Sambu na Nki Mvutu Kele Mfunu?
Sambu na nki yo kele mfunu na kuzaba kana yo kele ti Muntu Yina Me Salaka Bima Yonso to ve? Kana nge me ndima mambu ya ke monisa nde Nzambi nkwa-ngolo yonso kele, mbala ya nkaka nge ta sosa kutadila mambu ya ke monisa nde yandi muntu pesaka bantu mpeve santu sambu na kusonika Biblia. Kana nge ke ndima mambu yina Biblia ke tuba, tala mambote yina nge ta baka:
Nge ta kuma kusepela mingi ti luzingu
BIBLIA KE TUBAKA NDE: “[Nzambi] salaka mambu ya mbote mutindu yandi ke pesaka beno mvula mpi bansungi yina bambuma ke basikaka mingi, ebuna yandi ke pesaka beno madia mingi mpi ke fulusaka bantima na beno na kiese.”—Bisalu 14:17.
MAMBU YINA YO KE TENDULA: Konso kima ya ke pesaka nge kiese ya kele na zulu mpi na ntoto kele dikabu ya Muntu Yina Me Salaka Bima Yonso. Nge ta sepela diaka mingi ti makabu yina ntangu nge ta zaba nde Muntu Yina Pesaka yo ke zolaka nge mingi kibeni.
Nge ta zwa bandongisila ya mbote yina lenda sadisa nge
BIBLIA KE TUBAKA NDE: “Nge ta bakisa mambu ya lunungu, ya mbote, mpi ya me fwana, nzila ya mvimba ya mambu ya mbote.”—Bingana 2:9.
MAMBU YINA YO KE TENDULA: Nzambi Muntu Salaka nge, yo yina yandi me zaba inki nge kele na yo mfunu sambu na kuvanda na kiese. Kana nge tadila mambu ya kele Biblia, nge ta mona minsiku yina ta sadisa nge na luzingu ya konso kilumbu.
Nge ta zwa bamvutu na bangiufula na nge
BIBLIA KE TUBAKA NDE: “Nge ta zwa nzayilu ya Nzambi.”—Bingana 2:5.
MAMBU YINA YO KE TENDULA: Kana nge me zaba nde yo kele ti Muntu Mosi ya Salaka Bima Yonso, nge lenda zwa bamvutu na bangiufula ya mfunu bonso: Sambu na nki beto ke zingaka? Sambu na nki bampasi kele mingi? Inki ke salamaka kana muntu me fwa? Biblia ta pesa nge bamvutu yina ta ndimisa nge.
Nge ta vanda ti kivuvu sambu na bilumbu ya ke kwisa
BIBLIA KE TUBAKA NDE: “‘Mono me zaba mbote bangindu yina mono ke yindula sambu na beno,’ Yehowa muntu me tuba, ‘bangindu ya ngemba, kansi ya mpasi ve, sambu na kupesa beno makwisa mpi kivuvu.’”—Yeremia 29:11.
MAMBU YINA YO KE TENDULA: Nzambi me tuba nde na bilumbu ya ke kwisa, yandi ta katula mambi, bampasi mpi nkutu lufwa. Kana nge ke ndima nde Nzambi ta sala mambu yina yandi me tuba, nge ta kuma ti kivuvu mosi ya mbote yina ta sadisa nge na kukanga ntima na bampasi ya luzingu ti kikesa yonso.
Nge Lenda Sepela Mpi Ti
TELAMA!
Nzila ya Ke Nataka na Kiese—Lukanu na Luzingu
Kuzwa bamvutu ya mbote na bangiufula ya nene ya luzingu kele mfunu mingi sambu na kuvanda na kiese.
