1. Inki Yehowa me sadilaka nge?

INKI mutindu nge kumaka Mbangi ya Yehowa? Mbala ya nkaka nge waka “nsangu ya mbote” na bibuti na nge, na nduku na nge ya kisalu to ya nzo-nkanda to na nzila ya mpangi mosi yina vandaka kusamuna nzo na nzo. (Mar. 13:10) Na nima, mpangi mosi yantikaka kulonguka Biblia ti nge. Ntangu nge yantikaka kulonguka, nge kumaka kuzola Yehowa mpi nge bakisaka nde Yehowa ke zolaka nge. Yehowa sadisaka nge na kuzaba kieleka, nge me kumaka longoki ya Yezu Kristu mpi nge kele ti kivuvu ya kuzinga mvula na mvula. (Yoa. 6:44) Ntembe kele ve nde nge ke pesaka Yehowa mersi sambu yandi sadilaka mpangi mosi sambu na kulonga nge kieleka mpi yandi ndimaka nde nge kuma nsadi na yandi.

2. Inki beto ta longuka na disolo yai?

² Mutindu beto me zaba kieleka, beto kele ti dibaku ya kusadisa bantu ya nkaka na kukwisa kukuta beto na nzila yina ke nata na luzingu. Yo lenda vanda nde beto ke samunaka nzo na nzo kukonda mpasi kansi kulonguka Biblia ti bantu lenda vanda mpasi sambu na beto. Keti yo kele mpi mutindu mosi sambu na nge? Kana yo kele mpidina, bangindu ya kele na disolo yai lenda sadisa nge. Beto ta tubila mambu yina ke pusaka beto na kukumisa bantu balongoki. Beto ta tadila mpi mutindu beto lenda nunga mambu yina lenda sala nde beto kuka ve kulonguka Biblia ti bantu. Beto tadila ntete sambu na nki beto fwete samuna mpi kulonga nsangu ya mbote.

3. Sambu na nki beto ke samunaka?

³ Ntangu Yezu vandaka na ntoto, yandi pesaka balongoki na yandi bisalu zole. Kisalu ya ntete kele kusamuna nsangu ya Kimfumu  mpi yandi songaka bo mutindu ya kusala yo. (Mat. 10:7; Luka 8:1) Mu mbandu, Yezu songaka balongoki na yandi mambu yina bo fwete sala kana bantu me ndima to me buya nsangu ya Kimfumu. (Luka 9:2-5) Ntangu Yezu songaka balongoki na yandi nde bo ta ta “kimbangi na makanda yonso,” yandi monisaka mpi nde bo ta samuna na bantu mingi mpi na bisika mingi. (Mat. 24:14; Bis. 1:8) Ata bantu kundima to kubuya nsangu, Yezu songaka balongoki na yandi nde bo fwete longa nsangu ya Kimfumu mpi kulonga bo mambu yina Kimfumu yango ta sala.

4. Mutindu Matayo 28:18-20 ke monisa yo, katula kusamuna nsangu ya Kimfumu, nki beto fwete sala diaka?

⁴ Inki kele kisalu ya zole yina Yezu pesaka balongoki na yandi? Yandi songaka balongoki na yandi na kulonga bantu na kuzitisa mambu yonso yina yandi songaka bo. Bantu ya nkaka lenda tuba nde Yezu songaka kaka Bakristu ya mvu-nkama ya ntete na kusamuna mpi na kulonga. Kansi yo kele ve mutindu yina. Yezu monisaka nde kisalu yai ya mfunu ta landa kusalama na bilumbu na beto “tii na nsukilu ya ngidika ya bima.” (Tanga Matayo 28:18-20.) Ntembe kele ve nde Yezu pesaka kisalu yai ntangu yandi monanaka na balongoki na yandi kuluta 500. (1 Bak. 15:6) Na mbona-meso yina Yezu monisaka Yoane, yandi monisaka pwelele nde balongoki na yandi yonso fwete longa bantu mambu ya Yehowa.—Kus. 22:17.

