DISOLO YA KULONGUKA 22
Sadisa Balongoki ya Biblia na Kubaka Mbotika
“Konso muntu na kati na beno kubaka mbotika.”—BIS. 2:38.
NKUNGA 72 Beto Zabisa Kieleka ya Kimfumu
MAMBU YINA DISOLO YAI KE TUBILA *
1. Inki balongoki ya Yezu songaka kimvuka mosi ya nene ya bantu na mvu-nkama ya ntete?
KIMVUKA mosi ya nene ya babakala mpi ya bankento ya bansi mingi mpi ya bandinga mingi vukanaka na Yeruzalemi. Diambu mosi ya kuyituka salamaka kilumbu yina. Kimvuka mosi ya Bayuda ya kisina yantikaka kutuba ndinga ya banzenza yina kwisaka na Yeruzalemi. Mambu yai yitukisaka bantu mingi. Kansi diambu yina yitukisaka bo mingi kuluta vandaka mambu yina Bayuda vandaka kusonga bo mpi yina ntumwa Piere songaka bantu yonso. Bo songaka bantu yina nde kana bo ke zola kuguluka, bo fwete kwikila na Yezu Kristu. Mambu yai simbaka kibeni bantima na bo, yo yina bo yulaka bantumwa nde: “Inki beto fwete sala?” Piere songaka bo nde: “Konso muntu na kati na beno kubaka mbotika.”—Bis. 2:37, 38.
Mpangi mosi ti nkento na yandi ke longuka Biblia ti leke mosi ya bakala mpi bo ke longuka mukanda, Zinga Mvula na Mvula! (Tala paragrafe 2)
2. Inki beto ta longuka na disolo yai? (Tala kifwanisu ya lutiti ya zulu.)
2 Na nima, diambu ya nkaka ya kuyituka salamaka. Bantu kiteso ya 3000 bakaka mbotika kilumbu yina mpi bo kumaka balongoki ya Kristu. Yo vandaka luyantiku ya kisalu ya nene ya kukumisa bantu balongoki, kisalu yina Yezu songaka balongoki na yandi na kusala. Bo ke landa kusala yo tii na bilumbu na beto. Bubu yai, kana beto me kutana ti muntu na kisalu ya kusamuna mpi beto me solula ti yandi, yandi ta baka ve mbotika kaka kilumbu yina. Yo lenda baka bangonda mingi, mvula mosi to bamvula mingi na ntwala nde longoki kubaka mbotika. Kana nge ke longuka Biblia ti muntu, nge fwete sala bikesa sambu na kusadisa yandi na kukuma longoki ya Kristu. Na disolo yai, beto ta longuka mambu yina beto lenda sala sambu na kusadisa longoki ya Biblia na kubaka mbotika.
SADISA LONGOKI YA BIBLIA NA KUSADILA MAMBU YINA YANDI KE LONGUKA
3. Mutindu Matayo 28:19, 20 ke monisa yo, nki longoki ya Biblia fwete sala na ntwala ya kubaka mbotika?
3 Na ntwala ya kubaka mbotika, longoki ya Biblia fwete sadila mambu yina Biblia ke longaka. (Tanga Matayo 28:19, 20.) Kana longoki ke sadila mambu yina yandi ke longuka, yandi ta kuma bonso “muntu ya mayele” yina Yezu tubilaka na kingana na yandi; muntu ya mayele yina timunaka dibulu ya nda sambu na kutunga nzo na yandi na zulu ya ditadi. (Mat. 7:24, 25; Luka 6:47, 48) Inki mutindu beto lenda sadisa longoki ya Biblia na kusadila mambu yina yandi ke longuka? Beto tadila mambu tatu yina beto fwete sala.
4. Inki mutindu beto lenda sadisa longoki ya Biblia na kulanda kusala ngolo sambu na kubaka mbotika? (Tala mpi lupangu, “ Sadisa Longoki na Kuditudila Balukanu mpi na Kulungisa Yo.”)
