1. Inki mambu ya mfunu ta salama na Luyalu ya Bamvula Funda?

 KILUMBU yina bantu ta yantika kufutumuka awa na ntoto na luyalu ya Kristu ya Bamvula Funda ta vanda kilumbu mosi ya kiese kibeni. Bantu yonso yina me fwilaka bantu yina bo vandaka kuzola ke vingilaka bo na kiese yonso. Yehowa mpi ke vingilaka bo na kiese yonso. (Yobi 14:15) Bantu yonso ta vanda na kiese awa na ntoto ntangu bantu yina bo vandaka kuzola ta futumuka. Mutindu beto me longuka yo na disolo ya me luta, “bantu ya lunungu” bayina bazina na bo kele na mukanda ya luzingu, ta futumuka sambu na luzingu. (Bis. 24:15; Yoa. 5:29) Mbala ya nkaka, bantu mingi yina beto vandaka kuzola, bayina me fwaka ta vanda na kati ya bantu yina ta futumuka ntangu fioti na nima ya Armagedoni. * Diaka, “bantu ya kukonda lunungu,” mu mbandu bayina zwaka ve dibaku ya kuzaba Yehowa to ya kusadila yandi mbote ntangu bo vandaka na luzingu ta futumuka sambu na lusambisu.

2-3. (a) Mutindu Yezaya 11:9, 10 ke monisa yo, nki ta vanda kisalu ya nene ya me salamaka ntete ve na ntoto ya mvimba? (b) Inki beto ta tadila na disolo yai?

² Yo ta lomba nde bo longa bantu yonso yina ta futumuka. (Yez. 26:9; 61:11) Yo yina yo ta lomba nde bo yidika kisalu ya nene ya kulonga bantu awa na ntoto. (Tanga Yezaya 11:9, 10.) Sambu na nki? Sambu bantu ya kukonda lunungu yina  ta futumuka ta vanda ti mfunu nde bo longa bo mambu ya me tala Kimfumu ya Nzambi, kimenga ya Yezu, mfunu ya zina ya Yehowa mpi sambu na nki yandi mpamba muntu kele ti nswa ya kuyala. Yo ta lomba mpi nde bo longa bantu ya lunungu mambu yina Yehowa longaka bansadi na yandi malembe-malembe na yina me tala lukanu na yandi sambu na ntoto. Sambu bankaka fwaka na ntwala nde bo manisa kusonika Biblia ya mvimba. Bantu ya kukonda lunungu ta vanda ti mambu mingi ya kulonguka.

³ Na disolo yai, beto ta tadila bangiufula yai: Inki mutindu kisalu yina ya nene ya kulonga ta salama? Inki mutindu mambu yina bantu ta sala ta monisa kana yo ta lomba nde bazina na bo kubikala kimakulu na mukanda ya luzingu to ve? Bamvutu na bangiufula yina kele mfunu mingi sambu na beto bubu yai. Mutindu beto ta mona yo, mwa bambikudulu ya ke benda dikebi ya kele na mukanda ya Daniele mpi ya Kusonga, ta sadisa beto na kubakisa mbote mambu yina ta salama ntangu bafwa ta futumuka. Ntete, beto tubila mambu ya ke benda dikebi yina mukanda ya Daniele 12:1, 2 ke tubila.

4-5. Daniele 12:1 ke monisa nki sambu na bilumbu ya nsuka?

⁴ Tanga Daniele 12:1. Mukanda ya Daniele ke monisa mutindu mambu ta salama na ntangu ya nsuka. Mu mbandu Daniele 12:1 ke monisa nde Mikaele disongidila Yezu Kristu “me telama sambu na mambote ya bantu ya [Nzambi].” Kitini ya mbikudulu yina yantikaka kulungana na 1914 ntangu Nzambi tulaka Yezu Kristu Ntotila ya Kimfumu na yandi.

