1-2. Inki kele mutindu ya kuluta mbote ya kutanga Biblia mpi ya kulonguka yo? Pesa mbandu.

 YINDULA nde nge me baka lukanu ya kusumba nzo. Inki nge ta zola kumona na ntwala ya kusumba nzo yango? Keti nge ta zola kaka kumona foto ya nzo yango? Ya kieleka, nge ta zola kumona nzo yango na meso, nge tambula na lweka na yo, nge kota na kati sambu na kutala bashambre na yo yonso mpi kutala nene ya bashambre yango. Mbala ya nkaka, nge ta sepela kutala plan ya nzo yango sambu nge tala mutindu bo tungaka yo. Ya kieleka, nge ta sepela kutala mbote-mbote bima yonso ya nzo yina nge ke zola kusumba.

² Beto lenda sala mpi mutindu mosi ntangu beto ke tanga Biblia mpi ke longuka yo. Muntu mosi ya mayele yina ke longukaka mambu ya Biblia fwanisaka nsangu ya Biblia ti “nzo mosi ya nene mpi ya nda kibeni yina kele ti fondasio ya nene.” Yo yina, nki ta sadisa beto na kuzaba mbote-mbote mambu yonso yina kele na Biblia? Kana nge tanga yo nswalu-nswalu, nge ta longuka kaka “malongi ya ntete-ntete ya mambu ya santu ya Nzambi.” (Baeb. 5:12) Mutindu yo ta lomba nde nge kota na nzo yina nge ke zola kusumba sambu na kutala yo mbote-mbote, nge fwete longuka mpi Biblia na dikebi yonso sambu nge bakisa yo mbote-mbote. Mutindu ya kuluta mbote ya kulonguka Biblia kele kutala mutindu mambu yina kele na kati ke wakanaka. Sala bikesa ya kubakisa bakieleka yina nge ke kwikilaka mpi sambu na nki nge ke kwikilaka na yo.

3. Ntumwa Polo siamisaka Bakristu na kusala nki mpi sambu na nki? (Baefezo 3:14-19)

 ³ Sambu na kubakisa Ndinga ya Nzambi mbote-mbote, beto fwete longuka bakieleka ya mudindu ya kele na kati. Ntumwa Polo siamisaka Bakristu na kulonguka Ndinga ya Nzambi mbote-mbote sambu na “kubakisa mbote-mbote bunene, bunda, ntela, mpi mudindu” ya kieleka. Sambu bo ‘vanda ti misisa ya ngolo mpi bo kangama ngolo’ na lukwikilu na bo. (Tanga Baefezo 3:14-19.) Beto fwete sala mpi mutindu mosi. Beto tala mutindu beto lenda longuka Ndinga ya Nzambi na dikebi yonso sambu beto bakisa mbote-mbote nsangu na yo.

4. Inki beto fwete sala sambu na kukwenda pene-pene ya Yehowa? Pesa bambandu.

⁴ Beto fwete suka ve kaka na kuzaba malongi ya ntete-ntete ya Biblia. Kansi beto fwete longuka “ata mambu ya mudindu ya Nzambi” na nsadisa ya mpeve santu na yandi. (1 Bak. 2:9, 10) Nge lenda yantika kulonguka Biblia na mudindu sambu yo sadisa nge na kupusana kibeni pene-pene ya Yehowa. Mu mbandu, nge lenda longuka mutindu yandi monisilaka bansadi na yandi ya ntangu ya ntama zola mpi mambu yina ke monisa kibeni nde yandi ke zolaka nge mpi. Nge lenda longuka mpi mutindu Yehowa vandaka kuzola nde bantu ya Izraele kusambila yandi mpi mutindu yandi ke zolaka nde beto sambila yandi bubu yai. To nge lenda longuka mbote-mbote baprofesi yina Yezu lungisaka ntangu yandi vandaka awa na ntoto.

5. Keti kele ti disolo mosi yina nge ta zola kusadila bansosa na kulonguka na nge mosi?

⁵ Bo yulaka bantu ya nkaka yina ke longukaka Biblia mbote-mbote mambu ya mudindu yina bo ta sepela kulonguka mbote-mbote na Ndinga ya Nzambi. Bamvutu na bo ya nkaka kele na lupangu “ Mambu Yina Ta Sadisa Nge na Kulonguka Mbote-Mbote Biblia.” Mukanda Index des publications des Témoins de Jéhovah to Mukanda ya Bansosa Sambu na Bambangi ya Yehowa ta sadisa nge na kulonguka masolo yina mpi nge ta sepela mingi. Kana nge ke longuka Biblia na mudindu, yo ta kumisa lukwikilu na nge ngolo mpi nge ta “zwa nzayilu ya Nzambi.” (Bing. 2:4, 5) Beto tala mwa bakieleka ya mudindu yina beto lenda longuka.