4 Sadisa longoki ya Biblia na kuditudila balukanu. Sambu na nki yo kele mfunu? Beto baka mbandu yai: Kana nge ke sala nzietelo mosi ya nda, nge lenda pema na bisika ya nkaka ya kitoko. Kana nge sala mutindu yina, yo ta sadisa nge na kumona ve nzietelo yina nda. Mutindu mosi, kana longoki ya Biblia ke kuditudila balukanu ya fioti-fioti mpi yandi ke lungisa yo, yo ta sadisa yandi na kubaka mbotika. Sadila lupangu, “Mambu ya Kusala” yina kele na mukanda Zinga Mvula na Mvula! sambu na kusadisa longoki ya Biblia na kuyela. Na nsuka ya konso dilongi, tubila lukanu yina lenda sadisa longoki ya Biblia na kusadila mambu yina yandi ke longuka. Kana nge ke zola nde longoki na nge kulungisa lukanu mosi buna, nge lenda sonika yo na kitini “Mambu ya Nkaka” ya kele na mukanda yina. Sadila mbala na mbala kitini yina ya kulonguka sambu na kutadila ti longoki balukanu yina yandi lenda lungisa na bantangu fioti mpi yina yandi ta lungisa na bilumbu ke kwisa.
5. Mutindu Marko 10:17-22 ke monisa yo, nki Yezu songaka mvwama mosi mpi sambu na nki?
5 Sadisa longoki ya Biblia na kusala bansoba ya nene na luzingu na yandi. (Tanga Marko 10:17-22.) Yezu zabaka nde yo ta vanda mpasi sambu muntu yina kele mvwama kuteka bima na yandi yonso. (Mar. 10:23) Kansi Yezu songaka mvwama mosi na kusala yo. Sambu na nki? Sambu Yezu vandaka kuzola yandi. Bantangu ya nkaka, beto lenda siamisa ve longoki ya Biblia na kusadila mambu yina yandi ke longuka sambu beto lenda yindula nde yandi ta kuka ve kusala bansoba ya me fwana. Yo lenda lomba bantangu mingi sambu muntu kukatula kimuntu na yandi ya ntama mpi kulwata kimuntu ya mpa. (Bakol. 3:9, 10) Kansi kana nge solula ti yandi nswalu na yina me tala bansoba yina yo ke lomba nde yandi sala, yandi lenda yantika kusala yo mbala mosi. Kana nge me sala mutindu yai, yandi ta bakisa nde nge ke zolaka yandi.—Nk. 141:5; Bing. 27:17.
6. Sambu na nki beto fwete yula longoki bangiufula yina ta pusa yandi na kutuba mambu yina yandi ke yindula?
6 Yo kele mfunu na kuyula longoki ya Biblia ngiufula yina ta pusa yandi na kupesa dibanza na yandi na diambu mosi. Yo ta sadisa nge na kuzaba mambu yina longoki ke bakisa mpi yina yandi ke ndima. Kana nge ke sala mutindu yai mbala na mbala, yo ta sadisa nge na kusolula ti longoki mambu yina lenda vanda mpasi sambu yandi ndima. Mukanda Zinga Mvula na Mvula! kele ti bangiufula mingi yina lenda pusa longoki na kutuba mambu yina yandi ke yindula. Mu mbandu, dilongi 04 kele ti ngiufula yai: “Nge ke yindula nde Yehowa ke kudiwaka nki mutindu ntangu nge ke sadilaka zina na yandi?” Dilongi 09 kele ti ngiufula yai: “Inki kele mwa mambu ya nge lenda samba sambu na yo?” Na luyantiku, yo lenda vanda mwa mpasi sambu longoki kupesa bamvutu na bangiufula yai. Nge lenda sadisa yandi na kuyindula mambu yina kele na baverse mpi na bifwanisu yina kele na mukanda yina.
7. Inki mutindu beto lenda sadila bambandu ya bantu ya nkaka na mutindu ya mbote?
7 Kana longoki ke bakisa mambu yina yandi fwete sala, songa yandi masolo ya luzingu ya bantu ya nkaka sambu yo sadisa yandi na kubakisa mambu yina yandi fwete sala. Mu mbandu, kana longoki ya Biblia ke kwendaka ve mbala na mbala na balukutakanu, nge lenda songa yandi video, Yehowa Ke Kudibanzaka Sambu na Mono ya kele na kitini “Tala mpi” ya dilongi 14. Malongi mingi yina kele na mukanda Zinga Mvula na Mvula! kele ti bambandu ya masolo yina ya luzingu na kitini, “Longuka Mambu Mingi” to na kitini, “Tala mpi.” * Kufwanisa ve longoki na nge ti muntu ya nkaka mpi kusonga ve longoki nde: “Kana muntu yai salaka diambu yai, nge mpi lenda sala yo.” Bika longoki yandi mosi kutuba yo. Kansi kima ya nge fwete sala kele, kutubila mambu ya mfunu yina sadisaka muntu yina na video na kusadila malongi ya Biblia. Nge lenda tubila mukapu mosi ya Biblia to diambu mosi yina muntu yango salaka. Kana mpila kele, nge lenda tubila mutindu Yehowa sadisaka muntu yina.