⁵ Bo songaka mpi Daniele nde Yezu ta “telama” na ntangu mosi ya mpasi “na mutindu yina me salamaka ntete ve katuka dikanda mosi me basikaka tii na ntangu yina.” “Ntangu yina ya mpasi” kele “mpasi ya nene” yina Matayo 24:21 ke tubila. Yezu ta telama to ta nwanina bansadi ya Nzambi na nsuka ya ntangu yina ya mpasi disongidila na Armagedoni. Mukanda ya Kusonga ke tuba nde bansadi yina ya Nzambi kele kimvuka ya nene “ya me katuka na mpasi ya nene.”—Kus. 7:9, 14.

6. Inki ta salama ntangu kimvuka ya nene ta guluka na mpasi ya nene? Tendula. (Tala mpi Bangiufula ya Batangi ya kele na Nzozulu ya Nkengi yai mpi ya ketubila lufutumuku ya luzingu na ntoto.)

⁶ Tanga Daniele 12:2. Inki ta salama ntangu kimvuka ya nene ta guluka na ntangu yina ya mpasi? Mbikudulu yina ke tubila ve lufutumuku ya kifwani to ya kimpeve yina ke salama na bilumbu ya nsuka mutindu beto vandaka kubakisa yo ntete. * Kansi yo ke tadila lufutumuku ya bafwa yina ta salama na nsi-ntoto ya mpa. Sambu na nki beto ke tuba mpidina? Ngogo “mfututu” kele mpi na Yobi 17:16. Yo ke tendula “Maziamu.” Mambu yina ke monisa nde Daniele 12:2 ke tubila lufutumuku yina ta salama na nima ya bilumbu ya nsuka mpi na nima ya bitumba ya Armagedoni.

7. (a) Inki mutindu bantu ya nkaka ta futumuka sambu na “luzingu ya mvula na mvula”? (b) Sambu na nki yo ta vanda “lufutumuku ya kuluta mbote”?

⁷ Daniele 12:2 ke tuba nde bantu ya nkaka ta futumuka sambu na “luzingu ya mvula na mvula.” Yo ke tendula nki? Yo ke tendula nde, bantu yina ta futumuka bayina ta zaba Yehowa ti Yezu mpi ta landa kuzaba bo mpi ta lemfukila bo na nsungi ya bamvula 1000, ta baka luzingu ya mvula na mvula.  (Yoa. 17:3) Yo ta vanda “lufutumuku ya kuluta mbote” kuluta ya bantu yina futumukaka na ntangu ya ntama. (Baeb. 11:35) Sambu na nki? Sambu bantu ya kukonda kukuka yina futumukaka fwaka diaka na nima.

8. Sambu na nki bantu ya nkaka ta futumuka sambu na “nsoni mpi sambu na kuvweza ya mvula na mvula”?

⁸ Kansi yo ke tendula ve nde bantu yonso yina ta futumuka ta ndima malongi ya Yehowa. Mbikudulu ya Daniele ke tuba nde bantu ya nkaka ta futumuka sambu na “nsoni mpi sambu na kuvweza ya mvula na mvula.” Sambu bo ta kolama, Yehowa ta sonika ve bazina na bo na mukanda ya luzingu mpi bo ta baka ve luzingu ya mvula na mvula. Kansi bo ta baka “kuvweza ya mvula na mvula” disongidila lufwa. Yo yina, Daniele 12:2 ke tubila mambu yina ta kumina bantu yonso yina ta futumuka na kutadila mambu yina bo ta sala na nima ya lufutumuku na bo. * (Kus. 20:12) Bantu ya nkaka ta baka luzingu ya mvula na mvula kansi bankaka ta baka yo ve.

9-10. Inki kima ya nkaka ta salama na nima ya mpasi ya nene, mpi banani “ta sema ngolo bonso mpwasa ya nene ya zulu”?

⁹ Tanga Daniele 12:3. Inki kima ya nkaka ta salama na nima ya “ntangu ya mpasi”? Katula mambu yina Daniele 12:2 ke tubila, verse 3 ke tubila mpi kima mosi yina ta salama na nima ya mpasi ya nene.

