1, 2. Inki mutindu Polo monisaka nde yandi vandaka kutonda Nzambi sambu na ntima na yandi ya mbote?

NTUMWA POLO tubaka na masonga yonso nde: “Ntima ya mbote ya nene yina [Nzambi] me monisilaka mono kele ve ya mpamba.” (Tanga 1 Bakorinto 15:9, 10.) Polo bakisaka nde yo lombaka ve nde Nzambi kuwila yandi mawa sambu yandi vandaka kuniokula Bakristu.

² Na nsuka ya luzingu na yandi, Polo sonikilaka Timoteo nde: “Mono ke pesa ntonda na Kristu Yezu Mfumu na beto, yina pesaka mono ngolo, sambu yandi monaka mono ya kwikama na mutindu yandi pesaka mono kisalu.” (1 Timoteo 1:12-14) Inki kisalu Yezu pesaka Polo? Polo songaka bankuluntu ya Efezo nde: “Mono ke mona ve nde luzingu na mono kele mfunu, kansi mono ke zola kaka kubaka ntinu tii na nsuka mpi kumanisa kisalu yina Mfumu Yezu pesaka mono, ya kuta kimbangi mbote-mbote sambu na nsangu ya mbote  ya ntima ya mbote ya nene ya Nzambi.”—Bisalu 20:24.

3. Inki kisalu ya mfunu Yezu pesaka Polo? (Tala kifwanisu ya luyantiku ya disolo.)

³ Inki “nsangu ya mbote” Polo longaka, mpi nki mutindu nsangu yango monisaka ntima ya mbote ya nene ya Yehowa? Polo songaka Bakristu ya Efezo nde: “Beno waka nsangu ya kisalu ya kikapita ya ntima ya mbote ya nene ya Nzambi yina yandi pesaka mono sambu na beno.” (Baefezo 3:1, 2) Yezu songaka Polo na kulonga nsangu ya mbote na bantu yina vandaka ve Bayuda. Banda ntangu yina, bantu ya makanda lendaka kukuma bantu ya Kimfumu ya Mesia. (Tanga Baefezo 3:5-8.) Polo longaka ti kikesa mpi yandi kele mbandu ya mbote sambu na Bakristu bubu yai. Yandi monisaka nde ntima ya mbote ya nene ya Nzambi “kele ve ya mpamba.”

4, 5. Sambu na nki Biblia ke bingaka ‘nsangu ya mbote ya Kimfumu’ nde “nsangu ya mbote ya ntima ya mbote ya nene ya Nzambi”?

⁴ Na bilumbu yai ya nsuka, bansadi ya Yehowa kele ti mukumba ya kusamuna ‘nsangu ya mbote ya Kimfumu na ntoto ya mvimba sambu na kuta kimbangi na makanda yonso.’ (Matayo 24:14) Biblia ke bingaka mpi nsangu ya mbote ya Kimfumu nde “nsangu ya mbote ya ntima ya mbote ya nene ya Nzambi.” Sambu na nki? Beto ta baka balusakumunu yonso ya Kimfumu sambu na ntima ya mbote ya nene ya Yehowa. (Baefezo 1:3) Polo samunaka ti kikesa sambu na kumonisa ntonda na ntima ya mbote ya nene ya Yehowa. Keti beto ke landaka mbandu ya Polo?—Tanga Baroma 1:14-16.

⁵ Na disolo yina me luta, beto monaka nde, ata beto kele bantu ya masumu, Yehowa ke pesaka beto mambote mingi sambu na ntima na yandi ya mbote. Yo yina beto kele ti mukumba ya kulonga bantu mutindu Yehowa ke monisaka zola na yandi mpi mutindu bo lenda bakilaka yo mambote. Inki mutindu beto lenda sadisa bantu na kutonda Nzambi sambu na ntima na yandi ya mbote?

6, 7. Inki mutindu beto ke longaka bantu nsangu ya ntima ya mbote ya Nzambi ntangu beto ke tendudilaka bo nkudulu?