8. Inki mutindu beto lenda sadisa longoki ya Biblia na kuzola Yehowa?
8 Sadisa longoki ya Biblia na kuzola Yehowa. Inki mutindu? Tubila mambu yina lenda benda dikebi ya longoki na bikalulu ya Yehowa. Sadisa yandi na kubakisa nde Yehowa kele Nzambi ya kiese yina ke sadisaka bantu yina ke zolaka yandi. (1 Tim. 1:11; Baeb. 11:6) Songa longoki nde yandi ta baka mambote kana yandi ke sadila mambu yina yandi ke longuka mpi tendudila yandi nde mambote yina ke monisa nde Yehowa ke zolaka yandi. (Yez. 48:17, 18) Kana longoki ya Biblia ke zola Yehowa mingi, yo ta pusa yandi na kusala bansoba ya mfunu na luzingu na yandi.—1 Yoa. 5:3.
SONGA LONGOKI YA BIBLIA NA BAMPANGI YA NKAKA
9. Mutindu Marko 10:29, 30 ke monisa yo, nki lenda sadisa longoki ya Biblia na kuyambula mambu ya nkaka sambu na kubaka mbotika?
9 Longoki ya Biblia fwete yambula mambu ya nkaka sambu na kuyela mpi kubaka mbotika. Bonso mvwama yina beto me tubila, yo lenda lomba nde balongoki ya nkaka ya Biblia kuyambula bima na bo ya kinsuni. Mu mbandu, kana bisalu na bo ke wakana ve ti minsiku ya Biblia, bo fwete yambula yo. Yo lenda lomba nde balongoki mingi kuyambula banduku yina ke zolaka ve Yehowa. Yo lenda lomba nde bankaka kuyambula bantu ya mabuta na bo yina ke zolaka ve Bambangi ya Yehowa. Yezu zabaka mbote nde yo lenda vanda mpasi sambu balongoki ya nkaka kusala mambu yai. Kansi yandi tubaka nde bantu yina ke landa yandi ta konda kima mosi ve. Yehowa ta pesa bo bampangi mingi ya kimpeve yina ke zolaka bo. (Tanga Marko 10:29, 30.) Inki mutindu nge lenda sadisa longoki na kubaka mambote ya dikabu yai ya mbote?
10. Inki dilongi nge me baka na mambu yina mpangi Manuel ke tuba?
10 Sala kinduku ti longoki na nge ya Biblia. Yo kele mfunu mingi na kumonisa longoki ya Biblia nde nge ke zolaka yandi. Sambu na nki? Beto tala mambu yina mpangi Manuel na Mexique ke tuba. Yandi ke yibuka mambu yina longi na yandi vandaka kusala ntangu yandi vandaka kulonguka Biblia. Yandi ke tuba nde: “Na ntwala ya kulonguka, longi na mono vandaka kuyula mono kana mono kele mbote. Yandi siamisaka mono na kusonga yandi mambu yonso yina mono vandaka kukutana ti yo. Mono bakisaka nde yandi vandaka kuzola mono mingi.”
11. Inki mambote longoki ya Biblia ta baka kana yandi ke lutisa ntangu ti beto?
11 Lutisa ntangu ti longoki na nge ya Biblia mutindu Yezu vandaka kulutisa ntangu ti balongoki na yandi. (Yoa. 3:22) Kana mpila kele, nge lenda binga longoki ya Biblia yina ke yela na kukwisa na nzo na nge sambu na kudia to kutala manaka ya JW Télédiffusion. Longoki ya Biblia ta sepela mingi kana nge binga yandi na nzo na nge na ntangu yina banduku na yandi to bantu ya dibuta na yandi ke sala bafeti ya mabundu ya luvunu mpi yandi lenda kudiwa yandi mosi. Mpangi Kazibwe na Ouganda ke tuba nde: “Mono longukaka mambu mingi ya me tala Yehowa ntangu mono vandaka kulutisa ntangu ti mpangi yina vandaka kulonguka Biblia ti mono. Mono bakisaka mutindu Yehowa ke zolaka bansadi na yandi mpi mutindu bo ke vandaka na kiese. Mono ke zolaka mutindu yai.”
