1-2. Inki mambu ya mpasi Bambangi ya Yehowa mingi ke kutanaka ti yo?

NTUMWA Polo siamisaka Timoteo mpi Bakristu yonso na kulanda kusala ngolo sambu na kisalu ya kusamuna. (2 Tim. 4:5) Beto yonso fwete sadila ndongisila yai ya ntumwa Polo. Kansi bantangu ya nkaka beto ke kutanaka ti bampasi. Yo ke lombaka kikesa ya mingi sambu na bampangi na beto ya nkaka na kusala kisalu ya kusamuna. (2 Tim. 4:2) Mu mbandu, bampangi yina ke zingaka na bansi yina bamfumu ya luyalu me buyisaka kisalu na beto. Bo ke samunaka ata bo ke zabaka nde bo lenda tula bo na boloko.

² Bansadi ya Yehowa ke kutana ti bampasi mingi yina lenda lembisa bo. Mu mbandu, bampangi mingi ke salaka ngolo sambu na kusansa mabuta na bo. Bo ke vandaka ti mpusa ya ngolo ya kusamuna kansi bo ke vandaka ya kulemba na nsuka ya mposo. Bankaka ke salaka ve mingi na kisalu ya Yehowa sambu bo ke belaka maladi yina ke manaka ve, me kumaka minunu to bo ke basikaka ve na banzo. Bankaka ke yindulaka ntangu yonso nde bo kele mfunu ve na meso ya Yehowa. Mpangi Mary * yina ke zingaka na Moyen-Orient ke tuba nde: “Mono ke salaka bikesa sambu na kukatula mabanza ya mbi yina ke lembisaka mono mingi. Mono ke waka mbi sambu yo ke manisaka mono ngolo mpi yo ke salaka nde mono vanda ve ti ntangu ya kusamuna.”

3. Inki beto ta tubila na disolo yai?

³ Yo vanda beto ke kutana ti mambu ya nki mutindu, Yehowa lenda pesa beto ngolo ya kukanga ntima na mambu ya mpasi yina beto ke kutana ti yo mpi kulanda kusadila yandi na kutadila makuki na beto. Na ntwala nde beto tubila mutindu Yehowa lenda sadisa beto, beto tala mutindu Yehowa pesaka Polo mpi Timoteo ngolo ya kulanda kusamuna ata bo vandaka kukutana ti bampasi mingi.

4. Inki mambu ya mpasi Polo kutanaka ti yo?

⁴ Polo kutanaka ti bampasi mingi. Yandi vandaka ti mfunu ya kikesa mingi-mingi ntangu bo bulaka yandi, bo taka yandi matadi mpi bo tulaka yandi na boloko. (2 Bak. 11:23-25) Polo ndimaka na masonga yonso nde bantangu ya nkaka, yandi vandaka kunwana ti bangindu ya mbi. (Bar. 7:18, 19, 24) Yandi vandaka mpi ti maladi yina vandaka bonso “nsende na nsuni” yina yandi zolaka nde Nzambi kukatula yandi yo.—2 Bak. 12:7, 8.

5. Inki ntumwa Polo salaka ata yandi kutanaka ti mambu ya mpasi mingi?

⁵ Yehowa pesaka Polo ngolo ya kulanda kusamuna ata yandi kutanaka ti mambu ya mpasi. Beto tubila mambu yina Polo salaka. Mu mbandu, ntangu bo kangaka yandi na nzo mosi na Roma, yandi longaka ti kikesa yonso nsangu ya mbote na bantu mingi mpi mbala ya nkaka na bamfumu ya nene. (Bis. 28:17; Bafil. 4:21, 22) Yandi longaka mpi nsangu ya mbote na basoda mingi yina vandaka kutanina ntotila ya Roma mpi na bantu yonso yina vandaka kukwisa sambu na kutala yandi. (Bis. 28:30, 31; Bafil. 1:13) Kaka na ntangu yina, yandi sonikaka mikanda na nsadisa ya mpeve santu; mikanda yina ke sadisa mpi Bakristu ya kieleka bubu yai. Diaka, mbandu ya Polo pesaka Bakristu ya dibundu ya Roma kikesa. Yo sadisaka bo na ‘kumonisa kikesa mingi kibeni sambu na kuzabisa ndinga ya Nzambi kukonda boma.’ (Bafil. 1:14) Ata bantangu ya nkaka Polo salaka ve mambu yonso yina yandi zolaka kusala na kisalu ya Yehowa, yandi salaka yonso yina yandi lendaka kusala mpi yo “salaka nde nsangu ya mbote kukwenda na ntwala.”—Bafil. 1:12.

