1. Ntangu fioti na ntwala nde ntumwa Piere kufwa, mpeve santu pusaka yandi na kusala nki?

 NTUMWA Piere zabaka nde luzingu na yandi ta suka ntama mingi ve. Yandi sadilaka Yehowa na mutindu ya mbote bamvula mingi. Yandi tambulaka ti Yezu, yandi longaka bantu mingi nsangu ya mbote mpi yandi salaka na nto-kimvuka. Kansi yandi vandaka kaka ti mambu mingi ya kusala. Pene-pene ya bamvu 62 tii na 64 ya ntangu na beto, Yehowa sadilaka yandi sambu na kusonika mikanda zole: 1 Piere mpi 2 Piere. Mikanda yango kele na Biblia. Yandi zabaka nde mikanda yina ta sadisa Bakristu na nima ya lufwa na yandi.​—2 Pie. 1:12-15.

2. Sambu na nki Piere sonikaka mikanda yina na ntangu ya mbote?

² Piere sonikaka mikanda yina ntangu bampangi na yandi Bakristu vandaka “na mawa . . . sambu na mimekamu ya mutindu na mutindu.” (1 Pie. 1:6) Bantu ya mbi vandaka kusosa kukotisa malongi ya luvunu mpi bikalulu ya mbi na dibundu. (2 Pie. 2:1, 2, 14) Bakristu yina vandaka na Yeruzalemi zolaka kumona “nsuka ya bima yonso,” disongidila nde basoda ya Roma zolaka kufwa mbanza na bo mpi kusukisa luyalu ya Bayuda. (1 Pie. 4:7) Ntembe kele ve nde mikanda yina Piere sonikaka, zolaka kusadisa Bakristu na kukanga ntima na bampasi yina bo vandaka kukutana ti yo mpi yina bo zolaka kukutana ti yo na nima. b

3. Sambu na nki beto fwete longuka mikanda yina Piere sonikaka?

³ Ata Piere sonikaka mikanda yina sambu na Bakristu ya mvu-nkama  ya ntete, Yehowa salaka nde yo vanda na kati ya Ndinga na yandi sambu beto bakila yo mambote bubu yai. (Bar. 15:4) Beto mpi ke zinga na ntangu yina bantu mingi ke sala mambu ya mvindu mpi beto ke kutana ti bampasi yina lenda sala nde beto sadila ve Yehowa na mutindu ya mbote. Ntama mingi ve, mpasi ya nene ta kwisa. Yo ta luta yina bwilaka Bayuda na mvu-nkama ya ntete mpi tulaka nsuka na luyalu na bo. Beto lenda baka malongi ya mfunu na mikanda zole yina Piere sonikaka. Yo ta sadisa beto na kulanda kuvingila kilumbu ya Yehowa, kukatula boma ya bantu mpi kuyedisa zola ya mingi sambu na bampangi na beto. Yo ta sadisa mpi bankuluntu na kukeba mameme ya Nzambi na mutindu ya mbote.

4. Mutindu 2 Piere 3:3, 4 ke monisa yo, nki lenda lembisa lukwikilu na beto?

⁴ Beto ke zinga na kati ya bantu yina ke ndimaka ve baprofesi ya Biblia. Bambeni lenda seka beto sambu beto ke tubaka nde nsuka ta kwisa. Bantu ya nkaka ke tubaka nde yo ta kwisa ve ata fioti. (Tanga 2 Piere 3:3, 4.) Kana muntu mosi yina beto ke longa nsangu ya mbote, nduku na beto ya kisalu to muntu ya dibuta na beto me tuba mpidina, yo lenda lembisa kibeni lukwikilu na beto. Piere tubilaka mambu yina lenda sadisa beto.

