Inki Bupusi Ba-Apareyi Ke Vandaka Ti Yo na Makwela na Nge?
Kana bankwelani ke sadila ba-apareyi mbote, yo lenda kumisa kinduku na bo ya makwela ngolo. Mu mbandu, yo lenda sadisa bo na kusolula konso ntangu yina na kilumbu.
Kansi bankwelani ya nkaka ke sadilaka ve ba-apareyi na bo mbote. Kusadila yo mpidina lenda . . .
-
yiba bo ntangu yina bo lenda lutisa bo zole.
-
sala nde bo sala kisalu na ntangu yina bo lenda sala yo ve.
-
sala nde bo yantika kubumbilana mambu to nkutu kusala nde bo kangama ve kaka na bo zole.
MAMBU YA NGE FWETE ZABA
KULUTISA NTANGU BENO ZOLE
Bakala mosi na zina ya Michael ke tuba nde: “Bantangu ya nkaka, mono ke vandaka ti nkento na mono kisika mosi, kansi yo ke monanaka bonso nde yandi kele ve. Yandi ke tulaka meso kaka na telefone na yandi mpi yandi ke tubaka nde, ‘Mono vandaka me tanga ntete ve ba message to mambu ya nkaka tii sesepi.’” Bakala mosi na zina ya Jonathan ke tuba nde: “na ntangu yina bakala ti nkento ke vandaka bo zole kisika mosi, kansi yo ke monanaka bonso nde bo kele ve kisika mosi.”
MAMBU YA KUYINDULULA: Mbala ikwa telefone na nge ke dilaka, bo ke tindilaka nge ba message, na ntangu ya nge ke solula ti nkwelani na nge?—BAEFEZO 5:33.
KISALU
Yo ke lombaka nde bantu ya nkaka kuyamba telefone kana bo me binga to bo pesa mvutu kana bo me tindila bo message ata bo kele na nzo sambu kisalu na bo ke lombaka nde bo sala mpidina. Kansi bantu ya nkaka ke salaka ve kisalu yina ke lombaka bo na kulutisa bantangu mingi, ata mpidina bo ke kukaka kibeni ve kuyambula mambu ya kisalu ata bo kele na nzo. Bakala mosi na zina ya Lee ke tuba nde: “Konso mbala ya bo ke bingaka mono to ya bo ke tindilaka mono message sambu na mambu ya kisalu, mono ke kukaka ve kusala nde mono tala ve nani me binga to nani me tinda message, ata yo kele ntangu yina mono me tulaka sambu na kulutisa ti nkento na mono.” Nkento mosi na zina ya Yoy ke tuba nde: “Mono ke salaka na nzo, yo yina yo ke vandaka mpasi na kuzaba ntangu ya kumanisa kisalu. Yo ke vandaka mpasi sambu na kuvanda ti bukati-kati.”
MAMBU YA KUYINDULULA: Keti nge ke widikilaka na dikebi yonso nkwelani na nge ntangu yandi ke solulaka ti nge?—LUKA 8:18.
KUTULA MAKWELA NA KIGONSA
Bantu mingi ke tubaka nde bo me swanaka ti bankwelani na bo sambu mosi na kati na bo ke sadilaka Internet na mutindu ya kubumbana. Bantu ya nkaka tubaka nde bo ke tulaka bima na Internet na kinsweki sambu bo ke zolaka ve nde bankwelani na bo kuzaba.
Bantu mingi ke tubaka nde Internet ke vandaka kigonsa sambu na bankwelani mpi nkutu yo ke salaka nde bantu kubwa na mutambu ya bizumba kukonda mpasi. Yo kele ve kima ya kuyituka ntangu bazuzi ke tubaka nde Internet ke salaka nde makwela mingi kufwa.
MAMBU YA KUYINDULULA: Keti nge ke bumbilaka nkwelani na nge masolo ya nge ke solulaka ti bakala to ti nkento ya nkaka?—BINGANA 4:23.
MAMBU YA NGE LENDA SALA
VANDA TI MAMBU YA KUTULA NA KISIKA YA NTETE
Muntu yina ke diaka ve ta vanda ve na sante ya mbote. Kiteso mosi, nkwelani yina ke lutisaka ve ntangu ti bakala na yandi to nkento na yandi, makwela na yandi ta vanda ve mbote.—Baefezo 5:28, 29.
MUNSIKU YA BIBLIA: “Zikisa mambu ya kuluta mfunu.”—BAFILIPI 1:10.
Solula ti nkwelani na nge sambu na kuzaba inki bangindu na kati ya bangindu ya kele awa na nsi nge ta sepela kusadila, to sonika bangindu na nge sambu ba-apareyi kubebisa ve ntangu yina nge fwete lutisa ti nkwelani na nge.
-
Kudia ata mbala mosi kisika mosi konso kilumbu
-
Kusosa ntangu yina beno ta sadilaka ve ba-apareyi
-
Kutula ntangu mosi sambu na kusala kima mosi ya sipesiali beno zole
-
Kukanga ba-apareyi na mpimpa mpi kutula yo ntama ti kisika ya kulala
-
Kubaka minuta 15 konso kilumbu sambu na kusolula kukonda nde ba-apareyi kuyangisa beno
-
Kutula konso kilumbu ntangu ya kubasika na Internet
Nge Lenda Sepela Mpi Ti
MAKWELA MPI DIBUTA
Bika Mambu ya Kisalu na Kisika “ya Kisalu”
Mambu tanu yina ta sadisa nge na kubika kisalu na kisika na yo sambu yo bebisa ve makwela na nge.
