“Kana bantu ya mbi kumena bonso matiti ya mbi mpi bantu yonso ya ke salaka mambu ya mbi kukuma mingi, yo kele sambu bo manisa bo kimakulu.”—NKUNGA 92:7.

Mutindu beto me mona yo na disolo ya me luta, mambu ya mbi ke kuma kaka mingi. Mambu yai fwete yitukisa beto ve. Beto ke yituka ve sambu Biblia tubaka na 2 Timoteo 3:1-5 nde na “bilumbu ya nsuka,” bantu ta kuma mbi kuluta. Bilumbu ya nsuka ya nki? Bilumbu ya nsuka ya bantu ya nsi-ntoto yai ya ke lemfukilaka ve Nzambi. Ntama mingi ve, Nzambi ta fwa bantu yina ke buya kusoba bikalulu na bo. Na nima, kaka bantu ya mbote, disongidila bantu yina ke lemfukilaka Nzambi, bantu ta zinga na ntoto. “Bantu ya lunungu ta baka ntoto, mpi bo ta zinga kimakulu na zulu na yo.”—Nkunga 37:29.

“Nzambi yina ke pesaka ngemba ta niata Satana.”—BAROMA 16:20.

Ntangu Satana, bademo mpi bantu yonso ya mbi ta vanda diaka ve, ngemba ta kota na ntoto. Muntu  yina me salaka beto ke tuba nde: “Ata muntu mosi ve ta pesa bo boma.”—Mika 4:4.

“Tenta ya Nzambi kele ti bantu . . . Mpi yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve.”—KUSONGA 21:3, 4.

Mpasi mpi maladi ta katuka sambu Nzambi ta katula bampasi yonso yina Satana, Adami, Eva mpi kukonda kukuka na beto mosi ke natilaka beto. Yo yina, yo vanda “lufwa ta vandaka diaka ve.” Bantu yina ke zolaka muntu yina me salaka beto mpi ke lemfukilaka yandi ta zinga mvula na mvula. Kansi na wapi?

“Ntoto-makanga ti ntoto ya kuyuma ta vanda na kiese, mpi ntoto ya zelo na zelo ta yangalala mpi ta basisa bintuntu bonso safrani.”—YEZAYA 35:1.

Ntangu Nzambi ta katula mambu yonso ya mbi, ntoto ta kuma paladisu. Baparke mpi masamba (jardin) ta vanda mingi. Madia mpi ta vanda mingi. (Nkunga 72:16) Banzadi-mungwa, mazanga mpi bamasa ta vanda bunkete mpi ta fuluka ti bigangwa. Bantu ta yibuka diaka ve nde ntoto vandaka mvindu. Bantu ta tunga banzo na bo mosi mpi bo ta zinga muna. Ata muntu mosi ve ta konda nzo, ta vanda nzala to nsukami.—Yezaya 65:21, 22.

“Bantu . . . ta futumuka.”—BISALU 24:15.

Keti nge ta sepela diaka kumona bantu yina nge vandaka kuzola ya me fwaka? Nzambi Nkwa-Ngolo Yonso ta vutula bo na luzingu na paladisu to ta futumuna bo. Nge ta zaba bo, bo mpi bo ta zaba nge. Mona na mabanza kiese yina beno ta vanda ti yo, nge ti bo. Sambu na nki beto lenda ndima nde mambu yai ta salama? Sambu Biblia ke pesa beto mbandu ya bambuta mpi ya bana yina Nzambi vutulaka na luzingu mpi vukanaka diaka ti bantu ya mabuta na bo. Diaka, Yezu vandaka kufutumuna bafwa na meso ya bantu mingi.—Luka 8:​49-56; Yoane 11:11-14, 38-44.