6. Mutindu 2 Bakorinto 12:9, 10 ke monisa yo, nki sadisaka Polo na kusala mbote kisalu na yandi ya kusamuna?

⁶ Polo bakisaka nde mambu yonso yina yandi salaka na kisalu ya Yehowa vandaka na ngolo ya Nzambi kansi na ngolo na yandi mosi ve. Yandi tubaka nde ngolo ya Nzambi ‘ke kuma ya kukuka ntangu yandi kele ya kulemba.’ (Tanga 2 Bakorinto 12:9, 10.) Na nsadisa ya mpeve santu ya Yehowa, yandi pesaka Polo ngolo ya kusala mbote kisalu na yandi ya kusamuna ata Polo kutanaka ti mbangika, ata bo tulaka yandi na boloko mpi ata yandi kutanaka ti mambu ya nkaka ya mpasi.

7. Yo lombaka nde Timoteo kununga nki bampasi sambu na kusala mbote kisalu na yandi ya kusamuna?

⁷ Timoteo yina vandaka nduku ya kisalu ya Polo tulaka mpi ntima na ngolo ya Nzambi  sambu na kusamuna. Timoteo salaka banzietelo ya nda na kisalu ya kimisionere ti Polo. Polo tindaka yandi mpi na banzietelo ya nkaka sambu na kutala mpi kupesa mabundu kikesa. (1 Bak. 4:17) Mbala ya nkaka Timoteo vandaka kuyindula nde yandi me fwana ve. Yo lenda vandaka kikuma yina pusaka Polo na kusonga yandi nde: “Kubika ve nde muntu kuvweza kileke na nge.” (1 Tim. 4:12) Na bantangu yina Timoteo vandaka ti nsende na nsuni disongidila nde yandi ‘vandaka kubela mbala na mbala.’ (1 Tim. 5:23) Kansi Timoteo zabaka nde mpeve santu ya Yehowa ta pesa yandi ngolo yina yandi vandaka ti yo mfunu sambu na kusamuna nsangu ya mbote mpi kusadisa bampangi.—2 Tim. 1:7.

8. Inki mutindu Yehowa ke pesaka bansadi na yandi kikesa bubu yai?

⁸ Bubu yai, Yehowa ke pesaka bansadi na yandi “ngolo yina me luta ngolo ya bantu” sambu bo landa kusadila yandi na kwikama yonso. (2 Bak. 4:7) Beto tadila mitindu iya yina Yehowa ke sadilaka sambu na kupesa beto kikesa mpi kusadisa beto na kubikala ya kwikama: Kisambu, Biblia, Bakristu ya nkaka mpi kisalu ya kusamuna.

9. Inki mutindu kisambu ke sadisaka beto?

⁹ Yehowa ke pesaka beto ngolo na nsadisa ya kisambu. Na Baefezo 6:18, Polo ke siamisa beto na kusamba Nzambi na “konso dibaku.” Nzambi ta pesa beto kikesa. Mpangi Jonnie na Bolivie monaka mutindu Nzambi sadisaka yandi ntangu yandi kutanaka ti bampasi mingi. Nkento na yandi mpi bibuti na yandi belaka ngolo na mbala mosi. Yandi salaka ngolo sambu na kusansa bo yonso. Mama na yandi fwaka mpi nkento na yandi ti papa na yandi bakaka bantangu mingi na kubeluka. Mpangi Jonnie ke tuba nde: “Ntangu mono vandaka kudiyangisa mingi, Yehowa vandaka kusadisa mono konso ntangu yina mono vandaka kusamba yandi mpi kusonga yandi mambu yonso yina vandaka kuyangisa mono.” Yehowa pesaka mpangi Jonnie ngolo yina yandi vandaka na yo mfunu sambu na kukanga ntima na bampasi yina yandi kutanaka ti yo. Bo songaka mpangi Ronald yina kele nkuluntu na France nde mama na yandi vandaka ti maladi ya kansere. Na nima ya ngonda mosi, yandi fwaka. Inki sadisaka mpangi Ronald na kukanga ntima na diambu yai ya mpasi? Yandi ke tuba nde: “Ntangu mono ke sambaka Yehowa, mono ke songaka yandi mambu yina ke yangisa mono. Mono ke zabaka nde Yehowa ke bakisaka mono mbote kuluta bantu yonso, yo vanda mono mosi.” Bantangu ya nkaka, yo lenda vanda mpasi na kukanga ntima na mambu yina beto ke kutana ti yo mpi beto lenda zaba ve mambu yina beto lenda tuba na kisambu. Kansi Yehowa ke lomba beto na kusamba yandi ata yo kele mpasi na kutendudila yandi mambu yina beto ke kutana ti yo.—Bar. 8:26, 27.

10. Mutindu Baebreo 4:12 ke monisa yo, sambu na nki kutanga Biblia mpi kuyindulula mambu yina beto ke tanga kele mfunu mingi?

