“Beno Pesa Ntima Na Beno Kikesa”
“Beno Pesa Ntima na Beno Kikesa”
“Beno fweti kanga ntima, sambu na kusala mambu yina ya Nzambi ke zolaka ti na kubaka mambu yina ya yandi me silaka beno.”—BAEBREO 10:36.
1, 2. (a) Nki kuminaka Bakristu mingi na mvu-nkama ya ntete? (b) Sambu na nki yo ke mpasi ve lukwikilu na kulemba?
NA KATI ya bantu yonso ya kusonikaka Biblia, ntumwa Polo muntu kutubilaka lukwikilu kuluta mingi. Yandi tubaka nde bantu mingi lembisaka lukwikilu na bo, bankaka kufwaka lukwikilu na bo. Mu mbandu, Imeneo ti Alesandre “vidisaka lukwikilu na bo.” (1 Timoteo 1:19, 20) Demasi tinaka Polo sambu yandi “zolaka mambu ya nsi-ntoto yai.” (2 Timoteo 4:10) Bankaka “vidisaka lukwikilu” sambu bo vandaka bonso mimpani, bo vandaka lungisa ve mikumba na bo. Bankaka, sambu bo vandaka kudimona bantu ya mayele.—1 Timoteo 5:8; 6:20, 21.
2 Sambu na nki Bakristu yai ya kupakulama vidisaka lukwikilu mutindu yai? Sambu, “Lukwikilu kele kukinga ti kivuvu mambu ya muntu ketula ntima, kumonisa mambu ya kyeleka pwelele ata yau kemonika ve.” (Baebreo 11:1, NW) Beto ketulaka lukwikilu na mambu yina beto lenda mona ve, kansi na mambu yina beto ke na kumona, mfunu ya lukwikilu kevandaka ve. Yo yina, bantu kelutaka kudipesa na kusosa kimvwama ya kemonikaka na meso, kansi sambu na kimvwama ya kimpeve ya kemonikaka ve, bo kekudipesaka ve. (Matayo 19:21, 22) Bima mingi ya kemonikaka, mu mbandu, “bima yina ya nitu na beto ti meso na beto ke monaka nzala na yo,” kelutaka kukusa nitu na beto ya kukonda kukuka, mpi yo lenda lembisa lukwikilu na beto.—1 Yoane 2:16.
3. Lukwikilu ya nki mutindu Mukristu fwete kuna?
3 Kansi, Polo ketuba nde, “muntu yina ke kwisaka na Nzambi yandi fweti kwikila nde Nzambi kele, mpi nde Nzambi ke pesaka matabisi na bantu yina ke sosaka yandi.” Moize vandaka na lukwikilu ya mutindu yina, sambu “meso na yandi vandaka ke tala kaka matabisi yina kele na ntwala.” Mpi, “yandi tulaka kaka ngolo bonso nde yandi ke mona na meso na yandi Nzambi yina ke monikaka ve.” (Baebreo 11:6, 24, 26, 27) Mukristu fwete vanda na lukwikilu ya mutindu yai. Mutindu beto monaka yo na disolo ya kuyitaka, Abrahami pesaka mbandu ya lukwikilu mosi ya mbote.
Mbandu ya Lukwikilu ya Abrahami
4. Nki mutindu lukwikilu ya Abrahami sobaka luzingu na yandi?
4 Abrahami vandaka na Ure ntangu Nzambi silaka yandi nde yandi tabuta nkuna yina tanata lusakumunu na bantu ya makanda yonso. (Kuyantika 12:1-3; Bisalu 7:2, 3) Sambu na lusilu yina, Abrahami lemfukaka na Yehowa, yandi kwendaka na Arani, na nima na Kanana. Kuna, Yehowa silaka nde yandi tapesa ntoto na nkuna ya Abrahami. (Kuyantika 12:7; Nehemia 9:7, 8) Kansi, mambu mingi ya Yehowa silaka Abrahami lunganaka na nima ya lufwa na yandi. Mu mbandu, Abrahami bikaka kuzwa ve ata kitini mosi ya ntoto ya Kanana, katula kaka ntoto ya Makpela. Yandi sumbaka yo mpi kusumba, sambu na kuzikila bamvumbi. (Kuyantika 23:1-20) Ata mpidina, Abrahami vandaka kaka ti lukwikilu na ndinga ya Yehowa. Kuluta dyaka, yandi vandaka kukinga na lukwikilu yonso, “bwala yina ke na banzo ke na fondasio ya mvula na mvula, bwala yina ya Nzambi salaka plan na yo ti ya yandi tungisaka.” (Baebreo 11:10) Lukwikilu ya mutindu yina sadisaka yandi na luzingu na yandi ya mvimba.
