YINDULA nde nge ke tambula na bala-bala na mpimpa mpenza. Mbala mosi nge me mona muntu ke landa nge. Kana nge telema, muntu yango mpi kutelema. Kana nge tambula nswalu, muntu yango mpi kutambula nswalu. Nge me kwenda ntinu na nzo ya nduku mosi ya pene-pene. Yandi me kangudila nge porte mpi nge me kota; ntima na nge ta kita sambu nge me zaba nde nge kele diaka ve na kigonsa.

Mbala ya nkaka nge me kutanaka ntete ve ti mambu ya mutindu yai. Kansi ziku bampasi ya nkaka ke yangisaka nge. Mu mbandu, nge ke sosa kuyambula kifu mosi kansi nge ke kuka ve. Nge me sala bamvula mingi kukonda kisalu mpi nge ke landa kusosa kansi nge ke zwa kaka ve. Nge ke kudiyangisa sambu nge ke zola kukuma mbuta mpi nge ta kuma kubela-bela na bilumbu ke kwisa. To nge ke kudiyangisa sambu na kima ya nkaka.

Yo vanda nki kima ke yangisa nge, kuvanda ti nduku mosi, yina nge lenda songa bampasi na nge mpi yina lenda sadisa nge kele mbote. Keti nduku ya ngolo ya mutindu yina kele? Ee, Yehowa kele nduku ya mutindu yina! Yandi monisaka yo na nduku na yandi Abrahami, muntu ya kwikama, mutindu Yezaya 41:8-13 ke monisa. Na verse 10 ti 13, Yehowa ke sila konso muntu na kati na beto nde: “Kuwa boma ve, sambu mono kele ti nge. Kudiyangisa ve, sambu mono kele Nzambi na nge. Mono ta pesa nge kikesa, ee, mono ta sadisa nge, mono ta simba nge mpenza ngolo na diboko na mono ya kitata ya lunungu. Sambu mono Yehowa Nzambi na nge, mono ke simba ngolo diboko na nge ya kitata, mono Muntu ke tubila nge nde, ‘Kuwa boma ve. Mono ta sadisa nge.’”

Bangogo yai ya Yehowa ke pesa mpenza kikesa. Yindula fioti mambu yina Yehowa ke sila beto. Verse yai ke tuba ve nde Yehowa me simba diboko na nge mpi nge ke tambula na lweka na yandi. Kana yo vandaka mpidina, diboko ya Yehowa ya kitata zolaka kusimba diboko na nge ya kimama. Kansi verse ke tuba nde Yehowa me tandula “diboko na [yandi] ya kitata ya lunungu” mpi me simba ngolo “diboko na nge ya kitata,” bonso nde yandi ke katula nge na mpasi. Ntangu Yehowa ke simba ngolo diboko na nge ya kitata, yandi ke tuba mambu yai sambu na kupesa nge kikesa: “Kuwa boma ve. mono ta sadisa nge.”

Keti nge ke ndimaka nde Yehowa kele Tata mpi Nduku yina ke zolaka nge? Keti nge ke ndimaka nde yandi ta sadisa nge ntangu nge ke kutana ti bampasi? Yehowa ke tudilaka nge dikebi mpi ke zola kusadisa nge. Ntangu nge ke kutanaka ti bampasi, Yehowa ke zolaka nde nge kudiwa na lutaninu. Yandi ke zolaka nge mingi kibeni. Yandi ke pesaka mpenza “lusadisu yina beto lenda baka kukonda mpasi na bantangu ya mpasi.”—Nkunga 46:1.

Bantu ya nkaka ke landaka kuyindula mambi yina bo salaka ntama mpi ke kudiyulaka kana Nzambi  me lolulaka bo. Kana nge ke kudiwaka mutindu yina, yibuka Yobi muntu ya kwikama. Yandi ndimaka nde yandi salaka masumu ntangu yandi vandaka leke. (Yobi 13:26) Muyimbi-bankunga, Davidi mpi kudiwaka mutindu yina, yo yina yandi bondilaka Yehowa nde: “Kuyibuka ve masumu na mono ya kileke mpi mambu na mono ya mbi.” (Nkunga 25:7) Sambu beto kele bantu ya kukonda kukuka, beto yonso ‘me salaka disumu mpi beto lenda monisa ve nkembo ya Nzambi.’—Baroma 3:23.