⁶ Bubu yai, bantu mingi ke kudiyangisaka ve kana bo me sala disumu, sambu bo ke bakisaka ve mfunu ya nkudulu. Ata mpidina, bo ke monaka nde bo ke zingaka ve na kiese. Na ntwala ya kusolula ti Bambangi ya Yehowa, bantu mingi vandaka kuzaba ve kana disumu ke tendula nki, bampasi yina yo ke natilaka bantu, mpi mambu yina bo fwete sala sambu na kukatuka na kimpika ya disumu. Ntangu bo ke bakisaka mambu yai, bayina kele ti ntima ya mbote ke tondaka Yehowa mutindu yandi tindaka Mwana na yandi na ntoto sambu na kukatula bantu na kimpika ya disumu mpi ya lufwa. Yehowa salaka mambu yai sambu yandi ke zolaka bantu mingi mpi ke monisilaka bo ntima ya mbote.—1 Yoane 4:9, 10.

⁷ Tala mambu yina Polo tubaka sambu na Mwana yina Yehowa ke zolaka mingi: “Na nzila na yandi, Nzambi me katulaka beto na kimpika na nsadisa ya nkudulu na nzila ya menga ya muntu yina, disongidila, yandi me lolulaka bifu na beto, na kutadila bunene ya ntima ya mbote na yandi ya nene.”  (Baefezo 1:7) Kimenga ya nkudulu ya Kristu kele kima ya kuluta nene ya ke monisa nde Nzambi ke zolaka beto mpi ke monisilaka beto ntima na yandi ya mbote. Yo ke pesa kiese kibeni na kuzaba nde kana beto ke ndima kimenga ya Yezu, Nzambi ta lolula masumu na beto mpi beto ta kuma ti kansansa ya mbote! (Baebreo 9:14) Yai nsangu ya mbote kibeni ya kuzabisa bantu ya nkaka!

8. Sambu na nki bantu fwete wakana diaka ti Nzambi?

⁸ Nzambi ke tadilaka bantu yina ke ndimaka ve kimenga ya Yezu bonso bambeni na yandi. Yo yina beto fwete sadisa bantu na kukuma banduku ya Nzambi. Ntumwa Yoane sonikaka nde: “Muntu yina ke monisa lukwikilu na Mwana kele na luzingu ya mvula na mvula; muntu yina ke lemfuka ve na Mwana ta mona ve luzingu, kansi makasi ya Nzambi kele na zulu na yandi.” (Yoane 3:36) Beto kele na kiese ya kuzaba nde beto lenda kuma banduku ya Nzambi na nsadisa ya kimenga ya Kristu. Polo tendulaka nde: ‘Beno vandaka ntete ntama ti Nzambi mpi bambeni na yandi sambu mabanza na beno vandaka kaka na mambu ya mbi, ntangu yai yandi me wakanisa beno ti yandi na nzila ya lufwa ya muntu yina tambikaka nitu na yandi ya kinsuni.’—Bakolosai 1:21, 22.

9, 10. (a) Inki kisalu Kristu me pesaka Bakristu yina bo me tulaka mafuta? (b) Inki mutindu “mameme ya nkaka” ke sadisaka bo?

⁹ Kristu me pesaka Bakristu yina bo me tulaka mafuta “kisalu ya kuwakanisa diaka bantu ti [Nzambi].” Polo tubaka nde: “Bima yonso ke katukaka na Nzambi; yandi wakanisaka beto ti yandi mosi na nzila ya Kristu mpi yandi pesaka beto kisalu ya kuwakanisa diaka bantu ti yandi, disongidila, Nzambi vandaka kuwakanisa nsi-ntoto ti yandi mosi na nzila ya Kristu, yandi vandaka kutangila bo ve bifu na bo, mpi yandi pesaka beto nsangu ya kuwakanisa diaka bantu ti yandi. Yo yina, beto kele mimonisi na kisika ya Kristu, bonso nde Nzambi vandaka kubondila bantu na nzila na beto. Sambu beto kele bantu yina ke sala na kisika ya Kristu, beto ke bondila bantu nde: ‘Beno wakana diaka ti Nzambi.’”—2 Bakorinto 5:18-20.