5, 6. Nki mutindu lukwikilu ya Abrahami mekamaka sambu na lusilu ya Yehowa pesaka yandi?
5 Beto kemona yo mingimingi na lusilu yina Nzambi pesaka nde nkuna ya Abrahami takuma dikanda mosi ya nene. Sambu yo salama buna, yo lombaka nde Abrahami kubuta, ye yandi kingaka bamvula mingi sambu na kubuta mwana mosi. Beto kezaba ve kana yandi vandaka na bamvula ikwa ntangu yandi waka lusilu ya Nzambi mbala ya ntete. Kansi, ntangu yandi salaka nzyetolo ya nda na kukwenda na Arani, Yehowa vandaka mekabila yandi ntete mwana ve. (Kuyantika 11:30) Yandi salaka bamvula mingi na Arani sambu Biblia ketuba nde yandi zwaka ‘kimvwama mingi na bwala Arani.’ Ntangu yandi katukaka na Arani na kwenda na Kanana, yandi vandaka na bamvula 75, Sara vandaka na yo 65. Kansi, bo vandaka mpi mebutaka kaka ve. (Kuyantika 12:4, 5) Ntangu Sara kumaka na bamvula kiteso ya 75, yandi monaka nde na bamvula yina, yandi lendaka dyaka ve kubutila Abrahami mwana. Ebuna, yandi landaka nsiku mosi ya bo vandaka kusadila na bilumbu yina, yandi bakaka mwana na yandi ya kisalu ya nkento, Agare, yandi pesaka yandi na Abrahami, ye Abrahami butaka mwana-bakala ti yandi. Kansi yina vandaka ve mwana ya bo silaka yandi. Nsukansuka, bo kulaka Agare ti mwana na yandi Ismaele. Ata mpidina, ntangu Abrahami sambaka sambu na Agare ti Ismaele, Yehowa silaka nde yandi tasakumuna Ismaele.—Kuyantika 16:1-4, 10; 17:15, 16, 18-20; 21:8-21.
6 Na ntangu ya Nzambi yandi mosi tulaka, bamvula mingi mpenza katuka ntangu bo waka lusilu ya Nzambi mbala ya ntete, Abrahami ti bamvula 100, mpi Sara ti bamvula 90 butaka mwana-bakala, zina na yandi Izaki. Yo vandaka mpenza kima ya kuyituka! Ntangu bo butaka muntu ya mpa, yo vandaka kibeni bonso nde Nzambi mefutumuna nitu ya “kufwa” ya bantu yai zole ya kununa. (Roma 4:19-21) Bo kingaka bamvula mingi, kansi ntangu lusilu kulunganaka, bo monaka mfunu ya kikalulu ya kukinga.
7. Nki mutindu lukwikilu kesalaka nzila mosi ti kukanga ntima?
7 Mbandu ya Abrahami kemonisa beto nde lukwikilu ke dikambu ya kilumbu mosi ve. Polo monisaka nde lukwikilu kesalaka nzila mosi ti kukanga ntima. Yandi sonikaka nde: “Beno fweti kanga ntima, sambu na kusala mambu yina ya Nzambi ke zolaka ti na kubaka mambu yina ya yandi me silaka beno. . . . Beto kele ve bantu yina ke vutuka na nima, ke vidisa moyo na bo. Beto ke na lukwikilu ebuna beto ke baka moyo ya mvula na mvula.” (Baebreo 10:36-39) Banda ntama, bamingi kekingaka mambu yina ya Nzambi mesilaka. Bankaka mekingaka yo luzingu na bo ya mvimba. Lukwikilu na bo ya ngolo kesadisaka bo. Mpi, bo tazwa lufutu na bo, bonso Abrahami, kana ntangu ya Yehowa tulaka melunga.—Habakuki 2:3.