5. Inki ta sadisa beto na kulanda kuvingila nsuka ya nsi-ntoto yai? (2 Piere 3:8, 9)

⁵ Bantu ya nkaka lenda mona nde Yehowa ke fwa ve nswalu nsi-ntoto yai ya mbi. Mambu yina Piere tubaka ke sadisa beto na kuyibuka nde mutindu Yehowa ke tadilaka ntangu me swaswana kibeni ti mutindu bantu ke tadilaka yo. (Tanga 2 Piere 3:8, 9.) Sambu na Yehowa, bamvula 1000 kele bonso kilumbu mosi. Yehowa ke vandaka ntima-nda mpi yandi ke zolaka ve nde ata muntu mosi kufwa. Kansi ntangu kilumbu yina yandi me tulaka ta lunga, yandi ta fwa kibeni nsi-ntoto yai. Beto kele ti dibaku ya mbote ya kusadila ntangu yai ya me bikala sambu na kulonga nsangu ya mbote na bantu ya mitindu yonso na ntoto ya mvimba.

6. Inki mutindu beto fwete “yibuka ntangu yonso” kilumbu ya Yehowa? (2 Piere 3:11, 12)

⁶ Piere songaka beto na ‘kuyibuka ntangu yonso’ kilumbu ya Yehowa. (Tanga 2 Piere 3:11, 12.) Inki mutindu? Konso kilumbu, beto lenda yindula mutindu luzingu ta vanda kitoko na nsi-ntoto ya mpa. Kudimona mutindu nge ke pema mupepe ya kitoko, nge ke dia madia ya mbote, nge ke yamba bantu yina me fwaka ya nge vandaka kuzola ntangu bo ke futumuka mpi nge ke longa bantu yina zingaka bamvula mingi na ntwala mutindu baprofesi ya Biblia lunganaka. Kana nge ke sala mpidina, yo ta sadisa nge na kulanda kuvingila kilumbu ya Yehowa mpi na kuvila ve nde beto ke zinga na bilumbu ya nsuka. Kana beto ke “zaba . . . na ntwala” mutindu luzingu ta vanda na bilumbu ke kwisa, balongi ya luvunu ta ‘vidisa beto ve nzila.’​—2 Pie. 3:17.

7. Boma ya bantu lenda pusa beto na kusala nki?

⁷ Kana beto ke landa kuyindula ntangu yonso kilumbu ya Yehowa, yo ta pusa beto na kulonga bantu ya nkaka nsangu ya mbote. Kansi bantangu ya nkaka, beto lenda wa boma ya kusala yo. Sambu na nki? Sambu beto lenda wa bantu boma. Yo kuminaka mpi Piere. Na mpimpa ya nsuka ya Yezu awa na ntoto, Piere waka boma ya kutuba nde yandi kele longoki na yandi mpi nkutu mbala mingi, yandi buyaka nde yandi ke zaba yandi ve. (Mat. 26:69-75) Kansi na nima, kaka Piere yango muntu sonikaka nde: “Mambu yina bo ke wa boma, beno wa yo boma ve, beno kuma mpi ve kisaka-saka.” (1 Pie. 3:14) Mambu yina Piere sonikaka ke ndimisa beto nde beto lenda katula boma ya bantu.

8. Inki lenda sadisa beto na kuwa ve bantu boma? (1 Piere 3:15)

 ⁸ Inki lenda sadisa beto na kukatula boma ya bantu? Piere tubaka nde: “Beno santisa Kristu bonso Mfumu na bantima na beno.” (Tanga 1 Piere 3:15.) Yo ke tendula nde beto fwete yibuka nde Kristu Yezu kele Ntotila na beto mpi yandi kele ngolo mingi. Kana nge ke wa boma ya kulonga nsangu ya mbote ntangu nge me zwa dibaku mosi, yibuka Ntotila na beto. Mona na mabanza mutindu yandi ke yala na zulu mpi bawanzio mingi me ziunga yandi. Kuvila ve nde yandi kele ti “kiyeka yonso na zulu mpi na ntoto” mpi yandi ‘ta vanda ti nge bilumbu yonso tii na nsukilu ya ngidika ya bima.’ (Mat. 28:18-20) Piere songaka beto na kuvanda “ntangu yonso ya kuyilama” sambu na kutendudila bantu balukwikilu na beto. Keti nge ta sepela kulonga nsangu ya mbote na kisalu, na nzo-nkanda to na konso kisika yina? Yindula na ntwala ntangu yina nge lenda zwa dibaku ya kusala yo mpi yidika mambu yina nge ta tuba. Samba Yehowa sambu yandi pesa nge kikesa mpi ndima nde yandi ta sadisa nge na kukatula boma ya bantu.​—Bis. 4:29.

