Kana beto kele ti bikuma ya ke ndimisa nde bampasi ta mana, yo ta soba mutindu na beto ya kutadila luzingu mpi Nzambi.

Bantu mingi ke zolaka kumanisa bampasi kansi bo kele ve ti ngolo ya kusala yo. Mu mbandu:

Ata bantu me yedisaka mayele mingi na kimunganga . . .

• Maladi ya ntima ke landa kufwa bantu mingi.

• Maladi ya kansere ke fwa bantu mingi konso mvula.

• Na zulunalu mosi (Frontiers in Immunology) David Bloom, yina kele munganga ya nene ke tuba nde: “Ntoto ya mvimba ke landa kukutana ti maladi ya mbi yina ke fwaka bantu mpi maladi ke landa kukuma mingi.”

Ata bansi yina kele na mbongo mingi . . .

• Konso mvula bana mingi ke fwa mpi mingi na kati na bo ke zinga na bisika yina bantu kele bansukami.

• Bantu mingi kele ve ti makuki ya kuyidika luzingu na bo sambu bo zinga na mutindu mosi ya bunkete.

• Bamilio ya bantu kele ve ti masa ya bunkete.

Ata bantu me tomisaka mingi mayele na yina me tala kunwanina banswa ya bantu . . .

• Rapore mosi ya Nations-Unies ke monisa nde na bisika mpi na bansi mingi, bo ke landa kuniokula to kuteka bantu mpi bamfumu ya luyalu ke landila ve bantu ya ke sala mambu yina sambu “bo ke zaba ve nde mambu ya mutindu yina ke salama na bansi na bo to bo me yidikaka ve mambu sambu na kusungika bantu yina ke salaka mambu ya mutindu yina.”

  LONGUKA MAMBU MINGI

  Tala video Kimfumu ya Nzambi Kele Nki? na jw.org.

Nzambi ke tudilaka beto dikebi.

Yandi ke sepelaka ve ntangu beto ke monaka mpasi.

“[Nzambi] me vweza ve mpi me seka ve mpasi ya muntu ya bo ke niokula; yandi me bumbila yandi ve luse na yandi. Ntangu yandi didilaka yandi sambu na kulomba lusadisu, yandi waka.”—NKUNGA 22:24.

“Beno . . . losa basusi na beno yonso na yandi sambu yandi ke kudibanzaka sambu na beno.”—1 PIERE 5:7.

Bantu ta landa ve kumona mpasi mvula na mvula.

Biblia ke monisa nde mambu yina Nzambi zolaka sambu na beto ta lungana.

“Nzambi . . . ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve.”—KUSONGA 21:3, 4.

Nzambi ta katula mambu yonso yina ke pesaka bantu mpasi.

Nzambi ta sala yo na nzila ya Kimfumu na yandi.

“Nzambi ya zulu ta tula kimfumu mosi yina ta fwa ve ata fioti. Kimfumu yina ta kwenda ve na bantu ya nkaka. . . . yo mpamba ta bikala kimakulu.”—DANIELE 2:44.