Bo sonikaka bangogo ya ke pesa kikesa, yina kele na Yezaya kapu 41, sambu na bantu ya Izraele. Bo salaka masumu ya nene kibeni. Yo yina Yehowa tubaka nde bo fwete baka ndola mpi kukuma bampika na Babilone. (Yezaya 39:6, 7) Kaka na ntangu yina, Nzambi silaka nde bayina ta balula ntima mpi ta vutukila yandi, yandi ta katula bo na kimpika! (Yezaya 41:8, 9; 49:8) Bubu yai, Yehowa ke monisaka zola mpi mawa ya mutindu yai na bantu yina ke balulaka ntima na masonga yonso mpi ke zolaka kupesa yandi kiese.—Nkunga 51:1.

Beto baka mbandu ya mpangi-bakala Takuya. * Yandi vandaka kusosa kuyambula bikalulu ya mbi ya kutala bafilme ti bifwanisu ya ke monisa bantu kinkonga mpi ya kusakana ti nitu na yandi ya kibakala. Yandi vandaka kusala yo mbala na mbala. Yandi kudiwaka nki mutindu? Yandi ke tuba nde: “Mono vandaka kudimona nde mono kele muntu ya mbi kibeni; kansi ntangu mono vandaka kusamba Yehowa sambu na kulomba yandi ndolula, yandi vandaka kutelemisa mono.” Yehowa salaka nki? Bankuluntu songaka Takuya na kubingaka bo konso ntangu yina yandi ke kuvutukila bifu yina. Yandi ke tuba nde: “Yo vandaka ve pete na kubinga bo, kansi ntangu yonso yina mono vandaka kubinga bo, bo vandaka kupesa mono kikesa.” Na nima bankuluntu lombaka nkengi ya nziunga na kukwenda kutala Takuya. Nkengi ya nziunga songaka Takuya nde: “Bankuluntu bantu me lomba mono na kukwisa kutala nge sambu beto solula.” Takuya ke tuba nde: “Mono muntu salaka masumu. Kansi Yehowa sadisaka mono mingi na nzila ya bankuluntu.” Nsuka-nsuka, Takuya yambulaka bifu na yandi. Yandi kumaka mupasudi-nzila ya ntangu yonso, mpi bubu yai yandi ke salaka na Betele. Kana nge me sala mbi, Yehowa ta sadisa nge mpi , kaka mutindu yandi sadisaka Takuya.

Bampangi ya nkaka ke kudiyangisaka sambu bo me konda kisalu mpi bo ke zwa ve kisalu. Yindula mpasi yina muntu ke waka kana bo ke katula-katula yandi na kisalu. Nkutu, bankaka ke monaka nde bo kele diaka ve na mfunu. Inki mutindu Yehowa lenda sadisa nge na mambu yai? Ziku yandi ta pesa nge ve mbala mosi kisalu ya mbote. Yandi lenda sadisa nge na kuyibuka bangogo yai ya Davidi: “Mono vandaka leke mpi ntangu yai mono me nuna, kansi mono me monaka ntete ve bo me yambula muntu ya lunungu, to bana na yandi ke sosa madia.” (Nkunga 37:25, noti na nsi ya lutiti.) Yehowa ke bakaka nge na mbalu mingi, mpi yandi ke simba nge ngolo na ‘diboko na yandi ya kitata ya lunungu’ sambu na kusadisa nge na kulanda kusadila yandi.