6. (a) Inki mutindu plan me swaswana ti lukanu? (b) Sambu na nki beto ke tuba nde lukanu ya Yehowa sambu na bantu mpi sambu na ntoto ke vandaka ya kukonda nsuka? (Baefezo 3:11)

⁶ Beto tadila mu mbandu mambu yina Biblia ke tubaka sambu na lukanu ya Nzambi. Plan mpi lukanu me swaswana kibeni. Beto lenda fwanisa plan ti nzila yina ke nata nge kisika yina nge ke zola kukwenda. Kansi kana kima mosi me kanga nzila yina, nge lenda kuka ve kukuma kisika yina nge ke kwenda. Beto lenda fwanisa lukanu ti kisika yina nge ke zola kukwenda. Beto lenda baka konso nzila yina kansi beto me zaba mbote-mbote kisika yina beto ke kwenda. Kana kima mosi me kanga nzila yina beto ke kwenda, beto lenda kwenda na nzila ya nkaka. Yehowa ke monisaka beto malembe-malembe ‘lukanu na yandi ya kukonda nsuka’ na Biblia. (Baef. 3:11) Yehowa ke sadilaka banzila ya kuswaswana sambu na kulungisa lukanu na yandi mpi konso ntangu yandi ke nungaka sambu yandi ‘me salaka nde mambu yonso kulungana sambu na lukanu na yandi.’ (Bing. 16:4) Yo yina mambu yonso yina Yehowa ke salaka ke zingaka mvula na mvula. Inki kele lukanu ya Yehowa mpi nki bansoba yandi me salaka sambu na kulungisa yo?

7. Ntangu bantu kolamaka, nki mutindu Yehowa sobaka mutindu ya kulungisa lukanu na yandi? (Matayo 25:34)

⁷ Nzambi songaka bantu ya ntete lukanu na yandi sambu na bo. Yandi songaka bo nde: “Beno buta mingi mpi beno kuma mingi, beno fulusa ntoto mpi beno yala yo, mpi beno yala . . . konso kigangwa ya ke zingaka” na ntoto. (Kuy. 1:28) Ntangu Adami ti Eva kolamaka, bantu yonso kumaka bantu ya masumu, kansi yo kangaka ve Yehowa nzila ya kulungisa lukanu na yandi. Yandi sobaka mutindu ya kulungisa yo. Kaka na ntangu yina, yandi bakaka lukanu ya kutula Kimfumu mosi na zulu yina ta lungisa lukanu na yandi sambu na bantu mpi sambu na ntoto. (Tanga Matayo 25:34.) Na ntangu yina Yehowa tulaka, yandi tindaka Mwana na yandi ya ntete na ntoto sambu yandi longa bantu Kimfumu yango mpi yandi pesa luzingu na yandi sambu na kugulusa beto na disumu mpi na lufwa. Na nima, Yezu futumukaka mpi yandi vutukaka na zulu mpi yandi kumaka Ntotila ya Kimfumu ya Nzambi. Kansi beto kele ti mambu mingi ya kulonguka sambu na lukanu ya Nzambi.

8. (a) Inki kele ntu-diambu ya Biblia? (b) Mutindu Baefezo 1:8-11 ke tendula yo, nki kele lukanu ya nkaka ya Yehowa? (Tala kifwanisu ya lutiti ya zulu.)

⁸ Ntu-diambu ya Biblia kele nde Yehowa ta santisa zina na yandi ntangu yandi ta lungisa lukanu na yandi sambu na ntoto na nzila ya Kimfumu na nsi ya lutwadisu ya Kristu. Lukanu ya Yehowa ta soba ve ata fioti. Yandi ke ndimisaka beto nde yandi ta lungisa yo kibeni. (Yez. 46:10, 11, banoti na nsi ya lutiti; Baeb. 6:17, 18) Ntoto ta kuma paladisu, kisika yina bana ya kukuka ya Adami ti Eva ta “vanda na luzingu kimakulu.” (Nk. 22:26) Katula yina, Yehowa kele diaka ti lukanu ya nkaka ya nene ya kulungisa. Yandi ta sala nde bansadi na yandi yonso na zulu mpi na ntoto kuvanda na bumosi. Bo yonso ta vanda ya kwikama mpi bo ta lemfukila Yehowa Mfumu na bo. (Tanga Baefezo 1:8-11.) Keti yo ke yitukisa nge ve na kumona mutindu Yehowa ta lungisa lukanu na yandi?

