1-2. Sambu na nki bansadi ya Nzambi ke vandaka na kiese? (Yakobo 1:22-25)

 YEHOWA ti Mwana na yandi ke zolaka nde beto vanda na kiese. Nkunga 119:2 ke tuba nde: “Kiese na bantu yina ke zitisaka bangibusa na yandi, yina ke sosaka yandi na ntima na bo ya mvimba.” Yezu mpi tubaka nde: “Kiese na bantu yina ke waka ndinga ya Nzambi mpi ke landaka yo!”​—Luka 11:28.

² Bansadi ya Yehowa ke vandaka na kiese. Sambu na nki? Bikuma kele mingi, kansi kikuma mosi ya mfunu kele yai: Beto ke tangaka Ndinga ya Nzambi konso kilumbu mpi beto ke salaka bikesa ya kusadila mambu yina beto ke tanga.​—Tanga Yakobo 1:22-25.

3. Inki mambote beto ke bakaka kana beto ke sadila mambu yina beto ke tanga na Ndinga ya Nzambi?

³ Beto ke bakaka mambote mingi ntangu beto ke ‘kumaka bantu yina ke lemfukaka na ndinga.’ Sambu beto ke zaba nde yo kele kima ya mfunu mingi yina beto fwete sala sambu na kusepedisa Yehowa. Kusala mpidina ke pesaka beto kiese. (Lon. 12:13) Kana beto ke sadila mambu yina beto ke tanga na Ndinga ya Nzambi, beto ke kumaka ti kinduku ya mbote ti bampangi na beto na dibuta mpi bampangi na beto Bakristu. Ntembe kele ve nde nge mpi me monaka nde yo kele mutindu yina na luzingu na nge. Diaka, beto ke kutanaka ve ti mambu mingi ya mpasi yina ke kuminaka bantu yina ke zitisaka ve bansiku ya Yehowa. Beto ke ndimaka mpi mambu yina ntotila Davidi tubaka. Na nima ya kutubila nsiku, bantuma mpi balusambisu ya Yehowa na nkunga mosi, yandi sukisaka nde: “Kuzitisa yo kele ti matabisi mingi.”​—Nk. 19:7-11.

4. Sambu na nki yo ke vandilaka beto ve pete na kusadila mambu yina beto ke tanga na Ndinga ya Nzambi?

⁴ Sambu na kusadila mambu yina kele na Ndinga ya Nzambi, beto fwete tanga yo mpi kulonguka yo sambu na kubakisa mambu  yina Yehowa ke zola nde beto sala. Kansi, yo ke vandaka ve pete ntangu yonso sambu beto ke vandaka ti mambu mingi ya kusala. Yo yina beto fwete tula ntangu ya kutanga Biblia mpi ya kulonguka yo. Beto tadila diaka mwa mambu yina lenda sadisa beto na kutanga yo konso kilumbu. Beto ta tala mpi mambu yina ta sadisa beto na kuyindula mambu yina beto ke tanga mpi na kumona mutindu beto lenda sadila yo na luzingu na beto.

TULA NTANGU YA KUTANGA NDINGA YA NZAMBI

5. Inki kele mambu ya mfunu yina ke bakaka beto ntangu mingi?

⁵ Bansadi mingi ya Yehowa ke vandaka ti mambu mingi kibeni ya kusala. Beto ke lutisaka ntangu mingi na kusala mambu mingi ya mfunu. Mu mbandu, bampangi mingi ke salaka kisalu ya kinsuni sambu na kulungisa bampusa na bo mpi kusansa dibuta na bo. (1 Tim. 5:8) Bampangi mingi ya nkaka ke kebaka bantu ya dibuta na bo ya ke belaka to ya minunu. Diaka, beto yonso ke salaka ngolo sambu na kuvanda ti sante ya mbote mpi yo ke lombaka ntangu mingi. Katula mambu yina, beto ke vandaka mpi ti mikumba ya kulungisa na dibundu. Mukumba mosi ya mfunu yina beto ke vandaka ti yo kele ya kulonga nsangu ya mbote ti kikesa yonso. Ata nge kele ti mambu mingi ya kusala, nki mutindu nge lenda zwa ntangu ya kutanga Biblia konso kilumbu, ya kuyindula mambu yina nge ke tanga mpi ya kusadila yo?