9. Inki mutindu Piere monisaka ve zola na dibaku mosi? (Tala mpi kifwanisu ya ke wakana ti paragrafe yai.)

⁹ Piere longukaka mutindu ya kumonisa zola. Yandi vandaka pana ntangu Yezu tubaka nde: “Mono ke pesa beno nsiku mosi ya mpa, nde  beno zolana beno na beno; mutindu mono zolaka beno, beno mpi beno zolana beno na beno.” (Yoa. 13:34) Ata mpidina, mwa bamvula na nima, Piere waka Bayuda boma mpi yandi buyaka kudia ti bampangi na yandi Bakristu yina vandaka Bantu ya Makanda. Ntumwa Polo tubaka nde mambu yina Piere salaka vandaka “luvunu.” (Bag. 2:11-14) Polo sungikaka Piere, Piere ndimaka mpi yandi bakilaka yo dilongi. Na mikanda yonso zole yina yandi sonikaka, yandi bulaka munsonso nde beto fwete zola ve bampangi kaka na munoko kansi beto fwete monisa zola yango.

10. Inki ke sadisaka beto na kumonisa “zola ya kieleka ya kimpangi”? Tendula. (1 Piere 1:22)

¹⁰ Piere tubaka nde beto fwete vanda ti “zola ya kieleka ya kimpangi” sambu na bampangi na beto na dibundu. (Tanga 1 Piere 1:22.) Kana beto “ke lemfuka na kieleka,” beto ta vanda ti zola ya mutindu yina. Kieleka yango ke tadila mpi dilongi ya ke tuba nde: “Nzambi ke pona-ponaka ve.” (Bis. 10:34, 35) Beto ta lemfukila ve nsiku ya Yezu kana beto ke zola bampangi ya nkaka na dibundu mpi beto ke menga bankaka. Ya kieleka, beto ta ta kinduku ya ngolo ti bampangi ya nkaka na dibundu mutindu Yezu mpi taka kinduku ya ngolo ti balongoki na yandi ya nkaka. (Yoa. 13:23; 20:2) Kansi Piere ke yibusa beto nde beto fwete sala ngolo sambu na kuvanda ti “zola ya kieleka ya kimpangi,” disongidila kuzola bampangi na beto yonso bonso dibuta mosi.​—1 Pie. 2:17.

11. Kuzola bampangi “ngolo na ntima ya mvimba” ke tendula nki?

¹¹ Piere songaka beto nde: “Beno zolana ngolo na ntima ya mvimba.” Na verse yai, “kuzolana ngolo” ke tendula kuzola muntu mosi ata yo kele ve pete na kuzola yandi. Mu mbandu, nki beto lenda sala kana mpangi mosi me tuba to me sala kima mosi yina me pesa beto mpasi? Ntete, beto lenda yindula nde beto fwete vutula mbi na mbi. Kansi, Piere longukaka na Yezu nde kusala mutindu yina ke sepedisaka ve Nzambi. (Yoa. 18:10, 11) Yandi sonikaka nde: “Beno vutula ve mbi na mbi to mafingu na mafingu. Kansi, beno sakumuna.” (1 Pie. 3:9) Kana nge ke zola bampangi ngolo, nge ta vanda mawete ti bo mpi nge ta sepela ti bo ata bo ke sala mambu yina lenda pesa nge mpasi.

12. (a) Kana beto ke zola ngolo bampangi, yo ta pusa beto na kusala diaka nki? (b) Mutindu video Beto Tanina Dikabu ya Mfunu ya Bumosi monisaka yo, beto fwete sala bikesa ya kusala nki?