¹⁰ “Mameme ya nkaka” kele ti dibaku ya mbote ya kusala kisalu yai ti Bakristu yina bo me tulaka mafuta. (Yoane 10:16) Sambu “mameme ya nkaka” kele “mimonisi” to binati-nsangu ya Kristu, bo ke salaka mingi kisalu ya kusamuna, bo ke longaka bantu kieleka mpi ke sadisaka bo na kukuma banduku ya Yehowa. Yo ke mutindu ya mbote ya kusamuna nsangu ya mbote ya ntima ya mbote ya nene ya Nzambi.

11, 12. Sambu na nki kulonga bantu nde Yehowa ke waka bisambu kele nsangu ya mbote?

¹¹ Bantu mingi ke sambaka kaka sambu na kudiwa mbote, kansi bo ke ndimaka kibeni  ve nde Nzambi ke waka bisambu na bo. Beto fwete songa bo nde Yehowa ‘ke waka bisambu.’ Muyimbi-bankunga Davidi sambaka nde: “O nge Muntu ya ke waka kisambu, bantu ya mitindu yonso ta kwisa na nge. Bifu na mono me lutila mono, kansi nge ke fika mambu na beto ya mbi.”—Nkunga 65:2, 3.

¹² Yezu songaka balongoki na yandi nde: “Kana beno lomba konso kima yina na zina na mono, mono ta sala yo.” (Yoane 14:14) Yo ke tendula nde beto lenda lomba “konso kima” yina ke wakana ti luzolo ya Yehowa. Yoane sonikaka nde: “Beto ke tulaka ntima sambu na yandi nde, konso kima yina beto ke lomba na kuwakana ti luzolo na yandi, yandi ke waka beto.” (1 Yoane 5:14) Yo kele mbote kibeni na kusadisa bantu na kubakisa nde, beto ke sambaka ve kaka sambu na kudiwa mbote, kansi sambu na kukwenda mpi pene-pene ya “kiti ya kimfumu ya ntima ya mbote ya nene” ya Yehowa! (Baebreo 4:16) Kana beto ke longa bantu mutindu ya mbote ya kusamba, Muntu yina bo fwete samba, mpi mambu ya bo fwete lomba na kisambu, beto ta sadisa bo na kukuma banduku ya Yehowa mpi ntangu bo ta sambaka yandi na bantangu ya mpasi, yandi ta sadisaka bo.—Nkunga 4:1; 145:18.

13, 14. (a) Inki dibaku ya nene Bakristu yina bo me tulaka mafuta ta baka? (b) Inki kisalu ya mbote bo ta sala sambu na mambote ya bantu?

¹³ Yehowa ta monisa diaka mingi ntima ya mbote ya nene na nsi-ntoto ya mpa. Inki mutindu? Nzambi ta pesa bantu 144000, yina ta yala ti Kristu dibaku ya nene kibeni. Polo tendulaka dibaku yango ntangu yandi sonikaka nde: “Nzambi, sambu yandi kele ya kufuluka na mawa, mpi sambu na zola ya nene yina yandi ke zolaka beto, yandi vutulaka beto na luzingu ti Kristu, ata ntangu beto vandaka ya kufwa na bifu na beto—yandi me gulusaka beno na ntima ya mbote na yandi ya nene. Diaka, yandi futumunaka beto kumosi mpi yandi vandisaka beto kumosi na bisika ya zulu na bumosi ti Kristu Yezu, sambu na bangidika ya bima yina ke kwisa, yandi monisa kimvwama ya kukonda ndilu ya ntima ya mbote na yandi ya nene na nzila ya bumbote yina yandi monisilaka beto na bumosi ti Kristu Yezu.”—Baefezo 2:4-7.

¹⁴ Beto lenda bakisa ve mambu yonso ya mbote yina Yehowa me bumbilaka Bakristu ya bo me tulaka mafuta ntangu bo ta yala ti Kristu na zulu. (Luka 22:28-30; Bafilipi 3:20, 21; 1 Yoane 3:2) Yehowa ta monisila bo, na mutindu ya kuyituka, “kimvwama ya kukonda ndilu ya ntima ya mbote na yandi ya nene.” Bo ta kuma “Yeruzalemi ya Mpa,” nkento ya Kristu. (Kusonga 3:12; 17:14; 21:2, 9, 10) Bo ta sala ti Yezu sambu na “kubelula makanda.” Bo ta sadisa bantu na kukatuka na kimpika ya disumu ti ya lufwa  mpi kukuma bantu ya kukuka.—Tanga Kusonga 22:1, 2, 17.

