KANA muntu me sekisa nge, nge ke salaka nki? Ntembe kele ve nde nge ke sekaka mpi. Ziku nge ke waka mpi kiese. Ya kieleka, kuseka ya masonga, yo vanda ya banduku to ya bantu yina nge me zaba ve, ke pusaka nge mpi na kuseka, mpi yo ke basisaka mawi ya mbote. Nkento mosi, zina na yandi Magdalena, tubaka nde: “Georg, bakala na mono ya me fwaka, vandaka kuseka mingi. Ntangu beto vandaka kutalana, mono vandaka kudiwa mbote mpi na lutaninu.”

Kuseka ya masonga ke monisaka mawi ya mbote, mu mbandu kiese. Ya kieleka, disolo mosi ya mukanda Observer, zulunalu mosi ya Association for Psychological Science yina basikaka na Internet tubaka nde: ‘Kuseka kele kima yina beto ke butukaka ti yo. Ata bana yina me katuka kubutuka ke bakisaka kukonda mpasi bidimbu ya luse.’ Disolo yango tubaka diaka nde: “Bantu ke bakaka ve kaka bansangu ya mfunu na kuseka ya bantu ya nkaka, kansi yo ke sadisaka bo mpi na kuzaba mutindu bo fwete sala mambu.” *

Bantu yina ke salaka bansosa na Iniversite ya Harvard na États-Unis longukaka kimvuka mosi ya minunu yina vandaka kubela mpi mambu ya bo vandaka kusala kana bo mona bidimbu ya luse ya bantu yina vandaka kukeba bo. Bantu yina ke tuba nde: “Kana bambefo kumona nde luse ya bantu yina ke keba bo kele ya mawete, ke monisa nde bo ke  kudiyangisa sambu na bo, ke tudila bo dikebi, mpi ke kuditula na kisika na bo,” bo vandaka kuwa kiese mpi mavimpi na bo ya nitu ti ya mabanza vandaka kukuma mbote. Kansi ntangu luse na bo vandaka ve kumonisa bidimbu yina, yo vandaka kusala nde bambefo kuvanda ntama ti bo.

Ntangu nge ke seka, nge lenda kudisadisa. Bansosa me monisaka nde yo ke sadisaka na kukuma kuditudila ntima mingi, na kukuma na kiese mingi, mpi na kudiyangisa ve mingi. Kansi, kukanga luse lenda natila nge ve mambote.

Magdalena, yina beto tubilaka dezia, vandaka Mbangi ya Yehowa na Mvita ya Zole ya Ntoto ya Mvimba. Bo tindaka yandi ti bantu ya dibuta na yandi ya nkaka na camp ya konsantrasio ya Ravensbrück (na Allemagne) sambu bo buyaka kundima bangindu ya Banazi. Yandi ke tuba nde: “Bantangu ya nkaka, bantu yina vandaka kukengila beto vandaka kubuyisa beto na kusolula ti bantu ya nkaka ya boloko. Kansi bo vandaka ve ti kiyeka na bidimbu na beto ya luse. Kumona mama ti mpangi na mono ya nkento ke seka pesaka mono kikesa mpi kumisaka ngolo lukanu na mono ya kukanga ntima.”

Ziku nge ke monaka nde basusi ya luzingu ke pesaka nge ve bikuma mingi ya kuseka. Kansi, kuvila ve nde mbala mingi mawi ke katukaka na bangindu. (Bingana 15:15; Bafilipi 4:8, 9) Yo yina, ata yo lenda vanda mpasi, sambu na nki ve kuyindula mambu ya mbote mpi ya kitoko kana mpila kele? * Kutanga Biblia mpi kusamba me sadisaka bantu mingi na kusala mutindu yina. (Matayo 5:3; Bafilipi 4:6, 7) Ya kieleka, beto ke kuta ngogo “kiese” mbala mingi na Biblia! Sambu na nki ve kutanga lutiti mosi to balutiti zole konso kilumbu? Mbala ya nkaka yo lenda sadisa nge. Nge mpi lenda kuma ti kikalulu ya kuseka mingi.

Diaka, kuvingila ve nde bantu ya nkaka kusekisa nge. Sala kitambi ya ntete; yika kiese na luzingu ya muntu ya nkaka. Ya kieleka, tadila kuseka na nge mutindu yo kele kibeni, disongidila dikabu ya me katuka na Nzambi yina ke sadisa nge mpi bantu yina ke mona yo.