6. Inki nge fwete sala sambu na kutula lutangu ya Biblia na kisika ya ntete na luzingu na nge? (Tala mpi kifwanisu ya ke wakana ti paragrafe yai.)

⁶ Kutanga Biblia kele na kati ya “mambu ya kuluta mfunu” yina Bakristu fwete sala. Yo yina beto fwete sala yonso sambu na kutula yo na kisika ya ntete. (Bafil. 1:10) Nkunga ya ntete ke tuba sambu na muntu ya kiese nde: “Yandi ke vandaka na kiese na nsiku ya Yehowa, mpi yandi ke tangaka nsiku na yandi na ndinga ya nsi mpimpa ti mwini.” (Nk. 1:1, 2) Ya kieleka, yo ke tendula nde beto fwete baka ntangu ya kutanga Biblia. Inki kele ntangu ya kuluta mbote ya kutanga Biblia? Konso muntu kele ti ntangu ya kuluta mbote sambu na yandi. Kansi  kima ya mfunu kele nde beto fwete pona ntangu yina ta sadisa beto na kutanga yo konso kilumbu. Mpangi Victor ke tuba nde: “Mono ke sepelaka kutanga Biblia na suka. Ata mono ke sepelaka ve kutelema na suka-suka, yo ke vandaka ntangu ya mbote sambu mambu yina lenda katula dikebi na mono ke vandaka ve mingi. Bangindu na mono ke vandaka kisika mosi mpi yo ke sadisaka mono na kutula dikebi kukonda mpasi na mambu yina mono ke tanga.” Keti yo kele mpi mutindu mosi sambu na nge? Kudiyula nde: ‘Inki kele ntangu ya kuluta mbote sambu na mono ya kutanga Biblia?’

YINDULA MAMBU YINA NGE KE TANGA

7-8. Inki lenda sala nde beto bakila ve lutangu na beto ya Biblia mambote? Pesa mbandu.

⁷ Diambu ya kieleka kele nde, beto lenda tanga mambu mingi kukonda kusimba mambu yango. Keti nge me tangaka dezia kima mosi mpi ntangu fioti na nima nge yibuka yo diaka ve ata fioti? Yo me kuminaka beto yonso. Diambu ya mawa kele nde, yo lenda kumina beto mpi ntangu beto ke tanga Biblia. Mbala ya nkaka beto me kuditudilaka lukanu ya kutanga bakapu mingi ya Biblia konso kilumbu. Yo kele diambu ya mbote. Beto fwete kuditudila balukanu mpi kusala yonso sambu na kulungisa yo. (1 Bak. 9:26) Kansi beto fwete suka kaka ve na kutanga Biblia, beto fwete sala mpi mambu ya nkaka sambu na kubakila yo mambote.

⁸ Beto baka mbandu yai: Banti ke vandaka ti mfunu ya masa sambu na kulanda kuzinga. Kansi kana mvula me noka mingi kibeni mpi nswalu-nswalu, ntoto lenda kuma masa-masa kibeni. Yo ta sala nde masa kukota ve mbote-mbote na ntoto mpi banti ta bakila yo ve mambote. Yo ke lombaka nde ntoto kubaka mwa ntangu ya kukotisa masa yina sambu na kunata yo na banti. Mutindu mosi mpi, beto fwete tanga ve Biblia nswalu-nswalu. Kana ve, beto ta baka ve ntangu ya kuyindula mambu yina beto ke tanga, ya kusimba yo mpi ya kusadila yo.​—Yak. 1:24.