5. Mutindu 1 Bakorinto 3:6-9 ke monisa yo, nki mbandu Polo pesaka ya ke monisa kuwakana yina kele na kisalu ya kusamuna mpi ya kulonga?

⁵ Ntumwa Polo fwanisaka kisalu ya kukumisa bantu balongoki ti kisalu ya bilanga. Yandi monisaka nde katula kukuna nkeni, yo ke lombaka kusala mambu mingi. Yandi yibusaka Bakristu ya Korinto nde: “Mono kunaka, Apolo losaka masa . . . Beno kele kilanga ya Nzambi yina yandi ke kuna.” (Tanga 1 Bakorinto 3:6-9.) Beto ke salaka na “kilanga ya Nzambi,” yo yina beto ke sukaka ve kaka na kukuna bankeni kansi beto ke losilaka yo masa mpi ke talaka yo mbala na mbala sambu na kuzaba kana yo ke yela mbote. (Yoa. 4:35) Beto ke vilaka ve nde Nzambi muntu ke salaka nde bankeni yina kuyela.

6. Ntangu beto ke longa bantu, beto fwete sadisa bo na kusala nki?

⁶ Beto ke sosaka bantu yina kele ti “nkadilu ya mbote sambu na kubaka luzingu ya mvula na mvula.” (Bis. 13:48) Sambu na kusadisa bantu yina na kukuma balongoki, beto fwete sadisa bo na (1) kubakisa mambu yina bo ke longuka na Biblia, na (2) kundima yo mpi na (3) kusadila yo. (Yoa. 17:3; Bakol. 2:6, 7; 1 Bate. 2:13) Bampangi yonso na dibundu ta sadisa balongoki ya Biblia kana bo ke monisila bo zola mpi ke yamba bo mbote na balukutakanu. (Yoa. 13:35) Nsamuni fwete lutisa bantangu mingi mpi kusala ngolo sambu na kusadisa longoki na kuyambula balukwikilu yina longoki “me kangamaka ngolo” na yo. (2 Bak. 10:4, 5) Sambu na kusadisa longoki na kusoba bikalulu na yandi mpi kubaka mbotika, yo lenda lomba bangonda mingi kansi bikesa yina beto ke sala ta kwenda ve mpamba. Yo kele mfunu mingi nde longoki kusoba bikalulu na yandi.

7. Inki ke pusaka beto na kusamuna mpi na kulonga bantu?

⁷ Sambu na nki beto ke samunaka mpi ke longaka bantu sambu bo kuma balongoki? Kikuma ya ntete kele sambu beto ke zolaka Yehowa. Kana nge ke sala yonso sambu na kulemfuka na nsiku ya kusamuna mpi ya kukumisa bantu balongoki, nge ta monisa nde nge ke zolaka Nzambi. (1 Yoa. 5:3) Yindula fioti: Zola na nge sambu na Yehowa me pusaka nge dezia na kusamuna nzo na nzo. Keti yo vandaka pete sambu nge lemfuka na nsiku yai? Mbala ya nkaka yo vandaka ve pete. Mbala ya nkaka ntangu nge samunaka nzo na nzo na mbala ya ntete, nge  waka boma. Kansi nge zabaka nde yo kele kisalu yina Yezu ke zola nde nge sala mpi nge lemfukaka na nsiku yina. Na nima ya kusamuna mingi, ntembe kele ve nde nge me kumaka kusamuna nzo na nzo kukonda mpasi. Ebuna kulonguka Biblia ti muntu, keti yo ke pesaka nge mpi boma? Mbala nkaka yo ke pesaka nge boma. Kansi kana nge lomba Yehowa na kusadisa nge na kukatula boma mpi na kupesa nge kikesa ya kulonguka Biblia ti bantu, Yehowa ta pesa nge nzala ya ngolo ya kukumisa bantu balongoki.

