Keti nge ta sepela nde kulonguka na nge mosi kunatila nge mambote? Nge lenda sala mambu yai sambu na kutula mpenza dikebi ya mingi na mambu ya nge ke longuka:

• Pona kisika mosi ya mbote. Kana mpila kele, pona kisika mosi ya bunkete yina kele ti nsemo ya me fwana ya ta sadisa nge na kumona mbote mambu ya nge ke tanga. Nge lenda vanda na banc to na mesa to nge lenda pona kisika mosi ya mbote na nganda.

• Sosa kisika yina nge lenda vanda nge mosi. Yezu sepelaka kusamba “na suka-suka” na “kisika mosi ya kingenga.” (Mar. 1:35) Kana nge me zwa ve kisika yina nge lenda vanda mpenza nge mosi, nge lenda songa bantu ya dibuta na beno to bantu ya nge ke zingaka ti bo nzo mosi, ntangu yina nge ke longukaka mpi kulomba bo na kuyangisa nge ve na ntangu yina.

• Buya mambu yina lenda katula nge dikebi. Kana nge ke sadila telefone to apareyi ya nkaka sambu na kulonguka, tula yo na mode silencieux to na mode avion sambu na kubuya mambu ya lenda katula nge dikebi. Mpi kana nge me yibuka mambu ya mfunu yina nge fwete sala, sonika yo sambu nge vila ve kusala yo na ntangu ya nkaka. Kana nge ke kuka ve kutula dikebi ya mingi na mambu yina nge ke longuka, pema sambu na kutambula mwa fioti to sambu na kudibenda nitu.