1. Inki Piere salaka ntangu Yezu sadisaka bo na kukanga bambisi mingi na mutindu ya kuyituka?

 PIERE lobaka mpimpa ya mvimba kansi yandi kangaka ve ata kima mosi. Kima ya kuyituka kele nde Yezu songaka yandi nde: “Kwenda kisika yina kele mudindu, mpi beno losa babukondi na beno sambu na kukanga bambisi.” (Luka 5:4) Piere ndimaka ve nde yandi ta kanga bambisi kuna kansi yandi salaka mutindu Yezu songaka yandi. Piere ti bantu yina vandaka kuloba ti yandi kangaka bambisi mingi yo yina bafile na bo yantikaka kupasuka. Bo bakisaka nde yo vandaka kima mosi ya kuyituka yina Yezu salaka, yo yina bo “yitukaka mingi.” Piere tubaka nde: “Mfumu, katuka na ntwala na mono, sambu mono kele muntu ya masumu.” (Luka 5:6-9) Yo ke monana nde Piere yindulaka nde yandi fwanaka ve na kuvanda na ntwala ya Yezu.

2. Sambu na nki yo kele mfunu nde beto tadila mbandu ya Piere?

² Piere vandaka ti raison, yandi vandaka “muntu ya masumu.” Biblia ke monisa nde bantangu ya nkaka yandi tubaka mpi salaka mambu yina pesaka yandi mpasi na nima. Keti yo me kuminaka nge mpi? Keti nge ke nwanaka sambu na kukatula kifu mosi to nzala ya kusala disumu? Kana mpidina, mbandu ya Piere ta sadisa nge. Inki mutindu? Yindula fioti: Yehowa lendaka kusala nde bo sonika ve bifu ya Piere na Biblia. Kansi na nsadisa ya mpeve santu na yandi, bo sonikaka yo na Biblia sambu yo longa beto. (2 Tim. 3:16, 17) Kana beto longuka disolo ya Piere ya me tala bikesa yina yandi salaka sambu na kunwana ti bifu na yandi, yo ta sadisa beto na kubakisa nde Yehowa ke vingilaka ve nde beto sala mambu ya kukuka. Yandi ke zolaka nde beto landa kusadila yandi, disongidila nde beto landa kusala bikesa ata beto ke sala bifu.

3. Sambu na nki beto fwete landa kusala bikesa?

³ Sambu na nki yo kele mfunu nde beto landa kusala bikesa? Sambu  kana beto ke landa kusala bikesa ya kusala kima mosi, beto ta kuma kusala yo mbote. Mu mbandu, kana muntu mosi ke zola kubula kidare mbote, yandi lenda baka bamvula mingi sambu na kulonguka yo. Yandi lenda sala bifu mingi ntangu yandi ke longuka kansi kana yandi ke landa kaka kulonguka, yandi ta kuma kubula yo mbote. Ata kana yandi me kuma kubula kidare mbote, bantangu ya nkaka yandi lenda sala kifu. Ata mpidina, yandi ta yambula ve. Yandi ta landa kaka kubula sambu na kukuma kubula yo diaka mbote. Mutindu mosi mpi, ata kana beto me katula kifu mosi yina beto vandaka ti yo, yo lenda vutukila beto diaka. Ata mpidina, beto ke landaka kusala bikesa sambu beto vutukila yo diaka ve. Beto yonso ke tubaka to ke salaka mambu yina ke pesaka beto mpasi na nima. Kansi kana beto yambula ve kusala bikesa, Yehowa ta sadisa beto na kuvutukila yo diaka ve. (1 Pie. 5:10) Mbandu ya Piere lenda sadisa beto sambu na kulanda kusala bikesa. Mutindu Yehowa wilaka yandi mawa sambu na bifu yina yandi salaka, lenda pusa beto na kulanda kusadila Yehowa.