9. Ntangu beto ke tanga Biblia, nki mutindu beto lenda yindula mingi mambu yina ta salama na bilumbu ke kwisa?

⁹ Beto tadila profesi yina Yehowa tubaka na kilanga ya Edeni ya kele na Kuyantika 3:15. b Yo ke tubila mambu yina ta lungisa lukanu na yandi, kansi mambu yango zolaka kulungana bamvula mingi kibeni na nima. Mu mbandu,  Nzambi songaka Abrahami nde Kristu ta butuka na dikanda na yandi. (Kuy. 22:15-18) Na nima, na mvu 33 ya ntangu na beto, bo tatikaka Yezu na dikulu mutindu profesi tubaka. (Bis. 3:13-15) Kitini ya nsuka ya profesi yina ya ke tuba nde bo ta niata Satana na ntu ta lungana na bilumbu ke kwisa na nsuka ya luyalu ya bamvula 1 000. (Kus. 20:7-10) Diaka, Biblia ke tubila mambu mingi ya me tala mambu yina ta salama ntangu kimbeni ya nsi-ntoto yai ya Satana ti organizasio ya Yehowa ta kuma ngolo kibeni.

10. (a) Inki mambu ta salama ntama mingi ve? (b) Inki mutindu beto lenda yidika mabanza mpi bantima na beto? (Tala noti na nsi ya lutiti.)

¹⁰ Yindula mambu ya kuyituka yina Biblia ke tubilaka ya ta salama. Ntete, makanda ta tuba nde “Ngemba mpi lutaninu!” (1 Bate. 5:2, 3) “Na kintulumukina,” mpasi ya nene ta yantika ntangu makanda ta nwanisa mabundu yonso ya luvunu. (Kus. 17:16) Na nima, ‘Mwana ya muntu ta kwisa na zulu ya matuti ya zulu ti ngolo mpi nkembo ya nene.’ Mbala ya nkaka yo ta monana na mutindu ya kuyituka. (Mat. 24:30) Yezu ta sambisa bantu mpi yandi ta kabula mameme ti bankombo. (Mat. 25:31-33, 46) Na ntangu yina, Satana ta landa kutelemina Yehowa. Sambu yandi ke mengaka bansadi ya Nzambi ngolo kibeni, yandi ta pusa kimvuka ya makanda yina Biblia ke bingaka nde Gogi ya insi ya Magogi sambu na kunwanisa bansadi ya Yehowa. (Ezek. 38:2, 10, 11) Na ntangu mosi buna, Bakristu yina bo me tulaka mafuta, bayina ta vanda diaka awa na ntoto, ta kwenda na zulu sambu na kuvukana ti Kristu mpi basoda na yandi ya zulu sambu na kunwana na bitumba ya Armagedoni disongidila kitini ya nsuka ya mpasi ya nene. c (Mat. 24:31; Kus. 16:14, 16) Na nima, Luyalu ya Bamvula 1 000 ya Kristu ta yantika.​—Kus. 20:6.

11. Kivuvu ya luzingu ya mvula na mvula ke tendula nki sambu na nge? (Tala mpi kifwanisu ya ke wakana ti paragrafe yai.)

¹¹ Ntangu yai, yindula mingi kibeni mambu yina ta salama na bilumbu ke kwisa. Biblia ke tuba nde Ngangi na beto ‘me tulaka nkutu na ntima na beto ngindu ya kuzinga mvula na  mvula.’ (Lon. 3:11) Yindula mambu yina yo ke tendula sambu na nge mpi sambu na kinduku na nge ti Yehowa. Mukanda Kwenda Pene-Pene na Yehowa na lutiti 319 ke tuba mambu yai ya ke benda dikebi na beto: “Na nima ya kuzinga bamvula mafunda, to bamilio mpi ata bamiliare ya bamvula, beto ta zaba Yehowa Nzambi mbote-mbote kuluta bubu yai. Ata mpidina, beto ta mona nde yo kele kaka ti mambu mingi ya mbote ya kulonguka. . . . Luzingu ya mvula na mvula ta natila beto mambu mingi ya kitoko mpi ya mutindu na mutindu; kukwenda pene-pene na Yehowa ta sadisa beto na kubaka mambote ya kuluta mingi ya luzingu yina.” Inki diaka beto lenda longuka ntangu beto ke landa kulonguka Ndinga ya Nzambi?