8. Mutindu Marko 6:34 ke monisa yo, nki ke pusaka beto diaka na kulonga bantu?

⁸ Kikuma ya zole yina ke pusaka beto na kulonga bantu kieleka kele zola na beto sambu na bo. Kilumbu mosi, Yezu ti balongoki na yandi vandaka ya kulemba mingi sambu bo samunaka mingi. Bo vandaka ti mfunu ya kisika mosi sambu na kupema. Kansi kaka na ntangu yina, kimvuka mosi ya bantu kwisaka kisika yina bo vandaka. Yezu wilaka bo mawa mpi yandi yantikaka kulonga bo “mambu mingi.” (Tanga Marko 6:34.) Yandi longaka bo ata yandi lembaka mingi. Sambu na nki? Sambu Yezu kuditulaka na kisika ya bantu yina. Yandi zolaka kusadisa bo sambu yandi bakisaka nde bo vandaka kuniokwama mpi bo vandaka ve ti kivuvu. Bubu yai mpi bantu ke niokwama mpi bo me konda kivuvu ata yo ke monana bonso nde bo ke zingaka na kiese. Bo kele bonso mameme yina me vila mpi ya me konda ngungudi ya kutwadisa bo. Ntumwa Polo tubaka nde bantu ya mutindu yai me zaba ve Nzambi mpi bo kele ve ti kivuvu. (Baef. 2:12) Bo kele na ‘nzila yina ke nataka na lufwa.’ (Mat. 7:13) Beto ke zolaka bantu ya teritware na beto mpi beto ke wilaka bo mawa, yo yina beto ke sadisaka bo na kuzaba Nzambi. Mutindu ya mbote ya kusadisa bo kele kulonguka Biblia ti bo.

9. Mutindu Bafilipi 2:13 ke monisa yo, nki Yehowa lenda sala sambu na kusadisa nge?

⁹ Mbala ya nkaka nge ke waka boma na kuyantika kulonguka Biblia ti muntu sambu nge ke zabaka nde kudibongisa mpi kulonguka Biblia ti muntu lenda baka ntangu mingi. Kana yo kele mutindu yai sambu na nge, songa Yehowa mutindu nge ke kudiwa. Lomba yandi na kusadisa nge sambu nge kuma ti nzala ya ngolo ya kuzwa muntu yina nge lenda longuka Biblia ti yandi. (Tanga Bafilipi 2:13.) Ntumwa Yoane tubaka nde Nzambi ta pesa mvutu na bisambu yina ke wakana ti luzolo na yandi. (1 Yoa. 5:14, 15) Yo yina, ndima nde Yehowa ta sadisa nge na kukuma ti nzala yina ya kukumisa bantu balongoki.

10-11. Inki lenda sala nde beto kuka ve kulonguka Biblia ti bantu?

¹⁰ Beto me zaba nde yo kele mfunu mingi na kulonga bantu kansi beto lenda kutana ti mambu yina lenda sala nde beto kuka ve kukumisa bantu balongoki. Beto tadila mwa mambu yango mpi mutindu beto lenda nunga yo.

¹¹ Mambu ya luzingu na beto lenda sala nde beto sala ve mingi na kisalu ya kukumisa bantu balongoki. Mu mbandu, bansamuni ya nkaka me kuma bambuta to bo ke belaka. Keti nge mpi me kuma mbuta to nge ke belaka? Kana yo kele mpidina, beto tadila mwa mambu yina beto me bakisa na nsungi ya maladi ya Coronavirus. Beto me bakisa nde beto lenda longuka mbote Biblia ti bantu na nzila ya ba-apareyi. Nge lenda vanda na nzo na nge mpi nge ke longuka Biblia ti muntu. Kusala mutindu yai kele ti mambote ya nkaka. Bantu ya nkaka lenda sepela kulonguka Biblia ti beto kansi bo ke vandaka ve na banzo na bo na bantangu yina beto ke samunaka. Bo ke vandaka na banzo na bo na suka-suka mpi na mpimpa. Keti nge lenda longuka Biblia ti muntu na bantangu yina? Yezu longaka Nikodemo na mpimpa sambu yo vandaka ntangu yina Nikodemo zolaka nde Yezu kulonga yandi.—Yoa. 3:1, 2.

