Ya kieleka, Yehowa ke zolaka nde bantu yina ke kwelana kuzinga na kiese mpi kuvanda ti kinduku ya ngolo yina ta wumela. (Mat. 19:4-6) Kana nge ke zola kukwela, nki mutindu nge lenda zwa nkwelani ya mbote? Yehowa muntu gangaka beto mpi yandi me zaba mambu yina beto fwete sala sambu na kuvanda ti makwela ya kiese. Yo yina kana nge sadila minsiku yina yandi me pesaka beto, nge ta vanda kibeni na kiese. Beto tadila minsiku yango.

Ntete beto fwete zaba nde: “Ntima kele luvunu kuluta konso kima ya nkaka mpi yo kele mbi kibeni.” (Yer. 17:9) Kana bantu zole me kutana, bo me zolana mpi bo me yantika kutalana sambu na makwela, bo lenda yedisa nswalu zola ya ngolo. Kana yo me salama mutindu yina, yo ke kumaka mpasi sambu bo baka balukanu ya mbote. Kana bantu ke baka lukanu ya kukwelana kaka sambu na mutindu bo ke kudiwa, mambu lenda sukila bo mbi. (Bing. 28:26) Yo yina, yo kele mbi kana bantu yina ke zola kukwelana me yedisa zola ya ngolo na mbala mosi, ntangu bo me kutana to me wakana mambu ya nkaka na ntwala nde bo zabana kibeni mbote-mbote.

Mukanda ya Bingana 22:3 ke tuba nde: “Muntu ya mayele ke monaka kigonsa mpi ke bumbanaka, kansi bantu yina me konda mayele ke kwendaka kaka na ntwala mpi bo ke kutanaka ti bampasi.” Inki kele kigonsa ya kusosa nkwelani na Internet? Diambu ya mawa kele nde, bantu ya nkaka me kutanaka ti bantu yina bo me zaba ve na Internet. Bo zolanaka mpi bo yantikaka kutalana sambu na makwela. Kansi na nima bo bakisaka nde muntu yina bo vandaka kutalana ti yandi sambu na makwela, kusaka bo. Diaka, bantu ya luvunu ke kangulaka ba compte ya luvunu na Internet sambu na kukusa bantu yina ke ndimaka mambu yonso mpi kuyiba bo mbongo. Bantangu ya nkaka, bantu yina ya luvunu ke tubaka nde bo kele Bambangi ya Yehowa.

Beto tadila kigonsa ya nkaka. Basite ya nkaka ya Internet yina ke vukisaka bantu sambu na makwela, ke sadilaka programe mosi ya ordinatere sambu na kutala kana muntu mosi buna ti muntu ya nkaka me fwana bo zole sambu na makwela. Kansi ata diambu mosi ve ke monisa nde kusala mutindu yai ke simbaka kibeni. Yo kele ve mbote na kutula ntima na programe ya ordinatere yina muntu me sala sambu na kubaka lukanu ya mfunu, mu mbandu lukanu ya makwela. Beto fwete fwanisa ve ata fioti baprograme ya ordinatere ti minsiku ya Biblia.—Bing. 1:7; 3:5-7.

Munsiku ya kele na Bingana 14:15 ke tuba nde: “Muntu ya kukonda mayele ke ndimaka mambu yonso, kansi muntu ya mayele ke tadilaka konso kitambi  na yandi.” Na ntwala ya kutuba nde muntu yina nge ke zola kukwelana ti yandi ta vanda nkwelani ya mbote to ve, nge fwete zaba yandi mbote. Kansi yo kele mpasi na kuzaba muntu mbote na nzila ya Internet. Kana beno ke tindilana bafoto ti muntu mpi ke solula mingi na Internet, keti nge lenda tuba kibeni nde nge me zaba yandi? Bantu ya nkaka yina yindulaka nde bo zwaka bantu ya mbote ya kukwelana ti bo waka mpasi mingi na nima ntangu bo kutanaka ti bantu yango.