12. Inki mutindu beto lenda tala ntama na zulu? Pesa mbandu.

¹² Ndinga ya Nzambi ke tubila mambu fioti ya me tala Yehowa “na zulu.” (Yez. 33:5) Biblia ke tubilaka mambu ya kuyituka ya Yehowa mpi ya kitini ya organizasio na yandi yina kele na zulu. (Yez. 6:1-4; Dan. 7:9, 10; Kus. 4:1-6) Mu mbandu, beto lenda tanga mambu ya kuyituka yina Ezekiele monaka ntangu “zulu kangukaka mpi [yandi] yantikaka kumona bambona-meso ya Nzambi.”​—Ezek. 1:1.

13. Mambu yina Yezu ke sala na zulu mutindu Baebreo 4:14-16 ke monisa yo, ke pusa nge na kuwa nki mutindu?

¹³ Yindula mpi mambu yina Yezu ke sala sambu na beto na zulu sambu yandi kele Ntotila na beto mpi Nganga-Nzambi ya Nene yina ke wilaka beto mawa. Na nzila na yandi beto lenda pusana pene-pene ya “kiti ya kimfumu ya ntima ya mbote ya nene” ya Nzambi na kisambu mpi na kulomba yandi na kuwila beto mawa mpi na kusadisa beto “na ntangu ya mbote.” (Tanga Baebreo 4:14-16.) Konso kilumbu, beto fwete yindula mambu yina Yehowa mpi Yezu me salaka sambu na beto mpi yina bo ke sala sambu na beto na zulu. Zola na bo  sambu na beto fwete simba kibeni bantima na beto mpi yo fwete pusa beto na kuvanda kikesa ntangu beto ke sambila Yehowa.​—2 Bak. 5:14, 15.

14. Inki kima ya kuluta mfunu beto lenda sala sambu na kumonisila Yehowa mpi Yezu ntonda ya mingi? (Tala mpi bifwanisu ya ke wakana ti paragrafe yai.)

¹⁴ Mutindu ya kuluta mbote ya kumonisila Nzambi mpi Mwana na yandi ntonda ya mingi kele ya kusala bikesa ya kusadisa bantu ya nkaka na kukuma Bambangi ya Yehowa mpi balongoki ya Yezu. (Mat. 28:19, 20) Ntumwa Polo salaka mpi mutindu yina sambu na kumonisila Nzambi mpi Kristu ntonda. Yandi zabaka nde Yehowa ke zolaka nde “bantu ya mitindu yonso kuguluka mpi kubaka nzayilu ya sikisiki ya kieleka.” (1 Tim. 2:3, 4) Yandi salaka ngolo kibeni na kisalu ya kulonga nsangu ya mbote sambu na kusadisa bantu mingi sambu na ‘kugulusa bankaka na mitindu yonso.’​—1 Bak. 9:22, 23.

15. Mutindu Nkunga 1:2 ke monisa yo, nki ta pesa beto kiese?

¹⁵ Muyimbi-bankunga tubaka nde muntu ya kiese yina ke nungaka kele muntu yina “ke vandaka na kiese na nsiku ya Yehowa” mpi yina ke “yindululaka nsiku na yandi mpimpa ti mwini.” (Nk. 1:1-3; noti na nsi ya lutiti) Na mukanda mosi (Studies in the Psalms) yina Joseph Rotherham, mbaludi mosi ya Biblia sonikaka, yandi tubaka mambu yai sambu na verse yina: “Muntu fwete sepela mingi kibeni ti lutwadisu ya Nzambi. Yo yina, yandi fwete sosa yo, kulonguka yo mpi kukangama na yo.” Yandi tubaka mpi nde: “Kana kilumbu mosi me luta mpi muntu me tanga ve Biblia, kilumbu yina me luta mpamba.” Nge ta vanda na kiese ya kulonguka Biblia kana nge ke sala bikesa ya kulonguka mbote-mbote mambu mingi ya mfunu yina kele na kati mpi kutala mutindu yo ke wakana. Nge ta vanda na kiese kibeni kana nge ke longuka mbote-mbote Ndinga ya Nzambi.

16. Inki beto ta tubila na disolo ya ke landa?

¹⁶ Bakieleka ya kitoko yina Yehowa ke longaka beto na Ndinga na yandi kele mpasi ve na kubakisa. Na disolo ya ke landa, beto ta tubila kieleka mosi ya mudindu, disongidila tempelo ya nene ya kimpeve ya Yehowa yina Polo tubilaka na mukanda yina yandi sonikilaka Bakristu ya Baebreo. Beto ke ndima nde nge ta sepela mingi ti disolo yango.