Haykanush, nsamuni mosi ya Arménie ya me bakaka ntete ve mbotika, lokutaka mikanda ya muntu mosi pene-pene ya nzo na bo. Yo vandaka ti karte ya banki mpi mbongo mingi na kati. Yandi songaka yo bakala na yandi, yina vandaka mpi nsamuni ya me bakaka ntete ve mbotika.

Bo vandaka ti bamfuka mingi mpi mpasi ya mbongo mpenza. Ata mpidina, bo bakaka lukanu ya kuvutula yo na munkwa na yo, na adresi yina vandaka na mikanda yango. Bakala yina vidisaka mikanda mpi dibuta na yandi yitukaka mingi. Haykanush ti bakala na yandi tendudilaka bo nde kulonguka Biblia me sadisaka bo na kukuma masonga. Na nima bo zabisaka dibuta yina balukwikilu ya Bambangi ya Yehowa mpi bo pesaka bo mikanda.

Dibuta yina pesaka Haykanush mbongo sambu na kutonda yandi, kansi yandi bakaka yo ve. Kilumbu yina landaka, nkento ya muntu yango kwendaka kutala Haykanush ti bakala na yandi na nzo sambu na kupesa bo mersi mpi kubondila bo na kundima kubaka lupetu mosi ya diama.

Masonga ya Haykanush ti bakala na yandi lenda yitukisa mpi bantu mingi mutindu yo yitukisaka dibuta yai. Keti Yehowa yitukaka mpi? Inki mutindu yandi tadilaka masonga na bo? Keti yo lombaka nde bo vanda masonga mpidina?

Mvutu na bangiufula yai kele mpasi ve. Sambu na nki? Bansadi ya Yehowa ke zabaka nde kuvanda ti bikalulu bonso ya Yehowa ke kumisaka bo bantu ya mbalu mingi na meso na yandi kuluta diama, wolo to bima ya nkaka ya kinsuni. Ya kieleka, bima yina Yehowa ke bakaka na mbalu me swaswana ti bima yina bantu mingi ke bakaka na mbalu. (Yezaya 55:8, 9) Bansadi na yandi ke bakisaka nde bikesa yina bo ke salaka sambu na kuvanda ti bikalulu bonso ya Yehowa kele mfunu mingi.

Biblia ke monisaka pwelele dibanza yai ntangu yo ke tubilaka mayele ti luswasukusu. Bingana 3:13-15 ke tuba nde: “Kiese na muntu yina me zwa mayele mpi na muntu yina me zwa luswasukusu; kuzwa yo kele mbote kuluta kuzwa arza, mpi kuvanda ti yo bonso luta kele mbote kuluta kuvanda ti wolo. Yo kele ntalu mingi kuluta bakorayi; kima mosi ve ya nge ke zola lenda fwanana ti yo.” Ya kieleka, Yehowa ke bakaka bikalulu yai na mbalu mingi kuluta bimvwama ya kinsuni.

Inki beto lenda tuba sambu na kikalulu ya masonga?

Yehowa yandi mosi ke vandaka masonga. Yandi “lenda kusa ve.” (Tito 1:2) Yandi pesaka ntumwa Polo mpeve santu sambu na kusonikila Bakristu ya Ebreo nde: “Beno landa kusamba sambu na beto, sambu beto ke tula ntima nde beto kele ti kansansa ya mbote, sambu beto ke zola kuditwadisa na masonga na mambu yonso.”—Baebreo 13:18.

Yezu Kristu me bikaka mbandu ya mbote na yina me tala kuvanda masonga. Mu mbandu, ntangu nganga-nzambi ya nene Kaifa tubaka nde, “mono ke lomba nge na kudia ndefi na zina ya Nzambi ya moyo na kusonga beto kana nge kele Kristu, Mwana ya Nzambi!,” Yezu tubaka masonga mpi monisaka nde yandi kele Mesia. Yandi tubaka kieleka ata yandi zabaka nde bantu ya Sanedreni lendaka kufunda yandi nde yandi me vweza Nzambi mpi kufwa yandi.—Matayo 26:63-67.

Ebuna beto? Kana beto me kutana ti kima mosi yina lenda natila beto mambote mingi ya kinsuni, kansi yo ke lomba nde beto ta luvunu to beto soba mwa mambu ya nkaka, keti beto ta vanda kaka masonga?

Yo kele mpasi na kuvanda masonga na bilumbu yai ya nsuka sambu bantu mingi ‘ke kudizolaka mpi ke zolaka mbongo.’ (2 Timoteo 3:2) Kana mbongo to bisalu me kuma mpasi, bantu mingi ke kumaka kuyiba, kukusa, to kusala mambu mingi kukonda masonga. Mambu yai ke salamaka bisika yonso. Yo yina bantu mingi ke monaka nde, sambu na kuzwa bima, yo ke lomba kaka kukusa. Bampangi na beto ya nkaka, bakaka lukanu ya kubaka “luta na banzila ya luvunu,” mpi yo me bebisaka lukumu na bo na dibundu.—1 Timoteo 3:8; Tito 1:7.