¹⁰ Banani “ta sema ngolo bonso mpwasa ya nene ya zulu”? Mvutu kele na mambu yina Yezu tubaka ya kele na Matayo 13:43. Yandi tubaka nde: “Na ntangu yina bantu ya lunungu ta sema ngolo kibeni bonso ntangu na Kimfumu ya Tata na bo.” Ntangu Yezu vandaka kutuba mambu yina, yandi vandaka kutubila “bana ya Kimfumu” disongidila, bampangi na yandi Bakristu yina bo me tulaka mafuta bayina ta yala ti yandi na Kimfumu ya Nzambi. (Mat. 13:38) Yo yina Daniele 12:3 ke tubila Bakristu yina bo me tulaka mafuta mpi kisalu yina bo ta sala na nsungi ya Luyalu ya Bamvula Funda.

11-12. Inki kisalu bantu 144000 ta sala na nsungi ya bamvula 1000?

¹¹ Inki mutindu Bakristu yina bo me tulaka mafuta ta nata “bantu mingi na lunungu”? Bakristu yina bo me tulaka mafuta ta sala ti Yezu Kristu sambu na kutwadisa kisalu ya kulonga yina ta salama awa na ntoto na nsungi ya bamvula 1000. Bantu 144000 ta vanda bantotila mpi banganga-nzambi. (Kus. 1:6; 5:10; 20:6) Yo yina, bo ta sadisa na “kubelula makanda,” mpi malembe-malembe bo ta sadisa bantu na kukuma ya kukuka. (Kus. 22:1, 2; Ezek. 47:12) Bakristu yina bo me tulaka mafuta ta vanda na kiese ya mingi kibeni.

¹² Banani ta vanda na kati ya “bantu mingi” yina bo ta nata na lunungu? Yo ta vanda bantu yina ta futumuka mpi bayina ta guluka na Armagedoni ti bana yina lenda butuka na nsi-ntoto ya mpa. Na nsuka ya bamvula 1000 bantu yonso na ntoto ta kuma bantu ya kukuka. Ebuna nki ntangu bo ta sonika bazina na bo na mukanda ya luzingu ti biki kansi ve ti crayon?

13-14. Inki bantu yonso ya kukuka yina ta vanda na ntoto fwete sala sambu na kubaka luzingu ya mvula na mvula?

¹³ Beto fwete vila ve nde ata muntu kele muntu ya kukuka, yo ke tendula ve nde yandi ta baka luzingu ya mvula na mvula kaka mpidina.  Beto tadila mbandu ya Adami ti Eva. Bo vandaka bantu ya kukuka, kansi yo lombaka nde bo lemfukila Yehowa Nzambi sambu bo zinga mvula na mvula. Kansi diambu ya mawa kele nde bo lemfukilaka ve Yehowa.—Bar. 5:12.

¹⁴ Inki ta kumina bantu yina ta vanda na ntoto na nsuka ya bamvula 1000? Bo yonso ta kuma bantu ya kukuka. Keti bantu yonso yina ya kukuka ta lemfukila Yehowa mvula na mvula? Keti bantu ya nkaka ta landa mbandu ya Adami ti Eva yina kolamaka na Yehowa ata bo vandaka bantu ya kukuka? Yo kele mfunu nde beto pesa bamvutu na bangiufula yina. Kansi nki mutindu?

15-16. (a) Inki ntangu bantu yonso ta vanda ti dibaku ya kumonisa nde bo ke zitisaka zina ya Yehowa mpi ke pesaka maboko na luyalu na yandi? (b) Inki ta salama na kumekama ya nsuka?

¹⁵ Bo ta tula Satana na boloko mpi yandi ta sala bamvula 1000. Na ntangu yina, yandi ta kusa ve bantu ata fioti. Kansi na nima ya bamvula 1000, bo ta basisa yandi na boloko. Na nima, yandi ta sosa kukusa bantu ya kukuka. Na nsungi ya kumekama yina, bantu yonso ya kukuka yina ta vanda na ntoto ta vanda ti dibaku ya kumonisa pwelele nde, bo ke zitisaka zina ya Nzambi mpi bo ke pesaka maboko na luyalu na yandi. (Kus. 20:7-10) Mambu yina konso muntu ta sala ntangu Satana ta meka yandi, ta monisa kana zina na yandi  fwete bikala kimakulu na mukanda ya luzingu to ve.