Beto Widikila Ndinga ya Nzambi
8. Nki mutindu beto kewidikilaka ndinga Nzambi bubu yai, ye sambu na nki yo kekumisaka lukwikilu na beto ngolo?
8 Beto lenda tanga bima iya ya kusadisaka Abrahami na kuvanda na lukwikilu ya ngolo, bima yai lenda sadisa beto mpi. Ntete, yandi ‘kwikilaka nde Nzambi kele,’ yo yina yandi tulaka makutu ntangu Yehowa vandaka kutuba. Yandi vandaka ve bonso Bayuda ya ntangu ya Yeremia, yina vandaka kundima nde Nzambi kele, kansi bo kekwikila ve ndinga na yandi. (Yeremia 44:15-19) Bubu yai, Yehowa ketubaka na beto na nzila ya Biblia, Ndinga na yandi ya kupemama, yina Piere fwanisaka ti “mwinda yina ke pelaka na kisika kele mpimpa, . . . na ntima na beno.” (2 Piere 1:19) Ntangu beto ketangaka Biblia na dikebi yonso, beto “ke longukaka mbote-mbote mambu [to, “beto kedyaka madya,” NW] ya lukwikilu.” (1 Timoteo 4:6; Roma 10:17) Dyaka, na bilumbu yai ya nsuka, “mpika ya kwikama mpi ya mayele” kepesa beto “madya [ya kimpeve] na ntangu ya mbote,” yandi kesonga beto mpi mutindu ya kusadila minsiku ya Biblia ti mutindu ya kubakisa bambikudulu ya Biblia. (Matayo 24:45-47, NW) Kana beto kewidikila ndinga ya Yehowa ntangu yandi ketuba na banzila yai yonso, yo tasadisa beto mingi na kuvanda na lukwikilu ya ngolo.
9. Nki tasalama kana beto kekwikila mpenza kivuvu yina Bakristu ke na yo?
9 Lukwikilu ya Abrahami vandaka kwenda nzila mosi ti kivuvu na yandi. “Na nsadisa ya kivuvu na yandi, yandi kwikilaka nde yandi lendaka kukuma tata ya makanda mingi.” (Roma 4:18, NW) Yai kima ya zole ya lenda sadisa beto. Beto fwete vila ve ata fyoti nde Yehowa ke muntu ya “ke pesaka matabisi na bantu yina ke sosaka yandi.” Ntumwa Polo tubaka nde: “Beto ke sala, beto ke nwana ngolo, sambu beto me tula ntima na beto na Nzambi ya moyo.” (1 Timoteo 4:10) Kana beto kekwikila mpenza kivuvu yina Bakristu ke na yo, mambu yonso ya beto kesala na luzingu na beto tamonisa nde beto kele na lukwikilu, mutindu mosi ti Abrahami.
Kutuba ti Nzambi
10. Nki kisambu takumisa lukwikilu na beto ngolo?
10 Abrahami tubaka ti Nzambi, yo vandaka kima ya tatu ya kumisaka lukwikilu na yandi ngolo. Bubu yai, beto yonso mpi lenda tuba ti Yehowa na kisambu na nzila ya Yezu. (Yoane 14:6; Efezo 6:18) Na ntwala ya kuyula nde, “ntangu Mwana-muntu ta kwisa awa na nsi-ntoto, keti yandi ta kwisa kukuta bantu ti lukwikilu?,” Yezu pesaka ntete kingana mosi sambu na kumonisa mfunu ya kusamba mbala na mbala. (Luka 18:8) Kisambu yina kekumisaka lukwikilu ngolo ke kima ya beto kesalaka ve na kintulumukina, kukonda kuyindula to na zuluzulu. Yo ke kisambu ya muntu keyindulaka mingi. Mu mbandu, kana beto kezo baka badesizio ya mfunu, to beto ke na mpasi, beto fwete sala kisambu ya kekatuka na nsi ya ntima mpenza.—Luka 6:12, 13; 22:41-44.
11. (a) Nki mutindu Abrahami bakaka ngolo ntangu yandi kangudilaka Nzambi ntima na yandi? (b) Nki beto lenda longuka na mbandu ya Abrahami?