4. Na Luka 5:5-10, nki mutindu Piere kudibingaka, kansi nki Yezu ndimisaka yandi?

⁴ Biblia ke tuba ve sambu na nki Piere tubaka nde yandi vandaka “muntu ya masumu.” Yo ke tubila mpi ve masumu yina yandi vandaka kuyindula ntangu yandi tubaka mpidina. (Tanga Luka 5:5-10.) Kansi ntembe kele ve nde yandi salaka bifu ya nene. Yezu zabaka nde Piere vandaka kuwa boma, mbala ya nkaka sambu yandi yindulaka nde yandi vandaka ve muntu ya mbote. Kansi Yezu zabaka mpi nde Piere lendaka kulanda kuvanda ya kwikama. Yo yina Yezu songaka yandi na mawete yonso nde “kuwa diaka boma ve.” Yezu tudilaka Piere ntima mpi yo sobaka luzingu na yandi. Na nima, Piere ti mpangi na yandi Andre yambulaka kisalu na bo ya kuloba bambisi mpi bo kumaka balongoki ya Mesia mpi Yehowa sakumunaka bo mingi. ​—Mar. 1:16-18.

5. Inki mambote Piere bakaka sambu yandi katulaka boma mpi ndimaka na kulanda Yezu?

⁵ Piere kutanaka ti mambu mingi ya mbote ntangu yandi kumaka longoki ya Kristu. Yandi monaka mutindu Yezu vandaka kubelula bambefo, kubasisa bantu bademo mpi nkutu kufutumuna bafwa. b (Mat. 8:14-17; Mar. 5:37, 41, 42) Na mbona-meso mosi, yandi monaka mpi Yezu na nkembo ya Kimfumu na yandi yina ta kwisa. Yandi vilaka ve mbona-meso yina ata fioti. (Mar. 9:1-8; 2 Pie. 1:16-18) Ya kieleka, kana Piere kumaka ve longoki ya Yezu, yandi zolaka ve kumona mambu yina yonso. Yandi waka kiese mingi sambu yandi katulaka bangindu ya mbi  mpi yandi sepelaka ti mambote yina yandi bakaka.

6. Keti Piere yambulaka nswalu bifu na yandi? Tendula.

⁶ Ata Piere monaka mpi waka mambu ya Yezu, yandi landaka kaka kunwana ti bifu na yandi. Beto tadila mwa bifu yango. Ntangu Yezu vandaka kutendula mutindu yandi ta niokwama mpi ta fwa sambu na kulungisa baprofesi ya Biblia, Piere nganinaka yandi. (Mar. 8:31-33) Mbala mingi, Piere ti bantumwa ya nkaka vandaka kuswana sambu na kuzaba nani na kati na bo vandaka muntu ya kuluta nene. (Mar. 9:33, 34) Na mpimpa ya nsuka ya luzingu ya Yezu awa na ntoto, Piere zengaka dikutu ya muntu mosi. (Yoa. 18:10) Kaka na mpimpa yina, Piere waka boma mpi yandi buyaka nduku na yandi Yezu mbala tatu. (Mar. 14:66-72) Yo yina yandi dilaka ngolo.​—Mat. 26:75.

7. Inki dibaku Piere vandaka ti yo na nima ya lufutumuku ya Yezu?

⁷ Ata Piere lembaka kibeni nitu, Yezu yambulaka yandi ve. Na nima ya lufutumuku ya Yezu, yandi pesaka Piere dibaku ya kumonisa nde yandi ke zolaka yandi. Yezu songaka Piere na kusadila yandi na kudikulumusa yonso bonso ngungudi ya mameme na yandi. (Yoa. 21:15-17) Piere ndimaka na kiese yonso. Yandi vandaka na Yeruzalemi na kilumbu ya Pantekoti, yandi vandaka na kati ya Bakristu ya ntete yina bakaka mpeve santu.

