DISOLO YA KULONGUKA 39
Kana Muntu Yina Beto Ke Zolaka Me Yambula Kusadila Yehowa
“Mbala mingi bo . . . pesaka yandi mpasi na ntima.”—NK. 78:40.
NKUNGA 102 ‘Sadisa Bayina Me Lemba’
MAMBU YINA DISOLO YAI KE TUBILA *
1. Inki mutindu bantu ya nkaka ke waka kana bo me basisa muntu yina bo ke zolaka na dibundu?
KETI bo me basisa muntu yina nge ke zolaka na dibundu? Yo ke salaka mpasi mingi na ntima. Mpangi Hilda ke tuba nde: “Ntangu bakala na mono fwaka na nima ya bamvula 41 ya makwela, mono waka mpasi yina mono me waka ntete ve. * Kansi ntangu bo basisaka mwana na mono na dibundu, mpi ntangu yandi yambulaka nkento na yandi ti bana na yandi, mono waka mpasi ya ngolo kuluta.”
Yehowa ke zabaka mbote mpasi yina beto ke waka kana muntu yina beto ke zolaka mingi me yambula kusadila yandi (Tala baparagrafe 2-3) *
2-3. Mutindu Nkunga 78:40, 41 ke monisa yo, nki mutindu Yehowa ke waka kana bansadi na yandi me yambula kusadila yandi?
2 Yehowa waka mpasi mingi na ntima ntangu bawanzio ya nkaka yambulaka kusadila yandi. (Yude 6) Yandi waka mpi mpasi mingi ntangu bantu ya Izraele yina yandi vandaka kuzola vandaka kulemfukila yandi ve mbala na mbala. (Tanga Nkunga 78:40, 41.) Zaba nde Tata na beto ya zulu ke waka mpi mpasi kana muntu yina nge ke zolaka me yambula kusadila yandi. Yandi ke zaba mbote mpasi yina nge ke wa. Yandi ta pesa nge ngolo mpi lusadisu ya me fwana.
3 Na disolo yai, beto ta mona mambu yina beto lenda sala sambu Yehowa kusadisa beto ntangu muntu yina beto ke zolaka me yambula kusadila yandi. Beto ta mona mpi mutindu beto lenda sadisa bampangi ya nkaka na dibundu yina ke kutana mpi ti diambu yina. Kansi beto tadila ntete bangindu ya mbi yina beto fwete vanda ve ti yo.
KUDIPESA VE FOTI
4. Inki mutindu bibuti mingi ke waka kana mwana na bo me yambula kusadila Yehowa?
4 Mbala mingi kana mwana mosi me yambula kusadila Yehowa, bibuti na yandi ke yindulaka nde yo lombaka nde bo sala diaka ngolo sambu na kusadisa mwana na bo na kulanda kusadila Yehowa. Ntangu bo basisaka mwana ya mpangi Luke na dibundu, mpangi Luke tubaka nde: “Mono kudipesaka foti. Mono kumaka nkutu kulala bandosi ya mbi. Bantangu ya nkaka mono vandaka kudila mpi mono vandaka kuwa ntima mpasi.” Mpangi Elizabeth yina kutanaka mpi ti diambu ya mutindu mosi tubaka nde: “Mbala ya nkaka mono salaka bifu mingi. Mono yindulaka nde mono longaka ve mwana na mono kieleka mbote.”
5. Kana muntu me yambula kusadila Yehowa, foti kele ya nani?
5 Beto fwete vila ve nde Yehowa me pesaka konso muntu nswa ya kupona. Yo ke tendula nde beto lenda pona kana beto ta lemfukila yandi to ve. Bana ya nkaka, bibuti na bo pesaka bo ve mbandu ya mbote kansi bo me bakaka lukanu ya kusadila Yehowa mpi ya kukangama kaka na yandi. Bankaka, bibuti na bo salaka ngolo sambu na kulonga bo na kuzola Yehowa. Kansi ntangu bo kumaka bambuta, bo me yambulaka kusadila Yehowa. Konso muntu fwete pona kana yandi ta sadila Yehowa to ve. (Yoz. 24:15) Yo yina bibuti yina ke wa mpasi sambu mwana na bo me yambula kusadila Yehowa fwete kudipesa ve foti.