Kansi bampangi mingi ke landaka mbandu ya Yezu. Bo me zaba nde, kuvanda ti bikalulu bonso ya Nzambi kele mfunu mingi kuluta bimvwama yonso ya kinsuni. Yo yina batoko yina kele Bakristu ke yibaka ve na nzo-nkanda sambu na kuzwa ba point mingi. (Bingana 20:23) Kana beto kele masonga, yo ke tendula ve nde bantu ta pesaka beto ntangu yonso matabisi bonso bo pesaka Haykanush. Kansi, kuvanda masonga kele mbote na meso ya Nzambi, mpi yo ke sadisaka beto na kuvanda ti kima mosi ya kuluta mfunu, disongidila kansansa ya mbote.

 Mbandu ya Gagik ke monisa yo. Yandi ke tuba nde: “Na ntwala ya kukuma Mbangi ya Yehowa, mono vandaka kusala na kompani mosi ya nene, yina mfumu na yo vandaka kusonga leta mbongo fioti mpamba sambu na kufuta ve mpaku. Sambu mono vandaka ntwadisi ya bisalu, mono vandaka kuwakana ti kalaki ya mpaku sambu yandi tula ve dikebi na mambu ya mbi ya kompani. Yo yina mono zabanaka bonso muntu mosi ya luvunu. Ntangu mono kumaka Mbangi ya Yehowa, mono yambulaka kikalulu yina, ata kompani vandaka kufuta mono mbongo mingi. Na nima, mono salaka kompani na mono mosi; mono sonikisaka yo na leta mpi mono vandaka kufuta bampaku yonso.”—2 Bakorinto 8:21.

Gagik ke tuba nde: “Mono ke bakaka diaka ve mbongo mingi bonso na kompani ya ntete, mpi kulungisa bampusa ya dibuta kumaka mpasi. Kansi bubu yai mono kele na kiese mingi. Mono kele mpi ti kansansa ya mbote na meso ya Yehowa. Mono ke pesaka bana na mono zole mbandu ya mbote, mpi mono me bakaka mikumba na dibundu. Bubu yai, bakalaki ya mpaku ti bantu yina mono ke salaka ti bo ke zabaka nde mono kele muntu ya masonga.”

Kana muntu ke landa mbandu ya Yehowa, mu mbandu kuvanda masonga, Yehowa ke zolaka yandi mingi sambu yo ke pesaka Yehowa lukumu. (Tito 2:10) Yandi ke sila nde yandi ta sadisa beto kana beto sala mpidina. Yandi pesaka Davidi mpeve santu sambu na kusonika nde: “Mono vandaka leke mpi ntangu yai mono me nuna, kansi mono me monaka ntete ve bo me yambula muntu ya lunungu, to bana na yandi ke sosa mampa.”—Nkunga 37:25.

Luzingu ya Ruti, nkento mosi ya kwikama, ke monisa yo. Yandi kangamaka ti bokilo na yandi Naomi mpi yambulaka yandi ve ata Naomi kumaka mbuta. Ruti kwendaka kuzinga na Izraele, kisika yandi lendaka kusambila Nzambi ya kieleka. (Ruti 1:16, 17) Yandi vandaka masonga mpi salaka bikesa sambu na kulokuta bambuma, mutindu nsiku tubaka sambu na bansukami. Kaka mutindu Davidi tubaka yo bamvula mingi na nima, Yehowa yambulaka ve ata fioti Ruti ti Naomi. (Ruti 2:2-18) Yehowa salaka mambu mingi ya nkaka sambu na Ruti. Yandi kumisaka yandi nkaka ya Ntotila Davidi mpi ya Mesia ya lusilu!—Ruti 4:13-17; Matayo 1:5, 16.

Bansadi ya nkaka ya Yehowa ke zwaka mbongo na mpasi sambu na kulungisa bampusa na bo. Na kisika ya kukusa sambu na kuzwa mbongo kukonda mpasi, bo ke salaka kisalu ngolo mpi ke vandaka kikesa. Ntangu bo ke salaka mpidina, bo ke monisaka nde bikalulu ya kitoko ya Nzambi, mu mbandu kikalulu ya masonga, kele mfunu mingi kuluta bima ya kinsuni.—Bingana 12:24; Baefezo 4:28.

Bonso Ruti, Bambangi ya Yehowa na ntoto ya mvimba ke kwikilaka nde Yehowa lenda sadisa bo. Bo ke tulaka ntima ya mvimba na lusilu na yandi yai: “Mono ta bikisa nge ve ata fioti mpi mono ta yambula nge ve ata fioti.” (Baebreo 13:5) Yehowa ke monisaka mbala na mbala nde yandi kele ti ngolo ya kusadisa bantu yina ke vandaka ntangu yonso masonga. Yandi ke lungisaka lusilu na yandi ya kupesa bansadi na yandi bima yina bo kele na yo mfunu.—Matayo 6:33.

Ya kieleka, bantu lenda baka diama ti bima ya nkaka ya kinsuni na mbalu mingi. Kansi beto vila ve nde Tata na beto ya zulu ke bakaka na mbalu mingi kikalulu na beto ya masonga mpi bikalulu ya nkaka ya mbote, kuluta konso ditadi ya ntalu!