8. Inki kifu ya nene Piere salaka na Antioshe?

⁸ Ata na nima ya kukuma Mukristu yina bo me tulaka mafuta, Piere landaka kaka kunwana ti bifu na yandi. Na mvu 36 ya ntangu na beto, Piere vandaka pana ntangu Korneye, Muntu ya Makanda yina bo yotisaka ve bakaka mpeve santu. Yo ndimisaka kibeni Piere nde “Nzambi ke pona-ponaka ve” mpi nde Bantu ya Makanda lenda vanda na dibundu ya Bukristu. (Bis. 10:34, 44, 45) Na nima, Piere yantikaka kudia ti Bantu ya Makanda, kima yina yandi vandaka kusala ve ata fioti. (Bag. 2:12) Kansi Bakristu ya nkaka yina vandaka Bayuda vandaka kuyindula nde Bayuda ti Bantu ya Makanda fwete dia ve kisika mosi. Ntangu Bayuda ya nkaka yina vandaka kuyindula mpi mutindu yina kwisaka na Antioshe, Piere yambulaka kudia ti bampangi na yandi Bantu ya Makanda, sambu yandi vandaka kuwa boma ya kubudisa Bakristu ya Bayuda dibaku. Ntangu ntumwa Polo monaka yo, yandi nganinaka Piere na meso ya bantu. (Bag. 2:13, 14) Ata Piere salaka kifu yina, yandi landaka kaka kusala bikesa. Inki sadisaka yandi?

9. Inki mutindu Yoane 6:68, 69 ke monisa nde Piere vandaka muntu ya kwikama?

⁹ Piere vandaka ya kwikama, yo yina yandi bikaka ve nde ata kima mosi kupusa yandi na kuyambula kulanda Yezu. Kilumbu mosi, yandi monisaka nde yandi vandaka ya kwikama ntangu Yezu tubaka kima mosi yina balongoki na yandi bakisaka ve. (Tanga Yoane 6:68, 69.) Balongoki mingi vingilaka ve nde Yezu kutendudila bo yo, bo yambulaka kulanda yandi. Kansi Piere yambulaka ve. Yandi vandaka ya kwikama mpi tubaka nde kaka Yezu mpamba muntu vandaka ti “bangogo ya luzingu ya mvula na mvula.”

10. Inki mutindu Yezu monisaka nde yandi tudilaka Piere ntima? (Tala mpi kifwanisu ya ke wakana ti paragrafe yai.)

¹⁰ Yezu yambulaka ve Piere. Na mpimpa ya nsuka ya luzingu na yandi awa na ntoto, yandi zabaka nde Piere ti bantumwa ya nkaka ta yambula yandi. Kansi Yezu songaka Piere nde yandi ke ndima nde yandi ta vutukila yandi mpi yandi ta landa kuvanda ya kwikama. (Luka 22:31, 32) Yezu bakisaka nde “mpeve kele ngolo, kansi nsuni kele ngolo ve.” (Mar. 14:38) Yo yina, ata Piere buyaka Yezu, Yezu yambulaka yandi ve. Ntangu Yezu futumukaka, yandi monanaka na Piere. Yo ke monana nde Piere vandaka yandi mosi. (Mar. 16:7; Luka 24:34; 1 Bak. 15:5) Yo pesaka  Piere kikesa mingi ata yandi lembaka nitu sambu na mambu yina yandi tubaka mpi salaka.