6. Inki mutindu mwana lenda wa kana papa to mama na yandi me yambula kusadila Yehowa?
6 Yo lenda salama mpi nde papa to mama kuyambula kusadila Yehowa mpi kuyambula nkutu dibuta na yandi. (Nk. 27:10) Yo lenda vanda mpasi mingi sambu na bana yina ke zitisaka bibuti na bo mpi ke zolaka bo. Bo basisaka papa ya Esther na dibundu mpi yandi ke tuba nde: “Mono vandaka kudila mbala na mbala sambu mono bakisaka nde papa sukaka ve kaka na kuyambula kieleka. Yandi bakaka lukanu na luzolo yonso nde yandi ta sadila diaka ve Yehowa na luzingu na yandi. Mono ke zolaka papa yo yina ntangu bo basisaka yandi na dibundu, mono vandaka kudiyangisa mbala na mbala sambu na sante na yandi. Yo vandaka kupesa mono mpasi mingi mpi mono kumaka kubwa mpi mono vandaka kudizaba ve.”
7. Inki mutindu Yehowa ke waka kana bo me basisa papa to mama ya leke mosi na dibundu?
7 Baleke, kana bo me basisa papa to mama na beno na dibundu, beto ke kabisa mpasi yina ti beno. Beno ndima mpi nde Yehowa ke zaba mbote mpasi ya ngolo yina beno ke wa. Yandi ke zolaka beno mpi yandi kele na kiese mpila beno ke landa kusadila yandi na mutindu ya mbote. Beto mpi bampangi na beno na dibundu kele na kiese. Beno vila mpi ve nde beno ve bantu fwete bakila bibuti na beno balukanu. Mutindu beto me mona yo, Yehowa me pesaka konso muntu nswa ya kupona kana yandi ta sadila yandi to ve. Konso muntu yina me bakaka mbotika fwete “nata kilo na yandi mosi.”—Bag. 6:5.
8. Inki bantu ya dibuta lenda sala ntangu bo ke vingila nde muntu yina bo ke zolaka kuvutukila Yehowa? (Tala mpi lupangu “ Vutuka na Yehowa.”)
8 Kana muntu ya nge ke zolaka me yambula kusadila Yehowa, nge lenda landa kuvanda ti kivuvu nde kilumbu kele yandi ta vutukila Yehowa. Inki nge lenda sala ntangu nge ke vingila nde yandi vutukila Yehowa? Sala yonso sambu na kulanda kukumisa lukwikilu na nge ngolo. Kana nge sala mutindu yina, nge ta pesa bantu ya nkaka ya dibuta mbandu ya mbote mpi nkutu nge lenda vanda mbandu ya mbote sambu na muntu yina bo me basisa na dibundu. Yo ta pesa nge ngolo ya kukanga ntima na mpasi yina nge ke wa. Beto tadila mambu yina nge lenda sala sambu na kulanda kukumisa lukwikilu na nge ngolo.
MAMBU YA NGE LENDA SALA SAMBU NA KULANDA KUKUMISA LUKWIKILU NA NGE NGOLO
9. Inki nge lenda sala sambu na kukumisa lukwikilu na nge ngolo? (Tala mpi lupangu, “ Baverse Yina Ta Pesa Nge Kikesa Kana Muntu Yina Nge Ke Zolaka Me Yambula Kusadila Yehowa.”)
9 Sala yonso sambu na kulanda kusala mambu ya kimpeve. Yo kele mfunu mingi nde nge landa kukumisa lukwikilu na nge ti ya bantu ya dibuta na beno ngolo. Inki mutindu nge lenda sala yo? Tanga Ndinga ya Nzambi konso kilumbu, yindula mingi mambu yina nge ke tanga mpi kwendaka mbala na mbala na balukutakanu sambu Yehowa kupesa nge ngolo. Papa ya Joanna ti yaya na yandi ya nkento yambulaka kieleka. Yandi ke tuba nde: “Mono ke waka mbote ntangu mono ke tangaka masolo ya bantu yai ya Biblia ke tubilaka: Abigaile, Estere, Yobi, Yozefi mpi Yezu. Bambandu na bo ke pesaka mono kikesa mpi yo ke sadisaka mono na kuvanda ti bangindu ya mbote. Bankunga ya nkaka yina bo ke yimbaka na dibundu ya Yehowa ke pesaka mono mpi kikesa mingi.”
