MUNSIKU YA BIBLIA: “Muntu yina ke waka makasi nswalu ve kele mbote kuluta muntu ya ngolo.”—Bingana 16:32.

MAMBU YINA YO KE TENDULA: Beto ke bakaka mambote kana beto ke yala mabanza na beto. Bantangu ya nkaka, beto lenda vanda ti kikuma ya mbote ya kuwa makasi kansi kana beto yala yo ve, yo lenda pusa beto na kusala diambu ya mbi. Bantu yina ke salaka bansosa ke tubaka nde mbala mingi kana muntu kele ti makasi, yandi ke yindulaka ve mbote mpi ke tubaka to ke salaka mambu yina ta pesa yandi mpasi na nima.

MAMBU YA NGE LENDA SALA: Sosa kuyala makasi na ntwala nde yo pusa nge na kusala diambu ya mbi. Bantu ya nkaka ke yindulaka nde muntu yina ke waka makasi mpamba-mpamba kele muntu ya ngolo, kansi na kutuba ya mbote yandi kele ngolo ve. Biblia ke tuba nde: “Muntu yina lenda yala ve makasi na yandi kele bonso mbanza yina bo me panza, yina me konda kibaka.” (Bingana 25:28) Mutindu ya mbote ya kuyala makasi na nge kele ya kuzaba ntete mambu yina salamaka na ntwala ya kutuba to ya kusala diambu mosi. Biblia ke tuba nde: “Mayele ya kubakisa mambu mbote-mbote ya muntu ke kulumusaka kibeni makasi na yandi.” (Bingana 19:11) Beto fwete sosa kuzaba mbote-mbote mambu yina salamaka sambu yo lenda sadisa beto na kulembika makasi na beto.

MUNSIKU YA BIBLIA: “Beno pesa matondo.”—Bakolosai 3:15.

MAMBU YINA YO KE TENDULA: Muntu yina ke monisaka ntonda ke vandaka na kiese. Bantu ya me fwisaka muntu to me vidisaka kima mosi ya mfunu ke ndimaka mpi mambu yai. Bo ke tubaka nde kima sadisaka bo na kununga bampasi yina kele ntonda ya bo vandaka kumonisa sambu  na bima yina bo kele na yo kansi ve kuyindula ntangu yonso bima yina bo me vidisaka.

MAMBU YA NGE LENDA SALA: Konso kilumbu, yindula to sonika mambu yina nge fwete monisa ntonda sambu na yo. Yo fwete vanda ve kaka mambu ya nene, ata ya fioti mpi. Mu mbandu, kumona mutindu ntangu ke basika, disolo ya mbote ti muntu yina nge ke zolaka, to mutindu nge me kuma na kilumbu ya nkaka. Kana nge ke yindula mingi mambu yai mpi ke monisa ntonda sambu na yo, yo lenda sadisa nge na kuvanda na kiese.

Kana nge ke yindula bikuma yina nge fwete monisa ntonda na dibuta mpi na banduku na nge, yo lenda sadisa nge mingi. Kana muntu mosi me sala diambu ya mbote mpi nge me mona yo, songa yandi yo to sonikila yandi yo na message to na mukanda. Mbala ya nkaka, mambu yai ta kumisa kinduku na beno ngolo mpi nge ta vanda na kiese sambu nge ke sadila bantu ya nkaka mambu ya mbote.—Bisalu 20:35.

BUYA KUSWANA.

“Kuyantikisa bitumba kele bonso kukangula bakielo ya masa; na ntwala nde kuswana kuyantika, katuka pana.”—BINGANA 17:14.

KUDIYANGISA VE SAMBU NA BILUMBU KE KWISA.

“Beno kudiyangisa ve ata fioti sambu na kilumbu yina ke landa, sambu kilumbu yina ke landa ta vanda ti basusi na yo. Konso kilumbu ke vandaka ti bampasi na yo.”—MATAYO 6:34.

KUSALA VE MAMBU NA KUTADILA MUTINDU NGE KE KUDIWA, KANSI NA NTWALA YA KUSALA DIAMBU MOSI, YINDULA MBOTE.

“Mayele ya kuyindula ta landa kukeba nge, mpi luswasukusu ta tanina nge.”—BINGANA 2:11.