11. Inki mutindu Yezu ndimisaka Piere nde Yehowa ta sadisa yandi?

¹¹ Yezu ndimisaka Piere nde Yehowa ta sadisa yandi. Na nima ya lufutumuku ya Yezu, yandi sadisaka Piere ti bantumwa ya nkaka na kukanga diaka bambisi na mutindu ya kuyituka. (Yoa. 21:4-6) Yo ndimisaka Piere nde Yehowa ta pesa yandi bima ya kinsuni yina yandi ta vanda ti yo mfunu. Mbala ya nkaka na ntangu yina, Piere yibukaka mambu yina Yezu tubaka nde Yehowa ta lungisa bampusa ya bantu yina ke landaka “kusosa ntete Kimfumu.” (Mat. 6:33) Mambu yina yonso salaka nde Piere kutula kisalu ya Yehowa na kisika ya ntete na luzingu na yandi kansi ve kisalu ya kuloba bambisi. Yandi longaka ti kikesa yonso na kilumbu ya Pantekoti ya mvu 33 ya ntangu na beto mpi yandi sadisaka bantu mingi na kundima nsangu ya mbote. (Bis. 2:14, 37-41) Na nima, yandi sadisaka bantu ya Samaria mpi Bantu ya Makanda na kulonguka mambu ya Kristu mpi na kukuma balongoki na yandi. (Bis. 8:14-17; 10:44-48) Ya kieleka, Yehowa sadilaka Piere mingi sambu na kusadisa bantu ya mitindu yonso na kukuma Bakristu.

12. Inki mutindu mbandu ya Piere ta sadisa beto kana beto ke nwanaka sambu na kukatula kifu mosi?

¹² Yehowa ta sadisa beto na kulanda kusala bikesa. Yo lenda vanda mpasi na kulanda kusala bikesa, mingi-mingi kana beto ke nwanaka ti kifu mosi banda ntama. Bantangu ya nkaka, beto lenda yindula nde bifu na beto kele mpasi mingi na kuyambula kuluta yina Piere vandaka ti yo. Kansi Yehowa lenda pesa beto ngolo ya kuyambula yo. (Nk. 94:17-19) Mu mbandu, mpangi-bakala mosi vandaka kuvukisa nitu ti babakala ya nkaka bamvula mingi na ntwala nde yandi zaba kieleka. Na nima, yandi yambulaka kusala mambu yina ya nsoni. Kansi bantangu ya nkaka, yandi vandaka kunwana ti banzala yina ya mbi. Inki sadisaka yandi na kulanda kusala bikesa? Yandi ke tuba nde: “Yehowa pesaka mono ngolo. Na nsadisa ya mpeve ya Yehowa . . . , mono me bakisaka nde mono lenda landa [kutambula] na nzila ya kieleka . . . Yehowa ke sadilaka mono, mpi ata mono ke salaka bifu, yandi ke landaka kupesa mono ngolo.”

13. Inki mutindu beto lenda landa mbandu ya Piere yina kele na Bisalu 4:13, 29, 31? (Tala mpi kifwanisu ya ke wakana ti paragrafe yai.)

¹³ Mutindu beto me mona yo, mbala mingi Piere salaka bifu ya nene sambu yandi vandaka kuwa bantu boma. Kansi ntangu yandi sambaka sambu Yehowa kupesa yandi ngolo,  yandi salaka mambu ti kikesa. (Tanga Bisalu 4:13, 29, 31.) Beto mpi lenda katula boma. Beto tadila mambu yina kuminaka mpangi Horst ntangu yandi vandaka leke na Allemagne na luyalu ya Nazi. Mbala mingi, bo vandaka kupusa yandi na nzo-nkanda na kutuba nde: “Heil Hitler!” disongidila nde Hitler ta gulusa beto, mpi yandi vandaka kusala yo. Bibuti na yandi vandaka kunganina yandi ve kansi bo vandaka kusamba Yehowa ti yandi mpi kulomba Yehowa na kupesa yandi kikesa. Bibuti na yandi sadisaka yandi mpi yandi tudilaka Yehowa ntima. Nsuka-nsuka, yandi bakaka kikesa mpi yandi tubaka diaka ve mambu yina. Na nima yandi tubaka nde: “Yehowa yambulaka mono ve ata fioti.” c