9. Inki beto fwete sala kana beto me bakisa nde beto ke tangaka Biblia ntinu-ntinu?

⁹ Keti nge ke tangaka mpi Biblia ntinu-ntinu bantangu ya nkaka? Inki nge fwete sala? Tanga  malembe-malembe. Sala bikesa ya kutanga yo malembe-malembe sambu nge yindula mambu yina nge ke tanga to sambu na kubaka ntangu ya kuyindula yo kana nge me manisa kutanga. Yo fwete pesa nge ve boma. Nge lenda baka lukanu ya kubaka ntangu mingi ya kulonguka sambu na kuyindula mambu yina nge ke tanga. To nge lenda tanga kaka baverse fioti mpi nge yindula yo na ntangu yina me bikala. Mpangi Victor yina beto me tubila ke tuba nde: “Mono ke tangaka ve baverse mingi, mbala ya nkaka kapu mosi mpamba. Sambu mono ke tangaka na suka-suka, mono ke yindulaka mambu yina mono ke tanga kilumbu ya mvimba.” Ata nge ke sadila konso metode yina, kima ya mfunu kele nde nge fwete tanga malembe-malembe sambu na kuyindula mambu yina nge ke tanga mpi kubakila yo mambote.​—Nk. 119:97; tala lupangu “ Bangiufula ya Kuyindula.”

10. Pesa mbandu ya ke monisa mutindu nge lenda sadila mambu yina nge ke longuka. (1 Batesalonika 5:17, 18)

¹⁰ Ata nge ke tangaka Biblia konso ntangu yina to nge ke bakaka ntangu mingi to ntangu fioti ya kutanga yo, sala yonso sambu na kusadila mambu yina nge ke tanga. Ntangu nge ke tanga kima mosi na Biblia, kudiyula nde: ‘Inki mutindu mono lenda sadila yo bubu yai to na bilumbu ke kwisa?’ Sambu na kubakisa yo mbote, yindula nde nge ke tanga 1 Batesalonika 5:17, 18. (Tanga.) Na nima ya kutanga baverse yina zole, nge lenda zenga ntete mpi nge yindula bambala ikwa nge ke sambaka mpi kana bisambu na nge ke vandaka ya mudindu to ya zulu-zulu. Diaka, nge lenda yindula mambu yina nge lenda pesa Yehowa mersi sambu na yo. Mbala ya nkaka nge lenda baka lukanu ya kupesa Yehowa mersi sambu na mambu tatu. Ata nge me baka ntangu fioti ya kuyindula malongi yina nge me baka na Biblia, yo ta sadisa nge na kubakisa Ndinga ya Nzambi mpi na kusala mambu yina yo ke lomba nge. Yindula mambote yina nge ta baka kana nge ke sala mutindu yina konso kilumbu ntangu nge ke tanga baverse ya nkaka ya Biblia. Ya kieleka, nge ta kuma kulemfuka kibeni na Ndinga ya Nzambi. Ebuna, nki nge fwete sala kana nge me bakisa nde kele ti mambu mingi yina nge fwete yidika?

KUDITUDILA BALUKANU YINA NGE TA KUKA KULUNGISA

11. Sambu na nki bantangu ya nkaka nge lenda lemba nitu? Pesa mbandu.

¹¹ Kana nge ke tanga Biblia, bantangu ya nkaka nge lenda lemba nitu kana nge ke mona nde kele ti mambu mingi yina nge fwete yidika. Yindula nde bubu, nge me tanga baverse ya ke tubila kikalulu ya kupona-pona. (Yak. 2:1-8) Nge me bakisa nde nge fwete yidika mutindu ya kusadila bantu ya nkaka mambu. Yo yina, nge me baka lukanu ya kusala mwa bansoba.  Yo kele diambu ya mbote. Mbasi, nge me tanga baverse ya ke tubila mfunu ya kukeba na mambu yina nge ke tuba. (Yak. 3:1-12) Nge me bakisa nde bantangu ya nkaka nge ke tubaka ve mambu ya mbote. Yo yina nge me baka lukanu ya kutuba mambu ya mbote mpi ya ke pesa kikesa. Na kilumbu ya kulanda, nge me tanga baverse ya ke buyisa beto na kukuma ve banduku ya nsi-ntoto yai. (Yak. 4:4-12) Nge me bakisa nde nge fwete pona mbote-mbote bansaka ya kulutisila ntangu. Na kilumbu ya iya, nge lenda bakisa nde nge kele ti mambu mingi ya kuyidika mpi yo ta vandila nge mpasi na kusala bansoba yina yonso.

12. Sambu na nki nge fwete lemba ve nitu kana ntangu nge ke tanga Biblia nge me bakisa nde kele ti mambu yina nge fwete yidika? (Tala mpi noti na nsi ya lutiti.)