10. Inki mutindu Nkunga 32:6-8 ke sadisa beto na kukanga ntima na mpasi yina beto ke wa?
10 Songa Yehowa mambu yonso yina ke yangisa nge. Kana nge ke wa mpasi, landa kusamba Yehowa. Lomba Nzambi na beto ya zola na kusadisa nge na kutadila mambu mutindu yandi ke tadilaka yo mpi lomba yandi na ‘kupesa nge mayele ya kubakisa mambu mbote-mbote mpi na kulonga nge nzila yina nge fwete kwenda.’ (Tanga Nkunga 32:6-8.) Ya kieleka, yo lenda vanda mpasi mingi na kusonga Yehowa mutindu nge ke wa kibeni. Kansi Yehowa ke zaba mbote mpasi yina nge ke wa na ntima. Yandi ke zolaka nge mingi mpi yandi ke lomba nge na kusonga yandi mambu yonso yina ke yangisa nge.—Kub. 34:6; Nk. 62:7, 8.
11. Mutindu Baebreo 12:11 ke monisa yo, sambu na nki beto fwete tula ntima na disipline ya Yehowa? (Tala mpi lupangu “ Kubasisa Muntu na Dibundu Ke Monisaka nde Yehowa Ke Zolaka Beto.”)
11 Ndima lukanu yina bankuluntu me baka. Yehowa ke zolaka nde bo basisa muntu yina me sala disumu mpi me balula ve ntima na dibundu. Yo ke sadisaka muntu yina me sala mbi mpi bantu ya nkaka. (Tanga Baebreo 12:11.) Bampangi ya nkaka na dibundu lenda tuba nde, bankuluntu bakaka ve lukanu ya mbote ya kubasisa muntu na dibundu. Kansi kuvila ve nde, mbala mingi bampangi yina ke tubaka mutindu yina ke zolaka ve kutuba mambu ya mbi ya muntu yina salaka disumu salaka. Beto ke zabaka ve mambu yonso. Yo yina, tula ntima nde bankuluntu yina sambisaka muntu yina salaka mbi salaka yonso sambu na kusadila mambu yina Biblia ke tubaka sambu na diambu yina mpi bo sambisaka “sambu na Yehowa.”—2 Bans. 19:6.
12. Inki mambote bampangi ya nkaka me bakaka sambu bo ndimaka lukanu ya bankuluntu ya kubasisa muntu yina bo vandaka kuzola na dibundu?
12 Kana nge ndima lukanu yina bankuluntu bakaka ya kubasisa muntu yina nge ke zolaka na dibundu, nge lenda sadisa yandi na kuvutukila Yehowa. Mpangi Elizabeth yina beto me tubila ke tuba nde: “Yo vandaka mpasi mingi sambu beto solula ve ata fioti ti mwana na beto ya mbuta yina bo basisaka na dibundu. Kansi ntangu yandi vutukaka na dibundu, yandi tubaka nde yo vandaka mbote mutindu bo basisaka yandi na dibundu.” Na nima yandi tubaka nde yandi bakaka malongi mingi ya mbote. Mpangi Elizabeth ke tuba diaka nde: “Yo ke sadisaka mono na kubakisa nde disipline ya Yehowa ke vandaka mbote ntangu yonso.” Bakala na yandi Mark ke tuba nde: “Bamvula mingi na nima, mwana na beto songaka mono nde, mutindu beto vandaka ve kusolula ti yandi ata fioti vandaka na kati ya mambu yina salaka nde yandi vutuka na Yehowa. Mono me sepela mingi mutindu Yehowa sadisaka beto na kulemfukila yandi.”
13. Inki lenda sadisa nge na kukanga ntima na mpasi yina nge ke wa?
13 Solula ti banduku yina ke bakisa mpasi yina nge ke wa. Lutisa ntangu ti bampangi ya kuyela na kimpeve sambu bo sadisa nge na kuvanda ti bangindu ya mbote. (Bing. 12:25; 17:17) Joanna yina beto me tubila ke tuba nde: “Mono vandaka kudiwa mono mosi. Kansi ntangu mono solulaka ti banduku yina mono ke tudilaka ntima, bo sadisaka mono mingi na kukanga ntima na mpasi yina.” Kansi, nki nge ta sala kana bampangi ya nkaka na dibundu ke tuba mambu yina ke sala nge mpasi?