11 Ntangu Abrahami bandaka kununa, Yehowa mepesa yandi mpi kaka ve nkuna ya yandi silaka, Abrahami zabisaka Nzambi susi na yandi. Yehowa ndimisaka yandi nde yo tasalama. Nki kulandaka? “Abrami tulaka Mfumu Nzambi ntima, yo yina Mfumu Nzambi ndimaka yandi, yandi bakaka yandi muntu ya mbote.” Na nima, Yehowa pesaka kidimbu na kundimisa yandi mambu yai. (Kuyantika 15:1-18) Kana beto kangudila Yehowa ntima na beto na kisambu, beto ndima mambu ya yandi mendimisaka beto na Ndinga na yandi, Biblia, mpi beto lemfukila yandi na lukwikilu yonso, Yehowa takumisa mpi lukwikilu na beto ngolo.—Matayo 21:22; Yude 20, 21.
12, 13. (a) Nki mutindu Abrahami bakaka lusakumunu ntangu yandi landaka ndinga ya Yehowa? (b) Nki mambu salamaka ya lenda pesa lukwikilu na beto ngolo?
12 Kima ya iya yina pesaka Abrahami lukwikilu ya ngolo kele lusadisu yina Yehowa Nzambi pesaka yandi ntangu yandi vandaka kulanda ndinga ya Nzambi. Ntangu Abrahami kwendaka kubotula Loti na maboko ya bamfumu yina kangaka yandi, Yehowa nungisaka yandi. (Kuyantika 14:16, 20) Ntangu yandi vandaka kuzinga bonso nzenza na ntoto yina Nzambi silaka na kupesa nkuna na yandi, Yehowa kabilaka yandi bima ya kinsuni mingi. (Fwanisa ti Kuyantika 14:21-23.) Yehowa twadisaka mpi nsadi ya Abrahami na kuzwa nkento ya kufwana sambu na Izaki. (Kuyantika 24:10-27) Ee, Yehowa “salaka [Abrahami] mbote na luzingu na yandi yonso.” (Kuyantika 24:1) Yo yina, lukwikilu ya Abrahami kumaka ngolo mpi yandi kunaka kinduku mosi ya ngolo ti Yehowa Nzambi, na mpila nde Yehowa bandaka kubinga yandi nde “nduku na mono.”—Yezaya 41:8; Yakobo 2:23.
13 Keti bubu yai beto lenda vanda na lukwikilu ya ngolo ya mutindu yina? Ee. Kana beto melanda mbandu ya Abrahami, beto meka Yehowa na kulemfukilaka bantuma na yandi, yandi tasakumuna beto mpi, ebuna yo tapesa lukwikilu na beto ngolo. Mu mbandu, kana beto tala Lapolo ya Kisalu ya Mvu 1998, beto tamona nde Nzambi sakumunaka bantu mingi na mutindu ya kuyituka, ntangu bo lemfukaka na ntuma ya kusamuna nsangu ya mbote.—Marko 13:10.
Lapolo ya Lukwikilu Bubu Yai
14. Nki mutindu Yehowa sakumunaka kampagne ya beto salaka ti Bansangu ya Kimfumu No. 35?
14 Na ngonda ya Oktobri 1997, beto salaka kampagne mosi na ntoto ya mvimba ti Bansangu ya Kimfumu No. 35. Kisalu yai nungaka mbote sambu na kikesa ti tiya ya konso Mbangi sadilaka yo. Beto baka mbandu ya Ghana. Kuna bo kabulaka batrakiti yai kiteso ya bamilio 2,5 na bandinga iya. Ebuna, bantu kiteso ya 2000 lombaka na kulonguka Biblia. Na Chipre, Bambangi zole ya vandaka kukabula Bansangu ya Kimfumu, monaka mumpe mosi kelanda bo na nima. Bo balukaka, bo pesaka yandi papie mosi ya Bansangu ya Kimfumu. Yandi vandaka meyita kuzwa yo ntete mpi yandi tubaka nde: “Mono sepelaka mingi na nsangu ya mukanda yai yo yina mono kezo tonda mingi bantu yina kusalaka yo.” Na Danemark, bo kabisaka Bansangu ya Kimfumu milio 1,5 mpi yo butaka mbuma ya mbote. Mwana-nkento mosi ya kesalaka na relations publiques tubaka nde: “Trakiti yango kele ti nsangu mosi ya ketadila konso muntu. Yo ke mpasi ve na kubakisa, yo kepusa bantu na kusala kima, mpi kepesa nzala ya kusosa kuzaba mambu mingi. Kyeleka mpenza, yo kesimba kibeni ntima!”
