Inki Bupusi Ba-Apareyi Ke Vandaka Ti Yo na Mayele na Nge?
Bantu ke longukaka ntangu yonso—yo vanda sambu na nzo-nkanda, kisalu, to mambu ya nkaka. Ba-apareyi lenda sadisa bo na kulonguka. Na luzingu, yo ke vandaka mpasi na kuzwa bansangu, kana nge kele kaka na nzo na nge to nkutu ya kuvanda kaka na kiti na nge.
Kansi bantu mingi yina ke sadilaka ba-apareyi ke monaka nde . . .
-
bo ke kukaka ve kutula dikebi ntangu bo ke tanga.
-
bo ke kukaka ve kutula dikebi kaka na kima mosi.
-
bo ke lembaka nswalu kana bo kele bo mosi.
MAMBU YA NGE FWETE ZABA
KUTANGA
Bantangu ya nkaka, bantu yina ke sadilaka mbala mingi ba-apareyi ke kukaka ve kutanga mukanda mosi buna tii na nsuka.
Kutala disolo mosi buna ntinu-ntinu ke vandaka mbote kana nge ke sosa nswalu mvutu na ngiufula mosi. Kansi yo ke vandaka ve mbote kana nge ke zola kibeni kubakisa diambu mosi buna.
MAMBU YA KUYINDULULA: Keti nge ke kukaka kutanga disolo mosi ya nda tii na nsuka? Sambu na nki kutanga disolo mosi buna na dikebi yonso ta sadisa nge na kulonguka mbote?—BINGANA 18:15.
KUTULA DIKEBI
Bantu ya nkaka ke monaka nde ba-apareyi lenda sadisa bo na kusala mambu mingi na mbala mosi, mu mbandu kusonikila banduku na bo mpi kulonguka. Kansi kana muntu ke sala mambu mingi na mbala mosi, yandi ta kuka ve kusala mbote ata kima mosi, mingi-mingi kana mambu yango ke lomba kutula dikebi.
Kutula dikebi kaka na kima mosi ke lombaka kudiyala. Toko mosi ya nkento na zina ya Grace ke tuba nde: “Nge ta sala ve bifu mingi mpi nge ta vanda ve ti basusi mingi. Mono me zabaka nde, yo kele mbote na kutula dikebi kaka na kima mosi na mbala mosi na kisika ya kusala mambu mingi na mbala mosi kukonda kutula dikebi.”
MAMBU YA KUYINDULULA: Keti kusala mambu mingi na mbala mosi ke salaka nde nge kuka ve kutula dikebi kaka na kima mosi mpi kuyibuka mambu ya nge me longuka?—BINGANA 17:24.
KUVANDA NGE MOSI
Bantu ya nkaka ke zolaka ve kuvanda bo mosi na kisika mosi ya pima. Yo yina bo ke sadilaka ba-apareyi sambu na kulutisa ntangu. Nkento mosi na zina ya Olivia ke tuba nde: “Mono ke kukaka ve kusala minuta 15 kukonda kutala apareyi na mono to tablette na mono to kukangula televizio.”
Kansi, sambu na kulonguka, yo ke vandaka mfunu nde muntu kuvanda yandi mosi sambu yandi yindula na mudindu. Diambu yai ke tadila bambuta ti baleke.
MAMBU YA KUYINDULULA: Kana nge kele nge mosi, keti nge ke sadilaka ntangu yina sambu na kuyindula na mudindu?—1 TIMOTEO 4:15.
MAMBU YA NGE LENDA SALA
TADILA MUTINDU NGE KE SADILAKA BA-APAREYI
Inki mutindu nge lenda sadila ba-apareyi sambu yo sadisa nge na kuyedisa makuki na nge ya kulonguka? Inki mutindu ba-apareyi lenda sala nde nge kuka ve kutula dikebi kaka na kima mosi mpi kulonguka?
MUNSIKU YA BIBLIA: “Tanina mayele mpi mayele ya kuyindula.”—BINGANA 3:21.
Nge Lenda Sepela Mpi Ti
BANGIUFULA YINA BALEKE KE KUDIYULAKA
Inki Mono Lenda Sala Sambu na Kutula Dikebi Kaka na Kima Mosi?
Ba-apareyi lenda kanga nge nzila ya kutula dikebi kaka na kima mosi na mabaku tatu mpi mambu ya nge lenda sala sambu na kutula diaka dikebi mingi kaka na kima mosi.
TELAMA!
Keti Nge Ke Salaka Mingi Kibeni?
Bantu mingi ke kukaka ve kulungisa mukumba na bo na kisalu mpi na nzo. Inki kele na kisina ya diambu yai? Inki beto lenda sala sambu na kulembika yo?
BANGIUFULA YINA BALEKE KE KUDIYULAKA
Keti Kusala Mambu Mingi na Mbala Mosi Kele Mbote?
Keti nge lenda kuka kibeni kusala mambu mingi na mbala mosi mpi kulanda kutudila yo yonso dikebi?
