Kana nge ke wa nzala ya kusala diambu mosi, mingi-mingi diambu mosi ya mbi, pana beto lenda tuba nde nge me kutana ti mpukumuna. Mu mbandu, ntangu nge me kwenda kusumba bima, nge me mona kima mosi ya kitoko. Ngindu me kwisila nge nde nge lenda yiba yo kukonda mpasi mpi bo ta kanga nge ve. Kansi, kansansa na nge me buyisa nge! Nge me katula ngindu yina mpi nge me kwenda. Na ntangu yina, mpukumuna me mana, mpi nge me nunga yo.

MAMBU YINA BIBLIA KE TUBAKA

Kana nge me kutana ti mpukumuna yo ke tendula ve nde nge me kuma muntu ya mbi. Biblia ke ndima nde beto yonso ke kutanaka ti bampukumuna. (1 Bakorinto 10:13) Diambu ya mfunu kele mambu ya beto ke salaka kana beto me kutana ti mpukumuna. Bantu ya nkaka ke landaka kuyindula nzala yina ya mbi mpi nsuka-nsuka bo ke bwaka. Bankaka ke yambulaka kuyindula yo kukonda kusukinina sambu yo kele mbi.

“Konso muntu ke mekamaka kana yandi ke bika nde nzala na yandi mosi kubenda yandi mpi kupukumuna yandi.”—Yakobo 1:14.

Biblia ke monisa bitambi yina ke nataka muntu na kusala diambu ya mbi. Yakobo 1:15 ke tuba nde: “Nzala [ya mbi], kana yo me baka divumu, yo ke butaka disumu.” Na kutuba ya pete, kana beto ke landa kuyindula nzala mosi ya mbi, beto ta kuma na kisika yina yo ta lomba nde beto lungisa nzala yina kaka mutindu nkento yina kele ti divumu ke butaka. Kansi, beto lenda buya kuvanda bampika ya banzala ya mbi. Beto lenda yala yo.

MUTINDU BIBLIA LENDA SADISA NGE

Mutindu mabanza na beto lenda kotisa banzala ya mbi, mutindu mosi mpi yo lenda basisa yo. Inki mutindu? Kana beto ke tula dikebi na kima ya nkaka, mu mbandu kisalu mosi, kusolula ti nduku mosi, to kuyindula diambu mosi ya mbote. (Bafilipi 4:8) Yo kele mpi mfunu na kuyindula mambu ya nge ta kutana ti yo kana nge bwa na mpukumuna, mu mbandu mpasi ya mawi, mpasi na nitu, to mpasi ya kimpeve. (Kulonga 32:29) Kisambu mpi lenda sadisa nge mingi. Yezu Kristu tubaka nde: “Beno samba ntangu yonso sambu beno bwa ve na mpukumuna.”—Matayo 26:41.

“Beno kudikusa ve: Bo ke sekaka Nzambi ve. Sambu konso kima yina muntu ke kuna, yandi ta katula yo mpi.”—Bagalatia 6:7.

DIAMBU YA KIELEKA

Tadila mpukumuna mutindu yo kele kibeni, disongidila mutambu to pambu yina lenda nata zoba na kigonsa. (Yakobo 1:14, noti na nsi ya lutiti) Diambu yai kele mfunu mingi sambu na bampukumuna ya ke tadila kuvukisa nitu sambu yo lenda vanda ti malanda ya mbi kibeni.—Bingana 7:22, 23.

MUTINDU BIBLIA LENDA SADISA NGE

Yezu Kristu tubaka nde: “Yo yina, kana disu na nge ya kitata ke budisa nge sakuba, tumuna yo mpi losa yo ntama ti nge.” (Matayo 5:29) Ya kieleka, Yezu tubaka na mutindu ya kifwani! Kansi, yandi zolaka kutuba nde kana beto ke zola kusepedisa Nzambi mpi kubaka luzingu ya mvula na mvula, beto fwete fwa bitini ya nitu na beto, na mutindu mosi buna, na yina me tala kusala mambu ya mbi. (Bakolosai 3:5) Yo lenda tendula nde beto baka lukanu ya ngolo ya kutina mpukumuna. Muntu mosi ya kwikama sambaka Nzambi nde: “Katula meso na mono sambu yo tala ve mambu ya kukonda mfunu.”—Nkunga 119:37.

Ya kieleka, yo lenda vanda mpasi na kudiyala. Na kutuba ya masonga, “nsuni kele ngolo ve.” (Matayo 26:41) Yo ke tendula nde beto ta salaka bifu. Kansi, kana beto me wa kibeni mawa mpi beto me sala ngolo sambu beto vanda ve ti kikalulu ya kusala mambu ya mbi, Ngangi na beto, Yehowa Nzambi, ‘ta wila beto mawa mpi ta fwila beto nkenda.’ (Nkunga 103:8) Mambu yai ke pesa kikesa kibeni!

“Kana nge vandaka kutala bifu, O Yah, O Yehowa, nani lendaka kutelama?”—Nkunga 130:3.