¹⁶ Biblia ke monisa nde bantu ya nkaka ta kolama na Yehowa bonso Adami mpi Eva mpi bo ta buya luyalu na yandi. Inki ta kumina bo? Kusonga 20:15 ke tuba nde: “Konso muntu yina bo sonikaka ve zina na yandi na mukanda ya luzingu, bo losaka yandi na dizanga ya tiya.” Ya kieleka bo ta fwa kimakulu bantu yina ta kolama. Kansi bantu mingi yina ta kuma ya kukuka, ta bikala ya kwikama na Yehowa na kumekama ya nsuka. Bo ta sonika bazina na bo kimakulu na mukanda ya luzingu.

17. Wanzio songaka Daniele nde nki ta salama na bilumbu na beto? (Daniele 12:4, 8-10)

¹⁷ Kuyindula mambu yina ta salama na bilumbu ke kwisa ke pesa beto kiese kibeni. Ata mpidina, wanzio mosi songaka Daniele mambu ya mfunu ya me tala bilumbu na beto disongidila, “ntangu ya nsuka.” (Tanga Daniele 12:4, 8-10; 2 Tim. 3:1-5) Yandi songaka Daniele nde: “Nzayilu ya kieleka ta kuma mingi.” Ya kieleka, bansadi ya Nzambi ta bakisa mbote-mbote mbikudulu ya kele na mukanda ya Daniele. Wanzio yina tubaka diaka nde na ntangu yina, “bantu ya mbi [ta] sala mambu  ya mbi mpi muntu mosi ve ya mbi [ta] bakisa.”

18. Inki ta kumina bantu ya mbi ntama mingi ve?

¹⁸ Bubu yai, yo lenda monana nde bantu ya mbi ke baka ve ndola sambu na mambu ya mbi yina bo ke sala. (Mal. 3:14, 15) Kansi ntama mingi ve, Yezu ta sambisa bantu yina kele bonso bankombo mpi yandi ta kabula bo ti bantu yina kele bonso mameme. (Mat. 25:31-33) Bantu yina ya mbi ta guluka ve na mpasi ya nene, bo ta futumuka mpi ve sambu na kuzinga na nsi-ntoto ya mpa. Bazina na bo ta vanda ve na “mukanda ya kuyibuka” yina Malaki 3:16 ke tubila.

19. Bubu yai beto fwete sala nki mpi sambu na nki? (Malaki 3:16-18)

¹⁹ Yai kele ntangu ya beto fwete monisa nde beto kele ve na kati ya bantu ya mbi. (Tanga Malaki 3:16-18.) Yehowa ke vukisa bantu yina kele bonso “kima ya mfunu na meso na yandi” disongidila, bantu yina kele mfunu mingi na meso na yandi. Ya kieleka, beto ke zolaka kuvanda na kati ya bantu yina.

20. Inki lusilu ya nsuka Yehowa pesaka Daniele mpi sambu na nki nge ke vingila ti kiese yonso kulungana ya lusilu yina?

²⁰ Ya kieleka beto ke zinga na bantangu yina mambu ya mfunu kibeni ke salama. Kansi ntama mingi ve mambu ya kuyituka ta salama. Bo ta fwa bantu yonso ya mbi. Na nima, beto ta mona kulungana ya lusilu yai ya Yehowa pesaka Daniele: “Nge ta telama sambu na kubaka dikabu na nge na nsuka ya bilumbu.” (Dan. 12:13) Keti nge ke vingila na kiese kilumbu yina Daniele mpi bantu yina nge vandaka kuzola ta “telama” diaka? Kana mpidina, sala yonso na kubikala ya kwikama mpi ndima kibeni nde, zina na nge ta bikala kimakulu na mukanda ya luzingu ya Yehowa.