Muyimbi-bankunga tubaka nde: “Mono ke taka ve kinduku ti bantu ya luvunu, mpi mono ke buyaka bantu yina ke bumbaka kimuntu na bo.” (Nk. 26:4) Bantu mingi ke yindulaka nde yo kele ve mbi na kutula ba compte ya luvunu na Internet sambu bo monana bantu ya mbote. Bo lenda bumba bikalulu na bo ya mbi to bikalulu na bo ya mbi lenda monana ve ntangu bo ke solula ti bantu na Internet. Yo kele mfunu na kupesa bamvutu na bangiufula yai: Ata bantu ya nkaka lenda tuba na Internet nde bo kele Bambangi ya Yehowa, keti bo me bakaka kibeni mbotika? Keti bo kele ya kuyela na kimpeve? Keti bo kele ti kinduku ya mbote ti Yehowa? Keti bampangi ke zitisaka bo na dibundu? Keti bo kele bambandu ya mbi to “banduku ya mbi”? (1 Bak. 15:33; 2 Tim. 2:20, 21) Keti minsiku ya Biblia ke pesa bo nswa ya kukwela? Yo kele mfunu nde nge tadila mambu yai, kansi yo kele mpasi na kuzaba yo kana nge solula ve ti Bambangi ya Yehowa ya nkaka yina me zaba muntu yina mbote. (Bing. 15:22) Ya kieleka, Mbangi ya Yehowa yina kele kwikama lenda kwelana ve ti muntu yina kele ve Mbangi ya Yehowa mpi ‘kuvukana’ ti muntu yina ke kwikilaka ve.—2 Bak. 6:14; 1 Bak. 7:39.

Kusosa nkwelani na Internet kele kigonsa. Kansi kele ti mutindu ya mbote yina lenda sadisa nge na kuzwa nkwelani, ya kuzabana ti yandi, sambu na kuvanda ti makwela ya kiese. Na wapi nge lenda zwa muntu ya mbote yina nge lenda kwelana ti yandi? Kana bo me buya ve nde bantu mingi kuvukana kisika mosi, Bambangi ya Yehowa ke zabanaka ti Bambangi ya Yehowa ya nkaka ntangu bo ke vukanaka na balukutakanu ya dibundu, na balukutakanu ya nene, na balukutakanu ya diskrike mpi na balukutakanu ya nkaka.

Kana bo me buya nde bantu mingi kuvukana kisika mosi, mu mbandu na nsungi ya maladi ya Coronavirus, beto ke sadila baapareyi mpi application Zoom sambu na kusala balukutakanu ya dibundu mpi yo kele kisika yina beto lenda kutana ti Bambangi ya Yehowa ya nkaka yina me kwelaka ve. Nge ta mona mutindu bo ke salaka masolo na balukutakanu mpi nge ta wa mutindu bo ke monisaka lukwikilu na bo ntangu bo ke pesaka bamvutu mpi bakomantere. (1 Tim. 6:11, 12) Nge lenda solula ti bo na nima ya balukutakanu ntangu bo ke kabisaka bantu na bimvuka sambu bo solula kana dibundu na beno ke sadilaka application Zoom. Na nzila ya balukutakanu yai ya ke salama na nzila ya Internet, nge lenda mona mutindu mpangi yina nge ke sepela ti yandi ke solula ti bantu ya nkaka mpi yo lenda sadisa nge na kuzaba kimuntu na yandi ya kieleka. (1 Pie. 3:4) Ntangu nge ta zaba yandi mbote, yo ta sadisa nge na kubakisa kana beno zole kele ti balukanu ya mutindu mosi to ke sepelaka ti mambu ya mutindu mosi mpi yo ta sadisa nge na kuzaba kana beno zole me fwana na kukwelana.

Kana mpangi yina me kwelaka ntete ve ke sosa nkwelani na kuwakana ti minsiku ya Biblia, ntembe kele ve nde yandi ta vanda ti makwela ya kiese mpi yandi ta mona kulungana ya kingana yai ya ke tuba nde: “Muntu yina me zwa nkento ya mbote [to bakala ya mbote], yandi me zwa kima mosi ya mbote, mpi Yehowa ke ndimaka yandi.”—Bing. 18:22.