¹² Kana nge kele ti mambu mingi ya kuyidika, kulemba ve nitu. Yo ke monisa nde nge kele ya kudikulumusa mpi nge kele ti bangindu ya mbote. Muntu ya kudikulumusa mpi ya masonga ke tangaka Biblia sambu na kumona mambu yina yandi fwete yidika. a Kuvila mpi ve nde kulwata “kimuntu ya mpa” kele kima yina nge fwete landa kusala. (Bakol. 3:10) Inki ta sadisa nge na kulanda kulemfukila Ndinga ya Nzambi?

13. Inki lenda sadisa nge na kusadila mambu yina nge ke longuka? (Tala mpi kifwanisu ya ke wakana ti paragrafe yai.)

¹³ Na kisika ya kusosa kusadila mambu yonso yina nge ke tanga na mbala mosi, kuditudila lukanu ya kusadila ntete mosi to zole. (Bing. 11:2) Meka diambu yai: Sala liste ya mambu yina nge ke zola kuyidika mpi na nima pona mosi to zole yina nge lenda yidika ntete. Yina ya nkaka, nge lenda yidika yo na nima. Nge fwete yantika ti nki?

14. Inki balukanu nge lenda yantika ntete kulungisa?

 ¹⁴ Nge lenda yantika ti lukanu yina ta vandila nge pete na kulungisa. To nge lenda baka lukanu ya kuyidika ntete kisika yina nge ke mona nde nge fwete sala bansoba mingi. Kana nge me baka lukanu ya mambu yina nge fwete yidika, sala bansosa na mikanda na beto. Mu mbandu na Index des publications des Témoins de Jéhovah to na Mukanda ya Bansosa Sambu na Bambangi ya Yehowa. Samba Yehowa sambu na lukanu yina mpi lomba yandi na kupesa nge “nzala ti ngolo ya kusala mambu.” (Bafil. 2:13) Na nima, sadila mambu yina nge me longuka. Kana nge me lungisa dezia lukanu ya ntete, ntembe kele ve nde nge ta kuma ti nzala ya ngolo ya kulungisa balukanu ya ke landa. Kana nge me soba na diambu mosi to nge me kuma ti kikalulu mosi yina Bakristu fwete vanda ti yo, yo ta pesa nge kikesa ya kulanda kusala bansoba na bisika ya nkaka.

BIKA NDE NDINGA YA NZAMBI ‘KUSALA NA KATI NA NGE’

15. Inki mutindu bansadi ya Yehowa me swaswana ti bantu mingi yina ke tangaka Biblia? (1 Batesalonika 2:13)

¹⁵ Bantu ya nkaka ke tubaka nde bo me tangaka Biblia mbala mingi. Keti bo ke ndimaka kibeni mambu yina Biblia ke tubaka? Keti bo ke sadilaka mambu yina Biblia ke tubaka mpi bo ke salaka bansoba na luzingu na bo? Diambu ya mawa kele nde bantu mingi ke salaka yo ve. Kansi bansadi ya Yehowa me swaswana kibeni ti bo. Bonso Bakristu ya mvu-nkama ya ntete, beto ke ndimaka Biblia “mutindu yo kele kibeni, bonso ndinga ya Nzambi.” Diaka, beto ke salaka yonso sambu na kusadila mambu yina yo ke tubaka.​—Tanga 1 Batesalonika 2:13.

16. Inki lenda sadisa beto na kukuma bantu ya ke lemfukaka na Ndinga?

¹⁶ Yo ke vandaka ve pete ntangu yonso na kutanga Ndinga ya Nzambi mpi na kusadila mambu yina yo ke tuba. Yo lenda vandila beto mpasi na kuzwa ntangu ya kutanga. To beto lenda tanga nswalu-nswalu mpi beto yindula ve mambu yina beto ke tanga. Diaka, beto lenda lemba nitu sambu beto fwete sala bansoba mingi. Kana yo kele mutindu yina sambu na nge, kulemba ve nitu. Yehowa ta sadisa nge. Beto fwete ndima lusadisu ya Yehowa sambu beto kuma bantu ya ke lemfukaka na Ndinga, kansi ve bawi ya ke vilaka. Ntembe kele ve nde kana beto ke tanga Ndinga ya Nzambi mingi mpi beto ke sadila yo na luzingu na beto, beto ta vanda na kiese mingi.​—Yak. 1:25.