Beto kele ve ti kikuma ya kuyindula nde sambu balongoki yina 70 vandaka ve ntangu Yezu salaka sambu na mbala ya ntete nkinsi ya Madia ya Nkokila ya Mfumu, yo ke tendula nde yandi ndimaka bo ve to nde bo yambulaka yandi. Yezu zolaka kaka kuvanda ti bantumwa na yandi na dibaku yina.

Yandi ndimaka bo yonso, yo vanda bantumwa 12 mpi balongoki yina 70. Yandi ponaka ntete babakala 12 na kati ya balongoki na yandi mingi mpi yandi bingaka bo nde bantumwa. (Luka 6:12-16) Yandi vandaka na Galilea ntangu “yandi bingaka bantumwa 12” mpi “tindaka bo na kusamuna Kimfumu ya Nzambi mpi na kubelula bantu.” (Luka 9:1-6) Na nima na Yudea, yandi “solaka balongoki ya nkaka 70 mpi yandi tindaka bo zole-zole.” (Luka 9:51; 10:1) Yezu vandaka ti balongoki na bisika mingi mpi bo vandaka kulonga nsangu ya me tala yandi.

Bayuda yina kumaka balongoki ya Yezu vandaka kusala nkinsi ya Paki konso mvula. Ntembe kele ve nde bo vandaka kusala yo ti bantu ya mabuta na bo. (Kub. 12:6-11, 17-20) Ntangu lufwa ya Yezu pusanaka, yandi ti bantumwa na yandi kwendaka na Yeruzalemi. Kansi, yandi songaka ve balongoki na yandi ya Yudea, ya Galilea mpi ya Perea na kuvukana bo yonso sambu na kusala nkinsi ya Paki. Yo ke monana nde Yezu vandaka kuzola kaka kuvanda ti bantumwa na dibaku yina. Yandi songaka bo nde: “Mono vandaka ti nzala ya ngolo ya kudia Paki yai ti beno na ntwala nde mono mona mpasi.”—Luka 22:15.

Yandi vandaka ti kikuma ya mbote ya kutuba mutindu yina. Ntama mingi ve yandi zolaka kufwa bonso “Mwana-Dimeme ya Nzambi yina ke katula disumu ya nsi-ntoto.” (Yoa. 1:29) Yo lombaka nde yandi fwa na Yeruzalemi, kisika yina bo vandaka kupesa Nzambi bimenga banda ntama. Mwana-dimeme ya Paki vandaka kuyibusa bantu ya Izraele nde Yehowa basisaka bo na kimpika na Ezipte, kansi kimenga ya Yezu lutaka yo kibeni sambu yo zolaka kukatula bantu yonso na kimpika ya disumu mpi ya lufwa. (1 Bak. 5:7, 8) Kimenga ya Yezu zolaka kusala nde bantumwa 12 kukuma kitini ya fondasio ya dibundu ya Bukristu. (Baef. 2:20-22) Kima ya ke benda dikebi kele nde Yeruzalemi, mbanza ya santu, vandaka ti “matadi 12 ya fondasio” mpi na zulu ya matadi yango bo sonikaka “bazina 12 ya bantumwa 12 ya Mwana-Dimeme.” (Kus. 21:10-14) Yo yina bantumwa yina ya kwikama vandaka ti mukumba ya mfunu ya kulungisa sambu lukanu ya Nzambi kulungana. Yo ke sadisa beto na kubakisa sambu na nki Yezu zolaka kusala nkinsi ya Paki ya nsuka ti bo mpi na mbala mosi, yandi sala sambu na mbala ya ntete nkinsi ya Madia ya Nkokila ya Mfumu ti bo.

Balongoki yina 70 mpi balongoki ya nkaka vandaka ve na nkinsi yina ti Yezu. Kansi balongoki yonso yina bikalaka ya kwikama ta baka mambote ya nkinsi ya Madia ya Nkokila ya Mfumu yina Yezu salaka sambu na mbala ya ntete. Balongoki yonso yina kumaka Bakristu yina bo me tulaka mafuta na nima, kotaka na kuwakana sambu na kimfumu yina Yezu tubilaka ntangu yandi vandaka ti bantumwa na nkokila yina.—Luka 22:29, 30.