14. Sambu na nki beto fwete ‘landa kukanga-ntima na mambu ya bantu ya nkaka mpi kulanda kulolulana na ntima ya mvimba’?
14 Vanda ntima-nda ti bampangi. Ya kieleka, beto fwete vingila ve nde bantu yonso kutuba mambu ya mbote ntangu yonso. (Yak. 3:2) Beto yonso kele bantu ya kukonda kukuka. Yo yina, kuyituka ve kana bampangi ya nkaka ke zaba ve mambu yina bo lenda tuba to bo ke tuba mambu yina ke pesa nge mpasi kukonda kuzaba. Kuvila ve ndongisila yai ya ntumwa Polo pesaka: “Beno landa kukanga-ntima na mambu ya bantu ya nkaka mpi beno landa kulolulana na ntima ya mvimba ata muntu mosi kele na makambu ti muntu ya nkaka.” (Bakol. 3:13) Bo basisaka muntu ya dibuta ya mpangi-nkento mosi na dibundu. Yandi ke tuba nde: “Yehowa sadisaka mono na kulolula bampangi yina kwisaka kupesa mono kikesa kansi bo vandaka kutuba mambu yina pesaka mono mpasi.” Inki bampangi ya dibundu lenda sala sambu na kusadisa bantu ya dibuta ya muntu yina bo me basisa na dibundu?
BAMPANGI YA DIBUNDU LENDA SADISA
15. Inki lenda sadisa bantu ya dibuta ya muntu yina bo me basisa na dibundu?
15 Sadila bantu ya dibuta ya muntu yina bo me basisa na dibundu mambu ya mbote. Mpangi Miriam ke ndima nde, yandi vandaka kukuka ve kukwenda na balukutakanu ntangu bo basisaka leke na yandi ya bakala na dibundu. Yandi ke tuba nde: “Mono vandaka kuwa boma ya mambu yina bantu ta tuba. Kansi mono vandaka ti banduku ya mbote yina kabisaka mpasi ti mono mpi bo vandaka kutuba ve mambu ya mbi sambu na mpangi na mono yina bo basisaka na dibundu. Bo sadisaka mono na kudiwa ve mono mosi na mpasi yina mono vandaka kuwa.” Mpangi-nkento ya nkaka ke tuba nde: “Ntangu bo basisaka mwana na beto na dibundu, banduku kwisaka kupesa beto kikesa. Bampangi ya nkaka songaka beto nde bo vandaka kuzaba ve mambu ya kutuba. Bankaka dilaka ti mono mpi bankaka diaka tindilaka mono mikanda ya ke pesa kikesa. Mambu yina bo salaka sadisaka mono mingi kibeni.”
16. Inki mutindu bampangi ya dibundu lenda landa kusadisa bantu ya dibuta ya muntu yina bo me basisa na dibundu?
16 Landa kusadisa bantu ya dibuta ya muntu yina bo me basisa na dibundu. Bo kele ti mfunu nde nge zola bo mpi nde nge pesa bo kikesa mingi. (Baeb. 10:24, 25) Bantangu ya nkaka, bantu ya dibuta ya muntu yina bo me basisa na dibundu lenda mona nde bampangi ya nkaka ke solula diaka ve ti bo bonso nde bo mpi, bo me basisa bo na dibundu. Beto fwete sala ve nde bo yindula mutindu yina. Beto fwete sikisa baleke yina bibuti na bo me yambula kusadila Yehowa mpi beto fwete pesa bo kikesa. Bo basisaka bakala ya mpangi Maria na dibundu mpi bakala yango yambulaka dibuta na bo. Yandi ke tuba nde: “Bampangi ya nkaka vandaka kukwisa na nzo na mono, bo vandaka kulambila beto madia mpi bo vandaka kusadisa mono na kulonguka Biblia ti bana na mono. Bo vandaka kuwa mpasi yina mono vandaka kuwa mpi bo vandaka kudila ti mono. Bo vandaka kukotila mono ntangu bantu vandaka kutuba mambu ya luvunu sambu na mono. Bo pesaka mono kikesa mingi.”—Bar. 12:13, 15.