Sara, mpangi-nkento mosi ya Colombie, monaka mutindu Yehowa sadisaka yandi. Yandi vandaka kusala na kompani mosi ya nene. Ata bo vandaka kufuta yandi mbongo mingi, kisalu vandaka kubaka yandi ntangu mingi. Kansi yandi vandaka ti nzala ya  kudipesa mingi na kisalu ya Yehowa. Yo yina yandi katukaka mpi kumaka mupasudi-nzila. Yandi sosaka kisalu yina ta baka yandi ntangu fioti. Kansi yo vandaka ve. Yandi kumaka kuteka ba crème. Kansi malembe-malembe mbongo na yandi manaka mpi yandi yambulaka mumbongo yango. Yandi ke tuba nde, “Bamvula tatu lutaka; kansi Yehowa sadisaka mono na kukanga ntima.” Yandi bakisaka bima yina vandaka kibeni mfunu mpi yandi vandaka ve kudiyangisa sambu na kilumbu yina ke landa. (Matayo 6:33, 34) Nsuka-nsuka, mfumu na yandi ya ntama lombaka yandi na kusala kisalu yina yandi vandaka kusala ntete. Yandi songaka mfumu yina nde yandi lenda ndima kaka kana bo bikila yandi bilumbu ya nkaka, mpi kana bo ndima nde yandi kwendaka na balukutakanu yonso. Bubu yai, bo ke futaka ve Sara mbongo mingi mutindu bo vandaka kufuta yandi ntete. Kansi yandi kele ti ntangu ya kusala kisalu ya kimupasudi-nzila. Yandi ke tuba nde, yandi monaka zola ya Yehowa na bantangu yina ya mpasi.

Bantu mingi ke kudiyangisaka sambu bo ke kuma bambuta mpi ntama mingi ve bo ta baka pansio. Bo ke kudiyulaka kana bo ta vanda ti mbongo yina ta sadisa bo na kuzinga mbote. Bo ke kudiyangisaka mpi sambu na maladi yina bo lenda bela na bilumbu ke kwisa. Muyimbi-bankunga mosi, ziku Davidi, sambaka Yehowa nde: “Kulosa mono ve na kimununu na mono; kuyambula mono ve ntangu ngolo na mono me mana.”—Nkunga 71:9, 18.

Inki lenda sadisa bambuta na kuwa boma ve sambu na bilumbu ke kwisa? Bo fwete kumisa ngolo lukwikilu na bo na Yehowa mpi kutula ntima nde yandi ta pesa bo bima yina bo kele na yo mfunu. Kansi bankaka na kati na bo vandaka ti bima mingi ntangu bo vandaka na mbongo mingi. Ziku ntangu yai bo fwete ndima kuzinga ti bima fioti mpamba. Bo lenda bakisa nde kudia “ndunda” na kisika ya kudia “misuni” lenda vanda mbote sambu na mavimpi na bo! (Bingana 15:17) Kana nge ke kudipesa na kisalu ya Yehowa, yandi ta pesa nge bima yina ta sadisa nge kana nge me kuma mbuta.

Beto baka mbandu ya José ti Rose, Bambangi ya Yehowa yina salaka kisalu ya ntangu yonso bamvula kuluta 65. Bo kutanaka ti bampasi mingi. Papa ya Rose vandaka ti mfunu ya muntu mosi sambu na kusadisaka yandi; yo yina bo kwendaka kusadisa yandi. Bo salaka mpi José operasio mosi ya ngolo ya kansere. Inki mutindu Yehowa simbaka bampangi yai ya kwikama na diboko na yandi ya kitata? Yandi sadisaka bo na nzila ya mpangi Toni ti nkento na yandi Wendi. Bo vandaka ti nzo mpi bo kanaka kupesa yo bapasudi-nzila ya ntangu yonso. Toni yibukaka nde, ntangu yandi vandaka mwana ya nzo-nkanda, yandi vandaka kumona mutindu José ti Rose vandaka kusamuna mbala na mbala. Toni vandaka kusepela mingi ti bikesa na bo. Toni ti Wendi pesaka José ti Rose nzo yina sambu bo sadilaka Yehowa luzingu na bo ya mvimba. Bubu yai, José ti Rose kele ti bamvula 85, mpi Toni ti nkento na yandi me sadisa bo dezia bamvula 15. José ti Rose ke monaka nde, Toni ti Wendi kele dikabu ya me katuka na Yehowa.

Yehowa ke sila nge nde: “Kuwa boma ve. Mono ta sadisa nge.” Yandi ta tandudila nge mpi ‘diboko na yandi ya kitata ya lunungu.’ Keti nge ta pesa yandi diboko na nge ya kitata?