12. Inki ke sadisa beto na kundima nde beto lenda vanda balongi ya mbote?

 ¹² Beto lenda yindula nde beto ta kuka ve kulonguka Biblia ti muntu. Mbala ya nkaka beto lenda yindula nde beto fwete zaba mambu mingi to kuvanda mayele mingi sambu beto yantika kulonguka Biblia ti muntu. Kana nge ke yindulaka mutindu yai, tadila mambu tatu yina lenda sadisa nge na kundima nde nge ta kuka kulonguka Biblia ti muntu. Ya ntete, Yehowa me zaba nde nge me fwana na kulonga bantu ya nkaka. (2 Bak. 3:5) Ya zole, Yezu, muntu yina kele ti “kiyeka yonso na zulu mpi na ntoto,” muntu me pesa nge mukumba ya kulonga. (Mat. 28:18) Ya tatu, nge lenda ndima nde bantu ya nkaka ta sadisa nge. Yezu sadilaka mambu yina Tata na yandi longaka yandi na kutuba. Nge mpi lenda sala bonso Yezu. (Yoa. 8:28; 12:49) Katula mambu yai tatu, nge lenda lomba nkengi ya kimvuka na beno ya kisalu ya kusamuna to mupasudi-nzila ya me fwana to nsamuni ya nkaka yina me zaba kulonga mbote na kusadisa nge sambu nge yantika kulonguka Biblia ti muntu. Kima ya nkaka yina lenda sadisa nge na kuvanda nsamuni ya mbote kele kukwenda ti mosi na kati ya bansamuni yai ntangu yandi ke longuka Biblia ti muntu.

13. Sambu na nki beto fwete yikama ti mutindu ya mpa ya kulonguka Biblia ti bantu?

¹³ Yo lenda vanda mpasi sambu beto yikama ti bametode ya mpa ya kulonga mpi bisadilu ya mpa. Bubu yai, mutindu beto vandaka kulonguka Biblia ti bantu me soba. Mukanda Zinga Mvula na Mvula! ya beto ke sadila sambu na kulonguka Biblia ti bantu ke lomba nde beto kudibongisa sambu na kulonguka ti bantu mpi kutwadisa kulonguka yango na mutindu yina me swaswana ti mutindu beto vandaka kusala yo ntete. Beto ke tangaka baparagrafe fioti mpi beto ke solulaka mingi ti longoki. Ntangu beto ke longukaka ti longoki, beto ke sadilaka bavideo mingi, bima yina kele na site na beto ya Internet mpi ba application, mu mbandu JW Library^®. Kana nge me zaba ve mbote mutindu ya kusadila bisadilu yai, lomba mpangi ya nkaka sambu yandi sadisa nge na kuzaba mutindu ya kusadila yo. Bantu ke zolaka kusala mambu kaka mutindu bo me yikamaka kusala yo. Kusala mambu na mutindu ya nkaka ke vandaka ve pete. Kansi Yehowa mpi bampangi ya nkaka lenda sadisa nge na kuyikama mpi kusepela mingi ti mutindu ya mpa ya kulonguka Biblia ti bantu. Mpangi mosi yina kele mupasudi-nzila tubaka nde, mutindu yai ya kulonguka kele “mbote mingi sambu na longoki mpi sambu na longi.”

14. Inki beto fwete vila ve ntangu beto ke samuna na kisika yina bantu ke zolaka ve kundima nsangu mpi nki mutindu 1 Bakorinto 3:6, 7 ke pesa beto kikesa?