15, 16. Inki mutindu Yehowa ta monisila “mameme ya nkaka” ntima ya mbote ya nene na bilumbu ke kwisa?

¹⁵ Baefezo 2:7 ke tuba nde Nzambi ta monisa ntima ya mbote ya nene na nsi-ntoto ya mpa. Na ntangu yina, bantu yonso ta mona “kimvwama ya kukonda ndilu ya ntima ya mbote na yandi ya nene.” (Luka 18:29, 30) Lufutumuku ya bafwa na “Maziamu” kele mutindu mosi ya kuluta nene yina Yehowa ta monisila bantu ntima ya mbote ya nene. (Yobi 14:13-15; Yoane 5:28, 29) Banani ta futumuka? Babakala ti bankento ya kwikama yina fwaka na ntwala ya lufwa ya Kristu mpi “mameme ya nkaka” yina ke fwa ya kwikama na bilumbu ya nsuka. Yehowa ta futumuna bantu yai yonso ya kwikama sambu na kusadila yandi.

¹⁶ Bamilio ya bantu yina ke fwaka kukonda kuzaba Nzambi ta futumuka mpi. Yoane sonikaka nde: “Mono monaka bafwa, bantu ya mfunu mpi bantu ya kukonda mfunu, bo me telama na ntwala ya kiti ya kimfumu, mpi bo kangulaka barulo. Kansi bo kangulaka rulo ya nkaka; yo kele rulo ya luzingu. Bo sambisaka bafwa na kulanda mambu yina vandaka ya kusonika na barulo, na kutadila bisalu na bo. Nzadi-mungwa vutulaka bafwa yina vandaka na kati na yo, mpi lufwa ti Maziamu vutulaka bafwa yina vandaka na kati na yo, ebuna bo sambisaka bo, konso muntu na kutadila bisalu na yandi.” (Kusonga 20:12, 13) Bantu yina ta futumuka ta vanda ti dibaku ya kulonguka  mambu ya Yehowa mpi kusadila bansiku na yandi. Bo fwete longuka mpi kuzitisa bansiku ya Biblia ti bansiku ya mpa yina ta vanda na “barulo.” Bansiku yina ya mpa ta vanda mutindu ya nkaka yina Yehowa ta monisila beto ntima na yandi ya mbote.

17. Inki beto fwete vila ve ntangu beto ke samuna?

¹⁷ Bubu yai, beto fwete longa mingi nsangu ya mbote ya Kimfumu sambu nsuka me kuma pene-pene! (Marko 13:10) Beto fwete vila ve nde beto ke samunaka sambu na kupesa Yehowa lukumu. Inki beto fwete sala? Beto fwete zabisa bantu nde balusakumunu yonso yina beto ta baka na nsi-ntoto ya mpa ta vanda kaka sambu na ntima ya mbote ya nene ya Yehowa.

18, 19. Inki mutindu beto ke pesaka Yehowa lukumu sambu na ntima na yandi ya mbote?

¹⁸ Ntangu beto ke longa bantu, beto fwete tendudila bo nde Kimfumu ya Kristu ta natila bantu mambote yonso ya nkudulu mpi malembe-malembe bo ta kuma bantu ya kukuka. Biblia ke tuba nde: “Lugangu yo mosi mpi ta katuka na kimpika ya disumu mpi ya lufwa mpi ta baka kimpwanza ya nkembo ya bana ya Nzambi.” (Baroma 8:21) Beto ta baka balusakumunu yai yonso kaka sambu na ntima ya mbote ya nene ya Yehowa.

¹⁹ Beto kele ti dibaku ya mbote ya kusonga bantu lusilu ya kitoko yina kele na Kusonga 21:4, 5: “[Nzambi] ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.” Ebuna Yehowa, yina me vanda na kiti ya kimfumu, tubaka nde: “Tala! Mono ke sala bima yonso ya mpa.” Yandi yikaka nde: “Sonika, sambu mambu yai kele ya kwikama mpi ya kieleka.” Kana beto ke longa nsangu yai ya mbote ti kikesa, pana beto ke pesa Yehowa lukumu sambu na ntima na yandi ya mbote!