¹⁰ Yehowa ke pesaka beto ngolo na nzila ya Biblia. Polo vandaka kutanga Masonuku sambu na kubaka ngolo mpi kikesa, beto mpi fwete sala bonso yandi. (Bar. 15:4) Kana beto ke tanga Biblia mpi ke yindulula mambu yina beto ke tanga, Yehowa lenda sadila mpeve santu na yandi sambu yo sadisa beto na kubakisa mutindu Biblia lenda sadisa beto. (Tanga Baebreo 4:12.) Mpangi Ronald yina beto me katuka kutubila ke tuba nde: “Mono ke pesa Yehowa matondo sambu mono me kumaka ti kikalulu ya kutanga Biblia konso mpimpa. Mono ke yindululaka mingi bikalulu ya mbote ya Yehowa mpi zola yina ke pusaka yandi na kusadila bansadi na yandi mambu. Yo ke pesaka mono kikesa.”

11. Inki mutindu Biblia sadisaka mpangi-nkento mosi?

¹¹ Kana beto ke yindulula mambu yina beto ke  tanga na Biblia, yo ta sadisa beto na kuvanda ti mabanza ya mbote ntangu beto ke kutana ti bampasi. Beto tadila mutindu Biblia sadisaka mufwidi mosi yina vandaka na mpasi mingi. Nkuluntu mosi songaka yandi nde yandi lenda baka malongi mingi na mukanda ya Yobi. Ntangu yandi tangaka yo, ntete yandi pesaka Yobi foti sambu na mabanza ya mbi yina Yobi vandaka na yo. Na mabanza na yandi, yandi songaka Yobi nde: “Yobi, kuyindula ve kaka bampasi na nge.” Kansi na nima yandi bakisaka nde kikalulu na yandi vandaka bonso ya Yobi. Yo sadisaka yandi na kusoba mabanza na yandi mpi yo sadisaka yandi na kukanga ntima na bampasi yina yandi kutanaka ti yo ntangu bakala na yandi fwaka.

12. Inki mutindu Yehowa ke pesaka beto ngolo na nzila bampangi-Bakristu?

¹² Yehowa ke pesaka beto ngolo ntangu beto ke vukanaka ti bampangi na beto Bakristu. Polo sonikaka nde yandi vandaka ti mfunu ya ‘kupesana kikesa’ ti bampangi na yandi ya kimpeve. (Bar. 1:11, 12) Mpangi Mary yina beto me tubila ke zolaka kuvanda ti bampangi. Yandi ke tuba nde: “Yehowa sadilaka bampangi yina zabaka ve bampasi yina mono vandaka kukutana ti yo. Bo tubilaka mono mambu yina pesaka mono kikesa mpi bo tindilaka mono mikanda, yo vandaka kibeni mambu yina mono vandaka ti yo mfunu. Yo sadisaka mono na kusolula mpi ti bampangi-bankento yina kutanaka ti mambu ya mutindu mosi ti mono mpi na kuzaba mambu yina bo salaka. Bankuluntu ke songaka mono ntangu yonso nde mono kele mfunu mingi na dibundu.”

13. Inki mutindu beto lenda pesana kikesa na balukutakanu?

¹³ Balukutakanu kele mpi kisika ya nkaka ya kuluta mbote yina beto lenda pesana kikesa. Ntangu nge ke kwenda na balukutakanu, nge lenda pesa bampangi ya nkaka kikesa ntangu nge ke songa bo nde nge ke zolaka bo mpi ntangu nge ke monisila bo ntonda sambu na mambu yina bo ke sala. Mu mbandu, kilumbu mosi mpangi Peter yina kele nkuluntu songaka mpangi-nkento mosi yina bakala na yandi kele ve Mbangi ya Yehowa nde: “Yo ke pesaka mono kikesa mingi ntangu mono ke monaka nge na balukutakanu. Nge ke kwisaka ntangu yonso na balukutakanu ti bana na nge sambanu mpi nge ke yidikaka mbote bakomantere.” Mpangi-nkento yina pesaka matondo mpi tubaka nde: “Mono vandaka kibeni ti mfunu ya kuwa mambu ya mutindu yina kilumbu yina.”

14. Inki mutindu kisalu ya kusamuna ke sadisaka beto?

¹⁴ Yehowa ke pesaka beto ngolo na nzila ya kisalu ya kusamuna. Beto ke waka mbote ntangu beto ke longaka bantu ya nkaka ata bo ke ndima nsangu na beto to ve. (Bing. 11:25) Mpangi-nkento Stacy bakaka mpi kikesa na kisalu ya kusamuna. Ntangu muntu mosi ya dibuta na bo basikaka na dibundu, yandi kudiyangisaka mingi mpi yandi vandaka kudiyula nde: ‘Keti yo lombaka nde mono sadisa yandi?’ Yo vandaka mpasi sambu yandi ndima diambu yango. Inki sadisaka yandi na kununga diambu yango? Kisalu ya kusamuna. Ntangu yandi vandaka kusamuna, yandi vandaka kuyindula mingi bantu ya teritware yina vandaka ti mfunu ya lusadisu na yandi. Yandi ke tuba nde: “Kaka na ntangu yina, Yehowa pesaka mono longoki ya Biblia yina vandaka kuyela mbote. Yo pesaka mono kikesa mingi. Kisalu ya kusamuna sadisaka mono mingi.”