Bampangi ya dibundu lenda sadisa bantu ya dibuta ya muntu yina bo me basisa na dibundu mpi kumonisila bo zola (Tala paragrafe 17) *
17. Inki bankuluntu fwete sala sambu na kusadisa bantu ya dibuta ya muntu yina bo me basisa na dibundu?
17 Bankuluntu, beno pesa bantu ya dibuta ya muntu yina bo me basisa na dibundu kikesa. Beno kele ti mukumba ya nene ya kusadisa bantu ya dibuta ya muntu yina bo vandaka kuzola, yina me yambula kusadila Yehowa. (1 Bate. 5:14) Beno pesa bo kikesa na ntwala ya balukutakanu mpi na nima ya balukutakanu. Beno kwenda kutala bo mbala na mbala mpi beno samba ti bo. Beno longa nsangu ya mbote ti bo mpi bantangu ya nkaka beno bingisa bo na lusambu na beno ya dibuta. Bankuluntu fwete sadisa mameme yina ke niokwama, bo fwete wila bo mawa mpi bo fwete zola bo.—1 Bate. 2:7, 8.
LANDA KUVANDA TI KIVUVU MPI LANDA KUTUDILA YEHOWA NTIMA
18. Mutindu 2 Piere 3:9 ke monisa yo, nki Nzambi ke zola sambu na bantu yina me yambula kusadila yandi?
18 Yehowa “ke zola ve nde ata muntu mosi kufwa, kansi yandi ke zola nde bantu yonso kubalula ntima.” (Tanga 2 Piere 3:9.) Ata muntu me sala disumu ya nene, luzingu na yandi kele kaka mfunu na meso ya Nzambi. Kuvila ve nde Yehowa me futaka ntalu mingi, disongidila luzingu ya Mwana na yandi yina yandi ke zolaka mingi sambu na beto. Na zola yonso, Yehowa ke sosaka kusadisa bantu yina me yambula kusadila yandi sambu bo vutukila yandi. Yandi ke ndima nde bo ta vutukila yandi mutindu mbandu yina Yezu pesaka ya me tala mwana yina vilaka ke monisa yo. (Luka 15:11-32) Bantu mingi yina me yambulaka kieleka me vutukilaka Tata na beto ya zola yina kele na zulu. Bampangi na dibundu yambaka bo na kiese yonso. Mpangi Elizabeth yina beto me tubila waka kiese mingi ntangu mwana na yandi vutukaka na dibundu. Yandi ke tuba nde: “Mono kele na kiese mingi mutindu bampangi pesaka beto kikesa mpi sadisaka beto na kundima nde mwana na beto ta vutukila Yehowa.”
19. Sambu na nki beto fwete landa kutudila Yehowa ntima?
19 Beto fwete tudila Yehowa ntima ntangu yonso. Bandongisila na yandi ke sadisaka beto ntangu yonso. Yandi kele Tata yina ke kabaka, yandi ke wilaka bantu mawa mpi yandi ke zolaka bantu yonso yina ke zolaka yandi mpi ke sambilaka yandi. Ndima nde Yehowa ta yambula nge ve na bantangu ya mpasi. (Baeb. 13:5, 6) Mpangi Mark yina beto me tubila ke tuba nde: “Yehowa yambulaka beto ve ata fioti. Yandi ke sadisaka beto ntangu yonso yina beto ke kutanaka ti bampasi.” Yehowa ta landa kupesa nge “ngolo yina me luta ngolo ya bantu.” (2 Bak. 4:7) Ya kieleka, nge lenda landa kukangama na Yehowa mpi kuvanda ti kivuvu ata kana muntu yina nge ke zolaka me yambula kusadila Yehowa.
NKUNGA 44 Kisambu ya Nsukami
^ par. 5 Kana muntu yina beto ke zolaka me yambula kusadila Yehowa, yo ke pesaka mpasi mingi kibeni. Na disolo yai, beto ta mona mutindu Yehowa ke waka kana muntu mosi me yambula kusadila yandi. Beto ta mona mambu yina bantu ya dibuta ya muntu yina me basika na dibundu lenda sala sambu na kubaka kikesa mpi sambu na kulanda kukangama na Yehowa. Disolo yai ta tubila mpi mutindu bampangi yonso na dibundu lenda pesa bantu ya dibuta yina kikesa mpi kusadisa bo.
^ par. 1 Beto me soba bazina na disolo yai.