¹⁴ Mbala ya nkaka beto ke zingaka na teritware yina bantu ke zolaka ve kulonguka Biblia. Bantu ya nkaka lenda ndima ve nsangu na beto; bankaka nkutu lenda telemina nsangu yango. Kana beto ke zingaka na kisika ya mutindu yai, nki lenda sadisa beto na kundima nde kilumbu kele bantu ya nkaka lenda ndima nsangu na beto? Beto fwete vila ve nde mambu ya luzingu ya bantu lenda soba na mbala mosi na nsi-ntoto yai mpi bantu yina vandaka ve kusepela ti nsangu na beto lenda bakisa nde bo kele ti mfunu ya lutwadisu ya Nzambi. (Mat. 5:3) Bantu ya nkaka yina vandaka kubuya mikanda na beto me kumaka kundima kulonguka Biblia ti beto. Beto ke zabaka nde Yehowa kele Mfumu ya bilanga. (Mat. 9:38) Yandi ke lombaka beto na kulanda kukuna mpi na kulosila masa kansi yandi muntu ke salaka nde nkeni kuyela. (1 Bak. 3:6, 7) Beto kele na kiese ya kuzaba nde Yehowa ta sakumuna beto sambu beto ke salaka yonso sambu na kusadisa bantu kansi ve sambu beto ke pesaka bantu mingi mikanda to sambu beto ke longukaka ti bantu. *

15. Yehowa ke waka nki mutindu kana muntu me ndima kulonguka Biblia mpi yandi ke sadila mambu yina yandi ke longuka?

¹⁵ Yehowa ke sepelaka kana muntu me ndima kulonguka Biblia mpi kana muntu yango ke songa bantu ya nkaka mambu yina yandi ke longuka. (Bing. 23:15, 16) Ntembe kele ve nde Yehowa ke waka kiese mingi ntangu yandi ke monaka mutindu beto ke samuna mpi ke longa bantu na kikesa yonso bubu yai. Mu mbandu, na mvula ya kisalu 2020, beto longukaka Biblia ti bantu 7705765 mpi beto sadisaka bantu 241994 na kudipesa na Yehowa mpi na kubaka mbotika ata maladi ya Coronavirus vandaka na ntoto ya mvimba. Balongoki yai ya mpa mpi na ture na bo, bo ta longuka Biblia ti bantu mingi mpi bo ta sadisa bo na kukuma balongoki. (Luka 6:40) Ya kieleka, Yehowa ke sepelaka ntangu beto ke kumisaka bantu balongoki.

16. Inki kele lukanu ya mbote yina beto lenda baka?

¹⁶ Kisalu ya kukumisa bantu balongoki ke vandaka ve kisalu ya pete kansi Yehowa ta sadisa beto na kulonga bantu sambu bo zola yandi. Beto lenda baka lukanu ya kulonguka Biblia ata ti muntu mosi. Kana beto ke lomba konso muntu yina beto ke kutana ti yandi na kisalu ya kusamuna na kulonguka Biblia ti beto, mambu yina ta salama lenda yitukisa beto. Beto ke ndima nde Yehowa ta sakumuna bikesa yina beto ke sala.

17. Beto ta wa nki mutindu kana beto ke longuka Biblia ti muntu?

¹⁷ Beto kele ti mukumba ya nene ya kusamuna mpi ya kulonga bantu kieleka. Kisalu yai ke pesaka beto kiese kibeni. Ntumwa Polo sadisaka bantu mingi na Tesalonika na kukuma balongoki. Yandi ke tendula mutindu yandi waka mpi yandi ke tuba nde: “Nki kele kivuvu, kiese, to mpu na beto ya kimfumu ya lukumu na ntwala ya Mfumu na beto Yezu? Keti yo kele ve beno? Ya kieleka, beno kele nkembo mpi kiese na beto.” (1 Bate. 2:19, 20; Bis. 17:1-4) Bubu yai mpi bampangi mingi ke waka mutindu mosi. Mpangi Stéphanie ti bakala na yandi me sadisaka bantu mingi na kubaka mbotika. Yandi ke tuba nde: “Beto ke vandaka na kiese mingi ntangu beto ke sadisaka bantu na kudipesa na Yehowa.”