15. Inki dilongi nge me baka na mambu yina mpangi Mary tubaka?

¹⁵ Sambu na mambu ya nkaka ya luzingu, bampangi ya nkaka lenda yindula nde bo ta kuka ve kusamuna mingi. Kana nge ke yindulaka mpi mutindu yina, kuvila ve nde Yehowa ke sepelaka ti bikesa yina nge ke salaka. Beto tadila diaka mbandu ya mpangi Mary. Ntangu yandi kwendaka kusamuna na kisika yina bantu ke tubaka ndinga ya nkaka, yandi kudimonaka mfunu ve. Yandi ke tuba nde: “Bantangu ya nkaka na kisalu ya kusamuna, mono vandaka kupesa komantere  ya nkufi to kutanga verse mosi ya Biblia to kupesa muntu trakiti.” Yandi vandaka kuyindula nde yandi vandaka kusamuna mbote ve ntangu yandi vandaka kudifwanisa ti bantu yina ke tubaka mbote ndinga yina. Kansi yandi sobaka mabanza na yandi. Yandi yantikaka kubakisa nde Yehowa lendaka kusadila yandi ata yandi vandaka kutuba mbote ve ndinga yina. Yandi ke tuba nde: “Mambu yina Biblia ke longaka kele pete mpi yo ke sobaka luzingu ya bantu.”

16. Inki lenda sadisa bampangi yina kele ya kukangama na banzo na kubaka kikesa?

¹⁶ Yehowa ke monaka mpi ke sepelaka ti nzala yina beto ke vandaka ti yo ya kusamuna ata beto me kangama na banzo. Yandi lenda pesa beto mabaku ya kuta kimbangi na bantu yina ke sansa beto to na minganga. Beto lenda lemba nitu kana beto ke fwanisa kisalu ya beto ke sala bilumbu yai ti yina beto salaka bilumbu me luta. Kana beto ke bakisa mutindu Yehowa ke sadisa beto bubu yai, yo ta pesa beto ngolo yina beto kele ti yo mfunu sambu beto kanga ntima na kiese yonso na mambu yina beto ke kutana ti yo.

17. Mutindu Longi 11:6 ke monisa yo, sambu na nki beto fwete landa kusamuna ata beto ke mona ve mbala mosi mambote ya kisalu na beto?

¹⁷ Beto ke zabaka ve nki nkeni ya kieleka yina beto ke kuna ta mena mpi ta yela. (Tanga Longi 11:6.) Mu mbandu mpangi Barbara yina kele ti bamvula 80 ke samunaka mbala na mbala na telefone mpi na nzila ya mikanda. Na mukanda mosi, yandi tulaka Nzozulu ya Nkengi ya Marsi 1, 2014 yina vandaka ti disolo, “Mambu Yina Nzambi Me Salaka Sambu na Nge.” Yandi zabaka ve nde yandi tindaka mukanda yina na bakala mosi ti nkento na yandi yina vandaka diaka ve Bambangi ya Yehowa. Bo tangaka zulunalu yina mbala na mbala. Bakala yina monaka bonso nde Yehowa vandaka kutubila yandi. Na nima bamvula kuluta 27, bakala yina ti nkento na yandi vutukaka na dibundu. Mpangi Barbara bakaka kikesa mpi ngolo ntangu yandi monaka mambote ya mukanda yina yandi sonikaka.

18. Inki beto fwete sala sambu Nzambi kupesa beto ngolo?

¹⁸ Yehowa ke pesaka beto mabaku mingi ya kubaka ngolo na yandi. Yehowa me pesaka beto bima mingi yina lenda pesa beto kikesa. Mu mbandu, kisambu, Biblia, kimvuka ya Bampangi mpi kisalu ya kusamuna. Kana beto ke sadila bima yai, yo ta monisa Yehowa nde beto ke tulaka ntima nde yandi ta sadisa beto mpi yandi ke vandaka ti nzala ya kusadisa beto. Yo yina beto fwete tula ntima ntangu yonso na Tata na beto ya zulu yina ke vandaka ti kiese ya “kusonga ngolo na yandi sambu na bantu yina ntima na bo kele ya mvimba na yandi.”—2 Bans. 16:9.