15. Nki kesonga nde Yehowa sakumunaka kikesa ya beto salaka na kukumina bantu bisika yonso?
15 Na 1998, beto salaka ngolo na kusamuna ve kaka na bantu yina kele na banzo na bo, kansi bisika yonso. Na Côte d’Ivoire bamisionere zole, nkento ti bakala, kotaka na bamaswa 322. Bo kabulaka mikanda 247, bazulunalu 2284, tumikanda 500, ti batrakiti mingi mpenza, yika mpi babande ya video ya bo lendaka kutala nzila nzila na zulu ya masa. Na Canada, Mbangi mosi kwendaka na kisika mosi ya bo ketekaka banima ya bakamio. Munkwa kisika sepelaka mingi, ye mpangi salaka pana bangunga iya na ndambu. Kansi ntangu kibeni ya yandi lutisaka pana ti basumbi na kusamuna nsangu vandaka kaka kiteso ya ngunga mosi. Na nsuka, bo salaka manaka ya kulonguka Biblia na dizere ya mpimpa. Kansi, bilumbu yankaka bo vandaka kuyantika na midi ya mpimpa tii yo mana na dezere ya suka. Yo vandaka manaka mosi ya mpasi, kansi yo butaka mbuma ya mbote. Muntu yina bakaka desizio ya kukanga kisalu konso Lumingu, sambu na kukwenda na balukutakanu. Ntama mingi ve, kumosi ti dibuta na yandi, bo yantikaka kuyela na kimpeve.
16. Nki kesonga nde kamukanda Inki Nzambi Kelombaka ti mukanda Nzayilu kele bisadilu ya ngolo na kisalu ya kusamuna ti kulonga bantu?
16 Kamukanda Inki Nzambi Kelombaka na Beto? ti mukanda Nzayilu ya Kenataka na Luzingu ya Mvula na Mvula ke kaka na kumonisa ngolo na yo na kisalu ya kusamuna. Na Italie, masere mosi ndimaka na kubaka Bansangu ya Kimfumu na kisika ya yandi vandaka kukinga bisi. Kilumbu ya kulandaka, bo natilaka yandi kamukanda Inki Nzambi Kelombaka, yandi bakaka yo. Na nima, konso kilumbu yandi vandaka kulonguka Biblia baminuta 10 to 15 pana na kisika ya kukinga bisi. Na nima ya ngonda mosi ti ndambu, yandi katukaka kwa yandi na kuvan, yandi vutukaka na bwala na bo na Guatemala, sambu na kulanda kulonguka na yandi ya Biblia. Na Malawi, mundimi ya kikesa ya dibundu mosi, zina na yandi Lobina, sepelaka ve ata fyoti ntangu bana na yandi ya bankento bandaka kulonguka Biblia ti Bambangi ya Yehowa. Kansi, bana vandaka kesonga mama na bo bakyeleka ya Biblia kana bo mezwa mpila. Na Yuni 1997, Lobina monaka mukanda Nzayilu, ye yandi sepelaka mingi na bangogo ya ketuba nde, “Nzayilu ya Kenataka.” Na Yuli, yandi ndimaka na kulonguka Biblia. Na Augusti, yandi kwendaka na lukutakanu ya distrike mpi yandi landaka malongi yonso mbote. Na nsuka ya ngonda yina, yandi katukaka na dibundu na yandi mpi yandi kumaka nsamuni ya kukonda kubotama. Na Novembri 1997, yandi botamaka.
17, 18. Nki mutindu babande ya video ya la Société sadisaka bantu na “kumona” mambu ya kimpeve?