¹² Na mukanda ya ntete yina Piere sonikaka, yandi sadilaka bangogo “zolana ngolo.” Zola ya mutindu yina ke fikaka ve kaka masumu fioti kansi “masumu mingi.” (1 Pie. 4:8) Mbala ya nkaka, Piere yibukaka dilongi ya kulolula yina Yezu longaka yandi bamvula mingi na ntwala. Mbala ya nkaka na ntangu yina, Piere yindulaka nde yandi vandaka muntu ya mbote ntangu yandi songaka Yezu nde yandi lenda lolula mpangi na yandi “mbala nsambwadi.” Kansi Yezu longaka yandi mpi beto yonso nde, beto fwete lolula bampangi na beto “mbala 77,” disongidila kukonda nsuka. (Mat. 18:21, 22) Kulemba ve nitu kana yo ke vandilaka nge mpasi na kusadila dilongi yina. Bantangu ya nkaka, yo ke vandaka mpi mpasi sambu na bansadi yonso ya Yehowa na kulolula sambu bo kele bantu ya kukonda kukuka. Kansi kima ya mfunu sambu na nge ntangu yai kele nde, nge fwete sala yonso sambu na kulolula mpangi na nge mpi kutula ngemba ti yandi. c

13. Sambu na nki yo lenda vanda mpasi sambu bankuluntu kuzwa ntangu ya kupesa bampangi kikesa?

¹³ Piere vilaka ve ata fioti mambu yina Yezu songaka yandi na nima ya lufutumuku na yandi. Yandi tubaka nde: “Gungula mameme na mono ya fioti.” (Yoa. 21:16) Kana nge kele  nkuluntu, nge me zaba mbote nde nge fwete sadila mpi ndongisila yina. Kansi yo lenda vanda mpasi sambu nkuluntu kuzwa ntangu ya kusala kisalu yina ya mfunu mingi. Ntete, bankuluntu fwete sala yonso sambu na kulungisa bampusa ya mabuta na bo ya kinsuni mpi ya kimpeve. Diaka, bo fwete sala yonso sambu zola kuvanda na mabuta na bo. Bo kele mpi bambandu ya mbote na yina me tala kisalu ya kulonga nsangu ya mbote, kuyidika mpi kusala masolo na balukutakanu ya dibundu, na balukutakanu ya nziunga mpi na balukutakanu ya nene. Bankaka ke vandaka mpi ti mikumba ya kusadisa Bakomite ya Kuwakana ti Balupitalu to bo ke pesaka maboko na kisalu ya kutunga banzo ya lusambu. Bankuluntu ke vandaka kibeni ti mambu mingi ya kusala!

14. Inki fwete sadisa bankuluntu na kugungula mameme? (1 Piere 5:1-4)

¹⁴ Piere songaka bankuluntu nde: “Beno gungula mameme ya Nzambi.” (Tanga 1 Piere 5:1-4.) Kana nge kele nkuluntu, beto me zaba nde nge ke zolaka bampangi na nge mpi nge ke zolaka kugungula bo. Kansi bantangu ya nkaka, nge lenda vanda ti mambu mingi ya kusala mpi nge lenda lemba mingi, yo yina nge lenda yindula nde nge ta kuka ve kulungisa mukumba yina. Inki nge lenda sala? Songa Yehowa mambu yina ke yangisa nge. Piere tubaka nde: “Kana muntu ke sadila bankaka, yandi sala yo na nsadisa ya ngolo yina Nzambi ke pesaka.” (1 Pie. 4:11) Bampangi lenda kutana ti bampasi yina ta mana ve mbote-mbote na nsi-ntoto yai. Kansi kuvila ve nde Yezu Kristu, “ngungudi ya nene,” ta sadisa bo mbote kuluta konso muntu yina. Yandi lenda sala yo bubu yai mpi na nsi-ntoto ya mpa. Yehowa ke lomba bankuluntu na kuzola bampangi, na kugungula bo mpi na kukuma “bambandu sambu na mameme.”