14. Inki mutindu bangungudi ya zola ke pesaka bantu yina me lemba nitu kikesa?

¹⁴ Yehowa ti Yezu ta yambula beto ve. Na nima ya kubuya Yezu, yo lombaka nde Piere kubaka lukanu mosi ya mfunu. Keti yandi ta yambula to yandi ta landa kaka kusala bikesa ya kulanda kuvanda longoki ya Kristu? Yezu bondilaka Yehowa sambu lukwikilu ya Piere kulanda kaka kuvanda ngolo. Yezu songaka Piere kisambu yango mpi yandi ndimaka nde Piere ta pesa bampangi na yandi kikesa na nima. (Luka 22:31, 32) Ntangu Piere yibukaka mambu yina Yezu songaka yandi, yo pesaka yandi diaka kikesa mingi kibeni. Kana beto kele ti lukanu mosi ya mfunu ya kubaka, Yehowa lenda sadila bangungudi ya zola na kupesa beto kikesa yina beto kele ti yo mfunu sambu beto landa kuvanda ya kwikama. (Baef. 4:8, 11) Mpangi Paul, nkuluntu mosi ya ntama ke salaka bikesa ya kupesa bampangi kikesa na mutindu yina. Yandi ke songaka bantu yina ke zola kuyambula kusadila Yehowa na kuyindula mutindu Yehowa bendaka bo na kieleka. Na nima, yandi ke ndimisaka bo nde zola ya kwikama ya Yehowa ta pesa yandi ve nzila ya kuyambula bo. Yandi ke tuba nde: “Mono me monaka mutindu Yehowa sadisaka bampangi  mingi yina lembaka nitu na kulanda kusala bikesa.”

15. Inki mutindu mbandu ya Piere mpi ya mpangi Horst ke monisa kieleka ya mambu yina kele na Matayo 6:33?

¹⁵ Kaka mutindu Yehowa pesaka Piere mpi bantumwa ya nkaka bima ya kinsuni yina bo vandaka ti yo mfunu, yandi ta pesa beto yo mpi kana beto ke tula kisalu na yandi na kisika ya ntete na luzingu na beto. (Mat. 6:33) Na nima ya Bitumba ya Zole ya Ntoto ya Mvimba, mpangi Horst yina beto me tubila vandaka ti mfunu ya kukuma mupasudi-nzila. Yandi vandaka kibeni nsukami mpi yandi yindulaka nde yandi ta zwa ve mbongo yina ta sadisa yandi na kulanda kusala kisalu ya ntangu yonso. Inki yandi salaka? Yandi bakaka lukanu ya kumeka Yehowa disongidila, yandi longaka nsangu ya mbote mposo ya mvimba na viziti ya nkengi ya nziunga. Na nsuka ya mposo, yandi yitukaka mingi kibeni ntangu nkengi ya nziunga pesaka yandi amvelope mosi ya mbongo mpi yandi songaka yandi ve zina ya muntu yina pesaka yandi amvelope yango. Yo vandaka ti mbongo mingi yina lendaka kusadisa yandi na kisalu ya kimupasudi-nzila bangonda mingi. Yo ndimisaka kibeni mpangi Horst nde Yehowa ta sadisa yandi kana yandi kuma mupasudi-nzila. Yo yina, yandi tulaka mambote ya Kimfumu na kisika ya ntete luzingu na yandi ya mvimba.​—Mal. 3:10.

16. Sambu na nki kulonguka mbandu ya Piere kele mfunu mingi sambu na beto?

¹⁶ Piere waka kiese mingi kibeni mutindu Yezu katukaka ve na ntwala na yandi mutindu yandi songaka Yezu. Kristu landaka kupesa Piere formasio sambu na kuvanda ntumwa ya kwikama mpi mbandu ya mbote kibeni sambu na Bakristu. Formasio yango kele ti malongi mingi ya mfunu yina ta sadisa beto yonso. Piere tubilaka malongi yina mpi mingi ya nkaka na mikanda zole yina yandi sonikilaka Bakristu ya mvu-nkama ya ntete. Disolo ya ke landa ta tubila malongi yina kele na mikanda yango mpi mutindu beto lenda sadila yo bubu yai.