17 Babande ya video ya la Société sadisaka bantu mingi na “kumona” mambu ya kimpeve. Na kisanga ya Maurice, muntu mosi basikaka na dibundu na yandi sambu yo vandaka ti nkabisa mingi na kati. Misionere mosi songaka yandi bumosi ya Bambangi ya Yehowa na nzila ya bande yai: Unis grâce à l’enseignement divin. Yandi yitukaka mpi tubaka nde: “Beno Bambangi ya Yehowa, beno kele dezia na Paladisu!” Yandi ndimaka na kulonguka Biblia. Mpangi mosi ya nkento na Japon songaka bakala na yandi ya mumpani video yai: Les Témoins de Jéhovah : un nom, une organisation. Yo nataka yandi na kundima kulonguka Biblia. Na nima yandi talaka Unis grâce à l’enseignement divin. Yandi monisaka luzolo ya kukuma Mbangi ya Yehowa. Yandi talaka dyaka La Bible : un récit historique exact, des prophéties dignes de foi, bitini yonso tatu. Yo sadisaka yandi na kusadila minsiku ya Biblia na luzingu na yandi. Na nsuka, yandi talaka La fermeté des Témoins de Jéhovah face à la persécution nazie. Yandi monaka nde Yehowa kepesaka bantu na Yandi ngolo ya kunwana ti Satana. Na Oktobri 1997, yandi botamaka.
18 Awa beto metanga kaka ndambu na kati ya masolo mingimingi ya kitoko ya beto monaka na mvula ya kisalu ya meluta. Yo kemonisa nde Bambangi ya Yehowa kele na lukwikilu mosi ya kesala mpi nde Yehowa kele na kukumisa lukwikilu yango ngolo ntangu yandi kesakumunaka kisalu na bo.—Yakobo 2:17.
Kuna Lukwikilu Ntangu Yai
19. (a) Nki mutindu beto ke na mambu ya mbote kuluta Abrahami? (b) Bantu ikwa vukanaka na mvula ya meluta sambu na kusungimina lufwa ya Yezu? (c) Nki bansi vandaka na bantu mingi na Lusungiminu ya mvula meluta? (Tala lapolo na balutiti 26 tii na 29.)
19 Bubu yai beto ke na mambu mingi ya mbote kuluta yina Abrahami vandaka na yo. Beto kezaba nde mambu yonso ya Yehowa silaka Abrahami, yandi lungisaka yo. Bana ya Abrahami bakaka kibeni ntoto ya Kanana, bo kumaka mpi dikanda mosi ya nene. (1 Bantotila 4:20; Baebreo 11:12) Dyaka, bamvula kiteso ya 1971 na nima, banda ntangu ya Abrahami katukaka na Arani, mwana mosi ya dikanda na yandi, Yezu, bakaka mbotika na masa ya Yordani na maboko ya Yoane Mbotiki. Na nima, Yehowa yandi mosi botikaka yandi na mpeve santu, yandi kumaka Mesia, Nkuna ya Abrahami ya mefwana mbote na kimpeve. (Matayo 3:16, 17; Galatia 3:16) Na Nisani 14, ya mvu 33 T.B., Yezu pesaka luzingu na yandi sambu na kusumba bayina tatula lukwikilu na yandi. (Matayo 20:28; Yoane 3:16) Ntangu yai bantu mingi lendaka kudibakila lusakumunu na nzila na yandi. Na mvula ya meluta, bantu 13896312 vukanaka na kilumbu ya Nisani 14, sambu na kusungimina kidimbu yina ya nene ya zola. Kima yai monisaka mpenza kununga ya nene ya Yehowa, Muntu ya Kezitisaka balusilu!
20, 21. Nki mutindu bantu ya makanda yonso kudibakilaka balusakumunu na nzila ya Nkuna ya Abrahami na mvu-nkama ya ntete, ye nki mutindu bo kekudibakila balusakumunu bubu yai?
20 Na mvu-nkama ya ntete, bantu mingi ya katukaka na makanda yonso, banda ntete na Izraele ya kinsuni, tulaka lukwikilu na Nkuna yai ya Abrahami, mpi bo kumaka bana ya kupakulama ya Nzambi, bantu ya Israele mosi ya mpa, ya kimpeve, “Israele ya Nzambi.” (Galatia 3:26-29; 6:16; Bisalu 3:25, 26) Bo bandaka kukinga na ntima mosi nde bo ta zinga na zulu bonso bigangwa ya kimpeve ya lenda fwa ve, bo tayala ti Yezu na Kimfumu ya Nzambi. Lusakumunu yai vandaka kaka sambu na bantu 144 000, bubu ndambu na kati na bau kele dyaka na ntoto. (Kusonga 5:9, 10; 7:4) Na mvula ya meluta, bantu 8756 songaka kundima na bo nde bo metangama na ntalu yai, ntangu bo kudyaka mampa ti vinu na ntangu ya Lusungiminu.
