nsangu ya mbote mpi mambu yina Nzambi tubaka kumisaka lukwikilu na yandi ngolo. Ezekiele monaka na mbona-meso muntu mosi me simba rulo. (Tanga Ezekiele 2:9–3:3.) Rulo yango katukaka na wapi? Inki vandaka na kati na yo? Inki mutindu mambu yina vandaka na kati kumisaka lukwikilu ya Ezekiele ngolo? Beto tala. Rulo yina katukaka na kiti ya Kimfumu ya Nzambi. Ntembe kele ve nde Yehowa sadilaka wanzio mosi na kati ya bawanzio iya yina Ezekiele monaka sambu na kupesa yandi rulo yina. (Ezek. 1:8; 10:7, 20) Rulo yina vandaka ti mambu yina Nzambi tubaka disongidila, nsangu ya nda ya lusambisu yina yo lombaka nde Ezekiele kulonga bantu yina vandaka kukolama, bayina vandaka na kimpika. (Ezek. 2:7) Nsangu yina vandaka ya kusonika na bandambu yonso zole ya rulo yina.

13. Yehowa songaka Ezekiele na kusala rulo yina nki mpi sambu na nki yo vandaka sukadi?

¹³ Yehowa songaka Ezekiele na kudia rulo yina mpi ‘na kufulusa yo na divumu na yandi.’ Ezekiele lemfukaka. Yandi diaka rulo yina yonso. Kitini ya mbona-meso yina ke tendula nki? Yo lombaka nde Ezekiele kubakisa mbote-mbote nsangu yina yo lombaka nde yandi longa. Yo lombaka nde yandi ndima kibeni nsangu yina sambu yo pusa yandi na kulonga bantu ya nkaka. Kima mosi ya kuyituka salamaka na nima. Ezekiele waka rulo yina “sukadi bonso bwiki.” (Ezek. 3:3) Sambu na nki? Sambu na Ezekiele, dibaku ya kusonga bantu nsangu ya Yehowa vandaka sukadi to diambu ya kiese kibeni. (Nk. 19:8-11) Yandi vandaka na kiese mutindu Yehowa ponaka yandi na kuvanda profete na yandi.

14. Inki sadisaka Ezekiele na kuvanda ya kuyilama sambu na kulungisa mukumba na yandi?

¹⁴ Na nima, Yehowa songaka Ezekiele nde: “Mambu yonso ya mono ke tubila nge, tula yo na ntima mpi widikila yo.” (Ezek. 3:10) Yo ke tendula nde Yehowa songaka Ezekiele na kuyibuka mambu yina vandaka na rulo yina mpi na kuyindula yo mbote-mbote. Ntangu yandi salaka mutindu yina, lukwikilu na yandi kumaka ngolo. Yo pesaka yandi mpi nsangu ya ngolo ya kulonga bantu. (Ezek. 3:11) Ntangu Ezekiele bakisaka mbote-mbote nsangu ya Nzambi mpi ndimaka yo, yandi vandaka ya kuyilama na kulonga nsangu ya mbote tii na nsuka.

15. Sambu na kulanda kulonga nsangu ya mbote, nki beto fwete “tula na ntima”?

¹⁵ Beto mpi fwete bika nde mambu yina Nzambi tubaka kulanda kukumisa lukwikilu na beto ngolo sambu beto landa kulonga nsangu ya mbote. Beto fwete tula mambu yonso yina Yehowa ke songa beto “na ntima.” Bubu yai, Yehowa ke songaka beto mambu na nzila ya Ndinga na yandi Biblia. Inki beto fwete sala sambu Ndinga ya Nzambi kulanda kusadisa beto na kuyindula mambu ya mbote mpi na kusala mambu ya mbote?

16. Inki beto fwete sala Ndinga ya Nzambi mpi nki mutindu beto lenda tula yo na bantima na beto?

 ¹⁶ Beto ke vandaka ti sante ya mbote kana beto ke dia madia ya mbote yina ke tunga nitu. Mutindu mosi mpi beto ke kumaka ti kimpeve ya ngolo, kana beto ke longuka Ndinga ya Nzambi mpi ke yindula mambu yina beto ke tanga. Beto ke vilaka ve dilongi ya me tala rulo yina. Yehowa ke zolaka nde beto “fulusa divumu na [beto]” ti Ndinga na yandi, disongidila beto bakisa yo mbote-mbote. Beto ta sala yo kana beto ke samba, ke tanga Biblia mpi ke yindula mambu yina beto ke tanga. Beto ke sambaka ntete sambu na kuyidika bantima na beto sambu beto kotisa bangindu ya Nzambi. Beto ke tangaka Biblia. Na nima beto ke pemaka sambu na kuyindula na mudindu mambu yina beto me tanga. Kana beto sala mutindu yina, nki mbuma yo ta buta? Kana beto ke bakisa mbote Ndinga ya Nzambi, yo ta kumisa lukwikilu na beto ngolo.

17. Sambu na nki yo kele mfunu nde beto yindula mambu yina beto ke tanga na Biblia?

¹⁷ Sambu na nki yo kele mfunu nde beto tanga Biblia mpi beto yindula mambu yina yo ke tuba? Sambu kana beto sala mutindu yina, yo ta pesa beto kikesa ya kulonga nsangu ya Kimfumu bubu yai mpi ya kulonga nsangu ya lusambisu ya ngolo yina beto lenda longa ntama mingi ve. Diaka kana beto ke yindula bikalulu ya kitoko ya Yehowa, kinduku na beto ti yandi ta landa kukuma ngolo. Yo ta sadisa beto na kuzwa kima mosi ya sukadi to ya ke pesa kiese. Disongidila ngemba mpi beto ta sepela ti bima yina beto kele ti yo.—Nk. 119:103.

18. Inki bantu ya teritware na beto ta zaba mpi sambu na nki?

¹⁸ Ezekiele vandaka profete kansi beto, beto kele ve baprofete. Ata mpidina, beto ke landaka kulonga nsangu ya Yehowa yina kele na Ndinga na yandi tii ntangu yandi ta tuba nde yo me lunga. Kana ntangu ya lusambisu me lunga, bantu ya teritware na beto ta vanda ve ata ti kikuma mosi ya kutuba nde bo longaka bo ve nsangu ya mbote to nde Nzambi tudilaka bo ve dikebi. (Ezek. 3:19; 18:23) Kansi bo ta zaba nde mambu yina beto vandaka kulonga katukaka na Nzambi.

19. Inki ta pesa beto kikesa ya kulanda kulonga nsangu ya mbote?

¹⁹ Inki ta pesa beto kikesa ya kulanda kulonga nsangu ya mbote? Mambu tatu yina pesaka Ezekiele kikesa. Beto ke landaka kulonga sambu beto me zaba nde Yehowa muntu ke tindaka beto, sambu mpeve santu na yandi ke pesaka beto ngolo mpi sambu Ndinga na yandi ke kumisaka lukwikilu na beto ngolo. Yehowa ke sadisaka beto na kulanda kulonga nsangu ya mbote mpi na kukanga ntima “tii na nsuka.”—Mat. 24:13.