Polo tubaka na 1 Bakorinto 15:8 nde: “Na nsuka na bo yonso, yandi monikaka mpi na mono bonso na muntu yina butukaka matsiombe.” Ntete beto vandaka kubakisa nde Polo vandaka kutubila mambu yina yandi mosi kutanaka ti yo ntangu yandi monaka Yezu na mbonameso na nkembo na yandi na zulu. Yo vandaka bonso nde bo pesaka yandi lukumu ya kubutuka mpi ya kufutumuka bonso kigangwa ya kimpeve bamvula mingi na ntwala nde lufutumuku ya mutindu yina kusalama. Kansi na nima ya kutadila mbote-mbote verse yina, yo ke monana nde yo kele mfunu na kusoba mutindu na beto ya kubakisa yo.

Yo kele pwelele nde na verse yina Polo vandaka kutubila mambu yina salamaka ntangu yandi kumaka Mukristu. Kansi nki yandi zolaka kutuba ntangu yandi tubaka nde yandi “butukaka matsiombe”? Yandi zolaka kutubila mambu mingi.

Yandi sobaka na kintulumukina mpi yo vandaka diambu ya mpasi. Mbala mingi, matsiombe ke butukaka na kintulumukina. Ntangu Saule (yina kumaka na nima Polo) kwendaka na Damasi sambu na kuniokula Bakristu yina vandaka kuna, yandi yindulaka ve nde yandi ta mona mbonameso ya Yezu yina futumukaka. Polo sobaka na kintulumukina mpi yo yitukisaka Bakristu yina yandi vandaka kukana kuniokula na Damasi. Diaka mambu yina salamaka vandaka mpasi. Yo yina Polo vandaka kumona diaka ve sambu na mwa ntangu.—Bis. 9:1-9, 17-19.

Yandi sobaka na “ntangu ya mbi.” Ngogo ya kisina ya Kigreki yina bo me balula na kubutuka matsiombe, bo lenda balula yo mpi na kubutuka na ntangu ya mbi. Biblia mosi (The Jerusalem Bible) ke tuba nde: “Yo vandaka bonso nde mono butukaka na ntangu yina ata muntu mosi ve yindulaka.” Yezu vandaka dezia na zulu na ntangu Polo sobaka. Katula bantu yina Polo tubilaka na baverse yina kele na ntwala, yandi monaka ve Yezu yina futumukaka na ntwala nde Yezu kuvutuka na zulu. (1 Bak. 15:4-8) Mutindu Yezu monikaka na Polo kukonda kukana, yo pesaka Polo dibaku ya kumona yandi na nima ya lufutumuku na yandi ata yo monanaka nde yo vandaka na “ntangu ya mbi.”

Yandi vandaka kutuba mambu ya me tala yandi mosi na kudikulumusa yonso. Bantu ya nkaka ya ke salaka bansosa ke monisa nde, mambu yina Polo tubaka na verse yina lenda monisa nde yandi vandaka kuditubila na mutindu ya mbi. Kana Polo vandaka kuyindula mutindu yina, yo ke monisa nde yandi vandaka kubakisa mbote nde yandi fwanaka ve na kukuma ntumwa. Yo yina, yandi tubaka nde: “Mono kele muntu ya kuluta fioti na kati ya bantumwa, mpi yo me fwana ve nde bo binga mono ntumwa, sambu mono monisaka dibundu ya Nzambi mpasi. Kansi sambu na ntima ya mbote ya nene ya Nzambi, mono kele mutindu mono kele.”—1 Bak. 15:9, 10.

Yo yina, yo ke monana nde Polo vandaka kutubila ntangu ya kintulumukina mpi ya mpasi yina Yezu monikaka na yandi, mutindu yandi sobaka na kintulumukina to mutindu yandi vandaka kuyindula nde yandi fwanaka ve kumona mbonameso yina ya kuyituka. Yo vanda mpidina to ve, mambu yina Polo monaka na mbonameso yina vandaka mfunu mingi sambu na yandi. Yo ndimisaka yandi kibeni nde Yezu futumukaka. Ntembe kele ve nde mbala mingi, yandi vandaka kutubila mambu ya kukonda kukana yina yandi vandaka kukutana ti yo ntangu yandi vandaka kulonga bantu ya nkaka mambu ya me tala lufutumuku ya Yezu.—Bis. 22:6-11; 26:13-18.