21 Kansi, Bambangi yonso ya mebikala kele bantu ya “kibuka ya nene,” yina bo tubilaka na mbikudulu na Kusonga 7:9-17. Sambu bo kekudibakila lusakumunu na nzila ya Yezu, bo ke ti kivuvu ya kuzinga mvula na mvula na paladisu ya ntoto. (Kusonga 21:3-5) Ntalu ya bantu 5 888 650 yina kusalaka kisalu ya kusamuna na mvula ya meluta kesonga nde kibuka yai kele mpenza ya “nene.” Yo vandaka kyese mingi na kumona nde Russie mekuma ti bansamuni kuluta 10 0000, Ukraine mpi. Lapolo ya ngonda Augusti na États-Unis vandaka na bansamuni 1 040 283, ntalu mosi ya keyitukisa. Yai mbandu ya bansi tatu, na kati ya bansi 19, yina kumaka ti bansamuni kuluta 10 0000 na mvula meluta.
Kivuvu ya Talungana Ntama Mingi Ve
22, 23. (a) Sambu na nki beto fwete vanda ti kikesa mingi na ntima bubu yai? (b) Nki mutindu beto lenda monisa nde beto kele bonso Abrahami, kansi beto kele ve bonso bantu ya kukonda lukwikilu ya Polo tubilaka?
22 Mitubi yibusaka bayina yonso ya vandaka na Lusungiminu nde, balusilu ya Yehowa mingi mpenza ke na kulungana. Na 1914, Nzambi tulaka Yezu Mfumu ya Kimfumu na yandi ya zulu, yandi yantikaka kuvanda na kiyeka na yandi ya Kimfumu. (Matayo 24:3; Kusonga 11:15) Ee, ntangu yai Nkuna ya Abrahami ke na kuyala na zulu! Yakobo songaka Bakristu ya bilumbu na yandi nde: “Beno kanga ntima; beno vanda na kikesa mingi, sambu kilumbu ya Mfumu Yesu ta kwisa me kuma pene-pene.” (Yakobo 5:8) Ee, ntangu yai yandi kele dezia na Kimfumu! Bikuma yai yonso kepusa beto mpenza na kupesa ntima na beto kikesa!
23 Bika nde beto longuka Biblia ntangu yonso mpi beto sala bisambu ya mbote sambu kikalulu na beto ya kutula ntima na balusilu ya Nzambi kuvanda ya mpa ntangu yonso. Bika beto yambula ve kubaka balusakumunu ya Yehowa na kulemfukaka na Ndinga na yandi. Pana beto tavanda bonso Abrahami, beto tavanda ve bonso bayina Polo tubilaka nde bo lembisaka mpi bo fwaka lukwikilu na bo. Kima mosi ve takabisa beto ti lukwikilu na beto ya kuluta santu. (Yude 20) Beto kesamba nde yo vanda mutindu yai sambu na bansadi ya Yehowa yonso, na mvula ya kisalu yai 1999, tii na ntangu ya kukonda nsuka.
Keti Nge Zaba?
◻ Nki mutindu beto lenda widikila ndinga ya Nzambi bubu yai?
◻ Nki mambote beto kebakaka na kusamba bisambu ya mbote?
◻ Kana beto melemfuka na kulanda ndinga ya Yehowa ketuba, nki mutindu lukwikilu na beto takuma ngolo?
◻ Nki mambu mesepelisa nge mingi na lapolo ya mvu ya meluta (lutiti 26 tii na lutiti 29).
[Bangiufula ya disolo ya kulonguka]
[Tablo ya kele na lutiti 26-29]
LAPOLO YA BAMBANGI YA YEHOWA YA INZA YA MVIMBA YA MVULA YA KISALU 1998
[Kifwanisu ya kele na lutiti 24]
Kana beto kewidikila Ndinga ya Yehowa, kikalulu na beto ya kutula ntima na balusilu na yandi tabikala ya mpa ntangu yonso
[Kifwanisu ya kele na lutiti 31]
Kisalu ya kusamuna kekumisaka lukwikilu na beto ngolo