Kana nge ke nata nsamuni ya nkaka ntangu nge ke kwenda kulonguka Biblia ti balongoki, yo ta sadisa bo na kukwisa na balukutakanu (Tala paragrafe 12) *
12. Sambu na nki beto fwete nata nsamuni ya nkaka ntangu beto ke longuka Biblia ti longoki?
12 Nata nsamuni ya nkaka ntangu nge ke longuka Biblia ti longoki. Bantangu ya nkaka, beto lenda yindula nde beto ta longuka mbote ti longoki kana beto kwenda beto mosi to kana beto kwenda kaka ti nsamuni yina beto ke samunaka ti yandi mbala mingi. Ata beto lenda mona nde yo kele mbote na kusala mutindu yina, yo ta vanda mbote kuluta kana beto ke nata nsamuni ya nkaka ntangu beto ke kwenda kulonguka ti longoki na beto ya Biblia. Mpangi Dmitrii na Moldavie ke tuba nde: “Konso nsamuni yina vandaka kukwisa ti longi na mono ntangu beto vandaka kulonguka Biblia, vandaka kutendudila mono mambu na mutindu ya nkaka sambu mono bakisa mbote. Yo sadisaka mono na kuzaba mutindu mono lenda sadila mambu yina mono vandaka kulonguka. Mono vandaka ve nsoni-nsoni ntangu mono kwendaka na lukutakanu na mbala ya ntete sambu mono zabanaka dezia ti bampangi mingi.”
13. Sambu na nki beto fwete sadisa longoki ya Biblia na kukwenda na balukutakanu?
13 Sadisa longoki na kukwenda na balukutakanu. Sambu na nki? Sambu Yehowa ke lombaka bansadi na yandi na kuvukana sambu yo kele kitini ya lusambu na beto. (Baeb. 10:24, 25) Diaka, bampangi na beto kele dibuta na beto ya kimpeve. Ntangu beto ke vukanaka ti bo, yo kele bonso nde beto ke dia madia ya kitoko na kimvuka. Kana nge ke siamisa longoki na kukwenda na balukutakanu, nge ta sadisa yandi na kusala diambu mosi ya mfunu yina ta sadisa yandi na kuyela mpi na kubaka mbotika. Kansi yo lenda vanda mpasi sambu yandi yantika kukwisa na balukutakanu. Inki mutindu Mukanda Zinga Mvula na Mvula! ta sadisa longoki na kununga konso diambu ya mpasi yina lenda kanga yandi nzila ya kukwisa na balukutakanu?
14. Inki mutindu beto lenda sadisa longoki ya Biblia na kukwenda na balukutakanu?
14 Sadila dilongi 10 ya mukanda Zinga Mvula na Mvula! sambu na kusadisa longoki na nge na kuyela. Na ntwala nde bo basisa mukanda yai, bo lombaka bansamuni ya nkaka na kusadila dilongi yai sambu na kusiamisa balongoki na bo ya Biblia na kukwisa na balukutakanu. Bansamuni yango tubaka nde dilongi yango kele mbote mingi mpi yo sadisaka balongoki na bo na kukwisa na balukutakanu. Kuvingila ve tii ntangu beno ta kuma na dilongi 10 sambu nge bingisa longoki na balukutakanu. Bingisa yandi mbala mosi ntangu beno me yantika kusolula mpi landa kubingisa yandi mbala na mbala. Konso longoki ke kutanaka ti mambu na yandi ya mpasi. Tula dikebi na mambu yina yandi ke kutana ti yo mpi tala kana yo kele mfunu nde nge sadisa yandi. Kulemba ve nitu kana yandi ke baka ntangu mingi na ntwala ya kukwisa na balukutakanu. Vanda ntima-nda mpi landa kubingisa yandi na balukutakanu.
SADISA LONGOKI YA BIBLIA NA KUKATULA BOMA
15. Sambu na nki longoki lenda wa boma?
15 Ziku na ntwala nde nge kuma Mbangi ya Yehowa, nge vandaka mpi kuwa boma. Mbala ya nkaka nge vandaka kuyindula nde nge ta kuka ve kusamuna kisika yina bantu kele mingi. To nge vandaka kuwa boma nde bantu ya dibuta na nge to banduku na nge ta telemina nge. Kana yo kele mutindu yina, nge lenda bakisa mbote longoki na nge ya Biblia. Yezu zabaka mbote nde bantu mingi ta wa boma ya mutindu yai. Kansi, yandi songaka balongoki na yandi na kuwa ve boma na kusadila Yehowa. (Mat. 10:16, 17, 27, 28) Inki mutindu Yezu sadisaka balongoki na yandi na kukatula boma? Inki mutindu nge lenda landa mbandu na yandi?