15. Inki mutindu nkuluntu mosi ke gungulaka mameme? (Tala mpi kifwanisu ya ke wakana ti paragrafe yai.)

¹⁵ Mpangi William me sala bamvula mingi na kinkuluntu mpi yandi ke bakisaka mfunu ya kugungula mameme. Ntangu coronavirus yantikaka, yandi mpi bankuluntu ya nkaka vandaka kubinga konso mposo, konso mpangi ya kimvuka na bo ya kulonga nsangu ya mbote mpi bo vandaka kutula yo na kisika ya ntete. Yandi ke tuba nde: “Bampangi mingi vandaka bo mosi na nzo, yo yina bangindu na bo lendaka kukwenda kisaka-saka mpi bo yindula mambu ya mbi.” Kana mpangi mosi ke kutana ti mambu ya mpasi, mpangi William ke widikilaka  yandi na dikebi yonso sambu na kuzaba bampusa na yandi mpi mambu yina ke yangisa yandi. Yandi ke sosaka mikanda to bavideo na site Internet na beto sambu yo sadisa yandi na kupesa mpangi yina kikesa. Yandi ke tuba diaka nde: “Kugungula kele mfunu mingi bubu yai kuluta bantangu yonso ya nkaka. Beto ke salaka bikesa mingi sambu na kusadisa bantu na kuzaba Yehowa. Beto fwete sala mpi mutindu mosi sambu na kugungula mameme ya Yehowa, disongidila kusadisa bo sambu na kubikala na kieleka.”

16. Inki mutindu beto lenda sadila malongi yina beto me baka na mikanda ya Piere?

¹⁶ Beto me tubila kaka malongi ndambu ya kele na mikanda zole yina Piere sonikaka. Mbala ya nkaka nge me mona bisika yina nge fwete yidika. Mu mbandu, keti nge lenda yindula mingi mambote yina beto ta baka na nsi-ntoto ya mpa? Keti nge me kuditudila lukanu ya kulonga nsangu ya mbote na kisalu, na nzo-nkanda to na konso kisika yina? Keti nge me mona mitindu ya kumonisila bampangi zola ya ngolo? Bankuluntu, keti beno me baka lukanu ya kugungula mameme ya Yehowa ti luzolo yonso mpi kikesa yonso? Kuditadila na masonga yonso. Kana nge me mona nde kele ti mambu yina nge fwete yidika, kulemba ve nitu. “Mfumu kele ntima ya mbote” mpi yandi ta sadisa nge na kuyidika mambu yina yo ke lomba nde nge yidika. (1 Pie. 2:3) Piere ke ndimisa beto nde: “Nzambi . . . yandi mosi ta manisa kulonga beno. Yandi ta kumisa beno kikesa, yandi ta kumisa beno ngolo, yandi ta tula beno fondasio ya ngolo.”​—1 Pie. 5:10.

17. Kana beto landa kusala bikesa mpi beto bika nde Yehowa kulonga beto, nki mbuma yo ta buta?

¹⁷ Ntete, Piere vandaka kuyindula nde yandi me fwana ve na kuvanda ti Mwana ya Nzambi. (Luka 5:8) Kansi Yehowa mpi Yezu sadisaka Piere mingi sambu yandi landa kusala bikesa ya kuvanda longoki ya Kristu. Yo yina, Yehowa pesaka Piere nswa ya “kukota na Kimfumu ya mvula na mvula ya Mfumu mpi Ngulusi na beto Yezu Kristu.” (2 Pie. 1:11) Yo vandaka lusakumunu ya nene kibeni. Kana nge landa mpi kusala bikesa bonso Piere mpi nge bika nde Yehowa kulonga nge, nge mpi ta zinga mvula na mvula. Nge ta ‘lungisa lukanu ya lukwikilu na nge, luguluku na nge.’​—1 Pie. 1:9.