16. Inki mutindu beto lenda sadisa longoki ya Biblia na kusonga bantu ya nkaka mambu yina yandi ke longuka?
16 Sadisa longoki ya Biblia na kusonga bantu ya nkaka mambu yina yandi ke longuka. Yo lenda vanda nde balongoki ya Yezu waka boma ntangu Yezu tindaka bo na kukwenda kusamuna. Kansi Yezu sadisaka bo; yandi songaka bo kisika yina bo ta kwenda kusamuna mpi mambu yina bo ta longa. (Mat. 10:5-7) Inki mutindu nge lenda landa mbandu ya Yezu? Sadisa longoki na kuzaba kisika yina yandi lenda samuna. Mu mbandu, nge lenda yula yandi kana yandi ke zaba muntu mosi yina ke zola kulonguka Biblia. Sadisa yandi na kuyidika mambu yina yandi lenda tuba mpi songa yandi mutindu ya pete ya kusonga bantu ya nkaka mambu yina yandi ke longuka. Kana mpila kele, beno lenda sala mwa bansonga ti yandi sambu nge sadisa yandi na kuzaba mutindu yandi lenda sadila mambu yina kele na kitini “Bantu ya Nkaka Ke Tubaka nde” mpi na kitini “Muntu ya Nkaka Lenda Yula Nge nde” ya kele na mukanda Zinga Mvula na Mvula! Ntangu beno ke sala bansonga yango, sala yonso sambu na kusadisa longoki na kusadila Biblia sambu na kupesa bamvutu ya pete mpi na mutindu ya mbote.
17. Inki mutindu beto lenda sadila mambu yina kele na Matayo 10:19, 20, 29-31 sambu na kusadisa longoki ya Biblia na kutudila Yehowa ntima?
17 Sadisa longoki na kutudila Yehowa ntima. Yezu songaka balongoki na yandi nde Yehowa ta sadisa bo sambu yandi ke zolaka bo. (Tanga Matayo 10:19, 20, 29-31.) Songa longoki nde Yehowa mpi ta sadisa yandi. Nge lenda sadisa yandi na kutudila Yehowa ntima kana nge ke samba ti yandi sambu na balukanu na yandi. Mpangi Franciszek na Pologne ke tuba nde: “Mbala mingi longi na mono vandaka kutubila balukanu na mono ntangu yandi vandaka kusamba. Ntangu mono monaka mutindu Yehowa pesaka mvutu na bisambu ya longi na mono, mbala mosi mono yantikaka kusamba. Mono monaka lusadisu ya Yehowa ntangu mono vandaka ti mfunu ya bilumbu ya konzie sambu na kukwenda na balukutakanu ya dibundu mpi na balukutakanu ya distrike.”
18. Inki mutindu Yehowa ke tadilaka kisalu yina bansamuni ke salaka?
18 Yehowa ke tudilaka balongoki ya Biblia dikebi mingi. Yandi ke sepelaka mutindu yandi ke monaka kisalu ya ngolo yina bansamuni ke salaka sambu na kusadisa bantu na kukwenda pene-pene na yandi mpi yandi ke zolaka bo mingi. (Yez. 52:7) Kana nge me yantika ntete ve kulonguka Biblia ti muntu, nge lenda sadisa balongoki ya Biblia ya bansamuni ya nkaka na kuyela mpi na kubaka mbotika ntangu nge ke kwenda kufidisa bansamuni yango sambu na kulonguka ti bo.
NKUNGA 60 Bo Ta Baka Moyo
^ par. 5 Na disolo yai, beto ta longuka mutindu Yezu sadisaka bantu na kukuma balongoki na yandi mpi mutindu beto lenda landa mbandu na yandi. Beto ta longuka mpi mutindu beto lenda sadila mukanda yai ya mpa: Zinga Mvula na Mvula! Bo me basisa mukanda yai sambu yo sadisa balongoki ya Biblia na kuyela mpi na kubaka mbotika.
^ par. 7 Nge lenda zwa mpi bambandu ya masolo ya luzingu na (1) Mukanda ya Bansosa Sambu na Bambangi ya Yehowa na ntu-diambu “Biblia,” mpi na “Mfunu na Yo” mpi na nima tala na “‘Biblia Ke Sobaka Luzingu ya Bantu’ (masolo ya kulandana ya Nzozulu ya Nkengi)” to na (2) JW Library® bweta na media mpi kota na “Bainterview mpi Baeksperiansi.”
^ par. 62 NTENDULA YA BIFWANISU: Mpangi mosi ti nkento na yandi ke longuka Biblia ti toko mosi ya bakala. Bantangu ya nkaka, yandi ke nata nsamuni ya nkaka ntangu yandi ke kwenda kulonguka Biblia ti bantu.
